1, 2. a) Ndiéjunʼ eyoo gáʼthúu̱n ma̱ngaa regalo kiejunʼ rí Dios nixnúlú rá. b) Xú káʼnii graxe̱ gúriʼña̱a̱ náa artículo rígi̱ rá.

 JEOBÁ nandoo kaʼyulúʼ wéñuʼ rí nikuʼmaa A̱ʼdióo Jesucristo bi̱ nandoo kaʼyoo náa tsu̱du̱u̱ Ku̱ba̱ʼ mu makhañúu ga̱jma̱a̱ numulúʼ (Juan 3:16; 1 Juan 4:9, 10). Rígi̱ nindxu̱u̱ mbóo regalo rí itháan mba̱a̱ rí nindrígúlú ikháanʼ. Ikha jngó apóstol Pablo niʼthí rí “numuu rí nimínáanʼ mbá rí nda̱a̱ ajngáa muʼthá xú káʼnii nindxu̱u̱” (2 Cor. 9:15). Ndiéjunʼ nindoo gáʼthi Pablo ga̱jma̱a̱ ajngáa rígi̱ rá.

² Pablo ndiʼyoo rí ga̱jma̱a̱ numuu rí nikháñu Jesús naʼni mambanúu gajkhun rí Dios nikudaminaʼ maʼni (atraxnuu 2 Corintios 1:20). * Rígi̱ nandoo gáʼthúu̱n rí nimínáanʼ Dios “mbá rí nda̱a̱ ajngáa muʼthá xú káʼnii nindxu̱u̱” ga̱jma̱a̱ rí nixnáximinaʼ Jesús, ga̱jma̱a̱ xúgíʼ ngajua ma̱ngaa xúgíʼ rí májánʼ rí Dios naxnúlú. Regalo rígi̱ nindxu̱u̱ ra̱ʼkhá tháán májánʼ rí asndu nda̱a̱ ajngáa  muʼthá xóo nindxu̱u̱. Xú káʼnii gíʼmaa makumulúʼ ga̱jma̱a̱ regalo kiejunʼ rígi̱ rá. Ga̱jma̱a̱ ndiéjunʼ gándoo gúʼni xúgi̱ rí na̱ʼkha̱ rajngiyuu Conmemoración rí xú nikháñu Cristo rá. Tsiguʼ rígi̱ muʼniriyaʼ mbiʼi miercoles 23 ñajunʼ gu̱nʼ marzo.

3, 4. a) Xú káʼnii kumulú índo̱ mbáa naxnúlú mbá regalo rá. b) Xú káʼnii gándoo gáriʼkhu̱u̱ xóo kuwáanʼ mbá regalo rá.

³ Xúgíʼ regalo naʼniulú makuwa gagi. Mú tikhuu nindxu̱u̱ kiejunʼ wéñuʼ rí asndu ma̱ndoo mariʼkhu̱u̱ xóo kuwáanʼ. Gúʼgíʼ mbá xkri̱da. Atatsaʼwáminaʼ rí ikháánʼ nitani̱ mbá dí ra̱májánʼ ga̱jma̱a̱ nuthi rí gíʼmaa makhañáaʼ. Mú mbá nacha̱ mbáa xa̱bu̱ bi̱ tsítatsiʼniiʼ naxnáximinaʼ makhañúu ga̱jma̱a̱ numaʼ. Xú káʼnii gákumaʼ rá.

⁴ Mbáa matriʼkhu̱u̱ tikhuu xóo xtaa. Ga̱jma̱a̱ mbáa maʼnda̱ʼ xtañún itháan eʼwíínʼ ga̱jma̱a̱ maraxnu̱u̱n rí xtaʼdáá ma̱ngaa matani mba̱a̱ a̱jkia̱nʼ xtañún bi̱ niniaʼ dí ra̱májánʼ. Mbáa ikháánʼ matasnga̱jmá xúgíʼ mbiʼi rí gáraxtaa rí naraxnáa núma̱aʼ rí niʼni xa̱bu̱ bi̱ tsítatsiʼniiʼ.

5. Náa numuu rí ma̱ndoo muʼthá rí Dios nixnúlú regalo rí itháan mba̱a̱ rá.

⁵ Regalo rí Dios nixnúlú nindxu̱u̱ itháan mba̱a̱ ki xóo xkri̱da rí niʼthá nángíi (1 Ped. 3:18). Ikháanʼ xúgiáanʼ ni̱ndxu̱lú xa̱bu̱ aʼkhá, xúgiáanʼ kaʼyulúʼ makhañúlúʼ (Rom. 5:12). Mú Dios nandoo kaʼyulúʼ wéñuʼ rí nikuʼmaa A̱ʼdióo mu makhañúu ga̱jma̱a̱ numulúʼ (Heb. 2:9). Rí xúgi̱ tsigijñaʼ ndrígóo Cristo maʼni itháan. Maʼni gámbáa rí nakháñulú kámuu mbiʼi (Is. 25:7, 8; 1 Cor. 15:22, 26). Xúgínʼ bi̱ gaguaʼdáá fe náa Jesús makuwá tsímáá ga̱jma̱a̱ gagi kámuu mbiʼi, tikhun magúun mekhuíí gajmiún Cristo ga̱jma̱a̱ eʼwíínʼ makuwa náa tsu̱du̱u̱ Ku̱ba̱ʼ (Rom. 6:23; Rev. 5:9, 10). Mú regalo rí nixnúlú Dios gíʼdoo i̱ʼwáʼ rí májánʼ.

6. a) Ndiéjunʼ rí májánʼ xtaʼti̱i̱n ikháánʼ makánaʼ nda̱wa̱á rá. b) Xú káʼnii gándoo gusngájma rí nuxnáa núma̱aʼ rí Dios nindoo kaʼyulúʼ rá.

⁶ Ndiéjunʼ i̱ʼwáʼ rí májánʼ e̱ʼkha̱ náa regalo rí nixnúlú Dios rá. Ku̱ba̱ʼ maʼni̱i̱ mitsaan, maʼni̱i̱ a̱jkiu̱ún bi̱ guáʼdáá nandii ga̱jma̱a̱ bi̱ nikháñun matuxi̱ín (Is. 33:24; 35:5, 6; Juan 5:28, 29). Nandulúʼ kuʼyáá wéñuʼ Jeobá ga̱jma̱a̱ Jesús ga̱jma̱a̱ numuu regalo rígi̱ dí ra̱ʼkhá tháán mitsaan. Xú káʼnii gándoo gusngajmá rí nuxnáa núma̱aʼ ráʼ. Timbá, rí mbuʼyaridáá Cristo. Raga̱jma̱, rí maʼndulú kuʼñúún a̱ngiu̱lú. Ga̱jma̱a̱ ragajtsú, muʼni mba̱a̱ a̱jkiu̱lú kuʼñúún eʼwíínʼ.

7, 8. a) Á mu nuxnáa núma̱aʼ rí Jesús nindoo kaʼyulúʼ, ndiéjunʼ gakumulú rá. b) Ndiéjunʼ gíʼmaa muʼni á mu nuxnáalú núma̱aʼ rí Jesús nandoo kaʼyulúʼ rá.

⁷ Timbá, rí Dios nandoo kaʼyulúʼ gíʼmaa maxkaxáanʼ makuwaanʼ mu mbuʼyamajkuíí Jesús. Apóstol Pablo niʼthí: “Numuu rí Cristo nandoo kaʼyulú ikha jngó gíʼmáanʼ náa ikhaa” (atraxnuu 2 Corintios 5:14, 15). * Pablo ndiʼyoo á mu rí nuxná numaʼ rí Jesús nindoo kaʼyulúʼ, maxkaxáanʼ rí maʼndulú kuʼyáá ga̱jma̱a̱ rí mbuyamajkuíí. Índo̱ nakru̱ʼu̱lú májánʼ rí Jeobá niʼni ga̱jma̱á ni̱ndxu̱lú, mbuʼyáá májánʼ á mu xóo kuwáanʼ xtáa raʼyamajkhuu Jesús. Xú káʼnii eʼni rígi̱ rá.

⁸ Gíʼmaa mbuʼyaridáá xkri̱da ndrígóo Cristo ga̱jma̱a̱ tsumáá wéñuʼ (1 Ped. 2:21; 1 Juan 2:6). Índo̱ nuʼnimbulúʼ kuʼyáá Dios ga̱jma̱a̱ Cristo, nusngájma rí nandulúʼ kuʼñúún. Jesús niʼthí: “Tsi guidaʼ idxu ri natañajunloʼ, jame naʼnembanu, tsuʼkue tsi naʼne akuin-jaʼyeʼ, xoma tsi naʼne akuin-jaʼyeʼ,  maʼne akuin Tateʼ-jaʼyo, maʼne akuinʼ-jayo mangun, jame masjngajmaminaʼloʼ naʼ ika” (Juan 14:21; 1 Juan 5:3).

9. Ndiéjunʼ rí eraʼníí xúgiáanʼ rá.

⁹ Xúgi̱ rí najngiyuu Conmemoración gíʼmaa mundxaʼwamíjna̱ ndiéjunʼ rí kuwáanʼ ruʼni (atayáá kúgumaʼá “Ndiéjunʼ eyoo gáʼthúu̱n”). Guraximíjna̱: “Náa rí xtáá má rayarídoo Jesús rá. Lá rígá rí xóó rí ndayóoʼ mariʼkuminaʼ ráʼ.” Gíʼdoo numuu rí muraximíjna̱ rígi̱, numuu rí numbaaʼ naʼniulú muʼni rí kuwa runi xúgínʼ xa̱bu̱ (Rom. 12:2). Á mu tsiñewumíjnalú, mbáa asndu mbuʼyaridáá rí kuwa runi bi̱ nduyáá wéñuʼ, bi̱ najmaʼnunʼ ga̱jma̱a̱ bi̱ naʼngu̱u̱n nudaʼ náa gitsíin (Col. 2:8; 1 Juan 2:15-17). Xú káʼnii gándoo guʼni gaʼduunʼ rígi̱ rá.

10. a) Ndiéjunʼ graxe̱ gíʼmaa muʼni xúgi̱ rí na̱ʼkha̱ rajngiyuu Conmemoración rá. b) Lá rígá rí xóó ndayóoʼ muriʼkhumijná ráʼ. (Atayáá timbá xtiʼkhu.)

¹⁰ Rí inuu má marigá Conmemoración májánʼ gáʼni rí mbuʼyáá xú káʼnii nindxu̱u̱ xtíñúlúʼ, ajmúú, películas, teléfono celular, computadora o tableta. Guraximíjna̱: “Lá matiyuʼ á mu Jesús gáʼyoo xú káʼnii xtíin eʼgíiʼ ráʼ.” (Atraxnuu 1 Timoteo 2:9, 10.) * “Lá nasngájma xtíin rí naʼgíiʼ rí ndayarídoo Cristo ráʼ. Lá maniguuʼ Jesús películas rí nda̱yo̱o̱ ga̱jma̱a̱ ajmúú rí nadxun ráʼ. Lá maxnatíʼñuu Jesús teléfono celular o tableta ráʼ. Lá masngajmúu videojuegos ga̱jma̱a̱ mathu̱u̱n náa numuu rí naniguʼ xáʼ.” Á mu nandulúʼ kuʼyáá Jeobá, gíʼmaa muʼdaʼ xúgíʼ rí nindxu̱u̱ ra̱májánʼ náa mbáa cristiano, maski ajndu maʼniulú mingíjyúuʼ (Hech. 19:19, 20). Índo̱ nuxnaxímijná náa Jeobá, nixnaxímijná muʼni ñajunʼ Cristo. Ikha jngó ragíʼmaa muguaʼdáá nimbá rí maʼniulú mingíjyúuʼ mbuʼyaridáá Jesús (Mat. 5:29, 30; Filip. 4:8).

11. a) Ndiéjunʼ gándoo gúʼni itháan á mu nandulúʼ kuʼyáá Jeobá ga̱jma̱a̱ Jesús rá. b) Ndiéjunʼ gándoo gúʼni ga̱jma̱a̱ numún eʼwíínʼ náa congregación rá.

¹¹ Rígá imbo̱o̱ rí ma̱ndoo muʼni á mu nandulúʼ kuʼyáá Jeobá ga̱jma̱a̱ Jesús, nindxu̱u̱ rí muʼtáraʼa ga̱jma̱a̱ muʼsngúún eʼwíínʼ ga̱jma̱a̱ gagi (Mat. 28:19, 20; Luc. 4:43). Rí inuu marigá Conmemoración, lá ma̱ndoo muriyaʼ awan mu manindxu̱lúʼ precursores auxiliares ga̱jma̱a̱ muʼtáraʼa 30 o 50 horas ráʼ. Atatsaʼwáminaʼ náa mbáa ndxájulú bi̱ nikháñu a̱ʼgiu̱u̱ bi̱ gíʼdoo 84 tsiguʼ. Ikhaa nikumu̱u̱ rí xándoo mani̱ndxu̱u̱ precursor auxiliar numuu rí nikhi̱i̱ ga̱jma̱a̱ naʼniuu nandii. Mú precursor bi̱ kuwa mijngii nimbayíí mu magún ku̱ya̱a̱ ga̱jma̱a̱ ndiyáaʼ mbá territorio náa ma̱ndoo maʼtáraʼa. Ga̱jma̱a̱ numuu rígi̱ nindoo niʼtáraʼa 30 horas rí mbá gu̱nʼ. Lá ma̱ndoo mumbayíí mbáa ndxájulú náa congregación mu mani̱ndxu̱u̱ precursor gu̱nʼ marzo o abril ráʼ. Maski ajndu, raʼkháa xúgiáanʼ ma̱ndoo manindxu̱lúʼ precursor. Mú ma̱ndoo majmulúʼ mbiʼi ga̱jma̱a̱ tsiakii ndrígúlú mu muʼni itháan ñajunʼ Jeobá. Á mu nuʼni musngajmá rí nuxnáa núma̱aʼ rí nandoo kaʼyulúʼ Cristo xó má niʼni apóstol Pablo. Ndiéjunʼ gándoo guʼni itháan mu musngajmá rí nuxnáa núma̱aʼ rí Dios nandoo kaʼyulúʼ rá.

12. Ndiéjunʼ exkaxáanʼ muʼni rí Dios nandoo kaʼyulúʼ rá.

¹² Rí maʼni raga̱jma̱, rí nandoo kaʼyulúʼ Dios gíʼmaa maxkaxáanʼ maʼndulú kuʼñúún a̱ngiu̱lú. Apóstol Juan niʼnirámáʼ: “Á mu Dios nindoo kaʼyulúʼ xúʼko̱ kaʼnii, rígi̱ naxkaxáanʼ mangáanʼ maʼndulú kuʼyamijná” (1 Juan 4:7-11). Á mu nandulúʼ rí Dios ma̱ndoo kaʼyulúʼ, gíʼmaa maʼndulú kuʼñúún  a̱ngiu̱lú (1 Juan 3:16). Xú káʼnii gándoo gusngajmún rí nandulúʼ kuʼñúún xá.

13. Xú káʼnii májánʼ xkri̱da niniñuʼ Jesús muʼnilú rá.

¹³ Ga̱jma̱a̱ xkri̱da ndrígóo, Jesús niʼsngúlúʼ xú káʼnii gándoo maʼndulú kuʼñúún eʼwíínʼ. Índo̱ nixtáa náa tsu̱du̱u̱ Ku̱ba̱ʼ, nimbáñun itháan xa̱bu̱ bi̱ niguáʼdáá mbá a̱jkiu̱ún májánʼ. Niʼni thanún xa̱bu̱ bi̱ niʼniún nandii, bi̱ guʼxinʼ, bi̱ tsiyaxi, bi̱ tsedxun ga̱jma̱a̱ bi̱ tsethi (Mat. 11:4, 5). Jesús ninindxu̱u̱ mixtiʼkuii wéñuʼ ki xóo xa̱bu̱ ede̱, numuu rí ikhaa niniguʼ maʼsngúún wéñuʼ xa̱bu̱ bi̱ nindúún majmañún ga̱jma̱a̱ numuu Dios (Juan 7:49). Nindoo kaʼñúún xa̱bu̱ bi̱ gua̱bi̱nʼ ga̱jma̱a̱ niʼniminaʼ mu mambáñun (Mat. 20:28).

14. Ndiéjunʼ gándoo gúʼni mu musngajmá rí nandulúʼ kuʼñúún a̱ngiu̱lú rá.

¹⁴ Gu̱nʼ rí marigá Conmemoración májánʼ rí mundxaʼwamíjna̱ xú káʼnii gándoo gumbaʼñúún a̱ngiu̱lú náa congregación, itháan náa a̱ngiu̱lú guanuu. Lá ma̱ndoo mu̱ʼgua̱lú gúʼñun, mu̱ʼgua̱ kuʼyúlú ganitsu, mumbañún ga̱jma̱a̱ ñajunʼ rí guáʼdáá náa guʼwún, mu̱ʼgua̱ kuʼdiin náa reunión o muʼthúún magún gutaraʼa gajmiúlú xáʼ. (Atraxnuu Lucas 14:12-14.) Rí nandoo kaʼyulúʼ Dios gíʼmaa maxkaxáanʼ maʼndulú kuʼñúún a̱ngiu̱lú.

15. Ndiéjunʼ gíʼmaa makru̱ʼu̱lú xúgiáanʼ rá.

¹⁵ Rí maʼni ajtsú numuu, rí nandoo kaʼyulúʼ Dios gíʼmaa maxkaxáanʼ muʼni mba̱a̱ a̱jkiu̱lú kuʼñúún a̱ngiu̱lú. Xúgiáanʼ kuaʼdáálu aʼkhá ga̱jma̱a̱ rí nakháñulú rí na̱ʼkha̱ náa Adán, ikha jngó nimbáa xándoo maʼthí rí tséyóoʼ tsigijñaʼ ndrígóo Jesús. Asndu xa̱bi̱i̱ bi̱ itháan jmbii ndayóoʼ rígi̱. Xúgiáanʼ gíʼmaa mbuʼyáá rí Dios niʼni mba̱a̱ a̱jkiu̱u̱n kaʼyulúʼ ga̱jma̱a̱ mbá gidxóó mba̱a̱ wéñuʼ. Ndíjkha gíʼdoo wéñuʼ numuu makru̱ʼu̱lú rígi̱ rá. Mbuʼyáá rí naxtiʼña̱a̱ náa mbá xkri̱da rí Jesús niʼthí.

16, 17. Ndiéjunʼ nindoo gáʼsngúlú Jesús ga̱jma̱a̱ xkri̱da ndrígóo rey bi̱ niʼni mba̱a̱ a̱jkiu̱u̱n kaʼyoo mbá gidxóó mba̱a̱ wéñuʼ rá.

¹⁶ Jesús niʼthí mbá historia ndrígóo mbáa ñumbáá bi̱ nigiʼmaa náa inuu rey 60 millones mbújkha̱a̱ plata. Mú rey niʼni mba̱a̱ a̱jkiu̱u̱n kaʼyoo ga̱jma̱a̱ numuu mbújkha̱a̱ rúʼko̱. Nda̱wa̱á, ñumbáá buʼko̱ táʼni mba̱a̱ a̱jkiu̱u̱n kaʼyoo imba̱a̱ ñumbáá bi̱ gíʼmaa 100 mbújkha̱a̱ plata. Á mu ñumbáá nixnáa núma̱aʼ dí rey niʼni mba̱a̱ a̱jkiu̱u̱n kaʼyoo, ikhaa maʼni mba̱a̱ a̱jkiu̱u̱n kaʼyoo imba̱a̱ ñumbáá. Índo̱ Rey niʼdxuun rí niʼni ñumbáá bi̱ ra̱májánʼ, nikiʼnáa me̱ndaʼkho. Ikha jngó rey nindxa̱ʼóo ga̱jma̱a̱ niʼthúu̱n: “Nini mba-ma akuinʼ-jayaʼ numu mba xugui ri guiʼma numu ri niratajañuʼ. ¿An raguiʼma mañahuin akianʼ mangan-xtaya ñumba gajmaʼ xo ri niñahuin akuinʼ-jayaʼ ikun-ra?” (Mat. 18:23-35.) Ndiéjunʼ nindoo maʼsngáa Jesús náa xkri̱da rígi̱ rá. Rí índo̱ Jeobá niʼni mba̱a̱ a̱jkiu̱u̱n kaʼyoo aʼkhá ndrígúlú, niʼni mba̱a̱ a̱jkiu̱u̱n ga̱jma̱a̱ numuu mbá gidxóó mba̱a̱ wéñuʼ. Á mu rí nuxnáa núma̱aʼ, ndiéjunʼ gíʼmaa muʼni rá.

 ¹⁷ Índo̱ kuwáanʼ ruʼniratamijná rí marigá Conmemoración, guraximíjna̱: “Lá xtáa mbáa ndxájulú bi̱ niʼniuʼ dí raʼkhí ráʼ. Lá naʼniuʼ mingíjyúuʼ mani mba̱a̱ a̱jkiu̱nʼ ka̱yo̱o̱ xáʼ.” Á mu xúʼko̱, guʼyaridáá Jeobá ‹bi̱ xtáa xawii mu maʼni mba̱a̱ a̱jkiu̱u̱n kaʼyulúʼ› (Sal. 86:5; Neh. 9:17). Á mu nuxnáa núma̱aʼ Jeobá rí niʼni mba̱a̱ a̱jkiu̱u̱n kaʼyulúʼ, muʼni mba̱a̱ a̱jkiu̱lú kuʼñúún eʼwíínʼ. Á mu nandulúʼ rí Jeobá maʼndoo kaʼyulúʼ ga̱jma̱a̱ maʼni mba̱a̱ a̱jkiu̱u̱n kaʼyulúʼ, gíʼmaa maʼndulú kuʼñúún ga̱jma̱a̱ muʼni mba̱a̱ a̱jkiu̱lú kuʼñúún a̱ngiu̱lú (Mat. 6:14, 15). Gajkhun má rí á mu natani mba̱a̱ a̱jkia̱nʼ tsériʼkhuu rí nirígá, mú mambáyulúʼ makuwáanʼ itháan gagi nda̱wa̱á.

18. Ndiéjunʼ nimbáyúu mbáa ndxájulú mu maraʼnuu rí xú káʼnii nindxu̱u̱ mbáa ndxájulú rá.

¹⁸ Nguáná naʼniulú mingíjyúuʼ maʼngo̱o̱ a̱jkiu̱lú rí nuni a̱ngiu̱lú (atraxnuu Efesios 4:32; * Colosenses 3:13, 14). * Guʼyáá xkri̱da ndrígóo mbáa ndxájulú bi̱ mbiʼyuu Lily.  ^[1] Ikhaa niʼthí mambáyúu mbáa ndxájulú a̱ʼgú xuáʼa̱ bi̱ nigumbiʼyuu Carol. Lily na̱jkha̱ kayáa asndu náa má, nimbáyúu mu maʼga̱ gáʼtsi̱ o nambáyúu ga̱jma̱a̱ i̱ʼwáʼ rí ndayóoʼ. Maski ajndu Lily nimbáyúu wéñuʼ, Carol nixiéʼkha má xúʼko̱ ga̱jma̱a̱ numuu xúgíʼ. Nguáná niʼni mingíjyúuʼ mambaxúu májánʼ ga̱jma̱a̱. Mú Lily niʼni mbá tsiakii mu mandxaʼwáminaʼ i̱ndó rí májánʼ rí naʼni Carol, ga̱jma̱a̱ numuu rúʼko̱ Lily nimbáyúu mba̱yu̱ʼ tsiguʼ, asndu índo̱ Carol nikháñu. Lily naʼthí dí ra̱ʼkhá tháán eyoo mbaʼyoo Carol índo̱ gátuxi̱i̱ mu maniniiʼ índo̱ ganindxu̱u̱ xa̱bu̱ jmbii. Á mu nuxnáa núma̱aʼ ga̱jma̱a̱ numuu rí Dios nandoo kaʼyulúʼ, ikháanʼ mangáanʼ maʼngo̱o̱ a̱jkiu̱lú rí nakiéʼkhun a̱ngiu̱lú. Ma̱ngaa, ngajua rígi̱ nambáyulúʼ muraʼti̱i̱n mbiʼi rí xúgiáanʼ ganindxu̱lú xa̱bu̱ jmbii ga̱jma̱a̱ nánguá muʼni dí raʼkhí.

19. Ndiéjunʼ gúʼni á mu nuxnáa núma̱aʼ rí niʼni Dios ga̱jma̱a̱ numulúʼ rá.

¹⁹ Nduʼyáá rí Jeobá nixnúlú mbá regalo rí mitsaan wéñuʼ. Guʼni rí gu̱nʼ rí gárígá Conmemoración mundxaʼwamíjna̱ náa xúgíʼ rí niʼni Jeobá ga̱jma̱a̱ Jesús náa ikháanʼ. Gusngájma xúgíʼ mbiʼi rí nuxnáa núma̱aʼ. Guʼyaridáá Cristo, gaʼndulúʼ kuʼñúún a̱ngiu̱lú ga̱jma̱a̱ guʼni mba̱a̱ a̱jkiu̱lú kuʼñúún.