1, 2. a) Xú káʼnii eʼyáá rí ma̱ndoo mambáxulúʼ gajmiúlú Dios rá. b) Ndiéjunʼ gúʼthá náa artículo rígi̱ rá.

 ÍNDO̱ nagumáanʼ asndu índo̱ nakháñulú, rí itháan nda̱yúlúʼ rí maʼndún kuyulúʼ. Xa̱bu̱ numbaaʼ nda̱yúlúʼ mambaxúlúʼ gajmiúlú bi̱ maʼndún kuyulúʼ, raʼkháa i̱ndó rí maʼndulú kuʼyáá mbáa xa̱biya̱ o mbáa a̱ʼgu̱. Mú itháan ndayóoʼ mambaxúlúʼ gajmiúlú Dios ga̱jma̱a̱ rí maʼndoo kaʼyulúʼ. Mbaʼin xa̱bu̱ nakumún rí xándoo rúʼko̱, numuu rí Dios tsikujmaa ga̱jma̱a̱ gíʼdoo wéñuʼ tsiakii. Mú ikháanʼ nduʼyáá rí ma̱ndoo mambaxúlúʼ gajmiúlú Jeobá.

² Xú káʼnii eʼyáá rá. Numuu rí náa Biblia naʼthí ga̱jma̱a̱ numún xa̱bu̱ bi̱ nimbáxu̱u̱n gajmiún Dios. Májánʼ gánindxu̱u̱ rí mundxaʼwamíjna̱ ga̱jma̱a̱ numún ma̱ngaa rí mbuʼyaridúún. Náa numuu rá. Numuu rí itháan gíʼdoo numuu mambáxulúʼ gajmiúlú Dios. Náa artículo rígi̱ gúʼthá ga̱jma̱a̱ numuu xkri̱da ndrígóo Abrahán  (atraxnuu Santiago 2:23). * Ikhaa nimbáxu̱u̱ ga̱jma̱a̱ Dios numuu rí nigiʼdoo fe náa ikhaa. Ikha jngó náa Biblia naʼthí rí ikhaa nindxu̱u̱ ‹anu̱ún xúgínʼ bi̱ guáʼdáá fe› (Rom. 4:11). Índo̱ kuwaanʼ ruʼnigajmaa artículo rígi̱, guraximíjna̱: “Ndiéjunʼ gándoo gáni mu magúʼdoo mbá fe xóo rí nigiʼdoo Abrahán ga̱jma̱a̱ mambáxuʼ májánʼ ga̱jmu̱ʼ Jeobá rá.”

3, 4. a) Xú káʼnii nisngájma itháan fe Abrahán rá. b) Ndiéjunʼ ni̱jkha̱nú ndiʼyoo májánʼ Abrahán numuu rí nigiʼdoo fe rá.

³ Atatsaʼwáminaʼ ga̱jma̱a̱ numuu Abrahán rí gíʼdoo 125 tsiguʼ ga̱jma̱a̱ rí mañúú xtáa ratsimuu náa kúbá ^[1] (atayáá nota rí na̱ʼkha̱ náa námbá artículo). Ki̱dxu̱ʼ xtáa ra̱jkha̱ a̱ʼdióo Isaac, bi̱ gíʼdoo mbá 25 tsiguʼ. Abrahán kayá mbá chílú ga̱jma̱a̱ i̱ʼwáʼ rí maskámuu ga̱jma̱a̱ aguʼ. Isaac kagu̱ ixi̱. Rígi̱ ninindxu̱u̱ itháan mingíjyúuʼ rí niʼni xúgíʼ mbiʼi rí nixtáa Abrahán. Náa numuu rá. Raʼkháa numuu rí xa̱bu̱ nikhi̱i̱ má nindxu̱u̱, Abrahán xóó migújkuíʼ wéñuʼ. Ninindxu̱u̱ mingíjyúuʼ wéñuʼ numuu rí nda̱wa̱á maxnáxi̱i̱ a̱ʼdióo xó má niʼthúu̱n Jeobá (Gén. 22:1-8).

⁴ Rígi̱ ninindxu̱u̱ náa nisngájma itháan fe Abrahán. Tikhun nuthi rí Dios nindxu̱u̱ ra̱májánʼ índo̱ niʼthúu̱n Abrahán rí maxnáxi̱i̱ a̱ʼdióo Isaac xóo tsigijñaʼ. Eʼwíínʼ nuthi rí Abrahán niriʼña rí maxnáxi̱i̱ a̱ʼdióo numuu rí na̱nguá nindoo kaʼyoo. Bi̱ nuthi rígi̱ na̱nguá guáʼdáá fe (1 Cor. 2:14-16). Abrahán niʼnimbo̱o̱ kaʼyoo Dios numuu rí ndiʼyoo rí niʼni. Niʼnimbo̱o̱ numuu rí nigiʼdoo mbá fe gajkhun. Ndaʼyoo májánʼ rí Jeobá xándo̱ʼo̱o̱ mbá rí maʼni gawúunʼ. Ga̱jma̱a̱ ndaʼyoo májánʼ rí á mu naʼnimbo̱o̱ kaʼyoo Dios, ikhaa maʼni tsajkurámááʼ ga̱jma̱a̱ a̱ʼdióo. Mu magiʼdoo mbá fe gujkhuʼ, Abrahán ndiyóoʼ magiʼdoo ku̱ma̱ ga̱jma̱a̱ rí majmañuu. Xú káʼnii niʼni xá.

5. a) Xú káʼnii Abrahán ni̱jkha̱nú nininiʼ Jeobá rá. b) Ndiéjunʼ ni̱jkha̱nú niʼni Abrahán ga̱jma̱a̱ numuu rí nininiʼ Dios rá.

⁵ Ku̱ma̱. Abrahán nigumaa náa xuajin Ur.  Ikhí xa̱bu̱ nduyamajkhún xándú ga̱jma̱a̱ anu̱u̱ Abrahán ma̱ngaa ndiʼyamajkhún (Jos. 24:2). Mú, xú káʼnii Abrahán nininiʼ Jeobá rá. Náa Biblia naʼsngáa rí ikhaa na̱ʼkha̱ náa e̱ji̱i̱n Sem, mbáa a̱ʼdióo Noé. Ga̱jma̱a̱ Sem nikháñu índo̱ Abrahán gíʼdoo 150 tsiguʼ. Sem ra̱ʼkhá tháán nigiʼdoo fe náa Jeobá, ga̱jma̱a̱ mbáa ikhaa niʼthún bi̱ kuwa náa goʼwóo ga̱jma̱a̱ numuu Jeobá. Mbáa xúʼko̱ rí Abrahán nininiʼ Jeobá. Ga̱jma̱a̱ numuu ku̱ma̱ rígi̱, Abrahán ni̱jkha̱nú nindoo kaʼyoo Jeobá ga̱jma̱a̱ nigiʼdoo fe.

6, 7. Ndiéjunʼ nimbáyúu Abrahán mu magiʼdoo itháan fe rá.

⁶ Rí nijmañuu. Xú káʼnii ni̱jkha̱nú nigiʼdoo itháan fe Abrahán rá. Mbaʼin nuthi rí ku̱ma̱ narkawo asndu náa a̱jkiu̱lú ga̱jma̱a̱ rígi̱ naʼni muʼni rí nandulúʼ. Ga̱jma̱a̱ rúʼko̱ rí nigíʼnuu Abrahán. Ikhaa nijmañuu mbaʼa ga̱jma̱a̱ numuu Dios. Ku̱ma̱ rúʼko̱ ni̱jkha̱ kayáa mbaʼyamajkuu wéñuʼ Jeobá Dios ‹bi̱ itháan mba̱a̱› (Gén. 14:22). Xóo muʼthá, rígi̱ nixkaxi̱i̱ mu xáʼni mbá rí Jeobá tsíniguuʼ (Heb. 5:7). Ga̱jma̱a̱ rúʼko̱ niʼni rí ikhaa maʼnimbo̱o̱ kaʼyoo má xúʼko̱ Jeobá. Á mu ikháanʼ nandulúʼ mambaxúlúʼ gajmiúlú Dios, mangáanʼ gíʼmáanʼ mbuʼyamajkuíí wéñuʼ (Sal. 25:14).

⁷ Dios niʼthúu̱n Abrahán ga̱jma̱a̱ Sara rí magajnún náa xuajñún mu magún gakuwa náa imbo̱o̱ xuajin rí tsiniʼnuʼ. Ikhiin ni̱ndxu̱ún má xa̱bu̱ guanii ga̱jma̱a̱ mbaʼyóoʼ makuwá náa guʼwá xtíin xúgíʼ mbiʼi rí gakuwa. Ma̱ngaa, Abrahán ndaʼyoo rí muraʼníí mbaʼa gamíi. Mú ikhaa nindoo maʼnimbo̱o̱ má xúʼko̱ náa Jeobá. Numuu rí niʼnimbo̱o̱, Dios niʼni tsajkurámááʼ ga̱jma̱a̱ niñewu̱u̱n. Mbá xkri̱da, náa Biblia naʼthí rí a̱jma̱ nuthu nigún ku̱ya̱a̱ Sara numuu rí mitsiʼyáa wéñuʼ. Migamíi rí muxiyáa Abrahán. Mú náa a̱jma̱ nuthu rígi̱ Jeobá niʼni mbá milagro ma̱ngaa niñewu̱u̱n Abrahán ga̱jma̱a̱ Sara (Gén. 12:10-20; 20:2-7, 10-12, 17, 18). Rígi̱ niʼni magiʼdoo itháan fe Abrahán.

8. Xú káʼnii gándoo guguaʼdáá ku̱ma̱ ga̱jma̱a̱ rí gajmañulú mu mambaxúlúʼ itháan májánʼ gajmiúlú Jeobá rá.

⁸ Ikháanʼlu rá. Lá ma̱ndoo mambaxúlúʼ gajmiúlú Jeobá ráʼ. Ma̱ndoo. Ndayóoʼ majmañulúʼ ga̱jma̱a̱ numuu Jeobá, xó má Abrahán. Ma̱ngaa ndayóoʼ maguaʼdáá ku̱ma̱ ga̱jma̱a̱ rí majmañulúʼ. Xú káʼnii rá. Abrahán tágiʼdoo Biblia mú ikháánʼ kuaʼdáá (Dan. 12:4; Rom. 11:33). Náa Biblia naʼthí mbaʼa wéñuʼ ku̱ma̱ ndrígóo Dios. Rí gajmañulú maʼni rí maʼndulú kuʼyáá ga̱jma̱a̱ mbuʼyamajkuíí wéñuʼ Jeobá. Ga̱jma̱a̱ rígi̱ maʼni rí muʼnimbulúʼ kuʼyáá. Ikhú ikhaa mañewu̱nlú ga̱jma̱a̱ maʼni tsajkurámáánʼ, ga̱jma̱a̱ rúʼko̱ mambáyulúʼ mu  majmañulúʼ rí ndayóoʼ mu maguaʼdáá mbá fe gujkhuʼ. Rí muʼni ñajunʼ Jeobá ga̱jma̱a̱ xúgíʼ a̱jkiu̱lú maʼni rí makuwáanʼ gagi ga̱jma̱a̱ tsímáá (Sal. 34:8; Prov. 10:22). Índo̱ guguaʼdáá itháan ku̱ma̱ ga̱jma̱a̱ numuu Dios ga̱jma̱a̱ rí majmañulúʼ, mambaxúlúʼ itháan májánʼ gajmiúlú Jeobá.

9, 10. a) Ndiéjunʼ eyóoʼ muʼni mu mambaxúlúʼ májánʼ gajmiúlú mbáa rá. b) Xú káʼnii niñawu̱u̱n Abrahán rí nimbáxu̱u̱ ga̱jma̱a̱ Jeobá rá.

⁹ Rí mambaxáʼ ga̱jma̱ʼ mbáa gíʼdoo wéñuʼ numuu. Á mu nandulúʼ mambáxulúʼ má xúʼko̱ gajmiúlú, ndayóoʼ muñewa̱a̱n (atraxnuu Proverbios 17:17). * Na̱nguá nindxu̱u̱ xóo mbá guʼwá rí nda̱wa̱a̱ tsáa xtáa o nda̱wa̱a̱ tsáa eñawu̱u̱n. Rí mambaxáʼ ga̱jma̱ʼ mbáa nindxu̱u̱ xóo mbá ixi̱ ri̱ʼi̱ rí mitsaan rí ndayóoʼ mixtiewa̱a̱n. Abrahán ndiʼyoo rí gíʼdoo numuu rí mambáxúu ga̱jma̱a̱ Jeobá ikha jngó niñewu̱u̱n má xúʼko̱. Xú káʼnii niʼni xá.

¹⁰ Abrahán niʼnimbo̱o̱ má xúʼko̱ ga̱jma̱a̱ ndiʼyamajkuu Dios. Mbá xkri̱da, índo̱ kuwa ragún gajmíi̱n bi̱ kuwa náa goʼwóo ga̱jma̱a̱ bi̱ numbayíí náa xuajin rí Dios niʼthún magún, Abrahán niraʼwíí má xúʼko̱ rí nindoo Dios tséʼniuu á mu mingíjyúuʼ o ra̱mingíjyúuʼ. Mbá tsiguʼ wapháá nákha xóó tsegumaa Isaac, Jeobá niʼthúu̱n rí murujtu xtóo xuñúnʼ xúgínʼ xa̱bekha bi̱ kuwa náa goʼwóo (atayáá kúgumaʼá “Ndiéjunʼ eyoo gáʼthúu̱n”). Ikhú, Abrahán nigiʼdoo 99 tsiguʼ. Ndiéjunʼ niʼni xá. Lá niraxi̱ á mu májánʼ ganindxu̱u̱ rí niʼthí Jeobá xáʼ. Lá niʼthí rí xándoo maʼni xáʼ. Na̱nguá. Rí ikhaa niʼni, nikumu̱u̱ kaʼyoo Dios ga̱jma̱a̱ niʼnimbo̱o̱ ‹ikháá má mbiʼi rúʼko̱› (Gén. 17:10-14, 23).

11. a) Náa numuu rí nixmiéjunʼ Abrahán rá. b) Xú káʼnii nimbáyúu Jeobá Abrahán rá.

¹¹ Abrahán nimbáxu̱u̱ májánʼ ga̱jma̱a̱ Jeobá numuu rí nikumu̱u̱ kaʼyoo má xúʼko̱ náa xúgíʼ rí niraʼwíí maʼni. Nikumu̱u̱ rí ma̱ndoo maʼthúu̱n xúgíʼ kayuʼ rí naʼniuu miʼskhoo makro̱ʼo̱o̱. Mbá xkri̱da, índo̱ Jeobá niʼthúu̱n maʼni gámbáa Sodoma ga̱jma̱a̱ Gomorra, Abrahán nixmiéjunʼ wéñuʼ. Náa numuu rá. Numuu rí nikumu̱u̱ rí makhañún xa̱bu̱ bi̱ ra̱míjínʼ ga̱jma̱a̱ bi̱ míjínʼ. Mbáa nikumu̱u̱ kaʼyoo aʼdá rixio̱o̱ Lot gajmíi̱n bi̱ kuwa náa goʼwóo, bi̱ kuwa náa Sodoma. Mú Abrahán nikumu̱u̱ kaʼyoo Jeobá, ‹bi̱ naʼtáñajunʼ náa xúgíʼ Ku̱ba̱ʼ›. Ikha jngó niʼthúu̱n Dios xúgíʼ rí naʼni maxmiéjunʼ. Xú káʼnii nimbáyúu Jeobá xá. Jeobá niʼngo̱o̱ a̱jkiu̱u̱n ga̱jma̱a̱ nimbáyúu mbaʼyoo rí ikhaa májánʼ a̱jkiu̱u̱n. Niʼthúu̱n rí índo̱ ikhaa maʼni gámbíin xa̱bu̱, mbañíinʼ xa̱bu̱ bi̱ míjínʼ mu maʼni káwíin (Gén. 18:22-33).

12, 13. a) Índo̱ Jeobá nindo̱ʼo̱o̱ Abrahán rí maxnáxi̱i̱ Isaac, xú káʼnii nimbáyúu ku̱ma̱ ga̱jma̱a̱ rí nijmañuu xá. b) Náa numuu eʼyáá rí Abrahán nigiʼdoo fe náa Jeobá rá.

¹² Nakujmaa kaʼwu rí ku̱ma̱ ga̱jma̱a̱ rí nijmañuu Abrahán nimbáyúu mu mañewu̱u̱n  dí mambaxúu ga̱jma̱a̱ Jeobá. Ikha jngó, índo̱ Jeobá niʼthí dí maxnáxi̱i̱ Isaac xóo tsigijñaʼ, Abrahán ndiʼyoo kaʼwu rí Dios nindxu̱u̱ májáánʼ, naʼngo̱o̱ a̱jkiu̱u̱n ga̱jma̱a̱ nagáwiinʼ a̱jkiu̱u̱n. Ndiʼyoo rí Jeobá táriʼkuminaʼ mbá nacha̱ mu mani̱ndxu̱u̱ bi̱ ra̱májánʼ ga̱jma̱a̱ bi̱ naʼni gíníi xa̱bu̱. Náa numuu eʼyáá rá.

¹³ Nákha xóó tsitsimuu náa kúbá ga̱jma̱a̱ Isaac, Abrahán niʼthún bi̱ numbayíí: “Aguanála gi̱i̱ gajmiála burru, mú ikhúúnʼ ga̱jmu̱ʼ dxámá nanduxu muʼguá ñuʼún, mbuyamajkuííxu Dios, ga̱jma̱a̱ nda̱wa̱á matangáanʼxu náa ikháanʼla” (Gén. 22:5). Náa numuu rí Abrahán niʼthún xa̱bi̱i̱ rí Isaac ma̱ngaa mata̱nga̱a̱ rá. Lá niʼninduwiinʼ xáʼ. Na̱nguá. Náa Biblia naʼthí rí ikhaa naku̱mu̱u̱ kaʼyoo Jeobá rí ikhaa makuxi̱i̱ Isaac (atraxnuu Hebreos 11:19). * Ikhaa ndiʼyoo rí Dios niʼni dí ikhaa ga̱jma̱a̱ Sara muguaʼdaa mbáa ada̱ maski ajndu ikhiin ninindxu̱ún xa̱bu̱ guanii (Heb. 11:11, 12, 18). Ikha jngó, ndiʼyoo rí Dios xúgíʼ ma̱ndoo maʼni. Gajkhun má, táʼyoo ndiéjunʼ garigá mbiʼi rúʼko̱. Mú nigiʼdoo fe dí á mu rí Isaac gakhañu, Jeobá maʼnigabi̱i̱ mu maʼnimbánuu dí niʼthí maʼni. Ikha jngó náa Biblia naʼthí rí Abrahán nindxu̱u̱ ‹anu̱ún xúgínʼ bi̱ guáʼdáá fe›.

14. a) Náa biʼyaa xkujndu rí nuraʼníí tikhun xa̱bi̱i̱ Dios rá. b) Xú káʼnii embáyulú xkri̱da ndrígóo Abrahán rá.

¹⁴ Rí mbiʼi xúgi̱ Jeobá tsénda̱ʼa̱ rí muxnaxíi mbáa aʼdiúlú. Mú na̱ndu̱ʼu̱lú rí muʼnimbánii rí naʼthá ñajunlú muʼni. Mbáa nguáná xákru̱ʼu̱lú náa numuu rí naʼthúlúʼ muʼni xúʼko̱. O mbáa asndu xóo naʼniulú mingíjyúuʼ muʼnimbulúʼ. Mbá xkri̱da, mbáa tikuáanʼ naʼniulú mingíjyúuʼ muʼtáraʼa ga̱jma̱a̱ naʼniulú miʼskhaa muʼtámíjná gajmiúlú bi̱ tsiniʼnuʼ. Tikuáanʼ namíñulú manindxu̱lúʼ mixtiʼkuáanʼ náa xa̱bu̱ bi̱ nuñajunʼ gajmiúlú o bi̱ nuʼnigajmaa gajmiúlú (Éx. 23:2; 1 Tes. 2:2). Á mu nakumulú xúʼko̱ kaʼnii, ndiéjunʼ gándoo muʼni rá. Garmáʼáan a̱jkiu̱lú náa fe rí nigiʼdoo Abrahán ga̱jma̱a̱ rí tamíñu. Á mu nugíʼ nundxa̱ʼwa̱míjna̱ rí nini xa̱bekha mangiin gu̱ʼu̱ bi̱ niguajun jmbu xóo Abrahán, ma̱ndoo mbuʼyáridún mu mambáxulúʼ itháan májánʼ gajmiúlú Jeobá (Heb. 12:1, 2).

15. Náa numuu eʼyáá rí Abrahán tagáwinʼ a̱jkiu̱u̱n rí niʼnimbo̱o̱ kaʼyoo Jeobá rá.

¹⁵ Abrahán nimbá miʼtsú tagawiinʼ a̱jkiu̱u̱n rí niʼnimbo̱o̱ kaʼyoo Jeobá. Xú káʼnii eʼyáá rá. Numuu rí náa Biblia naʼthí rí ikhaa nikháñu índo̱ gíʼdoo 175 tsiguʼ, “índo̱ nindxu̱u̱ mbáa xiʼñáʼ, xa̱bu̱ nikhi̱i̱ ga̱jma̱a̱ nidxuu rí nixtáa mba̱yu̱ʼ” (Gén. 25:8). Rígi̱ tsíyoo gáʼthúu̱n rí Abrahán nánguá eyoo maxtáa. Nandoo gáʼthúu̱n rí ikhaa nixtáa gagi índo̱ nindxa̱ʼwáminaʼ xúgíʼ rí niʼni. Náa numuu rá. Numuu rí nigiʼdoo itháan numuu rí mambaxúu ga̱jma̱a̱ Jeobá.

16. Náa numuu rí maxtáa gagi wéñuʼ Abrahán náa Ku̱ba̱ʼ mitsaan rá.

 ¹⁶ Náa Biblia naʼthí rí Abrahán “nigi̱ʼthu̱u̱n mbá xuajen rí wíji̱ májánʼ, numuu rí bi̱ nitsiji ga̱jma̱a̱ bi̱ niʼni nindxu̱u̱ Dios” (Heb. 11:10). “Xuajen” rígi̱ nandoo gáʼthúu̱n Reino ndrígóo Dios. Abrahán nigiʼdoo fe rí maʼga̱nú mbá mbiʼi rí mbaʼyoo “xuajen” rúʼko̱ rí maʼtáñajunʼ náa xúgíʼ tsu̱du̱u̱ Ku̱ba̱ʼ. Ga̱jma̱a̱ xúʼko̱ má gáʼni. Atatsaʼwáminaʼ rí Abrahán maxtáa gagi índo̱ gáxtáa náa Ku̱ba̱ʼ mitsaan ga̱jma̱a̱ mambáxu̱u̱ itháan májánʼ ga̱jma̱a̱ Dios. Manigu̱ʼ mbaʼyoo rí xkri̱da ndrígóo ga̱jma̱a̱ fe rí nigiʼdoo nimbáñun mbaʼin wéñuʼ xa̱bi̱i̱ Dios. Mbaʼyoo rí nigiʼdoo wéñuʼ numuu rí niʼni ga̱jma̱a̱ Isaac náa kúbá rúʼko̱ ma̱ngaa rígi̱ ninindxu̱u̱ mbá xkri̱da rí marigá nda̱wa̱á (Heb. 11:19). Ga̱jma̱a̱ mbaʼyoo rí gaʼkhu rí niraʼnuu índo̱ ni̱jkha̱ gáxnaxíi a̱ʼdióo nimbáñun mbaʼin wéñuʼ xa̱bu̱ jmbiin. Ndiéjunʼ nimbáñun xá. Nimbáñun makru̱ʼu̱u̱n xú káʼnii nikumu̱u̱ Jeobá índo̱ nikuʼmaa Jesús makhañúu ga̱jma̱a̱ numún xa̱bu̱ numbaaʼ (Juan 3:16). Xkri̱da ndrígóo Abrahán nambáyulúʼ mu mbuʼyamajkuíí itháan tsigijñaʼ ndrígóo Jesús, mbá ngajua rí nigiʼdoo itháan numuu náa numbaaʼ.

17. a) Ndiéjunʼ gíʼmaa muʼgíʼ muʼni rá. b) Ndiéjunʼ gúʼyáá náa imbo̱o̱ artículo rá.

¹⁷ Gúʼgíʼ mbuʼyaridáá xkri̱da ndrígóo Abrahán rí ikhaa nigiʼdoo fe. Xó má ikhaa mangáanʼ ndayúlú ku̱ma̱ ga̱jma̱a̱ rí nijmañulúʼ. Á mu najmañulúʼ ga̱jma̱a̱ numuu Jeobá ma̱ngaa nuʼnimbulúʼ, mbuʼyáá xú káʼnii eʼni tsajkurámáánʼ ga̱jma̱a̱ nañewu̱nlú (atraxnuu Hebreos 6:10-12). * Xúʼko̱ ikhaa mambaxúu ga̱jma̱á ni̱ndxu̱lú kámuu mbiʼi. Náa imbo̱o̱ artículo mbuʼyáá xkri̱da ndrígu̱ún ajtsíin bi̱ nimbáxu̱u̱n májánʼ gajmiún Dios.