1, 2. a) Náa numuu rí mingíjyúuʼ rí xa̱bu̱ musngúún e̱jñún mu maguaʼdáá fe náa Jeobá xá. b) Xú káʼnii gándoo mumbañún e̱jñún mu muguaʼdáá fe náa Jeobá rá. c) Xú káʼnii a̱jkhu̱ enii rí gúʼyáá náa artículo rígi̱ rá.

 XA̱BU̱ gajmii bi̱ kuwa Francia nithi: “Ikháanʼ nunimbuxu ku̱ya̱a̱ Jeobá, mu rúʼko̱ tsíyoo gáʼthúu̱n rí mangiin e̱jñu̱xu munimbu̱ún kuyáá ikhaa. Fe tsekánulú, e̱ji̱n nagún raguáʼdáá mañúú mañúú”. Mbáa ndxájulú náa Australia niʼnirámáʼ rí mu mumbañún e̱ji̱i̱n muguaʼdáá fe náa a̱jkiu̱ún nindxu̱u̱ mbá ñajunʼ rí itháan mingíjyúuʼ rí guáʼdáá anu̱ún e̱ji̱n. Ga̱jma̱a̱ niʼthí xóó: “Mbáa naku̱ma̱ʼ rí nikro̱ʼo̱o̱ má a̱ʼdiáaʼ rí nitriʼña̱a̱, mú nda̱wa̱á naʼniaʼ ikháá má graxe̱. Rí nikro̱ʼo̱o̱ xúgi̱ a̱ʼdiáaʼ ní xákro̱ʼo̱o̱ nda̱wa̱á. Mbáa mbaʼyóoʼ matriʼña̱a̱ mbaʼa nuthu rí naraxe̱”. Índo̱ e̱ji̱n na̱jkha̱ ranii, mbaʼin xa̱bu̱ nduyáá rí ndayóoʼ mutún mbu̱júu̱ʼ e̱jñún, mu mutún itháan kuduun. Ma̱ngaa nduyáá rí ndayóoʼ majmúún mixtiʼkhu ikha mu musngúún maʼndún kuyáá Jeobá.

² Lá xtaʼdiin e̱ji̱n ráʼ. Mbáa nguáná natraximínáʼ á mu majmañaaʼ marasngúún mu maʼndún kuyáá Jeobá ga̱jma̱a̱ muni ñajunʼ xúgíʼ mbiʼi ndrígu̱ún. Rí phú gajkhun, nimbáa rí  ikháanʼ maʼngo̱o̱ maʼni mbáwíi rígi̱ (Jer. 10:23). I̱ndó ma̱ndoo muni á mu nakumu̱ún kuyáá Jeobá. Ikhaa nixnúún mbaʼa xtágabu bi̱ guáʼdiin e̱jñún. Xú káʼnii gándoo ikháánʼ matambáñun e̱jña̱ʼ rá. Náa artículo rígi̱ mbuʼyáá a̱jkhu̱ enii. Timbá, atatsinunʼ májánʼ. Raga̱jma̱, arasngúún rí gíwanʼ náa a̱jkiu̱ún. Ragajtsú, gajmaʼ xkri̱da. Rí maʼni a̱jkhu̱, atanda̱ʼa̱a̱ Jeobá xi̱ʼ kaʼwu ndrígóo ga̱jma̱a̱ gaʼngo̱o̱ a̱jkia̱nʼ guni e̱jña̱ʼ.

3. Xú káʼnii gándoo xa̱bu̱ mbuyaridáá Jesús rí xóo niʼsngúún xa̱bi̱i̱ xá.

³ Jesús nindu̱ʼu̱u̱n má xúʼko̱ xa̱bi̱i̱ mu muthi rí ekumún (Mat. 16:13-15). Ikháánʼ ma̱ndoo matayaridáá. Xú káʼnii rá. Índo̱ naratámíjná gajmiáanʼ e̱jña̱ʼ o índo̱ dí rígá rí eni, atraxu̱u̱n rí ekumún ga̱jma̱a̱ atatsíñunʼ muthi rí endxaʼwamíjna̱. Nguáná guáʼdáá graxe̱. Mbáa ndxájulú náa Australia bi̱ gíʼdoo 15 tsiguʼ niʼthí: “Anu̱ʼ naʼtámíjná wéñuʼ ga̱jma̱á ni̱ndxu̱ʼ ga̱jma̱a̱ numuu fe ndrígóʼ ma̱ngaa nambáyuʼ mu mandxa̱ʼo̱o̱ edxu̱ʼ. Naʼniún graxe̱ xóo ‹ndiéjunʼ eʼthí náa Biblia rá.› ‹Lá natatsimbaaʼ ikháánʼ ráʼ.› Ga̱jma̱a̱ náa numuu rí natatsimbaaʼ rá.› Nindo̱ʼo̱ʼ mata ga̱jma̱a̱ ajngóoʼ ga̱jma̱a̱ rí xata rí xó má niʼthí anu̱ʼ ga̱jma̱a̱ ru̱dúʼ”. Ma̱ngaa niʼthí rí índo̱ ni̱jkha̱ rakhi̱i̱ ndiyóoʼ mariʼña̱a̱ anu̱u̱ rí itháan mingíjyúuʼ.

4. Atagíʼ mbá xkri̱da ndíjkha rí gíʼdoo numuu rí maʼngo̱o̱ a̱jkia̱nʼ ga̱jma̱a̱ rí matambáñun e̱jña̱ʼ mu maxtiʼña̱a̱ graxe̱ ndrígu̱ún.

⁴ Á mu e̱jña̱ʼ naʼniún mingíjyúuʼ munimbu̱ún rí naʼthí náa Biblia, gaʼngo̱o̱ a̱jkia̱nʼ. Atambáñun mu makru̱ʼu̱u̱n. Mbáa xa̱bu̱ niʼthí: “Atayáá rí gíʼdoo numuu graxe̱ ndrígóo a̱ʼdiáaʼ. Xáta̱ya̱a̱ dí ragíʼdoo numuu o mu naʼniaʼ miʼskhoo matriʼña”. Májánʼ nindxu̱u̱ rí e̱jña̱ʼ muraxi, numuu dí rúʼko̱ nasngájma rí nandún majmañún. Asndu Jesús niʼni graxe̱ índo̱ ninindxu̱u̱ mbáa dxámá (atraxnuu Lucas 2:46). Mbá dxámá bi̱ xtáa náa Dinamarca niʼthí rí índo̱ niʼthún anu̱u̱ rí na̱nguá eʼyoo májánʼ á mu xtáa náa religión gajkhun, ikhiin na̱nguá nikiʼníin maski ajndu nixmiéjunʼ kuyáá. Ga̱jma̱a̱ xóó niʼthí: “Niriʼña̱a̱ xúgíʼ graxe̱ ndrígóʼ ga̱jma̱a̱ Biblia”.

5. Maski ajndu nakujmaa rí e̱ji̱n guáʼdáá fe náa Jeobá, ndiéjunʼ gíʼmaa muni anu̱ún xá.

⁵ Atatsinunʼ májánʼ e̱jña̱ʼ. Xáku̱ma̱ʼ rí guáʼdáá fe náa Jeobá i̱ndó numuu rí nagún gutaraʼa ga̱jma̱a̱ náa reunión. Atraxi̱mínáʼ: “Ndiéjunʼ phú ekumún e̱ji̱nʼ ga̱jma̱a̱ numuu Jeobá ma̱ngaa náa Biblia rá.” Ataniminaʼ ma̱ta̱ya̱a̱ á mu rígá mbá rí naʼniún mingíjyúuʼ mu muguajún jmbu náa Jeobá. Arathún ga̱jma̱a̱ numuu Dios xúgíʼ mbiʼi índo̱ kuwáanʼ rúni mbóó mbá ñajunʼ. Aratájkáan ga̱jma̱a̱ numún e̱jña̱ʼ índo̱ xtaa gajmiáanʼ ga̱jma̱a̱ índo̱ xtaa mbáwiin.

6. Ndíjkha gíʼdoo numuu rí xa̱bu̱ bi̱ guáʼdiin e̱ji̱n majmañún má xúʼko̱ ga̱jma̱a̱ numuu Jeobá ma̱ngaa náa Biblia rá.

⁶ Xa̱bu̱ ndiyáá rí Jesús nindoo kaʼñún ga̱jma̱a̱ nindoo kaʼyoo Jeobá ma̱ngaa nininuʼ májánʼ Escrituras. Ikha jngó nidxawíín májánʼ rí niʼthí (Luc. 24:32; Juan  7:46). Xúʼko̱ má kayuʼ, índo̱ e̱jña̱ʼ gúyáá rí ikháanʼ nandaʼ xtayáá Jeobá, rúʼko̱ mambáñún mangiin mu maʼndún kuyáá (atraxnuu Deuteronomio 6:5-8; Lucas 6:45). * Ikha jngó atraxnuu tsumáá wéñuʼ Biblia ga̱jma̱a̱ atraxnuu i̱yi̱i̱ʼ ndrígúlú. Gajmañaaʼ má xúʼko̱ ga̱jma̱a̱ numuu rí Jeobá niʼni (Mat. 6:26, 28). Índo̱ itháan gajmañaaʼ ga̱jma̱a̱ numuu Jeobá, itháan gándoo garasngúún e̱jña̱ʼ ga̱jma̱a̱ numuu ikhaa (Luc. 6:40).

7, 8. a) Ndiéjunʼ gándoo gátani mámbá rí gajmañaaʼ ga̱jma̱a̱ numuu Jeobá rá. b) Xú káʼnii eni rígi̱ tikhun xa̱bu̱ bi̱ guáʼdiin e̱ji̱n rá.

⁷ Mambá rí gajmañaaʼ ga̱jma̱a̱ numuu Jeobá, arathún e̱jña̱ʼ. Ma̱ndoo marathu̱u̱n índo̱ xtaa gajmiáanʼ, raʼkháa i̱ndó índo̱ nuniratamijná mu muʼguá reunión o índo̱ nunigajmaa Biblia mbá xúgiáanʼ. Rúʼko̱ rí eni a̱ngiu̱lú gajmii bi̱ kuwa náa Estados Unidos. Mámbá rí nduyáá mbá rí mitsaan o naʼphu̱ mbá rí miʼtsí nutún e̱jñún ga̱jma̱a̱ numuu Jeobá. Ikhiin nuthi: “Nunixu marmáʼáan a̱jkiu̱ún e̱jñu̱xu rí xúgíʼ rí Jeobá naxná nasngájma rí nandoo kaʼyulú ga̱jma̱a̱ rí nandxa̱ʼwáminaʼ wéñuʼ ga̱jma̱a̱ numulúʼ”. A̱ngiu̱lú bi̱ nidamijná bi̱ kuwa náa Sudáfrica nanigu̱nʼ wéñuʼ mutún e̱jñún ga̱jma̱a̱ numuu rí Dios niʼni índo̱ kuwa ruñajunʼ náa ixi̱ ri̱ʼi̱. Mbá xkri̱da, mbáa ma̱ndoo mutún dí ra̱ʼkhá tháán májánʼ rí xú káʼnii mbá tsígáʼ na̱jkha̱nú nanindxu̱u̱ mbá planta. Ikhiin nuthi: “Nugíʼ musngúúnxu rí mbuyamajkuíí wéñuʼ vida ga̱jma̱a̱ dí ra̱ʼkhá tháán mitsaan niguma”.

⁸ Mbáa xa̱bu̱ náa Australia ni̱jkha̱ kayáa a̱ʼdióo bi̱ gíʼdoo gu̱wa̱ʼ tsiguʼ náa museo. Xa̱bu̱ nijmuu mbiʼi rígi̱ mú mambáyúu mbaʼyoo dí rígá rí nasngájma rí Jeobá nindxu̱u̱ bi̱ Niʼniáanʼ ga̱jma̱a̱ rí maʼni gujkhuʼ fe ndrígóo. Ndiyáá mbá náa nakujmiin xujkhúʼ bi̱ nikuwa nákha wajyúúʼ bi̱ nánguá kuwa xúgi̱. Niʼniún tsiánguá rí xujkhúʼ bugi̱ mitsiʼñíin wéñuʼ, rí xóo nigumiin ga̱jma̱a̱ rí káxi̱i̱n xóo má xujkhúʼ bi̱ nduʼñún xúgi̱. Anu̱u̱ niʼthúu̱n: “Á mu vida ni̱jkha̱ rariʼkhuu dí ra̱mingíjyúuʼ asndu rí mingíjyúuʼ wéñuʼ, náa numuu xujkhúʼ bugi̱ nigumiin mingíjyúuʼ wéñuʼ rá. Rígi̱ niʼniuʼ tsiánguá ga̱jma̱a̱ ni̱thu̱u̱n a̱ʼdióoʼ”.

9. a) Náa numuu rí májánʼ majmaʼ xkri̱da mu marasngúún e̱jña̱ʼ rá. b) Xú káʼnii xkri̱da nijmuu mbáa a̱ʼgu̱ rá.

⁹ Mbaʼa nuthu, Jesús nijmuu historias ga̱jma̱a̱ xkri̱da mu maʼsngáa ikha rí gíʼdoo wéñuʼ numuu (Mat. 13:34, 35). Á mu ikháánʼ natani rúʼko̱, matambáñun e̱jña̱ʼ mu mundxa̱ʼwa̱a̱ edxu̱ún. Rúʼko̱ gambáñun mundxaʼwamíjna̱, makru̱ʼu̱u̱n ga̱jma̱a̱ marmáʼáan a̱jkiu̱ún rí nijmañún. Ma̱ngaa manigu̱nʼ rí kuwa rajmañún. Mbá xkri̱da, mbáa a̱ʼgu̱ bi̱ xtáa náa Japón nindoo maʼsngúún e̱ji̱i̱n rí xú káʼnii Jeobá  nandoo kaʼyulú wéñuʼ índo̱ niʼni atmósfera. Numuu rí mbáa ada̱ gíʼdoo migiñuʼ tsiguʼ ga̱jma̱a̱ imba̱a̱ gíʼdoo gu̱wa̱ʼ, ikhaa nijmuu mbá xkri̱da dí ramíʼskhoo mu makru̱ʼu̱u̱n ikhiin. Nixnúún leche, azúcar ga̱jma̱a̱ café. Ga̱jma̱a̱ nda̱wa̱á niʼthún rí mámbáa maʼni mbá taza café mu maga̱a̱n ikhaa. Ikhaa niʼthí: “Nini májánʼ wéñuʼ ga̱jma̱a̱ índo̱ niraxu̱u̱n náa numuu, nithu̱nʼ rí nindúún rí café magajnúu xóo eniguʼ ikhúúnʼ. Ikhú ni̱thu̱u̱n rí ikháá kayuʼ má niʼni Dios índo̱ nindáwoʼ gases dí rígá náa mbájndi numbaaʼ mu ma̱ndoo makuwáanʼ”. E̱ji̱i̱n ninigu̱nʼ xóo nijmañún rígi̱ ga̱jma̱a̱ támbumún.

10, 11. a) Káʼnii xkri̱da gándoo gájma̱ʼ mu matasngajmún e̱jña̱ʼ rí xtáa mbáa bi̱ Niʼniáanʼ rá. (Atayáá timbá xtiʼkhu.) b) Xú káʼnii xkri̱da ejmaʼ ikháánʼ mu marasngúún e̱jña̱ʼ rá.

¹⁰ Xú káʼnii xkri̱da gándoo majmaʼ mu matasngajmún e̱jña̱ʼ rí xtáa mbáa bi̱ Niʼniáanʼ rá. Ma̱ndoo munila xúwaʼ. Arathún ndíjkha gíʼdoo numuu mbuyáá májánʼ wéñuʼ náa naʼthí xú káʼnii maguma xúwaʼ. Nda̱wa̱á ayá mbáʼ manzana o i̱mba̱ xndú ga̱jma̱a̱ atraxu̱u̱n: “Lá ndu̱ya̱a̱ rí manzana rígi̱ rígá rí naʼtháanʼ xóo niguma ráʼ.” Atrujtu tapa manzana ga̱jma̱a̱ atasngájmuun tsígoʼ. Arathún rí tsígáʼ nindxu̱u̱ rí naʼthí xóo maguma. Ma̱ngaa arathún dí rúʼko̱ itháan miʼskhaa ki xóo rí náa naʼtháanʼ matani xúwaʼ. Nda̱wa̱á atraxu̱u̱n: “Á mu mbáa niʼnirámáʼ xú káʼnii maguma xúwaʼ, tsáa niʼnirámáʼ náa naʼthí xóo maguma manzana rá.” Á mu e̱jña̱ʼ wanii má ma̱ndoo marathu̱u̱n rí ADN ndrígóo tsigaʼ na̱ʼkha̱ mbaʼa ikha xóo maguma manzana ga̱jma̱a̱ ixu̱u̱ manzana. Ma̱ngaa ma̱ndoo matasngajmún tikhu xtiʼkhu ga̱jma̱a̱ xkri̱da náa ináa 10 asndu 20 náa folleto El origen de la vida.

¹¹ Mbaʼin xa̱bu̱ nuraxnuu gajmiún e̱jñún artículos náa sección “¿Casualidad o diseño?”, náa revista ¡Despertad! Á mu e̱ji̱n majkhinʼ wéñuʼ, anu̱ún ma̱ndoo mutún rí xóo xáʼniún mingíjyúuʼ wéñuʼ makru̱ʼu̱u̱n. Mbá xkri̱da, xa̱bu̱ gajmii bi̱ kuwa náa Dinamarca nithi: “Avión ni̱ndxu̱ún xóo ñu̱ʼu̱, mú lá ma̱ndoo ñu̱ʼu̱ mugíʼ xndú mu magajnún aviones ráʼ. Ga̱jma̱a̱ ñu̱ʼu̱, lá nda̱ñúnʼ mbá mbaaʼ mba̱a̱ náa muguajún xáʼ. Ga̱jma̱a̱ káʼnii enigua̱ʼ itháan rá. Xóo ewáán mbá avión, o xóo eʼni ajmúú mbáa ñu̱ʼu̱ dxe̱ʼ. Tsáa ejmañuu itháan, bi̱ Niʼnii ñu̱ʼu̱ o xa̱biya̱ bi̱ naʼni avión dxe̱ʼ.” Índo̱ natani mundxaʼwamíjna̱ e̱jña̱ʼ ga̱jma̱a̱ nataniu̱u̱n graxe̱, natambáñun mu majmañún mundxa̱ʼwa̱a̱ edxu̱ún ga̱jma̱a̱ muguaʼdáá mbá fe gujkhuʼ náa Jeobá (Prov. 2:10-12).

12. Xú káʼnii gándoo majmaʼ xkri̱da mu marasngúún e̱jña̱ʼ rí xúgíʼ rí naʼthí náa Biblia nindxu̱u̱ jmbu rá.

 ¹² Ikháánʼ ma̱ndoo majmaʼ xkri̱da mu marasngúún e̱jña̱ʼ rí xúgíʼ rí na̱ʼkha̱ náa Biblia nindxu̱u̱ jmbu. Mbá xkri̱da, ma̱ndoo matraxnuu rí naʼthí náa Job 26:7 (atraxnuu). * Mú xárathu̱u̱n rí Jeobá nixnúu Job ku̱ma̱ rígi̱. Atambáñun mundxa̱ʼwa̱a̱ edxu̱ún. Ma̱ndoo marathu̱u̱n rí xa̱bu̱ nákha ikhú tséyáá á mu Ku̱ba̱ʼ nda̱a̱ rí kayóo. Ikhiin nduyáá rí xúgíʼ dí rígá ndayóoʼ marigá náa tsu̱du̱u̱ mbá rí káʼnii. Nimbáa na̱nguá nisngájma ikhú rí Ku̱ba̱ʼ nda̱a̱ rí kayóo, numuu rí nda̱a̱ telescopios ni má naves espaciales. Ndiéjunʼ eʼsngúlúʼ rá. Rí maski ajndu Biblia nigumarámáʼ mba̱yu̱ʼ tsiguʼ kidíiʼ, xúgíʼ rí naʼthí nindxu̱u̱ jmbu numuu rí bi̱ kaʼyoo nindxu̱u̱ Jeobá (Neh. 9:6).

13, 14. Xú káʼnii gándoo xa̱bu̱ musngúún e̱jñún mu munimbu̱ún rí naʼthí náa Biblia rá.

¹³ Ma̱ngaa gíʼdoo numuu marasngúún e̱jña̱ʼ rí makuwá itháan gagi á mu nunimbu̱ún rí naʼthí náa Biblia (atraxnuu Salmo 1:1-3). * Mbá xkri̱da, ma̱ndoo marathu̱u̱n rí mundxa̱ʼwa̱a̱ edxu̱ún rí magún gákuwá náa mbá mbaaʼ rí gíwanʼ náa tapo̱o̱ iyaʼ ga̱jma̱a̱ ikhiin ndayóoʼ muraʼwíin tikhun xa̱bu̱ bi̱ makuwá gajmiún ikhí. Ikhú ma̱ndoo matraxu̱u̱n: “Tsíin xa̱bu̱ gúraʼwíin ikháanʼ mu xúgínʼ makuwá tsímáá ga̱jma̱a̱ rí xúgiʼdu̱u̱n xá.” Nda̱wa̱á ma̱ndoo matraxnuu Gálatas 5:19-23 mu mbuyáá tsíin xa̱bu̱ nandoo Jeobá makuwá náa numbaaʼ nuxi̱ʼ.

¹⁴ Xúgi̱ kaʼnii ma̱ndoo marasngúún e̱jña̱ʼ a̱jma̱ ikha rí gíʼdoo numuu. Timbá, rí Jeobá naʼsngúlú makuwáanʼ tsímáá gajmiúlú eʼwíínʼ rí mbiʼi xúgi̱. Raga̱jma̱, rí ikhaa naʼsngúlú xú káʼnii gakuwáanʼ náa numbaaʼ nuxi̱ʼ (Is. 54:13; Juan 17:3). Ma̱ngaa ma̱ndoo marasngúún e̱jña̱ʼ xú káʼnii Biblia nimbáñun eʼwíínʼ a̱ngiu̱lú. Xú káʼnii rá. Ma̱ndoo mataʼyááʼ historia ndrígu̱ún xa̱bu̱ náa i̱yi̱i̱ʼ ndrígúlú, xóo náa sección “Biblia niriʼkhu̱u̱ rí xóo makuwá” náa i̱yi̱i̱ʼ Bi̱ Nayejngoo. O ma̱ndoo matanda̱ʼa̱a̱ mbáa náa nagimbáanʼ mu maʼthúún xú káʼnii Biblia nimbáñun muriʼkhumijná mu muni ñajunʼ Jeobá (Heb. 4:12).

15. Ndiéjunʼ gándoo gambayaaʼ mu marasngúún e̱jña̱ʼ rá.

¹⁵ Á mu natatsaʼwá edxa̱ʼ, maʼngaaʼ matani rí mámbá rí narasngúún e̱jña̱ʼ manigu̱nʼ wéñuʼ. Atayááʼ mbaʼa ikha mu ikhiin munigu̱nʼ majmañún ga̱jma̱a̱ numuu Jeobá ma̱ngaa xúʼko̱ mambáxu̱u̱n itháan májánʼ gajmiún ikhaa. Ga̱jma̱a̱ atani má xúʼko̱ rígi̱ nákha ikhiin nagún ranuu. Mbáa xa̱bu̱ niʼthí: “Xágánʼ nditháan rí mataʼyááʼ i̱ʼwáʼ ikha mu maratha tema rí ndiʼyáá má”.

16. a) Índo̱ garasngúún e̱jña̱ʼ, ndíjkha gíʼdoo numuu maʼngo̱o̱ a̱jkia̱nʼ rá. b) Xú káʼnii esngajma tikhun rí naʼngo̱o̱ a̱jkiu̱ún rá.

¹⁶ Xi̱ʼ kaʼwu ndrígóo Jeobá gambayaaʼ  mu e̱jña̱ʼ ma̱ndoo muguaʼdáá mbá fe gujkhuʼ (Gál. 5:22, 23). Rúʼko̱ mbaʼyóoʼ mba̱yu̱ʼ mbiʼi. Ikha jngó gaʼngo̱o̱ a̱jkia̱nʼ gúní ga̱jma̱a̱ arasngúún má xúʼko̱. Náa Japón, mbáa xa̱bu̱ bi̱ gíʼdaa mbáa a̱ʼdióo dxámá ga̱jma̱a̱ wáxá niʼthí: “Ikhúúnʼ ga̱jmu̱ʼ a̱ʼgiu̱ʼ niríyaʼxu mba̱yu̱ʼ mbiʼi. Nákha majkhinʼ, ninigajmaa gajmíi̱nʼ mbá 15 minutos mbiʼi rí tséjkua̱xu reunión. Gu̱wa̱ʼ nítsu minutos na̱nguá mba̱yu̱ʼ ndiyáá ikhiin ni má ikháanʼxu”. Ga̱jma̱a̱ mbáa superintendente de circuito niʼnirámáʼ: “Nákha ninindxu̱ʼ mbáa dxámá nigúʼdoo mbaʼa graxe̱ ga̱jma̱a̱ mbaʼa rí tsíkroʼoʼ. Mbaʼa ni̱jkha̱ raxtiʼña̱a̱ náa nagimbáanʼ, índo̱ nanigajmaa mbáwun ga̱jma̱a̱ índo̱ nunigajmaaxu mbá guʼwáanʼ. Ikha jngó, gíʼdoo wéñuʼ numuu rí xa̱bu̱ xúniñaʼ rusngúún e̱jñún”.

17. a) Ndíjkha rí gíʼdoo numuu rí maʼni itháan gujkhuʼ fe ndrígu̱ún xa̱bu̱ bi̱ guáʼdiin e̱ji̱n rá. b) Xú káʼnii embañún e̱jñún mu muguaʼdáá fe náa Jeobá xa̱bu̱ gajmii bi̱ kuwa náa Bermudas rá.

¹⁷ Índo̱ e̱jña̱ʼ gúyáá rí ikháánʼ xtaʼdáá mbá fe gujkhuʼ náa Jeobá, majmañún wéñuʼ. Ikhiin mbuyáá rí gátani ikháánʼ. Ikha jngó, atani gujkhuʼ má xúʼko̱ fe ndrígáʼ ga̱jma̱a̱ atatsíñaʼ mbuyáá rí Jeobá nindxu̱u̱ gajkhun náa ikháánʼ. Atatsaʼwáminaʼ ga̱jma̱a̱ numún xa̱bu̱ gajmii bi̱ kuwa náa mbaaʼ rí gíwanʼ náa tapo̱o̱ iyaʼ Bermudas. Índo̱ ikhiin rígá rí naʼni maxmiéjunʼ, nutakhañii Jeobá gajmiún e̱jñún ga̱jma̱a̱ nunda̱ʼa̱a̱ rí maxnún ikha. Ma̱ngaa nuthúún e̱jñún rí mutajkáan náa Jeobá. Ma̱ngaa nutháán wáxiún bi̱ giʼnii rí maku̱mu̱u̱ kaʼyoo káxi̱ Jeobá, rí mañajunʼ má xúʼko̱ ga̱jma̱a̱ numuu Reino ga̱jma̱a̱ rí xaxmiéjunʼ wéñuʼ. Ikhiin nuthi: “Índo̱ ikhaa ndaʼyoo dí narígá, ndaʼyoo rí Jeobá xtáa rambáyúu. Xúgíʼ rígi̱ niʼni rí maʼni itháan gujkhuʼ fe ndrígóo náa Dios ga̱jma̱a̱ náa Biblia”.

18. Ndiéjunʼ rí gíʼmaa marmáʼáan a̱jkiu̱ún má xúʼko̱ xa̱bu̱ bi̱ guáʼdiin e̱jñún rá.

¹⁸ Ikháanʼ bi̱ kuaʼdiin e̱ji̱n, garmáʼáan a̱jkia̱la rí xándoo muniu̱u̱n tsiakii mu muguaʼdáá fe. Ikháanʼ ma̱ndoo mudula ga̱jma̱a̱ muxtíjyáʼ mbá planta, mú i̱ndó Jeobá ma̱ndoo maʼni rí mbaja̱a̱ (1 Cor. 3:6). Ikha jngó, guni mbá tsiakii mu musngúún e̱jña̱la ga̱jma̱a̱ numuu Dios ga̱jma̱a̱ gunda̱ʼa̱a̱ Jeobá rí mambáyala ga̱jma̱a̱ xi̱ʼ kaʼwu mu muguaʼdáá fe. Mbu̱ya̱a̱ gajkhun rí Jeobá gaʼni tsajkurámúúʼ tsiakii ndrígála (Efes. 6:4).