Rí naʼni maxmiéjunlú naku̱mu̱u̱ náa xuyulú índo̱ naraʼnuu mbá rí gakhi̱i̱ wéñuʼ. Ngañúlú naʼni rí náa xuyulú marigá hormonas. Rígi̱ naʼni maki̱xi̱i̱ nacha̱ a̱jkiu̱lú, mañajunʼ itháan nacha̱ eʼdi ga̱jma̱a̱ rí mañajunʼ o xáñajunʼ májánʼ xti̱tiu̱lú, ga̱jma̱a̱ naʼni xa̱ʼ xuyulúʼ. Ikháanʼ asndu tséʼyáá, mú xuyulú xtáa má xawii mu maraʼnuu rígi̱. Índo̱ nánguá exmiéjunlú, naniñuʼ raxtáa xawii ga̱jma̱a̱ natanga̱a̱ xó má kaʼnii.

Gamiéjunʼ naku̱mu̱u̱ náa xuyulú rí nambáyulú mu muraʼníí rí gakhi̱i̱ ga̱jma̱a̱ rí gamíi. Xúgíʼ nagi̱ʼdu̱u̱ náa ngáñulu. Gamiéjunʼ rí májánʼ naʼni mu̱ʼni̱ mbá nacha̱. Ma̱ngaa á mu naxmiéjunlú mambáyulú mu̱ʼni̱ rí nandulú o rí maʼngulú, xóo índo̱ mu̱ʼni̱ mbá examen, índo̱ na̱jkua̱ gúnda̱ʼa̱ mbá ñajunʼ o índo̱ nuʼniratamijná mu muʼtsíin.

Á mu naxmiéjunlú wéñuʼ, rígi̱ gáʼni rí xákuwáanʼ májánʼ. Índo̱ xuyulú xtáa má xúʼko̱ xawii magawúúnʼ xuyulú, a̱jkiu̱lú ga̱jma̱a̱ edxu̱lúʼ. Rí xóo ni̱ndxu̱lú ga̱jma̱a̱ rí xóo eʼniu̱u̱n eʼwíinʼ mani̱ndxu̱u̱ mixtiʼkhu. Rí maxmiéjunlú má xúʼko̱ maʼga̱ kaguáanʼ majmulú tikhuu drogas o mu̱ʼni̱ dí ra̱májánʼ. Asndu maʼni rí makuwáanʼ gíná wéñuʼ, maʼni néʼngulú o rí mundxaʼwamíjná rí itháan májánʼ muraʼdímíjná.

Maski ajndu rí naxmiéjunlú xánindxu̱u̱ ikháá má, ma̱ndoo maʼni rí muguaʼdáá mbaʼa nandii ga̱jma̱a̱ maʼni rí mamínuʼ xuyulú.