Náa griego najuiʼtájuíi ajngáa rúʼko̱ xóo mbá rí májánʼ má xúʼko̱, rí na̱ʼkha̱ náa Biblia. Ma̱ngaa nandoo gáʼthúu̱n mbá rí mitsaan wéñuʼ ga̱jma̱a̱ rí gíʼdoo wéñuʼ numuu.

Cristianos ninimbaníí ajngáa rí niʼthí apóstol Pablo: “Nanduxu munixu xúgíʼ enii rí májánʼ”. Ndiéjunʼ eyoo gáʼthúu̱n ajngáa rígi̱ rá.

Mbaʼin xa̱bu̱ numbaaʼ nuyaximi̱jna̱ náa niwanʼ nákha xóó tsegájnun náa guʼwún. Náa numuu rá. Numuu rí nandún makujmiin májánʼ. Mú rígá imbo̱ʼ rí gíʼdoo itháan numuu ki xóo rí mataxtígúu májánʼ edxa̱ʼ o mataguʼwáanʼ májánʼ xtíñaaʼ. Rí xóo xa̱bu̱ ni̱ndxu̱lú rí awúu̱n ma̱ndoo maʼni makujmáanʼ májánʼ o na̱nguá.

Náa Biblia naʼthí kaʼwu rí nuʼni dí ra̱májánʼ. Náa Génesis 8:21 naʼthí: “Numuu rí asndu nákha majkhinʼ xa̱bu̱ endxaʼwamíjna̱ muni̱ dí raʼkhí”. Á mu nandulúʼ manindxu̱lúʼ xa̱bu̱ jmbii, ndaʼyóoʼ muʼnimi̱jna̱ muʼni dí májánʼ. Apóstol Pablo niʼthí ga̱jma̱a̱ numuu rí ikhaa ndayóoʼ maʼni rí májánʼ: “Phú naniguʼ xtángoo ndrígóo Dios xó má xa̱bu̱ ni̱ndxu̱ʼ rí awúu̱n. Mú nda̱yo̱o̱ náa ikhúúnʼ i̱mba̱ xtángoo rí naxmínaʼ ga̱jma̱a̱ xtángoo dí rígá náa edxu̱ʼ rí na̱jkha̱ kañún náa xtángoo ndrígóo aʼkhá dí rígá náa ikhúúnʼ” (Romanos 7:22, 23).

Mbá xkri̱da, índo̱ naguáʼniilú mbá rí naʼni muʼnilú dí raʼkhí, tséyóoʼ má muʼnilú, numuu rí ikháanʼ má eraʼwíí ndiéjunʼ rí muʼni. Na̱nguá ni̱ndxu̱lú ñumbáá ndrígóo dí raʼkhí; ikháanʼ má kaʼyulúʼ muraʼwíí muʼni dí májánʼ o dí ra̱májánʼ. Índo̱ nuʼni gaʼduunʼ mbá dí ra̱májánʼ, nuraʼwíí manindxu̱lúʼ xa̱bu̱ jmbii náa numbaaʼ rígi̱.

Rí matani rí jmbu ndayóoʼ maʼni káxi̱ a̱jkia̱nʼ náa rí májánʼ. Mú mbaʼin xa̱bu̱ nduyáá rí itháan gíʼdoo numuu makujmiin májánʼ náa inún eʼwíínʼ xa̱bu̱ ki xóo muni rí májánʼ. Ikhiin nduyáaʼ mumbayúmíjná índo̱ nuni mbá dí raʼkhí. Libro The (Honest) Truth About Dishonesty (Rí gajkhun ga̱jma̱a̱ numuu rí minduwaʼ) naʼthí ga̱jma̱a̱ numuu rígi̱: “Nuʼni nduwaʼ má xúʼko̱ mu makujmaa rí ni̱ndxu̱lú xa̱bu̱ jmbii”. Mú, ndiéjunʼ gambáyuluʼ mbuʼyáá á mu májánʼ gáʼni rí matani nduwaʼ rá.

Mbaʼin wéñuʼ xa̱bu̱ náa xúgíʼ numbaaʼ niguánu ndiyáá rí Biblia naxná májánʼ ikha. Náa Ajngá rawunʼ Dios na̱ʼkha̱ mbaʼa rí májánʼ rí tsimbriguíi ga̱jma̱a̱ nimbá (Salmo 19:7). Naxná májánʼ ikha rí mambáñun bi̱ kuwa mbá guʼwíin, náa ñajunʼ, xú kaʼnii xa̱bu̱ gánindxa̱ʼ ma̱ngaa rí mambaxáʼ ga̱jma̱ʼ Dios. Xtágabu rí na̱ʼkha̱ náa Biblia nayambáá má xúʼko̱. Xtángoo ga̱jma̱a̱ ikha ndrígóo mambáñún xúgínʼ bi̱ kuwa náa xuajen mba̱ʼu̱,  xúgíʼ raza ga̱jma̱a̱ náa xuajen ma̱jkha̱ʼ. Á mu nuraxnuu Biblia, nundxaʼwáá e̱dxu̱luʼ rí naʼthí ikhí ga̱jma̱a̱ nuʼnimbánii ikha ndrígóo, majmañulúʼ manindxu̱lúʼ xa̱bu̱ jmbii.

Kuwáanʼ náa numbaaʼ náa nuniulú rí mundrígú ikha dí ra̱májánʼ, raʼkháa i̱ndó ndayóoʼ muniʼnúʼ Biblia mu manindxu̱lúʼ xa̱bu̱ jmbii. Mu maʼngulú muʼni rígi̱ ndayóoʼ munda̱ʼa̱a̱ Dios rí mambáyulúʼ (Filipenses 4:6, 7, 13). Ikhú xámiñulu mu muʼni rí nindxu̱u̱ májánʼ ga̱jma̱a̱ manindxu̱lúʼ xa̱bu̱ jmbii náa xúgíʼ.

Náa timbá artículo niʼthá ga̱jma̱a̱ numuu Hitoshi, ikhaa ndiʼyoo rí nimbáyúu wéñuʼ manindxu̱u̱ xa̱bu̱ jmbii náa nañajunʼ, numuu rí nixnúu ñajunʼ mbáa xa̱bu̱ bi̱ naniguʼ maguma rí jmbu. Hitoshi naʼthúlúʼ: “Xtáá gagi wéñuʼ. Nindoo nixkamaa mbá ñajunʼ náa tséthunʼ mani nduwaʼ”.

Xúʼko̱ má eguáʼnii mbaʼin. Atatsaʼwáminaʼ ga̱jma̱a̱ numuu xkri̱da ndrígu̱ún xa̱bu̱ bi̱ nimbáñun numuu rí ninimbu̱ún ikha ndrígóo Biblia náa naʼthí: “Nanduxu munixu xúgíʼ enii rí májánʼ”.

• Xaxkájkiulú

  “Niniʼñúʼ escuela nákha gúʼdoo 13 tsiguʼ mu “mañajunʼ” gajmíi̱nʼ bi̱ nuni kuʼwáʼ. Rí 95% rí nadaaʼ na̱ʼkha̱ náa ñajunʼ dí ra̱májánʼ. Nda̱wa̱á ninujúnʼ, ajmbioʼ ga̱jma̱a̱ ikhúúnʼ nigíʼdi̱i̱xu ninigajmaaxu Biblia gajmiúxu bi̱ nutaraʼa numuu Jeobá. Nijmañuxu rí Jeobá * naguiyuʼ kaʼyoo dí matani kuʼwáʼ, ikha jngó nitaxu rí muriʼkuííxu xóo kuwáanʼxu (Proverbios 6:16-19). Nákha tsiguʼ 1990 nijngúxu iyááʼ ga̱jma̱a̱ nini̱ndxu̱xu̱ xa̱bi̱i̱ Jeobá”.

  “Nákha ginii, náa goʼwóoʼ rígá mbaʼa rí nini kuʼwáʼ, mu xúgi̱ nánguá. Xúgi̱ rí nani rí jmbu, xtáá tsímáá. Índo̱ narmáʼáan a̱jkiu̱nʼ tsiguʼ rí niʼni kuʼwáʼ, naxna̱a̱ núma̱aʼ Jeobá numuu rí niʼni mba̱a̱ a̱jkiu̱nʼ kaʼyoʼ. Nda̱a̱ imbo̱ʼ rí itháan májánʼ rí maʼgáaʼ gígú tsímáá numuu rí Jeobá xtáa gagi ga̱jma̱á ni̱ndxu̱ʼ” (Cheryl, náa Irlanda).

  “Índo̱ jefe ndrígóʼ niʼdxuun rí tagruígú mbújkha̱a̱ dí rakáʼyóʼ, ikhaa niʼthúu̱n “Dios ndrígáʼ niʼni rí manindxa̱ʼ mbáa xa̱bu̱ májánʼ. Ra̱ʼkhá tháán májánʼ nindxu̱u̱ rí matiejunʼ náa empresa rígi̱”. Rí matani rí jmbu naʼni rí xaxkájkianʼ náa Jeobá. Ma̱ngaa nandoo nambáñun bi̱ kúwi̱i̱n náa goʼwóoʼ ma̱ngaa eʼwíínʼ mu muni xúʼko̱ kaʼnii” (Sonny, náa Hong Kong).

• Tsímáá

  “Ni̱ndxu̱ʼ mbáa asistente ejecutivo náa mbá banco dí nañajunʼ náa xúgíʼ numbaaʼ. Náa ñajunʼ rígi̱ mbaʼin nuni nduwaʼ mú makhánun itháan mbújkha̱a̱. Xúgínʼ nundxa̱ʼwa̱míjna̱: “Nda̱a̱ má dí raʼkhí matani nduwaʼ mu makhánaʼ itháan mbújkha̱a̱ ga̱jma̱a̱ xúʼko̱ maraʼdáá itháan”. Mú dí mani rí jmbu naʼni maxtáá tsímáá. Asndu ndiéjunʼ má dí garígá ikhúúnʼ maniminaʼ má xúʼko̱ mani rí jmbu. Jefes ndrígóʼ nduyáá rí xáni nduwaʼ ga̱jma̱a̱ numún ikhiin, ní má xáni nduwiinʼ ikhiin” (Tom, náa Estados Unidos).

• Gamajkhu

  “Bi̱ kayá edxu̱u̱ náa nañajunʼ nindo̱ʼo̱ʼ rí mani nduwaʼ ga̱jma̱a̱ numuu rí nindáti̱ga̱, mú ikhúúnʼ taʼndoʼ. Índo̱ ndiyáá tsíin nini kuʼwáʼ, xa̱bu̱ bi̱ kaʼyoo empresa náa nañajunʼ nixnáʼ núma̱aʼ numuu rí nitha dí gajkhun. Mu manindxa̱ʼ xa̱bu̱ jmbii náa numbaaʼ rígi̱ ndayóoʼ dí xámiñaʼ. Mú nda̱wa̱á, eʼwíínʼ nakumu̱ún kuyaaʼ itháan ga̱jma̱a̱ nduyamajkuaʼ” (Kaori, náa Japón).

Ri̱ manindxa̱ʼ xa̱bu̱ jmbii nañambá mu xaxkájkianʼ, maraxtaa tsímáá ga̱jma̱a̱ mbuyamajkuaʼ. Lá ra̱ʼkhá xúʼko̱ tayáá mangáán ráʼ.