Gaguaʼdáá má xúʼko̱ fe gujkhuʼ náa xúgíʼ rí kuaʼti̱i̱n
“Fe nindxu̱u̱ rí nduʼyáá rí marigá ga̱jma̱a̱ kuwaanʼ raguáʼthi̱i̱n” (HEBREOS 11:1).
1, 2. a) Xú káʼnii mixtiʼkhu rí guáʼthi̱i̱n xa̱bi̱i̱ Dios ga̱jma̱a̱ rí guáʼthi̱i̱n eʼwíínʼ rá. b) Ndiéjunʼ gúʼyáá náa artículo rígi̱ rá.
JEOBÁ naʼthúlúʼ maxnúlúʼ rí májánʼ wéñuʼ. Mbá xkri̱da, nakudaminaʼ maʼni kaʼwi̱i̱ mbiʼyuu ga̱jma̱a̱ maʼni rí nandoo náa mekhuíí ga̱jma̱a̱ náa Ku̱ba̱ʼ (Mat. 6:9, 10). Rígi̱ rí itháan gíʼdoo numuu rí kuaʼti̱i̱n. Jeobá ma̱ngaa naʼthúlúʼ rí makuwáanʼ kámuu mbiʼi, tséʼniuu á mu mekhuíí o náa Ku̱ba̱ʼ (Juan 10:16; 2 Ped. 3:13). Ma̱ngaa, bi̱ ni̱ndxu̱lú xa̱bi̱i̱ Dios kuáʼthi̱i̱nlu mbuʼyáá xú káʼnii ikhaa naxnúlú ikha ga̱jma̱a̱ nambáyulúʼ náa iwáá mbiʼi rígi̱.
2 Náa Biblia naʼthí rí fe nindxu̱u̱ “rí nduʼyáá rí marigá” rí kuáʼthi̱i̱nlu (atayáá nota rí na̱ʼkha̱ náa námbá artículo). Rígi̱ nandoo gáʼthúu̱n rí bi̱ kuaʼdáá fe nduʼyáá gajkhun rí mambanúu rí nakudaminaʼ Jeobá (Heb. 11:1). Ma̱ngaa mbaʼin wéñuʼ xa̱bu̱ rí mbiʼi xúgi̱ guáʼthi̱i̱n ga̱jma̱a̱ rígá mbaʼa rí nandún, mú tséyáá á mu gajkhun á mu maʼga̱nú mbá mbiʼi rí muguaʼdáá. Mbá xkri̱da, mbáa xa̱bu̱ nandoo maʼngo̱o̱ náa lotería mú xándoo maʼthí rí maʼngo̱o̱. Náa artículo rígi̱ gúʼyáá xú káʼnii gándoo gáʼni itháan gujkhuʼ fe ndrígúlú náa rí nakudaminaʼ Dios. Ma̱ngaa mbuʼyáá xú káʼnii rí mbiʼi xúgi̱ nambáyulúʼ muguaʼdáá mbá fe gujkhuʼ.
3. Náa numuu rí kuaʼdáá fe rí Dios maʼnimbánuu rí nikudaminaʼ rá.
3 Nimbáa tségumaa ga̱jma̱a̱ fe. Á mu nandulúʼ muguaʼdáá fe, gíʼmáanʼ muniʼñáaʼ rí xi̱ʼ ndrígóo Dios maxnúlúʼ ikha (Gál. 5:22). Xi̱ʼ kaʼwu mambáyulúʼ muniʼnííʼ Jeobá. Índo̱ nakru̱ʼu̱lú rí ikhaa gíʼdoo xúgíʼ tsiakii ga̱jma̱a̱ najmañuu wéñuʼ, nduʼyáá májánʼ rí ikhaa maʼnimbánuu xúgíʼ rí nakudaminaʼ. Jeobá ndaʼyoo májánʼ rí maʼnimbánuu rí nikudaminaʼ rí asndu naʼthí xóo rí nimbánuu má. Ikha jngó ikhaa naʼthí: “¡Ni̱jkha̱nú nirígá!” (atraxnuu Revelación 21:3-6). * Jeobá nindxu̱u̱ mbáa ‹Dios jmbii› numuu rí naʼnimbánuu rí naʼthí. Ikha jngó nuʼnimbulúʼ xúgíʼ rí naʼthí maʼni nda̱wa̱á (Deut. 7:9).
XA̱BI̱I̱ DIOS BI̱ NIKUWA WAJYÚÚʼ NIGUÁʼDÁÁ FE GUJKHUʼ
4. Náa niguáʼdáá fe xa̱bi̱i̱ Dios rá.
4 Náa capítulo 11 ndrígóo Hebreos naʼthí ga̱jma̱a̱ numún 16 xa̱bekha ga̱jma̱a̱ gu̱ʼu̱ bi̱ nikuwa nákha wajyúúʼ rí maguaʼdáá mbá fe gujkhuʼ náa rí nikudaminaʼ Jeobá. Ma̱ngaa naʼthí ga̱jma̱a̱ numún eʼwíínʼ xa̱bi̱i̱ Jeobá bi̱ nini rí niniguʼ ‹ga̱jma̱a̱ numuu fe ndrígu̱ún› (Heb. 11:39). Xúgínʼ ikhiin guáʼthi̱i̱n mbáa bi̱ Jeobá niʼthí maxnáa. Ndiyáá rí bugi̱ maʼni gámbíin xúgínʼ xa̱bu̱ sia̱nʼ náa Dios ga̱jma̱a̱ rí Ku̱ba̱ʼ mata̱nga̱a̱ maʼni̱i̱ mitsaan (Gén. 3:15). Xa̱bi̱i̱ Dios bugi̱ niguáʼdáá wéñuʼ fe rí Jeobá maʼni makuwá mbu̱júu̱ á mu nikháñun. Mú na̱nguá niguáʼti̱i̱n magúun mekhuíí numuu rí Jesús xóó tséʼnimbánuu rí marigá rígi̱ (Gál. 3:16). Ikhiin niguáʼti̱i̱n makuwá kámuu náa Ku̱ba̱ʼ rí maʼni̱i̱ mitsaan wéñuʼ (Sal. 37:11; Is. 26:19; Os. 13:14).
5, 6. a) Ndiéjunʼ nigi̱ʼthu̱u̱n Abrahán ga̱jma̱a̱ bi̱ kuwa náa goʼwóo rá. b) Ndiéjunʼ nini mu maguaʼdáá mbá fe gujkhuʼ rá. (Atayáá timbá xtiʼkhu.)
5 Hebreos 11:13 naʼthí rígi̱ ga̱jma̱a̱ numún xa̱bi̱i̱ Jeobá bi̱ niguájun jmbu: “Náa fe nikháñun xúgínʼ bugi̱, maski ajndu túyáá xú nimbánuu rí nijuiʼthá marigá, mu ndiyáá asndu mitsínguánʼ ga̱jma̱a̱ nindrigú májánʼ”. Xóo muʼthá, niguáʼti̱i̱n numbaaʼ nuxi̱ʼ ga̱jma̱a̱ nundxa̱ʼwa̱míjna̱ rí kuwa má ikhí. Mbáa dí ikhiin ninindxu̱u̱ Abrahán. Jesús niʼthí rí Abrahán nidxuu wéñuʼ ‹numuu rí nigi̱ʼthu̱u̱n mbaʼyoo› mbiʼi rúʼko̱ (Juan 8:56). Sara, Isaac, Jacob ga̱jma̱a̱ mbaʼin niguáʼti̱i̱n mbiʼi rí Reino ndrígóo Dios maʼtáñajunʼ náa tsu̱du̱u̱ Ku̱ba̱ʼ (Heb. 11:8-11).
6 Ndiéjunʼ niʼni Abrahán ga̱jma̱a̱ bi̱ kuwa náa goʼwóo mu muguaʼdáá mbá fe gujkhuʼ rá. Nimbá miʼtsú túniñanʼ rajmañún ga̱jma̱a̱ numuu Jeobá. Nguáná nijmañún náa ángeles, visión ga̱jma̱a̱ xnuʼndaa rí ni̱ʼkha̱ náa Dios. Mbáa ma̱ngaa nijmañún náa xkri̱da ndrígu̱ún xa̱bu̱ guanii bi̱ niguájun jmbu o mbáa náa i̱yi̱i̱ʼ rí nirígá ginii. Abrahán ga̱jma̱a̱ bi̱ kuwa náa goʼwóo tambumún nimbá miʼtsú rí nikudaminaʼ maʼni Dios. Ikhiin ninigu̱nʼ mundxaʼwamíjna̱ ga̱jma̱a̱ numuu rúʼko̱. Ikha jngó ninimbu̱ún rí Jeobá maʼnimbánuu rí nikudaminaʼ. Ma̱ngaa nimbáñun maguajún jmbu náa Dios maski ajndu niraʼníí xkujndu o índo̱ nijuixkúún.
7. Ndiéjunʼ rí nixnúlú Jeobá mu mambáyulúʼ muguaʼdáá mbá fe gujkhuʼ ga̱jma̱a̱ ndiéjunʼ gáʼyóóʼ muʼni rá.
7 Ndiéjunʼ gambáyulú mu muguaʼdáá mbá fe gujkhuʼ rá. Jeobá naxnúlú Biblia. Ikhí naʼsngúlú rí maʼni nda̱wa̱á ga̱jma̱a̱ rí gíʼmaa muʼni mu makuwáanʼ gagi. Ikha jngó májánʼ rí muraxnuu Biblia xúgíʼ mbiʼi ga̱jma̱a̱ muʼnimbulúʼ xtágabu ndrígóo (Sal. 1:1-3; atraxnuu Hechos 17:11). Jeobá ma̱ngaa naxnúlú ‹ganitsu mbiʼi rí ndayóoʼ› mú najmiuu “ñumba tsi jmbi, tsi majan indxaʼhuaminaʼ” (Mat. 24:45). Xó má nini xa̱bi̱i̱ Dios nákha wajyúúʼ, gíʼmáanʼ muraxnuu má xúʼko̱ rí maʼni Dios nda̱wa̱á ga̱jma̱a̱ mundxaʼwamíjna̱ tsumáá numuu rúʼko̱. Rígi̱ gambáyulú mu muguajún jmbu náa Dios ga̱jma̱a̱ muguaʼthi̱i̱n má xúʼko̱ mbiʼi rí Reino ndrígóo maʼtáñajunʼ náa xúgíʼ tsu̱du̱u̱ Ku̱ba̱ʼ.
Índo̱ Jeobá nariʼña̱a̱ rí nuʼtájkáan, fe naʼni itháan gujkhuʼ
8. Xú káʼnii embáyulú rí muʼtájkáan mu muguaʼdáá mbá fe gujkhuʼ rá.
8 Ndiéjunʼ xóó nimbáñun xa̱bi̱i̱ Jeobá nákha wajyúúʼ mu muguaʼdáá mbá fe gujkhuʼ rá. Munda̱ʼa̱a̱ rí Jeobá mambáñun ga̱jma̱a̱ mbuyáá rí ikhaa nariʼña̱a̱ rí nutajkháan (Neh. 1:4, 11; Sal. 34:4, 15, 17; Dan. 9:19-21). Xúʼko̱ má kaʼnii, fe ndrígúlú gáʼni itháan gujkhuʼ índo̱ nunda̱ʼa̱a̱ Jeobá mambáyulúʼ ga̱jma̱a̱ nduʼyáá rí ikhaa naʼdxawunlú ma̱ngaa naxnúlú rí phú ndayúlú índo̱ ndayóoʼ (atraxnuu 1 Juan 5:14, 15). * Gunda̱ʼa̱a̱ má xúʼko̱ Jeobá xi̱ʼ kaʼwu mu ma̱ndoo muguaʼdáá itháan fe (Luc. 11:9, 13).
9. Arathá tikhuu rí ma̱ndoo muʼtájkáan.
9 Índo̱ nuʼtájkáan náa Jeobá, ragíʼmaa muʼni i̱ndó mu munda̱ʼa̱ rí ndayúlú. Ma̱ngaa gíʼmaa muʼni mu muxnáa núma̱aʼ ga̱jma̱a̱ muʼni mba̱a̱ xúgíʼ mbiʼi, numuu rí ikhaa niʼni mbaʼa rí májánʼ wéñuʼ (Sal. 40:5). Ma̱ngaa gíʼmaa muʼtájkáan ga̱jma̱a̱ numún a̱ngiu̱lú náa xúgíʼ tsu̱du̱u̱ numbaaʼ, mbá xkri̱da, xóo bi̱ “kajchún náa guʼwá e̱jua̱nʼ”. Ma̱ngaa gíʼmáanʼ muʼtájkáan ga̱jma̱a̱ numún a̱ngiu̱lú bi̱ kuya̱ edxu̱u̱ náa congregación. Índo̱ nduʼyáá rí Jeobá nariʼña̱a̱ rí nuʼtájkáan nakumulú rí kuwáanʼ itháan mijngii náa ikhaa ga̱jma̱a̱ fe ndrígúlú naʼni itháan gujkhuʼ (Heb. 13:3, 7).
XA̱BI̱I̱ DIOS BI̱ NIGUÁJUN JMBU
10. Náa numuu rí mbaʼin xa̱bi̱i̱ Dios tamíñun ga̱jma̱a̱ niguájun jmbu má xúʼko̱ náa Dios rá.
10 Náa Hebreos capítulo 11, apóstol Pablo niʼthí: “Nikuwa gu̱ʼu̱ bi̱ nindriguíin bi̱ nikháñun numuu rí nigabi̱ín; mú eʼwíínʼ xa̱bekha nijma gíníi numuu rí nini gaʼduunʼ maguma káwíin, mu xúʼko̱ ma̱ndoo makhánun rí magabiín itháan májánʼ” (Heb. 11:35). Mbaʼin xa̱bi̱i̱ Dios niguájun jmbu maski ajndu niraʼníí xkujndu numuu rí niguáʼdáá fe rí magabiín bi̱ nikháñun rí Dios nikudaminaʼ maʼni. Ndiyáá rí Jeobá nda̱wa̱á maʼni gabiín ga̱jma̱a̱ rí makuwá kámuu náa tsu̱du̱u̱ Ku̱ba̱ʼ. Gundxaʼwamíjna̱ rí nigíʼnuu Nabot ga̱jma̱a̱ Zacarías. Nájmi̱i̱n niradíin ga̱jma̱a̱ itsí numuu rí ninimbu̱ún náa Dios (1 Rey. 21:3, 15; 2 Crón. 24:20, 21). Daniel nidama̱ʼa̱a̱n náa iñáʼ rí kajchún i̱ndi̱i̱ʼ bi̱ naxkidxu̱u̱n, ga̱jma̱a̱ ajtsíin bi̱ nambáxu̱u̱ gajmíi̱n nidami̱ʼi̱i̱n náa horno rí nakha. Nindúún makhañún ki xóo rí makiéʼkhun náa Jeobá. Xa̱bekha bugi̱ niguáʼdáá fe rí Jeobá maxnún xi̱ʼ ndrígóo ga̱jma̱a̱ rí mambáñun maʼngu̱u̱n asndu xú káʼnii tsingíná (Dan. 3:16-18, 20, 28; 6:13, 16, 21-23; Heb. 11:33, 34).
Xa̱bi̱i̱ Dios nakuwa jmbu numuu rí guáʼdáá fe rí magabiín bi̱ nikháñun, rí Dios niʼthí maʼni
11. Ndiéjunʼ rí niʼngu̱u̱n niraʼníí tikhun gaʼyee ga̱jma̱a̱ numuu fe ndrígu̱ún rá.
11 Mbaʼin gaʼyee niʼngu̱u̱n rí ninduʼwajmiin o nigún guʼwá e̱jua̱nʼ, xóo Micaya ga̱jma̱a̱ Jeremías. Ga̱jma̱a̱ Elías, mangiin eʼwíínʼ gaʼyee “nigún rajnguʼwún náa ku̱ba̱ʼ mixooʼ ga̱jma̱a̱ náa kúbá ga̱jma̱a̱ náa tsíñu ma̱ngaa náa iñáʼ dí rígá náa ku̱ba̱ʼ”. Xúgínʼ niguájun jmbu maski ajndu niraʼníí tsáʼkhá numuu rí nduyáá “rí marigá” rí gajkhun rí guáʼthi̱i̱n (Heb. 11:1, 36-38; 1 Rey. 18:13; 22:24-27; Jer. 20:1, 2; 28:10, 11; 32:2).
12. Tsáa nindxu̱u̱ bi̱ niniñuʼ itháan májánʼ xkri̱da, ga̱jma̱a̱ káʼnii nimbáyúu maraʼnuu tsáʼkhá rá.
12 Jesucristo niniñuʼ itháan májánʼ xkri̱da. Ikhaa niʼngo̱o̱ niraʼnuu tsáʼkhá rí itháan mingíjyúuʼ ga̱jma̱a̱ ninindxu̱u̱ jmbii náa Jeobá. Ndiéjunʼ nimbáyúu mu maʼngo̱o̱ xá. Pablo niʼthí: “Ga̱jma̱a̱ gagi rí nigiʼdoo niʼngo̱o̱ náa ixi̱, ga̱jma̱a̱ tatiyuʼ, ga̱jma̱a̱ nigi̱ʼi̱ náa ñawun mújúnʼ náa trono ndrígóo Dios” (Heb. 12:2). Ikha jngó Pablo niʼthún cristianos rí mbuyaridáá Jesús (atraxnuu Hebreos 12:3). * Xó má Jesús, mbaʼin cristianos nikháñun numuu rí ninindxu̱ún jmbiin náa Jeobá. Mbáa rí ikhiin ninindxu̱u̱ Antipas (Rev. 2:13). Cristianos bugi̱ niʼngu̱u̱n má nidaʼ, mú eʼwíínʼ xa̱bi̱i̱ Dios bi̱ nikuwa itháan ginii niguáʼti̱i̱n makuwá náa tsu̱du̱u̱ Ku̱ba̱ʼ (Heb. 11:35). Nda̱wa̱á rí Jesús nigíʼdu̱u̱ ninindxu̱u̱ rey nákha tsiguʼ 1914, cristianos bi̱ kaxtaʼwíin bi̱ nikháñun nigabi̱ín mu makuwá mekhuíí ga̱jma̱a̱ ní xakháñun nditháan. Ikhiin mutañajúúnʼ xa̱bu̱ numbaaʼ gajmiún Jesús (Rev. 20:4).
XA̱BI̱I̱ DIOS BI̱ GUÁʼDÁÁ MBÁ FE GUJKHUʼ RÍ MBIʼI XÚGI̱
13, 14. a) Ndiéjunʼ rí nigíʼnuu Rudolf Graichen rá. b) Ndiéjunʼ nimbáyúu mani̱ndxu̱u̱ jmbii náa Jeobá xá.
13 Rí mbiʼi xúgi̱, mbaʼin xa̱bi̱i̱ Jeobá nduyaridáá Jesús. Nundxa̱ʼwa̱míjna̱ ga̱jma̱a̱ numuu rí nikudaminaʼ maʼni Dios ga̱jma̱a̱ naguáju̱n jmbu maski ajndu guáʼdáá xkujndu. Gundxa̱ʼwámi̱jna̱ náa xkridoo Rudolf Graichen, bi̱ nigumaa náa Alemania nákha tsiguʼ 1925. Ikhaa narmáʼáan a̱jkiu̱u̱n rí índo̱ nindxu̱u̱ dxámá, ndiʼyoo náa goʼwóo tikhuu xtiʼkhu rí nagájnuu náa Biblia. Ikhaa niʼthí: “Náa mbá xtiʼkhu kamaa mbáa iña̱ʼ ga̱jma̱a̱ mbáa aʼdá múgú, mbáa aʼdá tsújtúunʼ ga̱jma̱a̱ mbáa i̱ndi̱i̱ʼ mixtíi, aʼdá xédé ga̱jma̱a̱ león: Xúgínʼ kuwa tsímáá ga̱jma̱a̱ mbáa ada̱ chíʼgíʼ xtáa rañewu̱u̱n” (Is. 11:6-9). Rígi̱ nimbáyúu Rudolf mu mandxaʼwáminaʼ itháan náa Ku̱ba̱ʼ mitsaan ga̱jma̱a̱ niʼni itháan gujkhuʼ fe náa rí nikudaminaʼ Dios. Ga̱jma̱a̱ numuu rígi̱ niwi̱ji̱ jmbu náa Jeobá maski ajndu mba̱yu̱ʼ tsiguʼ nini gínáa policía Alemania nazi ga̱jma̱a̱ nda̱wa̱á policía Alemania comunista.
14 Rudolf ndiyóoʼ maʼngo̱o̱ xúgíʼ tsingíná rígi̱. Ru̱dúu̱ nikháñu ga̱jma̱a̱ mbá nandii rí mbiʼyuu tifus náa guʼwá e̱jua̱nʼ nazi. Ga̱jma̱a̱ anu̱u̱ nixnúu firma i̱yi̱i̱ʼ náa naʼthí rí naniñuʼ mani̱ndxu̱u̱ xa̱bi̱i̱ Jeobá. Mú Rudolf nigiʼdoo má xúʼko̱ mbá fe gujkhuʼ. Nda̱wa̱á rí nigájnáa náa guʼwá e̱jua̱nʼ, ninindxu̱u̱ superintendente de circuito. Nda̱wa̱á ni̱jkha̱ Galaad náa nawaʼsngáa ga̱jma̱a̱ nixuʼmaa maʼga̱ náa Chile. Ikhí ninindxu̱u̱ mbu̱júu̱ superintendente de circuito ga̱jma̱a̱ ndiyáa mbáa misionera bi̱ nigumbiʼyuu Patsy. Niguáʼdáá mbáa dxáʼgú, mu nikháñu ada̱ índo̱ niʼni mbá tsiguʼ rí ikhiin nidamijná. Nda̱wa̱á ma̱ngaa Patsy nikháñu índo̱ nigiʼdoo 43 tsiguʼ. Mú Rudolf niʼni má xúʼko̱ ñajunʼ Jeobá. Maski ajndu nikhi̱i̱ ga̱jma̱a̱ naʼniuu nandii, ikhaa ninindxu̱u̱ precursor regular ga̱jma̱a̱ bi̱ kayá edxu̱u̱ náa congregación. Ma̱ndoo muraxnuu historia ndrígóo náa La Atalaya 1 ñajunʼ gu̱nʼ agosto tsiguʼ 1997, ináa 20 asndu 25 [1] (atayáá nota rí na̱ʼkha̱ náa námbá artículo).
15. Arathá ga̱jma̱a̱ numún tikhun a̱ngiu̱lú bi̱ nuni ñajunʼ Jeobá ga̱jma̱a̱ gagi.
15 Rí mbiʼi xúgi̱, mbaʼin a̱ngiu̱lú nuni ñajunʼ Jeobá ga̱jma̱a̱ gagi maski ajndu nuni gíníi wéñuʼ. Mbaʼin rí ikhiin kuwa guʼwá e̱jua̱nʼ náa Eritrea, Singapur ga̱jma̱a̱ Corea del Sur. Náa numuu rá. Numuu rí tsíñún gájmúún ajua̱nʼ (Mat. 26:52). Mbá xkri̱da, a̱ngiu̱lú Isaac, Negede ga̱jma̱a̱ Paulos kuwa mbá 20 tsiguʼ náa guʼwá e̱jua̱nʼ ndrígóo Eritrea. Ikhí nujmagíníin wéñuʼ. Náa xúgíʼ tsiguʼ rí ninújngoo na̱nguá nindoo munigu̱nʼ ni muñawu̱u̱n anu̱ún. Maski ajndu xúʼko̱, naguáju̱n jmbu náa Jeobá ga̱jma̱a̱ guáʼdáá mbá fe gujkhuʼ. Asndu bi̱ nuñawu̱u̱n nduyamajkhún. Náa jw.org ma̱ndoo ma̱ta̱ya̱a̱ xtiʼkhu ndrígu̱ún, náa nakujmaa rí kuwa gagi maski ajndu numíniiʼ.
Xú káʼnii eni a̱ngiu̱lú náa congregación mu muguaʼdáá má xúʼko̱ mbá fe gujkhuʼ rá. (Atayáá kutriga̱ 15 ga̱jma̱a̱ 16.)
16. Á mu kuaʼdáá mbá fe gujkhuʼ, ndiéjunʼ gándoo muʼni rá.
16 Mbaʼin xa̱bi̱i̱ Jeobá na̱nguá kuwa náa guʼwá e̱jua̱nʼ ni má tseguma gíníi xóo a̱ngiu̱lú bi̱ niʼthá nángii. Mú mbaʼin numíniiʼ ga̱jma̱a̱ numuu tsingíná, gamiéjunʼ o guerras. Eʼwíínʼ a̱ngiu̱lú nduyaridáá Abrahán, Isaac, Jacob ga̱jma̱a̱ Moisés ga̱jma̱a̱ nuniñaʼ xúgíʼ rí gíʼdoo wéñuʼ numuu mu muni itháan ñajunʼ Jeobá. Ndiéjunʼ embáñun a̱ngiu̱lú muni ñajunʼ Jeobá ga̱jma̱a̱ gagi rá. Rí nandún kuyáá ga̱jma̱a̱ fe rí guáʼdáá náa rí nikudaminaʼ. Nduyáá rí ikhaa gáxnún xa̱bi̱i̱ bi̱ ni̱ndxu̱ún jmbiin mbiʼi kámuu náa numbaaʼ nuxi̱ʼ. Ikhí ní xáguma gíníi (atraxnuu Salmo 37:5, 7, 9, 29). *
17. a) Ndiéjunʼ gíʼmaa muʼni á mu nandulúʼ muguaʼdáá mbá fe gujkhuʼ rá. b) Ndiéjunʼ gajmañulú náa imbo̱o̱ artículo rá.
17 Náa artículo rígi̱ ndiʼyáá rí “fe nindxu̱u̱ rí nduʼyáá rí marigá” rí kuaʼthi̱i̱nlú. Á mu nandulúʼ muguaʼdáá mbá fe gujkhuʼ, gíʼmaa muʼtákáñii Jeobá ga̱jma̱a̱ mundxaʼwamíjna̱ rí nakudaminaʼ maʼni. Xúʼko̱ ma̱ndoo muguajún jmbu náa mbá tsáʼkhá. Náa imbo̱o̱ artículo gajmañulú itháan ga̱jma̱a̱ numuu rí eyoo gáʼthúu̱n rí muguaʼdáá fe.
^ [1] (kutriga̱ 14) Atayáá ma̱ngaa historia ndrígóo Andrej Hanák, bi̱ na̱ʼkha̱ náa Eslovaquia, rí kayá edxu̱u̱ “Mi esperanza sigue brillante a pesar de las pruebas”. Nigájnuu náa revista ¡Despertad! 22 ñajunʼ gu̱nʼ abril tsiguʼ 2002.
^ Revelación 21:3-6: “Ikhú nidxawun aʼwá asndu náa xílí rí nutañajunʼ náa niʼthí: ¡Atayáá! Guʼwá xtíin ndrígóo Dios rígá náa majñúnʼ xa̱bu̱ numbaaʼ, ikhaa gáxtáa gajmíi̱n ikhiin, ga̱jma̱a̱ mani̱ndxu̱ún xuajñu. Ma̱ngaa Dios gáxtáa gajmíi̱n ikhiin. Maʼni kaʼwi̱i̱ xúgíʼ iyoʼ idún, ní xákhañun itháan, ní xárígá xtambiyaʼ, gitsawaʼskha asndu má gaʼkhu, xúgíʼ rígi̱ ninújngoo gáʼni ikhú”. Ga̱jma̱a̱ bi̱ gíiʼ náa xílí rí nutañajunʼ niʼthí: “¡Atayáá! Mani̱i̱ xúgíʼ nuxi̱ʼ”. Ma̱ngaa niʼthí: Ataniraʼmáʼ numuu rí ajngáa rígi̱ nindxu̱u̱ gajkhun ga̱jma̱a̱ xúʼko̱ gárígá”. Ga̱jma̱a̱ niʼthúunʼ: “¡Ni̱jkha̱nú nirígá! Ikhúúnʼ ni̱ndxu̱ʼ Alfa ga̱jma̱a̱ Omega, rí nagi̱ʼdu̱u̱ ga̱jma̱a̱ rí naguámbá. Bi̱ gakandawuʼ maxnu̱u̱ náa naku̱mu̱u̱ iyaʼ ndaʼya rí xáʼni numuu”.
^ 1 Juan 5:14, 15: “Rígi̱ jngó nakumulúʼ kuʼyáá ikhaa, numuu rí, tséʼniuu ndiéjunʼ nindxu̱u̱ rí gúnda̱ʼa̱a̱, ikhaa naʼdxun á mu ikháanʼ nunda̱ʼa̱ rí nandoo ikhaa. Ma̱ngaa, á mu nduʼyáá rí naʼdxun asndu ndiéjunʼ rí gunda̱ʼa̱a̱, nduʼyáá rí makhánulúʼ rí ninda̱ʼa̱a̱ numuu rí ninda̱ʼa̱a̱ ikhaa”.
^ Hebreos 12:3: “Xúʼko̱, guʼgíʼ tsumáá edxa̱la mbu̱ya̱a̱ bi̱ niʼngo̱o̱ índo̱ nini gínáa xa̱bu̱ aʼkhá ga̱jma̱a̱ táʼni rí nindoo ikhaa, mu xáʼni néʼnga̱la ga̱jma̱a̱ xákaguabáanʼ”.
^ Salmo 37:5, 7, 9, 29: “Atanimbánii rí nataxúdaminaʼ náa Jeobá, ga̱ku̱ma̱ʼ xtayáá ikhaa ga̱jma̱a̱ ikhaa má gámbáyaʼ. Gaʼni wíí náa inuu Jeobá. Ga̱jma̱a̱ gaʼndaʼ maraʼti̱i̱n ikhaa. Xaxmiéjuanʼ ga̱jma̱a̱ numuu xa̱biya̱ bi̱ xtáa ragájnuu májánʼ xúgíʼ rí niríyaʼ awan. Numuu rí xa̱bu̱ xkawiinʼ mambíin, mú bi̱ guaʼthi̱i̱n náa Jeobá makuwá náa tsu̱du̱u̱ ku̱ba̱ʼ. Xa̱bu̱ bi̱ nuni rí jmbu makuwá kámuu mbiʼi náa tsu̱du̱u̱ ku̱ba̱ʼ”.
