NIXTÁÁ 10 ñajunʼ gu̱nʼ diciembre tsiguʼ 1936, náa xuajen Wichita (Kansas, Estados Unidos). Ikhúúnʼ giʼnún náa a̱jkhu̱u̱n a̱ngui̱nʼ. Anu̱ʼ ga̱jma̱a̱ ru̱dúʼ nini má xúʼko̱ ñajunʼ Jeobá. Nigumbiʼñún William ga̱jma̱a̱ Jean. Anu̱ʼ ninindxu̱u̱ siervo de compañía, xóo nigumbiʼyuu nákha ikhú ndxájulú bi̱ kayá edxu̱u̱ náa nagimbáanʼ bi̱ naríyaʼ awan náa eʼwíínʼ bi̱ kuya̱ edxu̱u̱. Ru̱dúʼ nijmañuu rí gajkhun ga̱jma̱a̱ numuu Biblia numuu xíñúʼ, Emma Wagner. Xíñúʼ niʼsngúún mbaʼin wéñuʼ rí gajkhun. Mbáa rí ikhiin ninindxu̱u̱ Gertrude Steele, bi̱ ni̱jkha̱nú ninindxu̱u̱ misionera náa Puerto Rico. * Ikha jngó ikhúúnʼ nigúʼdoo májánʼ xkri̱da rí mbayaridoo.

Narmáʼáan a̱jkiu̱nʼ rí mbá sábado wakhííʼ ikhúúnʼ ga̱jmu̱ʼ anu̱ʼ ni̱jkuá gutaráʼaxu. Ikhúúnʼ gúʼdoo witsu tsiguʼ nákha ikhú. Kuwáanʼxu ruxnu̱u̱ i̱yi̱i̱ʼ Bi̱ Nayejngoo ga̱jma̱a̱ i̱yi̱i̱ʼ Consolación, rí xúgi̱ nagumbiʼyuu ¡Despertad!, xa̱bu̱ bi̱ nanújngun ikhí. Nákha ikhú xuajñuxu nixnáximinaʼ náa raga̱jma̱ guerra dí nirígá náa Xúgíʼ Numbaaʼ. Anu̱ʼ niwiji̱ jmbu. Índo̱ kúwáanʼxu rutaráʼa mbiʼi rúʼko̱, mbáa xa̱bu̱ bi̱ nindxu̱u̱ médico nikuʼmaminaʼ náa ikháanʼxu, mú najnga̱a̱. Niʼthúu̱n anu̱ʼ rí namiñuu ga̱jma̱a̱ naʼni gaʼduunʼ mu xáʼga̱ náa guerra. Xa̱bu̱ nikuʼmaminaʼ mijngii náa anu̱ʼ ga̱jma̱a̱ niʼthúu̱n: “¡Náa numuu rí tséraxnuʼ, namíñaʼ wéñuʼ maldito!”. Ra̱ʼkhá tháán nimíñuʼ, mu anu̱ʼ nixnáraʼa má xúʼko̱ i̱yi̱i̱ʼ náa xa̱bu̱ bi̱ kuwa ruyáá. Rúʼko̱ niʼni rí mbayamajkhuu itháan. Ikhú ninújngoo ikhí mbáa soldado, ga̱jma̱a̱ xa̱bu̱ nindxa̱ʼwá ga̱jma̱a̱ niʼthúu̱n: “¡Atayáá rí matani̱i̱ xa̱bu̱ bugi̱ bi̱ namíñu!”. Soldado ndiʼyoo rí najnga̱a̱ xa̱bu̱. Ikha jngó niʼthúu̱n: “¡Ayuʼ guʼwáʼ!”. Nda̱wa̱á nájmi̱i̱n nigúun. Naxna̱a̱ wéñuʼ núma̱aʼ Jeobá numuu rí nixnúu tsiakii anu̱ʼ. Anu̱ʼ nigiʼdoo a̱jma̱ barberías náa Wichita, ga̱jma̱a̱ médico buʼko̱ na̱jkha̱ ikhí.

Índo̱ ikhúúnʼ nigúʼdoo migiñuʼ tsiguʼ, anu̱ʼ nigujua̱a̱ guʼwá ga̱jma̱a̱ nájma̱ barberías, ga̱jma̱a̱ nini  mbá guʼwá chíʼgíʼ rí ma̱ndoo magún ku̱ñu̱u̱n. Ikhú ni̱jkuáxu náa ndayóoʼ miʼtáraʼa itháan, mijngii náa xuajen Grand Junction (Colorado). Ikhí, anu̱ʼ ga̱jma̱a̱ ru̱dúʼ ninindxu̱ún precursores ga̱jma̱a̱ niñajunʼ nguáthá hora náa nudu ga̱jma̱a̱ nunimbanuu xujkhúʼ. Núma̱a̱ má Jeobá ga̱jma̱a̱ tsiakii rí nini, náa xuajen rúʼko̱ nirígá mbá congregación. Nákha 20 ñajunʼ gu̱nʼ junio tsiguʼ 1948, anu̱ʼ nikumúnʼ iyááʼ náa mbá mañu chíʼgíʼ rí nagajtaa náa kúbá, gajmíi̱nʼ eʼwíínʼ xa̱bu̱ bi̱ nindrigú rí gajkhun. Mbáa rí ikhaa ninindxu̱u̱ Billie Nichols ga̱jma̱a̱ a̱ʼgiu̱u̱. Nda̱wa̱á ikhiin ninindxu̱ún circuito, xó má nini aʼdiún ga̱jma̱a̱ a̱ʼgiu̱u̱.

Ikhúúnʼ ga̱jma̱a̱ bi̱ kuwa náa goʼwóoʼ niguáʼdiinxu bi̱ nambáxuxu májánʼ gajmiúxu̱ bi̱ nuni káxi̱ ñajunʼ Jeobá. Mbá xkri̱da, nimbáxuxu májánʼ gajmiúxu̱ bi̱ kuwa náa goʼwóo Steele: Don ga̱jma̱a̱ Earlene, Dave ga̱jma̱a̱ Julia, ma̱ngaa Si ga̱jma̱a̱ Martha. Niniguxu mutamíjná ga̱jma̱a̱ numuu Biblia. Xkri̱da ndrígu̱ún nimbáyuʼ wéñuʼ. Náa ikhiin nijmañuʼ rí ma̱ndoo makuwáanʼ májánʼ ga̱jma̱a̱ ma̱ndoo makuwáanʼ tsímáá á mu nuʼgíʼ nuʼni ginii ñajunʼ Reino.

Índo̱ nigúʼdoo 19 tsiguʼ, mbáa bi̱ nambáxuxu májánʼ gajmiúxu̱ bi̱ nagumbiʼyuu Bud Hasty nindo̱ʼo̱ʼ rí maʼgá ga̱jmu̱ʼ xóo precursor xígií sur ndrígóo Estados Unidos, ga̱jma̱a̱ xúʼko̱ má nini. Ikhú superintendente de circuito nindu̱ʼu̱xu rí mu̱ʼguáxu náa Ruston (Luisiana). Ikhí kuwa mbaʼin xa̱bi̱i̱ Jeobá bi̱ nánguá eni ñajunʼ. Superintendente niʼtúxu rí magímbáanʼxu xúgíʼ xmáná maski ajndu xáʼkha̱ nimbáa. Ikha jngó ndiʼyáaʼxu náa magímbáanʼxu ga̱jma̱a̱ niniratááxu májánʼ. Ginii i̱ndó ikháanʼxu kúwáanʼ náa nagimbáanʼ, ikha jngó nuriʼkumijnáxu mu muxnaxu discurso. Índo̱ mbáa xtáa náa plataforma i̱mba̱a̱ nariʼña̱a̱ xúgíʼ graxe̱. Á mu náa mbá discurso na̱ʼkha̱ mixná mbá demostración, nájmáanʼ natsimuxu náa plataforma, ¡maski ajndu nda̱wa̱a̱ nimbáa ikhí! Ni̱jkha̱nú mbá mbiʼi índo̱ nigíʼdu̱u̱ ni̱ʼkha̱ reunión mbáa ndxájulú nikhi̱i̱. Ga̱jma̱a̱ nda̱wa̱á nigi̱ʼdi̱i̱ niguwáʼ bi̱ nunigajmaa Biblia gajmiún xa̱bi̱i̱ Jeobá bi̱ nánguá eni ñajunʼ ikhaa. Tájyúuʼ índo̱ ninindxu̱u̱ mbá congregación.

Mbá mbiʼi, ikhúúnʼ ga̱jmu̱ʼ Bud nitamíjná gajmiúxu̱ mbáa bi̱ kayá edxu̱u̱ náa Iglesia de Cristo. Ikhaa niʼniuxu tikhuu graxe̱ ga̱jma̱a̱ niʼthí tikhuu texto ndrígóo Biblia rí ikhúúnʼ tseniʼnúʼ. Rígi̱ niʼni makiʼnún ga̱jma̱a̱ niʼni mandxa̱ʼwa̱mínáʼ májánʼ ga̱jma̱a̱ numuu rí nanimboʼ. Ninigajmaa mbá xmáná asndu wakhííʼ mu mariʼña̱a̱ graxe̱ ndrígóo xa̱bu̱ buʼko̱. Rúʼko̱ niʼni mambaxúʼ itháan májánʼ ga̱jmu̱ʼ Jeobá rí asndu nindoʼ maxkamaa imba̱a̱ bi̱ kayá edxu̱u̱ náa guʼwá ndxajkun.

Nda̱wa̱á dí rígi̱, superintendente de circuito nindo̱ʼo̱ʼ rí maʼgá náa xuajen El Dorado (Arkansas). Ikhí nirígá mbá congregación rí ndayóoʼ wéñuʼ. Mbiʼi rí nixtáá náa xuajen rúʼko̱, ndiyóoʼ maʼgá mbaʼa nuthu náa Colorado mu maʼgá náa oficina náa nuxnaximi̱jna̱ mu mani̱ndxu̱ún soldados. Mbá mbiʼi ni̱jkhá gajmíi̱nʼ tikhun precursor mú niguáʼdááxu mbá gamiéjunʼ náa Texas. Carriuʼ niguámbáa. Nitaráʼaaxu mbáa ndxájulú bi̱ ni̱jkha̱ kaguáanʼxu náa goʼwóo ga̱jma̱a̱ nda̱wa̱á náa reunión. Náa reunión nixna mbá anuncio náa nithi rí niguáʼdááxu mbá gamiéjunʼ, ga̱jma̱a̱ a̱ngiu̱lú májánʼ a̱jkiu̱ún nixnuxu chíʼgíʼ mbújkha̱a̱. Ma̱ngaa, ndxájulú bi̱ ni̱jkha̱ kaguáanʼxu náa goʼwóo nigujua̱a̱ carriuʼ mbá 25 dólar.

Ndiʼyáaʼxu rí mbáa maʼga̱ kaguáanʼ náa Wichita. Ikhí nixtáa ndxájulú McCartney, bi̱ ninindxu̱u̱ precursor ga̱jma̱a̱ bi̱ nimbáxuxu májánʼ gajmiúxu̱. Ikhaa gíʼdiin a̱jmi̱i̱n gemelos, Frank ga̱jma̱a̱ Francis. Asndu mbiʼi xúgi̱ nambáxuʼ wéñuʼ gajmíi̱nʼ. Ikhiin nigujoʼ mbá carru wayuu rí numuu mbá 25 dólar, ikháá má mbújkha̱a̱ rí nigruígú ga̱jma̱a̱ numuu carriuʼ rí niguámbáa. Rígi̱ ninindxu̱u̱ timbá miʼtsú rí Jeobá nixnúʼ rí ndayóoʼ numuu rí niʼgíiʼ  ginii ñajunʼ Reino. Nákha ikhú, a̱ngiu̱lú McCartney niniuʼ presentar mbáa ndxájulú bi̱ májánʼ wéñuʼ a̱jkiu̱u̱n bi̱ mbiʼyuu Bethel Crane. Ru̱dúu̱ Bethel nigumbiʼyuu Ruth ga̱jma̱a̱ ninindxu̱u̱ xa̱bi̱i̱ Jeobá bi̱ niñajunʼ wéñuʼ náa Wellington (Kansas). Ruth ninindxu̱u̱ precursora asndu nda̱wa̱á rí nirámáʼ mbá 90 tsiguʼ. Ikhúúnʼ ga̱jmu̱ʼ Bethel nidamíjna̱xu tsiguʼ 1958, nákha xóó tséʼni mbá tsiguʼ rí niniʼnúmijnaxu. Nda̱wa̱á rí nidamíjna̱xu ninindxuxu precursores náa El Dorado.

Ninduxu mbuyaríduun xa̱bi̱i̱ Jeobá bi̱ niniʼnúnʼxu májánʼ asndu nákha majkiáanʼ bi̱ nigíʼ mbá májánʼ xkri̱da. Ikha jngó nindríguxu asndu káʼnii má ñajunʼ rí gaxnuxu muni xuajñu Jeobá. Timbá, nixuʼmáanʼxu xóo precursores especiales náa Walnut Ridge (Arkansas). Ga̱jma̱a̱ tsiguʼ 1962 nindríguxu mbá ñajunʼ nagui̱i̱ wéñuʼ. Nituxu muʼguá náa clase 37 ndrígóo Galaad náa nawaʼsngáa. Nidxuxu wéñuʼ índo̱ nidxáwiin rí ikhí má náa clase rúʼko̱ gáxtáa Don Steele. Nda̱wa̱á rí nirámáʼ mbiʼi, ikhúúnʼ ga̱jmu̱ʼ Bethel nituxu muʼguá Nairobi, xuajen rí kaʼyoo Kenia. Nikúwáanʼxu gíná rí muniʼñáʼ Nueva York, mú nidxuxu wéñuʼ índo̱ ni̱jkuánúxu náa aeropuerto ndrígóo Nairobi índo̱ ndiya̱a̱xu rí a̱ngiu̱lú kuwa raguáʼtuxu.

Nacha̱ niniguxu niʼni xuajin Kenia ga̱jma̱a̱ rí mutaráʼaxu ikhí. Timbíi̱n xa̱bu̱ bi̱ nisngúúnxu ga̱jma̱a̱ numuu Biblia ga̱jma̱a̱ nindrigú rí gajkhun ninindxu̱ún Chris ga̱jma̱a̱ Mary Kanaiya. Ikhiin xóó kuwa runi káxi̱ ñajunʼ Jeobá náa Kenia. * Mbá tsiguʼ nda̱wa̱á, nixuʼmáanʼxu náa Kampala, xuajen rí kaʼyoo Uganda. Ninindxuxu timbíi̱n misioneros bi̱ niguáʼnu náa xuajen rúʼko̱. Mbiʼi rúʼko̱ ninindxu̱u̱ mitsaan wéñuʼ, numuu rí mbaʼin xa̱bu̱ ninigu̱nʼ majmañún rí naʼsngáa náa Biblia. Mbaʼin rí ikhiin ninindxu̱ún xa̱bi̱i̱ Jeobá. Mú índo̱ niʼni má ajtsú tsiguʼ tikhu rí kúwáanʼxu náa África, nitangáanʼxu náa Estados Unidos numuu rí  maguaʼdáaxu mbáa ada̱. Nikúwáanʼxu itháan gíná índo̱ niniʼñáʼxu África ki xóo mbiʼi rí niniʼñáʼxu Nueva York. Ni̱jkuánúxu ninduxu̱ʼ ku̱ñu̱u̱n wéñuʼ xa̱bu̱ bi̱ kuwa náa África ga̱jma̱a̱ niguáʼthi̱i̱nxu rí magutangáanʼxu nda̱wa̱á.

Ni̱jkuáxu gakuwáanʼ xígií náa oeste Colorado, náa nixtáa anu̱ʼ ga̱jma̱a̱ ru̱dúʼ. Tájyúuʼ nigumaa timbáa a̱ʼdiúxu dxáʼgú, Kimberly. Ga̱jma̱a̱ 17 gu̱nʼ nda̱wa̱á nigumaa Stephany. Nigími̱jna̱xu munimbanuu májánʼ e̱jñu̱xu. Ikha jngó ninixu mbá tsiakii mu musngúún rí gajkhun. Ninduxu muxnu̱u̱n mbá xkri̱da májánʼ rí eʼwíínʼ nixnuxu ikháanʼ. Ndiya̱a̱xu rí mbá xkri̱da májánʼ ma̱ndoo mambáñun wéñuʼ e̱jñu̱xu. Mú ma̱ngaa ndu̱ya̱a̱xu májánʼ dí rúʼko̱ tsíyoo gáʼthúu̱n rí ikhiin mani̱ndxu̱ún xa̱bi̱i̱ Jeobá xó má nigíʼnuu mbáa ndxájuʼ xa̱biya̱ ga̱jma̱a̱ mbáa ndxájuʼ a̱ʼgu̱. Numuu rí ikhiin niniñaaʼ Jeobá. Nagúʼthu̱u̱n rí mbá mbiʼi muraʼwíí mbuyaridáá mbu̱júu̱ xkri̱da májánʼ rí nixnuxu.

Niniguxu wéñuʼ munimbanuu e̱jñu̱xu, ga̱jma̱a̱ nuʼgíʼ nuxnu̱u̱nxu rí nda̱ñúnʼ. Nikúwáanʼxu mijngii náa xuajen Aspen (Colorado). Numuu rí ikhí rígá náa mutsíinxu inuu idiʼ weʼtsi ikha jngó xúgiáanʼxu nijmañuxu nitsíin rígi̱. Nguáná na̱jkuáxu̱ xúgiáanʼxu gútsíin, ga̱jma̱a̱ rígi̱ nambáyuxu mu mutamíjná gajmiúxu̱ e̱jñu̱xu. Ma̱ngaa niniguxu muʼguá gúnuʼxuʼ náa xáná ga̱jma̱a̱ nutamíjnáxu gajmiúxu̱ náa rawunʼ mbajtsuunʼ. Índo̱ ikhiin majkhinʼ nuraxuxu xóo rígi̱: “Ndiéjunʼ gúnixu índo̱ gaganiáʼxu rá.” Ga̱jma̱a̱ “tsáa gúya̱a̱xu rá.” Ninixu xúgíʼ rí niʼngo̱o̱ mu musngúúnxu maʼndún kuyáá Jeobá. Ni̱thu̱u̱n má xúʼko̱ rí mugíʼ muni itháan ñajunʼ Jeobá ga̱jma̱a̱ rí munuju̱nʼ i̱ndó gajmiún mbáa bi̱ nandoo má maʼni ñajunʼ Jeobá. Ma̱ngaa niʼgíiʼ mumbáñuun makru̱ʼu̱u̱n rí itháan májánʼ á mu tsenu̱ju̱nʼ majkhinʼ wéñuʼ. Niguʼwunxu muthu̱u̱n: “Itháan májánʼ rí maraxtaa mbáwiin asndu índo̱ gáraʼdáá 23 tsiguaʼ”.

Ikhúúnʼ ga̱jmu̱ʼ Bethel ndiyarídaaxu xkri̱da ndrígóo anu̱ʼ ga̱jma̱a̱ ru̱dúʼ. Ikha jngó ninimi̱jna̱xu muʼguá kudíin e̱jñu̱xu náa nagimbáanʼ ga̱jma̱a̱ náa mutaráʼaxu. Niniguxu muthu̱u̱n a̱ngiu̱xu bi̱ kuwa runi káxi̱ ñajunʼ Jeobá rí maguanún náa guʼwúxu. Ma̱ngaa, nutaxu má xúʼko̱ rí niniguxu wéñuʼ mani̱ndxu̱xuʼ misionero. Ninduxu wéñuʼ mu̱ʼguáxu gajmiúxu̱ e̱jñu̱xu náa África, ga̱jma̱a̱ ikhiin nanigu̱nʼ wéñuʼ.

Nimbá miʼtsú tuniʼñáʼxu runigajmaa mbá guʼwáanʼ. Nuniratamijnaxu gajmiúxu̱ e̱jñu̱xu mu mbu̱ya̱a̱ xú káʼnii gúriʼña̱a̱ graxe̱ rí gúniu̱u̱n náa escuela. Ikhiin ninigu̱nʼ wéñuʼ muni rígi̱, ga̱jma̱a̱ najmañún itháan rí xóo muni. Mú índo̱ ni̱jkha̱ raganuu, nguáná táʼnduun rí munigajmaaxu mbá guʼwáanʼ. Mbá mbiʼi niʼni néʼngo̱ʼ ga̱jma̱a̱ ni̱thu̱u̱n rí ní xunigajmaaxu ga̱jma̱a̱ rí gágúun náa cuartiun. Asndu tsiánguá niʼniún. Nigi̱ʼdi̱i̱ nimbiyaʼ ga̱jma̱a̱ nithi rí nandún munigajmaa. Ikhú ni̱jkuánúxu ndi̱ya̱a̱ rí kuwáanʼxu rumbáñun mbuyáá rí gíʼdoo numuu rí naʼsngáa Jeobá. Nda̱wa̱á  ndiyáá rí gíʼdoo numuu rí munigajmaaxu mbá guʼwáanʼ. Ikhí nanigu̱nʼ mutuxu rí endxaʼwamíjna̱ ga̱jma̱a̱ rí ekumún. Nguáná nutuxu rí tsínigu̱nʼ tikhu rí naʼsngáa Biblia. Maski ajndu naʼni gawúnxu rígi̱, mu ndu̱ya̱a̱ rí endxaʼwamíjna̱. Nda̱wa̱á rí nunixu makru̱ʼu̱u̱n ikhiin nundrigú rí Jeobá naʼthí.

Tsiguʼ rí ninimbanuxu e̱jñu̱xu ninújngoo nacha̱. Ga̱jma̱a̱ numuu rí Dios nimbáyuxu ma̱ngaa ikha rí naxná náa xuajñu ninimi̱jna̱xu xó má niʼngo̱o̱ mu musngúnxu rí maʼndún kuyáá Jeobá. Nidxuxu wéñuʼ numuu rí nájmi̱i̱n ninindxu̱ún precursoras nda̱wa̱á rí nigájni̱i̱n náa secundaria ga̱jma̱a̱ rí nijmañún muni mbá ñajunʼ rí mambáñun makuwá. Nigún guyambáá gajmiún a̱jmi̱i̱n a̱ngiu̱lú náa Cleveland (Tennessee), numuu rí ikhí ndiyóoʼ miʼtáraʼa wéñuʼ. Ra̱ʼkhá tháán ndiʼñíinʼxu, mu nidxuxuʼ rí nixnaximi̱jna̱ muni káxi̱ ñajunʼ Jeobá. Ikhúúnʼ ga̱jmu̱ʼ Bethel nitaxu rí manindxuxu precursor mbu̱júu̱ʼ. Ga̱jma̱a̱ numuu rígi̱ nda̱wa̱á nindoo muyambááxu náa ñajunʼ ndrígóo circuito ga̱jma̱a̱ mayambáá náa asambleas.

Nákha xóó tsegun náa Tennessee, e̱jñu̱xu nigún náa Londres (Inglaterra) ga̱jma̱a̱ nigún gúya Betel. Stephany nininiʼ ikhí mbáa dxámá betelita bi̱ mbiʼyuu Paul Norton. Nákha ikhú Stephany gíʼdoo 19 tsiguʼ. Nda̱wa̱á rí nigún mbu̱júu̱ náa Inglaterra, Kimberly nininiʼ mbáa betelita bi̱ niñajunʼ ga̱jma̱a̱ Paul, ikhaa mbiʼyuu Brian Llewellyn. Índo̱ Stephany nigiʼdoo 23 tsiguʼ, ninújunʼ ga̱jma̱a̱ Paul. Ga̱jma̱a̱ mbá tsiguʼ nda̱wa̱á, Kimberly ndiyáa Brian. Ikhaa gíʼdoo 25 tsiguʼ ikhú. Nájmi̱i̱n ninu̱ju̱nʼ nda̱wa̱á rí niguáʼdáá 23 tsigúnʼ. Nadxuxu wéñuʼ rí ikhiin niraʼwíin mudiin xa̱bu̱ míjínʼ.

E̱jñu̱xu nutuxu rí xkri̱da ndrígúxu̱ ga̱jma̱a̱ xkri̱da ndrígu̱ún xiʼñúnʼ nimbáñun ‹mbuyááʼ ginii reino›, asndu índo̱ guáʼdáá xkujndu ga̱jma̱a̱ numuu mbújkha̱a̱ (Mat. 6:33). Gu̱nʼ abril tsiguʼ 1998, Paul ga̱jma̱a̱ Stephany nixuʼmiin magún náa clase 105 ndrígóo Galaad náa nawaʼsngáa, ga̱jma̱a̱ nda̱wa̱á nixuʼmiin magún náa Malaui rí kaʼyoo África. Ikhú má nixuʼmaa Brian ga̱jma̱a̱ Kimberly mu muyambáá náa Betel ndrígóo Londres. Ga̱jma̱a̱ nda̱wa̱á nixuʼmiin náa Betel ndrígóo Malaui. Nidxuxu wéñuʼ numuu rí e̱jñu̱xu nijmún májánʼ vida ndrígu̱ún.

Gu̱nʼ enero tsiguʼ 2001 niʼtároʼoʼ ndxájulú Marais bi̱ nitha ga̱jma̱a̱ numuu nákha ginii náa artículo rígi̱. Ndxájulú Marais naxná ikha náa Departamento rí kaʼyoo náa Nutajuíi. Ikhaa niʼthúunʼ rí a̱ngiu̱lú kuwa runi májánʼ mbá curso mu mambáñun bi̱ nutajuíi ajngáa náa xúgíʼ numbaaʼ mu makru̱ʼu̱u̱n itháan májánʼ ajngáa inglés. Maski ajndu ikhúúnʼ gúʼdoo 64 tsiguʼ nákha ikhú, ikhiin nindúún muniratún mu mani̱ndxu̱ʼ mbáa bi̱ maʼsngúún. Ikhúúnʼ ga̱jmu̱ʼ a̱ʼgiu̱ʼ nitakháñixu Jeobá ga̱jma̱a̱ numuu rígi̱ ga̱jma̱a̱ nitamíjna̱xu gajmiúxu̱ ru̱dúxu mu muxnuxu xtágabu. Maski ajndu nájmi̱i̱n guanuu ga̱jma̱a̱ ní xumbáñunxu, ikhiin nindúún rí mu̱ʼguáxu. Ikha jngó nitaráʼa náa Patterson mu mata rí nundríguxu ñajunʼ rí nindxu̱u̱ kiejunʼ.

Mú ikhú ru̱dúʼ niʼdxuun rí gíʼdoo cáncer. Nitamíjná ga̱jmu̱ʼ ga̱jma̱a̱ ni̱thu̱u̱n rí nanduxu maguanúxu mu mumbáyiixu ndxájuxu linda mu muñewa̱a̱n. Mú ru̱dúʼ tándoo ga̱jma̱a̱ niʼthúunʼ: “Itháan ra̱májánʼ gáʼniuʼ á mu tsédxúʼ”. Ikháá má endxa̱ʼwóo edxu̱u̱ Linda. Ikha jngó ni̱jkuáxu náa escuela dí rígá náa Patterson. Ikhúúnʼ ga̱jmu̱ʼ Bethel nixnu̱u̱nxu wéñuʼ núma̱aʼ rí ikhiin numbayúxu wéñuʼ. Ma̱ngaa nixna̱a̱xu núma̱aʼ numuu rí a̱ngiu̱lú bi̱ kuwa ikhí nimbáñun. Mbá mbiʼi nda̱wa̱á rí ni̱jkuánúxu náa Patterson, Linda niʼtáruʼuxu mu maʼtúxu rí ru̱dúʼ nikháñu. Xó má niʼthúxu ru̱dúʼ muni, nigími̱jna̱ muni ñajunʼ ndrígúxu.

 Ra̱ʼkhá tháán nidxuxu índo̱ nidxáwiin rí timbá xuajen náa muxnaxu curso nindxu̱u̱ náa sucursal ndrígóo Malaui, náa kuwa e̱jñu̱xu gajmiún ajmbiún. Ra̱ʼkhá tháán májánʼ rí kúwáanʼxu jnduʼ mbu̱júu̱ʼ. Nda̱wa̱á nixnaxu curso náa Zimbabue, ga̱jma̱a̱ náa Zambia. Índo̱ kuwáanʼxu ruxnaxu curso mbá ajtsú tsiguʼ tikhu, nindu̱ʼu̱xu rí magutangáanʼxu náa Malaui. Ikhí nimbáñunxu mu muniraʼmáʼ rí niguaʼnii xa̱bi̱i̱ Jeobá bi̱ nijuixkhún numuu rí na̱nguá nindawami̱jna̱ náa política. *

Índo̱ niniʼñáʼxu África nákha tsiguʼ 2005, nikuwaxu gíná wéñuʼ mbu̱júu̱ʼ. Nitangáanʼxu náa guʼwúxu, náa Basalt (Colorado). Ikhí ikhúúnʼ ga̱jmu̱ʼ Bethel ninindxuxu xóó precursor. Tsiguʼ 2006, Brian ga̱jma̱a̱ Kimberly niguwáa̱nʼ gakuwa náa níjniúu guʼwúxu mu munimbanuu a̱jmi̱i̱n e̱jñún wa̱ʼxa̱ʼ, Mackenzie ga̱jma̱a̱ Elizabeth. Paul ga̱jma̱a̱ Stephany kuwa xóó náa Malaui, ga̱jma̱a̱ Paul nindxu̱u̱ mbáa bi̱ xtáa náa Comité ndrígóo Sucursal. Ikhúúnʼ itháan maʼni 80 tsiguʼ, ga̱jma̱a̱ nadxuʼ wéñuʼ rí nda̱ñúnʼ tikhun a̱ngiu̱lú bi̱ itháan jiáma bi̱ niñajunʼ gajmíi̱nʼ rí nuni ñajunʼ rí ikhúúnʼ nigúʼdoo nákha ginii. Ga̱jma̱a̱ numún e̱jñu̱xu ga̱jma̱a̱ e̱jín xíñuxu, nunixu mbá tsiakii mu mbuyaridún eʼwíínʼ a̱ngiu̱lú bi̱ nixnuxu májánʼ xkri̱da. Ikha jngó kuwáanʼxu gagi wéñuʼ.