NIXTÁÁ tsiguʼ 1926 náa Crooksville, mbá xuajen dí rígá náa Ohio (Estados Unidos). Ikhúúnʼ nigúʼdiin mbá juwiin a̱ngui̱nʼ. Anu̱ʼ ga̱jma̱a̱ ru̱dúʼ túyamajkuíí wéñuʼ religión, mú nixuʼmáanʼxu xúgiáanʼ mu̱ʼguáxu náa guʼwá ndxajkun. Ikhúúnʼ ni̱jkhá náa guʼwá ndxajkun Metodista. Índo̱ nigúʼdoo 14 tsiguʼ, náa guʼwá ndxajkun nixnuʼ mbá premio numuu rí tatigoʼ nimbá domingo rí mbá tsiguʼ.

Nákha ikhú, mbáa a̱ʼgu̱ bi̱ xtáa mijngii náa guʼwúxu nindxu̱u̱ mbáa bi̱ naʼtáraʼa numuu Jeobá, ikhaa nigíʼdu̱u̱ ni̱ʼkha̱ raʼyoo ru̱dúʼ mu maʼsngóo ga̱jma̱a̱ numuu Biblia. Ikhaa nigumbiʼyuu Margaret Walker. Mbóo mbiʼi nindoʼ maguanúʼ madxun, mú ru̱dúʼ niʼthúu̱n rí magajnúʼ rexa̱a̱ mu xánijngawi̱i̱n. Mú ikhúúnʼ niniminaʼ madxun rí etamijná. Nda̱wa̱á rí mbaʼa ikhoo, Margaret niraxuʼ á mu nda̱yo̱o̱ xú káʼnii mbiʼyuu Dios. Ikhúúnʼ ni̱thu̱u̱n rí xúgínʼ xa̱bu̱ nduyáá rí Dios mbiʼyuu Dios. Ikhaa niʼthúunʼ rí mbaʼyáaʼ náa Biblia ndrígóʼ Salmo 83:18. Xúʼko̱ ndi̱yo̱o̱ rí Dios mbiʼyuu Jeobá. Nigájnuʼ ragayúʼ mu mbaʼñíinʼ bi̱ nambáxuʼ gajmíi̱nʼ. Ni̱thu̱u̱n á mu nandún mbuyáá xú káʼnii mbiʼyuu Dios, guyáaʼ Salmo 83:18 náa Biblia ndrígu̱ún. Ma̱ndoo muʼthá rí ikhú ninindxu̱u̱ timbá miʼtsú rí nitaráʼa.

Nda̱wa̱á dí rúʼko̱ nigíʼdu̱u̱ ranigajmaa Biblia ga̱jma̱a̱ tsiguʼ 1941 nijngúnʼ iyááʼ. Nguátha mbiʼi nda̱wa̱á nithu̱nʼ rí maxnáa estudio de libro náa congregación. Ni̱thu̱u̱n ru̱dúʼ ga̱jma̱a̱ a̱ngui̱nʼ, ikhú xúgínʼ nigi̱ʼdi̱i̱ raguwáʼ. Mú anu̱ʼ táʼndoo.

Mañu mañu nigún ruxnuʼ itháan ñajunʼ náa congregación. Ikhúúnʼ nigúʼdoo mbaʼa libro ndrígu̱ún bi̱ nutaraʼa numuu Jeobá. Mbá mbiʼi, anu̱ʼ niʼthúunʼ rí maguwíi xúgíʼ libro ga̱jma̱a̱ rí magajnúʼ náa goʼwóo. Xúʼko̱ má nini, ni̱jkhá gaxtáa náa mbá xuajen mijngii rí nagumbiʼyuu Zanesville. Mú mbaʼa nuthu ejkhá gáyóo ru̱dúʼ ga̱jma̱a̱ a̱ngui̱nʼ mú maxnu̱u̱n tsiakii.

Anu̱ʼ niʼni xúgíʼ mu ru̱dúʼ xáʼga̱ náa reunión. Nguáná índo̱ ru̱dúʼ xtaa ra̱jkha̱, anu̱ʼ na̱jkha̱ ki̱dxu̱ʼ ga̱jma̱a̱ naxúmuu xtíñuu mu mata̱ʼa̱a̱ náa guʼwá. Mú ikhaa nagájnuu náa i̱mba̱ xkrugua ga̱jma̱a̱ na̱jkha̱. Ikhúúnʼ ni̱thu̱u̱n rí xaxmiéjunʼ numuu rí maʼga̱nú  mbá mbiʼi rí anu̱ʼ makánajkoo. Nda̱wa̱á anu̱ʼ niniñuʼ ru̱dúʼ maʼga̱ reunión.

Índo̱ nigíʼdu̱u̱ nirígá náa Najuiʼsngáa xú Mi̱ʼtháraʼa Májánʼ nákha tsiguʼ 1943, nigíʼdu̱u̱ nixna tikhu discursos náa congregación. Xtágabu rí nuxnuʼ nda̱wa̱á rí námbá discurso nimbáyuʼ mu maxná itháan májánʼ discurso.

Tsiguʼ 1944 nithu̱nʼ rí maxtáá náa ejercito, índo̱ nirígá Raga̱jma̱ Guerra náa xúgíʼ Numbaaʼ. Ni̱jkhá náa cuartel general ndrígóo Columbus (Ohio). Ikhí ndiyóoʼ mani mbá examen físico ga̱jma̱a̱ manimajtíí tikhu i̱yi̱i̱ʼ. Mú ni̱thu̱u̱n bi̱ nutañajúnʼ soldado rí xáni̱ndxu̱ʼ xóo ikhiin. Niniñuʼ maʼgáaʼ, mú nguáthá mbiʼi nda̱wa̱á mbáa policía ni̱ʼkha̱nú náa goʼwóoʼ ga̱jma̱a̱ ni̱jkha̱ kañún guʼwá e̱jua̱nʼ.

A̱jma̱ xmáná nda̱wa̱á nigún ku̱ñu̱u̱n náa Xa̱bu̱ Ñajunʼ. Juez niʼthúunʼ rí á mu ikhaa kaʼyoo maraʼwíí, makudúnʼ guʼwá e̱jua̱nʼ asndu kámuu mbiʼi. Niraxuʼ á mu rígá mbá rí nandoʼ mata. Ikhúúnʼ ni̱thu̱u̱n: “Xúʼko̱ káʼnii tátá. Ikhúúnʼ ni̱ndxu̱ʼ bi̱ na̱jkha̱ náa mbá religión. Náa mámbá xkrugua ikhúúnʼ nasngáa ga̱jma̱a̱ na̱thu̱u̱n mbaʼin xa̱bu̱ ajngáa rí májánʼ numuu Reino”. * Ikhú juez niʼthún iʼwíínʼ bi̱ kuwa ikhí: “Na̱nguá kuwáanʼ gi̱i̱ mú mutha á mu dxámá bugi̱ na̱jkha̱ o na̱nguá náa mbá religión. Kuwaanʼ gi̱i̱ mú mutha á mu nindoo o táʼndoo mato̱ʼo̱o̱ náa ejército”. Ní táʼni mbá tikhu hora nithi rí nigúʼdoo aʼkhúnʼ. Juez niʼthí rí maʼgá mbá witsu tsiguʼ náa guʼwá e̱jua̱nʼ dí rígá náa Ashland (Kentucky).

Ginii nixtáá a̱jma̱ xmáná náa guʼwá e̱jua̱nʼ dí rígá náa Columbus. Tagajnúʼ náa kruʼún rí timbá mbiʼi. Ikhí nitakáñuu Jeobá ga̱jma̱a̱ ni̱thu̱u̱n rí xáʼngo̱ʼ maxtáá mbá witsu tsiguʼ náa kruʼún ga̱jma̱a̱ tséyóo rí mani.

I̱mba̱ néjtsuu, bi̱ nuñewa̱a̱n guʼwá e̱jua̱nʼ niniñu̱ʼ magajnúʼ mbá xngaa. Ni̱jkhá asndu náa wíji̱ mbáa xa̱bu̱ mba̱yi̱ʼ ga̱jma̱a̱ migújkuíʼ bi̱ kraʼaa má náa guʼwá e̱jua̱nʼ. Nájmáanʼxu niyexixu náa mbá ventana. Ikhaa niraxuʼ: “Náa numuu rí niruguaraʼan ikháánʼ xá.” Ni̱thu̱u̱n rí ni̱ndxu̱ʼ bi̱ naʼtaraʼa numuu Jeobá. Ikhaa niʼthí: “Ga̱jma̱a̱ numuu rúʼko̱ rí xtaa gi̱i̱ rá.” Ni̱thu̱u̱n rí bi̱ nutaraʼa numuu Jeobá na̱nguá ejkuáxu náa guerra ga̱jma̱a̱ tsexíyáaxu nimbáa. Niʼthúunʼ: “Xa̱bu̱ bugi̱ nuxudiinʼ guʼwá e̱jua̱nʼ bi̱ nuradíin eʼwíínʼ xa̱bu̱. Mú ikháánʼ nixudaanʼ numuu rí tsíyááʼ mataxíyáa nimbáa. Lá naganaʼyo rúʼko̱ ráʼ.” “Na̱nguá”, niriʼñuu ikhúúnʼ.

Xa̱bu̱ buʼko̱ nigumbiʼyuu Paul. Niʼthúunʼ rí nixtáa náa i̱mba̱ guʼwá e̱jua̱nʼ mbá 15 tsiguʼ. Ikhí niguxnuu tikhu i̱yi̱i̱ʼ ndrígúlú. Índo̱ nidxawun rúʼko̱, nindo̱ʼo̱o̱ Jeobá rí maʼni rí xa̱bu̱ buʼko̱ mambáyuʼ. Ikhú Paul niʼthúunʼ: “Á mu rí mbáa nandoo maxnáʼ, atatsaʼwá. Ikhúúnʼ mañewa̱nʼ”. Índo̱ nixtáa ikhí, tagúʼdoo  nimbá xkujndu gajmíi̱nʼ bi̱ 50 xa̱bu̱ bi̱ kajchún náa xtáa ikhúúnʼ.

Nda̱wa̱á nixuʼmún maʼgá náa i̱mba̱ guʼwá e̱jua̱nʼ dí rígá náa Ashland. Ikhí niniʼnúnʼ tikhun a̱ngiu̱lú bi̱ mba̱yu̱ʼ má kúwi̱i̱n guʼwá e̱jua̱nʼ. Ikhiin nimbayúxu mu mambáxuxuʼ má xúʼko̱ gajmiúxu̱ Jeobá. Xúgíʼ xmáná nutuxu rí muraxnuuxu Biblia ga̱jma̱a̱ nda̱wa̱á nunixu graxe̱ dí na̱ʼkha̱ náa Biblia. Kuwáanʼxu náa mbá guʼwá e̱jua̱nʼ mba̱a̱ ga̱jma̱a̱ gíʼdoo mbaʼa xiawo. Mbáa ndxájulú naʼni ratoo “territorio” náa mutaráʼaxu. Ikhaa niʼthúunʼ: “Robison, ikháánʼ kaʼyaʼ náa xiawo rígi̱ ga̱jma̱a̱ rúʼko̱. Atani marathu̱u̱n bi̱ kuwa ikhí nákha xóó tsegun”. Xúʼko̱ káʼnii etaráʼaxu.

Raga̱jma̱ Guerra dí nirígá náa xúgíʼ Numbaaʼ nitumuu tsiguʼ 1945, mú ikhúúnʼ ndijyúuʼ xóó náa guʼwá e̱jua̱nʼ. Nixmiéjunʼ eni bi̱ kuwa náa goʼwóoʼ, numuu rí anu̱ʼ niʼthún: Á mu naʼngoʼ nani rí ikháánʼ maxídxaaʼ, ma̱ndoo mani rí eʼwíínʼ muniñaʼ runigajmaa Biblia. Mú índo̱ nigájnaʼ náa guʼwá e̱jua̱nʼ nidxuʼ wéñuʼ rí mbá juwiin a̱ngui̱nʼ nagún reunión ga̱jma̱a̱ mbáa ndxájuʼ a̱ʼgu̱ nijngúun iyaʼ, maski ajndu anu̱ʼ nakiʼnáa má xúʼko̱.

Nákha tsiguʼ 1950 nigíʼdu̱u̱ nirígá guerra náa Corea. Numuu rí Estados Unidos ma̱ngaa niyambáá náa Guerra rúʼko̱, ikha jngó nitañajunʼ dí maʼgá náa ejército. Ni̱jkhá mbu̱júu̱ʼ náa cuartel general dí rígá náa Columbus. Nda̱wa̱á dí ndiyáá rí xú káʼnii eni, mbáa bi̱ naʼtáñajúnʼ soldado niʼthúunʼ dí ikhúúnʼ ni̱ndxu̱ʼ bi̱ itháan najmañuu náa grupo ndrígóʼ. Ni̱thu̱u̱n dí májánʼ má, mu rí na̱nguá endxa̱ʼo̱o̱ edxu̱ʼ mani̱ndxu̱ʼ soldado. Nda̱wa̱á ni̱thu̱u̱n rí na̱ʼkha̱ raʼthí náa 2 Timoteo 2:3 ga̱jma̱a̱ ni̱thu̱u̱n: “Ikhúúnʼ ni̱ndxu̱ʼ má soldado ndrígóo Cristo”. Nda̱wa̱á rí nikúwáanʼxu wíí, bi̱ naʼtáñajúnʼ soldado niʼthúunʼ rí ma̱ndoo maʼgáaʼ.

Nguáthá mbiʼi nda̱wa̱á ni̱jkuáxu náa mbá asamblea náa Cincinnati (Ohio). Ikhí ni̱jkhá náa reunión bi̱ nandún magún muñambáá náa Betel. Náa reunión rúʼko̱ ndxájulú Milton Henschel niʼthí rí náa Betel naxtandi̱ʼi̱i̱n a̱ngiu̱lú bi̱ nandún muñajunʼ ga̱jma̱a̱ numuu Reino. Ninimajtíí mbáa solicitud ga̱jma̱a̱ nindxa̱ʼwo̱ʼ maʼgá. Nigíʼdu̱u̱ rañajunʼ náa Betel ndrígóo Brooklyn nákha gu̱nʼ agosto tsiguʼ 1954, ga̱jma̱a̱ nixtáá ikhí asndu rí mbiʼi xúgi̱.

Náa Betel nigúʼdoo má xúʼko̱ ñajunʼ. Niñajunʼ mba̱yu̱ʼ tsiguʼ náa calderas ndrígóo imprenta ga̱jma̱a̱ náa guʼwá dí rígá oficinas ma̱ngaa nini májáánʼ maquina ga̱jma̱a̱ cerraduras. Ma̱ngaa niñajunʼ náa Guʼwá náa narígá Asambleas dí rígá náa xuajen Nueva York.

Naniguʼ wéñuʼ awan rí gíʼdoo Betel, xóo magixnuu texto mámbá miʼcha̱ ga̱jma̱a̱ rí munigajmaa mbá guʼwíin  i̱yi̱i̱ʼ Bi̱ Nayejngoo. Ma̱ngaa naniguʼ wéñuʼ mataraʼa gajmíi̱nʼ a̱ngui̱nʼ náa congregación. Rígi̱ nindxu̱u̱ rí xúgínʼ cristianos bi̱ kuwa náa mbá guʼwíin gíʼmaa muni. Xa̱bu̱ gajmiún e̱jñún gíʼma muraxnuu mbá jnduʼ texto rí kaʼyoo mámbá mbiʼi, munigajmaa mbá guʼwíin xúgíʼ xmáná, muthi rí nijmañún náa reunión ma̱ngaa rí mutaraʼa ga̱jma̱a̱ gagi. Á mu nuni, mbáa ikhiin mambaxúún májánʼ wéñuʼ gajmiún Jeobá.

Nigúʼdiin mbaʼin bi̱ nimbáxuʼ gajmíi̱nʼ náa Betel ga̱jma̱a̱ náa congregación. Tikhun ninindxu̱ún bi̱ kaxtaʼwíin, rí xúgi̱ kuwa mekhuíí. Eʼwíínʼ na̱nguá ni̱ndxu̱ún bi̱ kaxtaʼwíin. Mú xúgiáanʼ bi̱ nuʼni ñajunʼ Jeobá ni̱ndxu̱lú xa̱bu̱ aʼkhá, asndu bi̱ ñajunʼ betelitas. Ikha jngó índo̱ gúʼdoo xkujndu ga̱jmu̱ʼ mbáa ndxájuʼ, naniminaʼ manimbánuu. Nandxa̱ʼo̱o̱ edxu̱ʼ ajngáa rí na̱ʼkha̱ náa Mateo 5:23, 24, náa naʼthí xú káʼnii gándoo guʼnimbánii xkujndu rígi̱. Mbaʼa ikhoo nambánuu índo̱ maratha “atani mba̱a̱ a̱jkia̱nʼ xta̱yo̱ʼ”, maski ajndu mingíjyúuʼ matani.

Numuu rí nikiu̱u̱n má, naʼniuʼ mingíjyúuʼ mataraʼa mámbá guʼwá. Mú na̱nguá eniwabaminaʼ. Nijmañuʼ mata chíʼgíʼ ajngáa chino, ga̱jma̱a̱ naniguʼ wéñuʼ mataruʼun bi̱ nuthi chino, bi̱ naxkamiin náa kamba̱a̱. Nguáná mámbá miʼcha̱ naxnaxí mbá 30 o 40 revistas.

Asndu nitanga̱án ni̱thu̱u̱n mbáa xa̱bu̱ bi̱ xtáa China. Xú káʼnii nindoo rá. Mbá mbiʼi, mbáa ndxáʼgú bi̱ naxnáraʼa i̱yi̱i̱ʼ ndrígóo náa naxtango̱jo̱o̱ fruta ndiʼyoʼ ga̱jma̱a̱ ninduʼwá. Ikhúúnʼ mangúún nindu̱ʼwa̱ ga̱jma̱a̱ ni̱xnu̱u̱ i̱yi̱i̱ʼ Bi̱ Nayejngoo ga̱jma̱a̱ ¡Despertad! náa ajngáa chino. Ikhaa nigruigú ga̱jma̱a̱ niʼthúunʼ rí mbiʼyuu Katie. Asndu nákha ikhú, mámbá rí nda̱yo̱o̱ náa calle na̱ʼkha̱ gaʼtamíjná ga̱jma̱á ni̱ndxu̱ʼ. Ikhúúnʼ nisngóo mbiʼyuu tikhu fruta ga̱jma̱a̱ verduras náa ajngóoʼ. Ma̱ngaa ni̱thu̱u̱n rí naʼthí tikhu textos ndrígóo Biblia ga̱jma̱a̱ nixnu̱u̱ libro Dí naʼsngáa náa Biblia. Mú nda̱wa̱á nánguá ndi̱yo̱o̱ itháan.

Nguáthá gu̱nʼ nda̱wa̱á ni̱xnu̱u̱ revistas imba̱a̱ ndxáʼgú bi̱ naʼthí chino bi̱ jngroʼo raxnáxi i̱yi̱i̱ʼ. Índo̱ ndi̱yo̱o̱ i̱mba̱ xmáná, ikhaa nixnuʼ teléfono ndrígóo ga̱jma̱a̱ niʼthúunʼ: “Aratáraʼa náa China”. Ikhúúnʼ ni̱thu̱u̱n rí na̱nguá eniʼníiʼ nimbáa náa China. Mú ikhaa naʼthí má xúʼko̱. Ikha jngó nitaraʼa náa teléfono. Mbá aʼwá niʼthúunʼ: “Ikhúúnʼ ni̱ndxu̱ʼ Katie. Xtaa náa China”. Ikhaa niʼthúunʼ rí ndxáʼgú bi̱ nixnúʼ teléfono nindxu̱u̱ ndxájuu. Nda̱wa̱á nindo̱ʼo̱ʼ rí masngóo ndxájuu ikháá má rí nisngóo ikhaa. Ni̱thu̱u̱n rí mani xó má eʼngoʼ, ga̱jma̱a̱ ni̱xna̱a̱ núma̱aʼ numuu rí niʼthúunʼ náa xtáa. Nguáthá mbiʼi nda̱wa̱á nindoo nitamíjna̱ ga̱jmu̱ʼ ndxájuu Katie imbóó miʼtsú. Rí xúgi̱ nánguá e̱yo̱o̱ náa kuwa. Mú gúʼthu̱u̱n rí ma̱ndoo majmañún itháan ga̱jma̱a̱ numuu Jeobá.

Naʼni 73 tsiguʼ rí nigíʼdu̱u̱ rani̱ ñajunʼ Jeobá. Ga̱jma̱a̱ naxna̱a̱ wéñuʼ núma̱a̱ numuu rí nimbáyuʼ mu xakiéʼkúunʼ náa ikhaa índo̱ nixtáá náa guʼwá e̱jua̱nʼ. A̱ngui̱nʼ nuthi rí nixnúún wéñuʼ tsiakii rí ikhúúnʼ tániʼñuʼ ranigajmaa maski ajndu anu̱ʼ táʼndoo. Nda̱wa̱á ru̱dúʼ gajmíi̱n mbá majuiin a̱ngui̱nʼ nijngún iyááʼ. Asndu anu̱ʼ niriʼkuminaʼ lájuíin ga̱jma̱a̱ ni̱jkha̱ tikhuu reunión nákha rí xóó tsekháñu.

Á mu rí Dios nandoo, a̱ngui̱nʼ bi̱ nikháñun matangi̱i̱n makuwá náa Ku̱ba̱ʼ mitsaan. Ra̱ʼkhá tháán mitsaan gaʼni índo̱ gáʼga̱nú mbiʼi rí xúgiáanʼ guʼyamajkuíí Jeobá asndu kámuu mbiʼi. *