1. Ndiéjuunʼ kúwá runi̱ tikhuun a̱ngiu̱lú mu muni̱ itháán ñajuunʼ Jeobá rá.

 INUU má mambáa numbaaʼ rígi̱ ga̱jma̱a̱ kuaʼdáá wéñuuʼ ñajunʼ dí mu̱ʼni̱ (Mat. 24:14; Luc. 10:2; 1 Ped. 5:2). Xúgiáánʼ nandulú mu̱ʼni̱ ñajuunʼ Jeobá asndu xó má eʼngo̱o̱. Ga̱jma̱a̱ mbaʼin a̱ngiu̱lú nduyáʼ xóo muni̱ itháán ñajuunʼ Jeobá. Tikhuun nugíʼ meta rí mani̱ndxu̱ún precursor, eʼwíinʼ mu muñambáá náa Betel o náa naguma guʼwá mu mbuyamajkuíí Jeobá. Ga̱jma̱a̱ mbaʼin a̱ngiu̱lú nunimíjna̱ mu mani̱ndxu̱ún siervos ministerial o ancianos (1 Tim. 3:1, 8). Ra̱ʼkhá tháán nadxuu Jeobá índo̱ ndaʼyoo rí xa̱bi̱i̱ nandún muni̱ ñajuunʼ (Sal. 110:3; Is. 6:8).

2. Xú káʼnii gákumulú á mu tséʼngo̱o̱ gúxkamaa tikhuu meta rá.

² Á mu ninújngoo má mba̱yu̱u̱ʼ tsiguʼ ga̱jma̱a̱ xóó tséʼngulú gúxkamaa meta ndrígúlú mbáa rúʼko̱ gáʼni rí majmáa a̱jkiu̱lú. Mbáa nakáwabáánʼ ga̱jma̱a̱ numuu rí waniáánʼlu o i̱ʼwáʼ rí kuaʼdáálu dí tséniñulú mu̱ʼni̱ ñajuunʼ Jeobá (Prov. 13:12). Rúʼko̱ dí nikumu̱u̱ Melissa, * ikhaa ninigu̱u̱ʼ rí maʼga náa Betel mu mayambáá o rí maʼga Náa Najuiʼsngúún bi̱ Nutaraʼa numuu Reino. Ikhaa naʼthí: “Nikiu̱u̱n má xúgi̱ rá. Xáʼngo̱ʼ ma̱ni̱ ñajunʼ rúʼko̱. Índo̱ naku̱mu̱ʼ xúʼko̱ kaʼnii naʼni rí makawabúnʼ”.

3. Ndiéjunʼ gáʼyóoʼ muni̱ tikhun mu makánún mbá ñajunʼ náa congregación rá.

³ Kúwíin mbaʼin wéñuuʼ jiáma ga̱jma̱a̱ wa̱ʼxa̱ʼ bi̱ tséʼñún wéñuuʼ nandii, mú ikhiin ma̱ndoo maguaʼdáá mbá ñajunʼ ndayóoʼ maguaʼdáá tikhuu cualidades. Mbáa ikhiin najmañún ga̱jma̱a̱ kúwíin xawii muni̱ asndu ndiéjunʼ má ñajunʼ ga̱jma̱a̱ asndu nadxún rí muni̱. Mú ikhiin ndayóoʼ maʼngo̱o̱ a̱jkiu̱ún, muñewa̱a̱n  ñajunʼ ndrígu̱ún ga̱jma̱a̱ rí maguaʼdáá gamajkhu. Á mu nuni̱ tsiakimijna maguaʼdáá cualidad rí phú ndayóoʼ, xájyúuʼ gakhánún ñajunʼ náa congregación. Guʼyáá rí nigíʼnuu Nick. Índo̱ ikhaa nigiʼdoo 20 tsiguuʼ niʼni rí maxtáa gíná numuu rí na̱nguá nigíiʼ rí mani̱ndxu̱u̱ siervo ministerial. Ikhaa niʼthí: “Niʼni dí mandxa̱ʼwa̱mínáʼ rí xtáá rani̱ mbá dí ra̱májánʼ”. Mú ikhaa takanájko̱o̱, nigíminaʼ maʼni rí najmañuu náa congregación ga̱jma̱a̱ náa naʼtáraʼa. Rí xúgi̱ ikhaa nindxu̱u̱ Comité ndrígóo Sucursal.

4. Ndiéjunʼ gúʼyáá náa artículo rígi̱ rá.

⁴ Lá kuwáánʼ gíná ga̱jma̱a̱ numuu rí xóó tséʼngo̱o̱ gúxkamaa meta ndrígúlú ráʼ. Á mu dí xúʼko̱ guʼtháán Jeobá xóo kumulú (Sal. 37:5-7). Ma̱ndoo muʼtháán mbáa ndxájulú bi̱ mba̱yu̱u̱ʼ má xtáa náa xuajñuu Jeobá mu maʼthúlú ndiéjuunʼ rí ndayóoʼ mu̱ʼni̱ xóó itháán májánʼ. Ga̱jma̱a̱ guʼgíʼ mu̱ʼni̱ rí ikhaa gáʼthulúʼ, á mu nu̱ʼni̱ xúʼko̱ mbáa maʼngo̱o̱ muxkamaa meta ndrígúlú. Mu, á mu meta ndrígúlú naʼni mingíjyúuʼ muxkamaa xó má eku̱mu̱u̱ Melissa rá. Xú káʼnii gándoo makuwáánʼ gagi má xúʼko̱ rá. Náa artículo mambáyulú muriʼña̱a̱ graxe̱ rígi̱, guʼyáá mbá ajtsú puntos. Timbá, rí maʼni makuwáánʼ gagi. Ragajma, rí ma̱ndoo mu̱ʼni̱ mu makuwáánʼ itháán gagi. Ragajtsú, metas rí ma̱ndoo muʼgíʼ mu̱ʼni̱ mu makuwáánʼ itháán gagi.

5. Ndiéjuunʼ gíʼmaa mu̱ʼni̱ á mu nandulú makuwáánʼ gagi rá. (Eclesiastés 6:9.)

⁵ Á mu nandulú makuwáánʼ gagi gíʼmaa mu̱ʼni̱ dí na̱ʼkha̱ raʼthí náa Eclesiastés 6:9 (atraxnuu). * Xa̱bu̱ bi̱ naniguuʼ rí ndaʼyoo iduu naxtáa gagi ga̱jma̱a̱ rí gíʼdoo. Mbá xkri̱da xóo kuwáánʼlu dí mbiʼi xúgi̱. Mú xa̱bu̱ bi̱ najngrui̱go̱o̱ gi̱i̱ ñuʼún ndayáʼ rí nanigu̱u̱ʼ, ikhaa mbayáʼ má xúʼko̱ rí xáʼngo̱o̱ gákhánúu. Ndiéjuunʼ ejmañulú gi̱i̱ rá. Á mu nandulú makuwáánʼ gagi ga̱jma̱a̱ rí kuaʼdáálu, gíʼmaa maʼdxulu ga̱jma̱a̱ rí kuaʼdáálu dí mbiʼi xúgi̱ raʼkháa dí mbuʼyáʼ rí xáʼngo̱o̱ gákhánulú.

6. Ndiéjuunʼ ajngáa xkri̱da gúʼyáá ga̱jma̱a̱ ndiéjuunʼ gájmañulú rá.

⁶ Xúgiáánʼ nanigulú mbuʼyáá xú káʼnii nindxu̱u̱ rí nuxi̱ʼ. Lá ma̱ndoo makuwáánʼ gagi ga̱jma̱a̱ rí kuaʼdáá má ráʼ. Ma̱ndoo, asndu ma̱ndoo manigulú rí kuaʼdáá. Xú káʼnii rá. Mu ma̱ndoo makru̱ʼu̱lú guʼyáá ajngáa xkri̱da dí niʼthí Jesús ga̱jma̱a̱ numuu talento dí na̱ʼkha̱ náa Mateo 25:14-30. Ikhí majmañulú ndiéjuunʼ gúʼni mu ma̱ndoo makuwáánʼ itháán gagi maski ajndu nuraʼníí mbaʼa gamiéjunʼ.

7. Arathá mbá chíʼgíiʼ ajngáa xkri̱da dí niʼthí Jesús ga̱jma̱a̱ numuu talento.

⁷ Náa ajngáa xkri̱da dí niʼthí Jesús ga̱jma̱a̱ numuu mbáa xa̱bu̱ bi̱ magajnúu maʼga náa goʼwóo. Nákha xóó tsegájnun maʼga nindxaʼwún yumbáá ndrígóo ga̱jma̱a̱ nixnúún talento mu xúʼko̱ muxpiʼta̱a̱ inuu. Numuu rí ikhaa ndaʼyoo dí mámbáa yumbáá ndrígóo mixtiʼkhu xóo ejmañún. Ikha jngóo mámbáa nixnúu talento xó má kaʼyoo. * Bi̱ timbáa nixnúu mbá witsu talento, bi̱ maʼni raga̱jmi̱i̱n nixnúu a̱jma̱ talento, bi̱ mani ragajtsíin nixnúu mbóó talento. A̱jmi̱i̱n ndiyáá májánʼ xóo majmúún mbújkha̱a̱ rúʼko̱ ga̱jma̱a̱ nikhánún itháán mu muxnáa patriún. Mú bi̱ maʼni ragajtsíin nda̱a̱ dí niʼni ga̱jma̱a̱ talento dí nigruigú, ikha jngóo patriúun nixkoo maʼga̱a̱.

8. Náá numuu rí ma̱ndoo maxtáa gagi bi̱ timbáa yumbáá rá.

⁸ Mbáa bi̱ timbáa yumbáá nixtáa gagi numuu rí patriúun nixnúu mbá witsu talento,  numuu rí mbújkha̱a̱ rúʼko̱ nindxu̱u̱ mba̱a̱ wéñuuʼ. Ga̱jma̱a̱ patriúun nisngájma rí naku̱mu̱u̱ kaʼyoo ikhaa. Ndiéjunʼ gándoo gúʼthá ga̱jma̱a̱ numuu bi̱ maʼni raga̱jmi̱i̱n yumbáá rá. Yumbáá bugi̱ ma̱ndoo majmáa a̱jkiu̱u̱n numuu rí takhánáá mba̱a̱ talento ki xóo bi̱ timbáa yumbáá. Mu ndiéjuunʼ niʼni ikhaa xá.

9. Ndiéjuunʼ dí na̱nguá niʼthí Jesús ga̱jma̱a̱ numuu bi̱ maʼni raga̱jmi̱i̱n yumbáá rá. (Mateo 25:22, 23.)

⁹ (Atraxnuu Mateo 25:22, 23). * Jesús na̱nguá niʼthí rí bi̱ maʼni raga̱jmi̱i̱n yumbáá nikiʼnáa o nijmáa a̱jkiu̱u̱n numuu rí káaʼ a̱jma̱ talento nixnáá. Ga̱jma̱a̱ na̱nguá nisngájma dí yumbáá bugi̱ niʼthí: “I̱ndó má rígi̱ gúxnuʼla ráʼ. ¡Ikhúún ma̱ngaa najmún nañajunʼ xó má bi̱ nigruigú witsu talento! Á mu patriúnʼ ndaʼyoo rí na̱nguá gúʼdoo numuʼ, itháán májánʼ rí madu mbújkha̱a̱ ga̱jma̱a̱ ma̱ni̱ ñajunʼ ndrígóʼ ikhúún”.

10. Ndiéjuunʼ niʼni bi̱ raga̱jmi̱i̱n yumbáá ga̱jma̱a̱ talento rí nikhánáá rá.

¹⁰ Xó má bi̱ timbáa yumbáá ikha̱á má kayuuʼ niʼni bi̱ maʼni raga̱jmi̱i̱n, ndiʼyoo dí ra̱ʼkhá tháán gíʼdoo numuu ñajunʼ rí nikhánáá maʼni ga̱jma̱a̱ niʼni asndu xó má niʼngo̱o̱. Ga̱jma̱a̱ numuu rí niʼni nikhánúu imbá ijma̱ talento. Patriúun ra̱ʼkhá tháán nidxuu ga̱jma̱a̱ numuu tsiakii rí niʼni, ikhú nixnúu itháán ñajunʼ.

11. Ndiéjuunʼ gándoo mu̱ʼni̱ mu makuwáánʼ itháán gagi rá.

¹¹ Xúʼko̱ má mangáánʼ ma̱ndoo makuwáánʼ  gagi á mu nu̱ʼni̱ asndu xó má eʼngo̱o̱ náa ñajunʼ rí nakhánulú náa xuajñuu Jeobá. Guʼtáraʼa asndu xó má eʼngo̱o̱, gúyaʼmbáá asndu xó má eʼngo̱o̱ náa ñajunʼ rí naguma náa congregación, gu̱ʼni̱ ratháá májánʼ comentario dí muxná náa reunión mu xúʼko̱ muxnúún tsiakii eʼwíinʼ, guʼyáá rí gíʼdoo numuu asignación dí nakhánulú muxná náa reunión (Hech. 18:5; Heb. 10:24, 25). Á mu nundu̱ʼu̱lú mu̱ʼni̱ mbá ñajunʼ náa congregación, guʼgualú wapháá ga̱jma̱a̱ guʼnimíjna rí maku̱mu̱ún kuyulú. Xúndxaʼwamíjna rí tikhuu ñajunʼ na̱nguá má gíʼdoo wéñuuʼ numuu ga̱jma̱a̱ rí tséyóoʼ má muriʼyáʼ mbiʼi mu muʼnilú, gu̱ʼni̱ mbá tsiakii mu mu̱ʼni̱ májánʼ ñajunʼ rí nakhánulú (Prov. 22:29). Índo̱ itháán nu̱ʼni̱ ñajuunʼ Jeobá itháán gambáxu gajmiúlú ga̱jma̱a̱ rúʼko̱ maʼni rí makuwáánʼ gagi (Gál. 6:4). Ma̱ngaa xáʼñulu mingíjyúuʼ maʼdxulu ga̱jma̱a̱ numuu imba̱a̱ ndxájulú á mu nakhánáá mbá ñajunʼ rí ikháánʼ nanigulú (Rom. 12:15; Gál. 5:26).

12. Ndiéjuunʼ niʼni Melissa ga̱jma̱a̱ Nick mu maxtáa gagi rá.

¹² Lá narmáʼáan a̱jkia̱a̱nʼ eʼni Melissa bi̱ niʼthá náa kutriga̱ ragajma bi̱ nindoo maxtáa náa Betel ga̱jma̱a̱ Náa Najuiʼsngúún bi̱ Nutaraʼa numuu Reino ráʼ. Maski ajndu meta ndrígóo xáʼngo̱o̱ gáxkamaa, mú ikhaa niʼthí: “Na̱ni̱ asndu xó má eʼngo̱o̱ mu mani̱ndxu̱ʼ precursora ga̱jma̱a̱ mataráʼa asndu náá, rígi̱ naʼni rí maxtáá gagi.” Ndiéjuunʼ niʼni Nick bi̱ niʼthá náa kutriga̱ 3 mu xáxtáa gíná numuu rí tánindxu̱u̱ siervo ministerial rá. Ikhaa niʼthí: “Niʼgíminaʼ ma̱ni̱ rí najmañuʼ xóo dí mataráʼaʼ ga̱jma̱a̱ maxna comentario náa reunión dí maxnún tsiakii eʼwíinʼ, ma̱ngaa nini̱ majthíí solicitud rí maʼgá náa Betel, mbá tsiguʼ nda̱wa̱á nithu̱nʼ rí maʼgá.”

13. Ndiéjuunʼ gándoo marigá á mu nu̱ʼni̱ tsiakimijna mu̱ʼni̱ májánʼ ñajunʼ rí kuaʼdáálu xúgi̱ rá. (Eclesiastés 2:24.)

¹³ Lá rúʼko̱ eyoo gáʼthúu̱n á mu nu̱ʼni̱ tsiakimijna mu̱ʼni̱ májánʼ ñajunʼ rí kuaʼdáálu dí mbiʼi xúgi̱, makhánulú itháán ñajunʼ nda̱wa̱á ráʼ. Mbáa xúʼko̱, xó má nigíʼnuu nick, á mu na̱nguá ma̱ndoo marigá xó má nigíʼnuu Melissa. Asndu xkáʼníí má mú ma̱ndoo makuwáánʼ gagi ga̱jma̱a̱ rí nu̱ʼni̱ (atraxnuu Eclesiastés 2:24). * Ma̱ngaa ma̱ndoo makuwáánʼlu gagi numuu rí nduʼyáá dí nanigu̱u̱ʼ tsiakii rí nuʼnilú Jesucristo.

14. Ndiéjunʼ meta ma̱ndoo muʼgíʼ mu̱ʼni̱ rá.

¹⁴ Á mu kuwáánʼ má ru̱ʼni̱ asndu xó má eʼngo̱o̱ ñajuunʼ Jeobá, lá rúʼko̱ eyoo gáʼthúu̱n rí xáʼyóoʼ má muʼnilú itháán májánʼ rá. Na̱nguá, ma̱ndoo muʼgíʼ meta rí muʼtáraʼa ga̱jma̱a̱ muʼsngáa itháán májánʼ ma̱ngaa rí mumbaʼñún a̱ngiu̱lú. Ma̱ndoo muxkamaa meta rígi̱ á mu nuʼnimíjna manindxu̱lú xa̱bu̱ bi̱ najmañuu ga̱jma̱a̱ xa̱bu̱ guabaaʼ ma̱ngaa rí mumbaʼñún eʼwíinʼ, raʼkháa rí mbuʼyáʼ i̱ndó rí ndayúlú ikháánʼ (Prov. 11:2; Hech. 20:35).

15. Ndiéjuunʼ meta ma̱ndoo muʼgíʼ mu̱ʼni̱ mu makuwáánʼ itháán gagi rá.

¹⁵ Ndiéjunʼ meta ma̱ndoo muʼgíʼ mu̱ʼni̱ rá. Gunda̱ʼa̱a̱ Jeobá rí mambáyulú mbuʼyáá ndiéjunʼ meta ma̱ndoo mugíʼ mu̱ʼni̱ (Prov. 16:3; Sant. 1:5). Ma̱ndoo mbuʼyáá tikhuu meta rí niʼthá náa  kutriga̱ timbá, xóo dí manindxu̱lú precursor auxiliar o regular, muʼgua náa Betel o náa naguma guʼwá, ma̱ndoo majmañulú imbo̱o̱ʼ ajngáa mu muʼtáruʼúún itháán xa̱bu̱ o muʼgua gákuwáánʼlu náa ndayóoʼ rí mixtiembáá miʼtáraʼa. Á mu nandulú mbuʼyáá itháan ga̱jma̱a̱ numuu meta rígi̱, ma̱ndoo mbuʼyáá náa capítulo 10 ndrígóo libro Organizados para hacer la voluntad de Jehová ma̱ngaa muʼtamíjná gajmiúlú  mbáa bi̱ kayá edxu̱u̱ náa congregación ndrígúlú. * Índo̱ ikháánʼ nu̱ʼni̱ mbá tsiakii mu muxkamaa meta rí niʼgilú mu̱ʼni̱, rúʼko̱ gáʼni rí makuwáánʼ itháán gagi ga̱jma̱a̱ eʼwíinʼ ma̱ndoo mbuyáá rí mambáxulu májánʼ gajmiúlú Jeobá.

16. Ndiéjuunʼ gándoo mu̱ʼni̱ á mu tséʼngo̱o̱ gúxkamaa nimbá meta rá.

¹⁶ Á mu dí xúgi̱ tséʼngo̱o̱ gátaxkamaa nimbá meta rí niʼthálú, atagíʼ mbá meta rí maʼngaaʼ mataxkamaa. Guʼyáá tikhuu meta rí ma̱ndoo mataʼgíʼ matani̱.

17. Xó má naʼthí náa 1 Timoteo 4:13, 15, ndiéjuunʼ gándoo maʼni mbáa ndxájulú mu ma̱ndoo mani̱ndxu̱u̱ mbáa bi̱ naʼsngáa májánʼ rá.

¹⁷ (Atraxnuu 1 Timoteo 4:13, * 15). * Á mu ikháán nindxa̱a̱ʼ mbáa ndxájulú xa̱biya̱ bi̱ nijngúun má iyááʼ, ma̱ndoo mataʼgíʼ meta rí maraxna itháán májánʼ discurso ga̱jma̱a̱ marasngáa. Náá numuu rá. Á mu ikháán natraxnuu xúgíʼ mbiʼi, naraxná májánʼ discurso ga̱jma̱a̱ narasngáa, ra̱ʼkhá tháán gámbañún a̱ngiu̱lú. Atagíʼ meta rí matanigajmaa̱ ma̱ngaa rí mataʼgíʼ matani̱ rí na̱ʼkha̱ náa folleto Gajmañaaʼ matraxnuu ga̱jma̱a̱ marasngáa májánʼ, atraxnuu mámbá kíxnuu ga̱jma̱a̱ atagíʼ matani̱ rígi̱ náa guʼwáaʼ ma̱ngaa índo̱ naraxná discurso. Atanda̱ʼa̱a̱ mbáa ndxájulú Bi̱ nayambáá maxná consejo * mu mambáyaaʼ o imba̱a̱ ndxájulú bi̱ kayá edxu̱u̱ náa congregación ‹bi̱ nañajunʼ  gagi mu maʼthí ga̱jma̱a̱ naʼsngáa› (1 Tim. 5:17). Raʼkháa i̱ndó mataʼgíʼ matani̱ rí nijmañaaʼ náa folleto ma̱ngaa atambáñún bi̱ nudxawaanʼ mu xúʼko̱ maʼni gújkhúʼ fe ndrígu̱ún ga̱jma̱a̱ mugíʼ muni̱ rí najmañún. Á mu natani̱ xúʼko̱ ikháán ma̱ndoo maraxtaa itháán gagi xúʼko̱ má bi̱ nudxawaanʼ ma̱ngaa.

18. Mu matani̱ itháán májánʼ ñajunʼ rí kajkuáa ñawáanʼ, ndiéjuunʼ gándoo matani̱ rá.

¹⁸ Xúgiáánʼ bi̱ ni̱ndxu̱lú cristianos kuaʼdáá mbá ñajunʼ rí muʼtáraʼa ga̱jma̱a̱ rí mbuʼñíinʼ xa̱bu̱ (Mat. 28:19, 20; Rom. 10:14). Lá nanigua̱a̱ʼ matani̱ itháán májánʼ ñajunʼ rígi̱ ráʼ. Á mu dí xúʼko̱ ma̱ndoo matanigajmaa̱ folleto Marasngáa ga̱jma̱a̱ atagíʼ meta rí ma̱ndoo mambáyaaʼ mataʼgíʼ matani̱ rí nijmañaaʼ. Ma̱ngaa ma̱ndoo mataxkamaa rí mambáyaaʼ náa I̱yi̱i̱ʼ dí najmulú náa Reunión Xóo kúwi̱i̱n ga̱jma̱a̱ xóo Etaraʼa Cristianos ga̱jma̱a̱ video náa na̱ʼkha̱ xkri̱da xóo marataráʼa rí nduʼyáá náa reunión taguapha xmáná. Atagíʼ matani̱ rí najmañaaʼ mu ma̱ta̱ya̱a̱ ndiéjuunʼ rí nayambáá itháan, á mu natani̱ rígi̱ ma̱ndoo maraxtaa itháán gagi índo̱ narasngáa (2 Tim. 4:5).

19. Ndiéjuunʼ gándoo mambáyulú mu maguaʼdáá cualidad rí nanigu̱u̱ʼ Dios rá.

¹⁹ Mbá dí ragíʼmaa mambumulú rí muʼgíʼ meta dí maguaʼdáá cualidad rí nanigu̱u̱ʼ Dios (Gál. 5:22, 23; Col. 3:12; 2 Ped. 1:5-8). Xú káʼnii gándoo mu̱ʼni̱ rá. Mbá xkri̱da, á mu nandulú maguáʼdáá mbá fe gújkhúʼ ma̱ndoo muraxnuu artículo náa naʼthí ga̱jma̱a̱ numuu tema rúʼko̱. Ma̱ngaa ma̱ndoo mambáyulú video ma̱jkha̱ʼ dí na̱ʼkha̱ náa JW Broadcasting^® náa naʼthí ga̱jma̱a̱ numún a̱ngiu̱lú bi̱ nisngajma fe índo̱ niraʼníí gamiéjunʼ gakhi̱i̱. Nda̱wa̱á gundxaʼwamíjna̱ xú káʼnii gúʼyaridáá fe ndrígu̱ún.

20. Ndiéjuunʼ gándoo mu̱ʼni̱ mu makuwáánʼ itháán gagi ga̱jma̱a̱ xákuwáánʼ gíná rá.

²⁰ Gajkhun rí xúgiáanʼlú nandulú mu̱ʼni̱ itháán ñajuunʼ Dios raʼkháa xóo rí nuʼnilú xúgi̱. Náa numbaaʼ nuxi̱ʼ rí Jeobá nakudaminaʼ maxnúlú ikhí ma̱ndoo mu̱ʼni̱ itháán ñajuunʼ. Índo̱ kuwáánʼlu ruguaʼthi̱i̱n maʼga̱nú mbiʼi rúʼko̱, ma̱ndoo mu̱ʼni̱ asndu xó má eʼngo̱o̱ ñajuunʼ Jeobá rí mbiʼi xúgi̱, ga̱jma̱a̱ rúʼko̱ gáʼni rí makuwáánʼlu gagi ga̱jma̱a̱ xákuwáánʼlu gíná. Rí itháán gíʼdoo numuu nindxu̱u̱ rí mu̱ʼni̱ mba̱a̱ Jeobá ga̱jma̱a̱ mbuʼyamajkuíí bi̱ nindxu̱u̱ ‹Dios gagi› (1 Tim. 1:11). Ikha jngóo gaʼdxúlú rí nandoo nu̱ʼni̱ ga̱jma̱a̱ numuu Jeobá dí mbiʼi xúgi̱.