1, 2. Xú káʼnii nisngájma David rí ninindxu̱u̱ jmbii náa Jeobá rá. (Atayáá timbá xtiʼkhu.)

 DAVID gajmíi̱n xa̱bi̱i̱ kuwa náa ku̱ba̱ʼ mixooʼ dí rígá náa Judá. Ikhiin nirkaʼumijná numuu rí nduyáá rí Saúl gajmíi̱n mbá 3,000 soldados nduyáaʼ David mu muxi̱ya̱a̱. Mbá mbruʼun David gajmíi̱n xa̱bi̱i̱ ndiyáá náa kuwa runuʼ Saúl gajmíi̱n xa̱bi̱i̱. Tsumáá wéñuʼ, David ga̱jma̱a̱ mbáa soldado ndrígóo bi̱ nagumbiʼyuu Abisai niguánu náa Saúl. Abisai nindo̱ʼo̱o̱ David rí maniñuʼ maxíyáa Saúl. Mú David na̱nguá niniñuʼ ga̱jma̱a̱ niʼthúu̱n: “Xátaxíyáa, numuu rí mixnáá castigo xa̱bu̱ bi̱ gáʼni gawúunʼ bi̱ ndiyáaʼ Jeobá”. Nda̱wa̱á niʼthí: “¡Phú raʼkhí gáʼyoo Jeobá á mu nani gawúunʼ xa̱bi̱i̱ bi̱ Jeobá ndiyáaʼ!” (1 Sam. 26:8-12).

² David ndaʼyoo rí Saúl nindxu̱u̱ rey náa Israel numuu rí Jeobá má nigíiʼ. Ndaʼyoo májánʼ rí á mu nandoo mani̱ndxu̱u̱ jmbii náa Jeobá, ndayóoʼ mbaʼyamajkuu Saúl. Ikha jngó tándxa̱ʼwáminaʼ nditháan rí maʼni gawúunʼ. Rí mbiʼi xúgi̱, Jeobá gíʼthu̱u̱n rí xúgínʼ xa̱bi̱i̱ manindxu̱lúʼ jmbii náa ikhaa ga̱jma̱a̱ mbuʼyamajkún bi̱ Jeobá  nixnúún mbá ñajunʼ (atraxnuu Salmo 18:25). *

3. Xú káʼnii nisngájma Abisai rí ninindxu̱u̱ jmbii náa David rá.

³ Abisai ndiʼyamajkuu David numuu rí ndaʼyoo rí Jeobá ndiyáaʼ mu mani̱ndxu̱u̱ rey. Mú índo̱ David ninindxu̱u̱ rey, niʼni tikhuu aʼkhá dí ra̱májánʼ wéñuʼ. Nibóʼ ga̱jma̱a̱ a̱ʼgiu̱u̱ imba̱a̱ xa̱bu̱. Ga̱jma̱a̱ nda̱wa̱á nikuʼmaa mbáa general ndrígóo bi̱ nagumbiʼyuu Joab mu mbaʼyoo á mu ajmbio̱o̱ a̱ʼgu̱ nikháñu náa nuxmijná (2 Sam. 11:2-4, 14, 15; 1 Cró. 2:16). Joab nindxu̱u̱ ndxájuu Abisai. Mbáa Abisai ndiʼyoo rí niʼni David. Ma̱ngaa numuu rí Abisai nindxu̱u̱ bi̱ naʼtáñajúnʼ soldados, ma̱ndoo magíminaʼ xóo rey. Mú nditháan táʼni rúʼko̱. Rí phú niʼni, ndiʼyamajkuu David, niʼni ñajunʼ ga̱jma̱a̱ niñewu̱u̱n náa xa̱bu̱ sia̱nʼ (2 Sam. 10:10; 20:6; 21:15-17).

4. a) Náa numuu nandoo nuʼthá rí David ninindxu̱u̱ jmbii náa Jeobá xúgíʼ mbiʼi rí nixtáa rá. b) Ndiéjunʼ gúʼyáá náa artículo rígi̱ rá.

⁴ David ninindxu̱u̱ jmbii náa Jeobá xúgíʼ mbiʼi rí nixtáa. Índo̱ ikhaa nindxu̱u̱ mbáa dxámá, nixíyáa Goliat bi̱ mba̱yi̱ʼ wéñuʼ numuu rí niʼthí dí ra̱májánʼ ga̱jma̱a̱ numuu Jeobá ma̱ngaa numuu xuajñu (1 Sam. 17:23, 26, 48-51). Índo̱ ninindxu̱u̱ rey, Jeobá nikuʼmaa gaʼyee Natán mu maxprígúu ga̱jma̱a̱ numuu aʼkhá rí nikudaminaʼ. David niriʼña májánʼ ga̱jma̱a̱ nitanga̱a̱ a̱jkiu̱u̱n (2 Sam. 12:1-5, 13). Ga̱jma̱a̱ índo̱ nikhi̱i̱ má, nixná mbaʼa rí gíʼdoo wéñuʼ numuu mu maguma templo ndrígóo Jeobá (1 Cró. 29:1-5). Xó má eʼyáá, David nikudaminaʼ aʼkhá rí mitsáʼkhúun wéñuʼ, mú ninindxu̱u̱ jmbii má xúʼko̱ náa Dios (Sal. 51:4, 10; 86:2). Náa artículo rígi̱ gúʼyáá xkridoo David ga̱jma̱a̱ iʼwíínʼ xa̱bu̱ bi̱ nikuwa nákha ikhú. Mbuʼyáá xú káʼnii gándoo ganindxu̱lú itháan xa̱bu̱ jmbii náa Jeobá ki xóo náa mbáa xa̱bu̱. Ma̱ngaa mbuʼyáá ndiéjunʼ gambáyuluʼ manindxu̱lúʼ jmbii náa Dios.

5. Ndiéjunʼ ejmañulú rí nigíʼ maʼni Abisai rá.

⁵ Índo̱ Abisai nindoo maxíyáa Saúl, nindoo mani̱ndxu̱u̱ jmbii náa David. Mú tsekro̱ʼo̱o̱ rí á mu naʼni gawúunʼ “bi̱ Jeobá ndiyáaʼ”, xánindxu̱u̱ jmbii náa Dios. David nikro̱ʼo̱o̱ rúʼko̱, ikha jngó tániñuʼ rí Abisai maxíyáa Saúl (1 Sam. 26:8-11). Ndiéjunʼ ejmañulú rí nigíʼ maʼni Abisai rá. Rí índo̱ tséʼyáá tsáa inuu ganindxu̱lú jmbii, gíʼmaa mundxaʼwamíjna̱ náa ikha rí naxná Biblia mu mambáyulúʼ muraʼwíí muʼni mbá rí májánʼ.

6. Ndíjkha rí ndayóoʼ muñeumíjna̱ índo̱ ganindxu̱lú jmbii náa a̱ngiu̱lú ga̱jma̱a̱ bi̱ nambáxulúʼ gajmiúlú rá.

⁶ Nandulúʼ manindxu̱lúʼ jmbii náa xa̱bu̱ bi̱ nandulúʼ kuʼñúún, a̱ngiu̱lú ga̱jma̱a̱ bi̱ nambáxulúʼ gajmiúlú. Mú gíʼmaa muñeumíjna̱, numuu rí ni̱ndxu̱lú xa̱bu̱ aʼkhá ga̱jma̱a̱ ma̱ndoo maʼni nduwánʼ rí nakumulú ga̱jma̱a̱ asndu maʼni rí ni xánindxu̱lú jmbii náa Dios (Jer. 17:9). Ikha jngó, á mu mbáa bi̱ kuʼyáá o mbáa bi̱ nambáxulúʼ gajmiúlú naʼni mbá dí raʼkhí ga̱jma̱a̱ naniñuʼ Jeobá, garmáʼáan a̱jkiu̱lú rí itháan gíʼdoo numuu manindxu̱lúʼ jmbii náa Dios ki xóo náa mbáa xa̱bu̱ (atraxnuu Mateo 22:37). *

7. Xú káʼnii nisngájma Anne rí ninindxu̱u̱ jmbii náa Jeobá rá.

⁷ Índo̱ nagumaa expulsar mbáa bi̱ kuʼyáá  náa congregación, ndayóoʼ muraʼwíí á mu manindxu̱lúʼ jmbii náa Jeobá. Guʼyáá rí nigíʼnuu mbáa ndxájulú bi̱ nagumbiʼyuu Anne ^[1] (atayáá nota rí na̱ʼkha̱ náa námbá artículo). Mbá mbiʼi ru̱dúu̱ bi̱ nigumaa expulsar niʼtároʼoo mu maraxu̱u̱ á mu ma̱ndoo maʼga̱ gáʼyoo. Niʼthúu̱n rí najmúu wéñuʼ numuu rí nimbáa bi̱ kaʼyoo tséʼthúu̱n. Anne nixtáa gíná wéñuʼ ga̱jma̱a̱ niʼthúu̱n rí makuʼma mbá carta mu mariʼña̱a̱ graxe̱ ndrígóo. Mú nákha xóó tseʼnirámáʼ carta, Anne nindxa̱ʼwáminaʼ tsumáá wéñuʼ ga̱jma̱a̱ numuu tikhuu textos rí na̱ʼkha̱ náa Biblia (1 Cor. 5:11; 2 Juan 9-11). Ga̱jma̱a̱ ajngáa gua̱ba̱ʼ, Anne niʼthúu̱n ru̱dúu̱ rí ikhaa niniñúúnʼ a̱ngui̱i̱n índo̱ nikudaminaʼ aʼkhá ga̱jma̱a̱ rí tagáwinʼ a̱jkiu̱u̱n. Nda̱wa̱á niʼthúu̱n rí á mu nandoo maxtáa tsímáá mbu̱júu̱ ndayóoʼ mata̱nga̱a̱ náa Jeobá (Sant. 4:8).

8. Ndiéjunʼ gambáyulú mu manindxu̱lúʼ jmbii náa Jeobá rá.

⁸ Tikhun xa̱bi̱i̱ Dios bi̱ nikuwa nákha nixtáa David ninindxu̱ún jmbiin náa Jeobá numuu rí nisngajma rí ninindxu̱ún xa̱bu̱ gua̱bi̱nʼ, ninindxu̱ún míjínʼ xa̱bu̱ ga̱jma̱a̱ támiñuun. Guʼyáá xú káʼnii nájtsu enii rígi̱ gambáyulú mu manindxu̱lúʼ jmbii náa Jeobá.

9. Náa numuu rí Abner nigíʼ maxíyáa David rá.

⁹ Jonatán ninindxu̱u̱ a̱ʼdióo Saúl. Ga̱jma̱a̱ Abner ninindxu̱u̱ bi̱ naʼtáñajúnʼ soldados ndrígóo Saúl. Jonatán ga̱jma̱a̱ Abner ndiyáá índo̱ David ni̱jkha̱ kayóo edxu̱u̱ Goliat náa Saúl. Jonatán nimbáxu̱u̱ ga̱jma̱a̱ David ga̱jma̱a̱ ninindxu̱u̱ jmbii má xúʼko̱ náa ikhaa (1 Sam. 17:57–18:3). Mú Abner tánindxu̱u̱ jmbii náa David. Asndu nimbáyúu Saúl mbayáaʼ David mu maxíyáa (1 Sam. 26:1-5; Sal. 54:3). Jonatán ga̱jma̱a̱ Abner ndiyáá rí Dios ndiyáaʼ David mu mani̱ndxu̱u̱ rey nda̱wa̱á náa Israel. Mú nda̱wa̱á rí nikháñu Saúl, Abner tambáyúu David mu mani̱ndxu̱u̱ rey, nimbáyúu imba̱a̱ a̱ʼdióo Saúl. Mbáa asndu Abner nindoo mani̱ndxu̱u̱ rey. Mbáa ikha jngó nibóʼ ga̱jma̱a̱ mbáa a̱ʼgiu̱u̱ rey Saúl (2 Sam. 2:8-10; 3:6-11). Náa numuu rí Jonatán nimbáxu̱u̱ ga̱jma̱a̱ David, mú Abner nigíʼ maxíyáa xá. Numuu rí Jonatán ninindxu̱u̱ xa̱bu̱ gua̱ba̱ʼ ga̱jma̱a̱ ninindxu̱u̱ jmbii náa Jeobá, mu Abner táʼni xúʼko̱ kaʼnii.

10. Ndíjkha rí Absalón tánindxu̱u̱ jmbii náa Jeobá rá.

¹⁰ Mbáa a̱ʼdióo rey David, ninindxu̱u̱ Absalón. Ikhaa tánindxu̱u̱ xa̱bu̱ gua̱ba̱ʼ, ikha jngó  tánindxu̱u̱ jmbii náa Jeobá. Maski ajndu ndiʼyoo dí Jeobá nigíiʼ anu̱u̱ mu mani̱ndxu̱u̱ rey náa Israel, ikhaa nindoo mani̱ndxu̱u̱ rey. Ikha jngó “nikuʼma maguma mbá carro, ga̱jma̱a̱ wáyú ga̱jma̱a̱ mbá a̱jma̱ skiñiínʼ gu̱wi̱nʼ xa̱bekha bi̱ nagáñun náa inuu ikhaa” (2 Sam. 15:1). Ma̱ngaa niʼni rí mbaʼin israelitas mumbayíí. Asndu nigíiʼ maxíyáa anu̱u̱ (2 Sam. 15:13, 14; 17:1-4).

11. Ndiéjunʼ eʼsngúlúʼ xkridoo Abner, Absalón ga̱jma̱a̱ Baruc rá.

¹¹ Xkridoo Abner ga̱jma̱a̱ Absalón naʼsngúlúʼ rí á mu na̱nguá ni̱ndxu̱lú xa̱bu̱ gua̱ba̱ʼ ga̱jma̱a̱ á mu nandulúʼ muguaʼdáá itháan tsiakii ga̱jma̱a̱ rí muʼtá ñajunʼ, maʼniulú mingíjyúuʼ manindxu̱lúʼ jmbii náa Dios. Mú á mu nandulúʼ kuʼyáá Jeobá, xúndxaʼwamíjna̱ i̱ndó ga̱jma̱a̱ numulúʼ ikháanʼ xóo Abner ga̱jma̱a̱ Absalón. Ma̱ngaa gíʼmaa muñeumíjna̱ mu xáʼndulú muguaʼdáá itháan mbújkha̱a̱, mbá carrera ga̱jma̱a̱ mbá ñajunʼ májánʼ rí maʼni maguaʼdáá numulúʼ. Rígi̱ gáʼni gachúu rí nambáxulúʼ gajmiúlú Jeobá. Gundxaʼwamíjna̱ rí nigíʼnuu Baruc, secretario ndrígóo gaʼyee Jeremías. Nirígá mbiʼi rí nindoo magiʼdoo rí tágiʼdoo, ikha jngó nánguá niʼni ñajunʼ Dios ga̱jma̱a̱ gagi. Ikhú Jeobá niʼthúu̱n: “Rí nitsiji nani gámbáa, rí nidu naruburiyaʼ, xúgíʼ xuajin. Mú ikháánʼ, natayááʼ má xúʼko̱ rí gíʼdoo wéñuʼ numuu náa ikháánʼ. Ní xataʼyáaʼ rúʼko̱” (Jer. 45:4, 5). Baruc ninindxu̱u̱ xa̱bu̱ gua̱ba̱ʼ ga̱jma̱a̱ niʼdxuun xtágabu ndrígóo Jeobá. Mangáanʼ ndayóoʼ muʼdxawíín xtágabu rúʼko̱ numuu rí inuu má ikhaa maʼni gámbóo numbaaʼ xkawiʼ rígi̱.

12. Gajmaʼ mbá xkri̱da mu maratha rí xándoo manindxa̱ʼ jmbii náa Dios á mu natani i̱ndó rí nandaʼ ikháánʼ.

¹² Náa México, mbáa ndxájulú bi̱ nagumbiʼyuu Daniel ndiyóoʼ maraʼwíí tsáa inuu ganindxu̱u̱ jmbii. Ninigiu̱ʼ kaʼyoo mbáa ndxáʼgú bi̱ na̱nguá nindxu̱u̱ xa̱bi̱i̱ Jeobá ga̱jma̱a̱ nindoo mbayáa. Ikhaa naʼthí: “Taniʼñúʼ raniraʼmáʼ náa inuu maski ajndu ni̱ndxu̱ʼ má precursor”. Mú ikhú ndiʼyoo rí na̱nguá nindxu̱u̱ jmbii náa Jeobá. Ndiʼyoo rí i̱ndó nandxa̱ʼwáminaʼ ga̱jma̱a̱ numuu ikhaa ga̱jma̱a̱ ndayóoʼ mani̱ndxu̱u̱ xa̱bu̱ gua̱ba̱ʼ. Ikha jngó nindo̱ʼo̱o̱ mambáyúu mbáa bi̱ kayá edxu̱u̱ náa nagimbáanʼ bi̱ najmañuu itháan. Daniel naʼthí: “Ndxájulú nimbáyuʼ makro̱ʼo̱ʼ rí á mu nandoʼ mani̱ndxu̱ʼ jmbii náa Dios ndayóoʼ maniʼñúʼ raniraʼmáʼ náa inuu dxáʼgú. Nda̱wa̱á rí nitajkháan ga̱jma̱a̱ rí nimbiyaʼ wéñuʼ, nimbáyuʼ  mu maʼngo̱ʼ. Nguáthá mbiʼi nda̱wa̱á niniguʼ mataraʼa itháan”. Rí xúgi̱, Daniel nindxu̱u̱ superintendente ndrígóo circuito ga̱jma̱a̱ ndiyáa mbáa ndxájulú bi̱ nandoo kaʼyoo Jeobá.

13. Ndiéjunʼ nimbáyúu Natán mu mani̱ndxu̱u̱ jmbii náa Jeobá ga̱jma̱a̱ David rá.

¹³ Á mu ni̱ndxu̱lú jmbii náa Jeobá, mangáanʼ ma̱ndoo manindxu̱lúʼ jmbii náa eʼwíínʼ ga̱jma̱a̱ mumbaʼñún. Guʼyáá rí niʼni gaʼyee Natán. Índo̱ rey David nibóʼ ga̱jma̱a̱ a̱ʼgiu̱u̱ imba̱a̱ xa̱biya̱ ma̱ngaa nda̱wa̱á niʼni rí muxiyáa, Jeobá nikuʼmaa Natán mu maxprígúu David. Gaʼyee Natán ninindxu̱u̱ jmbii náa Jeobá ga̱jma̱a̱ David. Ndiéjunʼ rí nimbáyúu xá. Ninindxu̱u̱ jmbii náa Jeobá numuu rí támiñuu ga̱jma̱a̱ rí niʼnimbo̱o̱. Ma̱ngaa ninindxu̱u̱ jmbii náa David numuu rí nixprígúu ga̱jma̱a̱ májánʼ. Mu mambáyúu makro̱ʼo̱o̱ rí ra̱ʼkhá tháán mitsaʼkhúun rí niʼni, nijmuu mbá xkri̱da. Niʼthúu̱n rí mbáa xa̱bu̱ bi̱ gíʼdoo wéñuʼ niʼni kúwoʼ mbáa xa̱bu̱ gínáa bi̱ gíʼdaa mbáwíi mugiu̱u̱. Índo̱ David niʼdxuun rígi̱, nikiʼnáa wéñuʼ ga̱jma̱a̱ numuu xa̱bu̱ bi̱ gíʼdoo. Ikhú, Natán niʼthúu̱n: “¡Ikháánʼ ni̱ndxa̱ʼ xa̱bu̱ buʼko̱!”. Xúʼko̱ David ndiʼyoo rí nikiéʼkúun náa Jeobá (2 Sam. 12:1-7, 13).

14. Xú káʼnii gándoo ga̱nindxu̱lúʼ jmbii náa Jeobá ga̱jma̱a̱ náa bi̱ kuʼñúún o bi̱ nambáxulúʼ gajmiúlú rá.

¹⁴ Rí manindxu̱lúʼ májánʼ xa̱bu̱ ma̱ndoo mambáyulúʼ manindxu̱lúʼ jmbii náa Jeobá ga̱jma̱a̱ náa eʼwíínʼ. Mbá xkri̱da, atatsaʼwáminaʼ rí ikháánʼ natayáá rí mbáa ndxájulú niʼni dí ra̱májánʼ. Mbáa nandaʼ manindxa̱ʼ jmbii náa ikhaa, itháan á mu xtayáá o mbáa bi̱ nambáxa̱ʼ ga̱jma̱ʼ. Mú ikháánʼ natayáá rí itháan gíʼdoo numuu manindxa̱ʼ jmbii náa Jeobá. Ndiéjunʼ gándoo gátani rá. Atayaridáá xkridoo Natán. Atanimbaʼ xtayáá Jeobá ga̱jma̱a̱ atani̱i̱ rí májánʼ ndxájuaʼ. Aratháán rí maʼthúún nacha̱ bi̱ kuya̱ edxu̱u̱. Á mu ikhaa tséʼthún, ikhú ikháánʼ gíʼmaa marathu̱u̱n. Xúʼko̱ manindxa̱ʼ jmbii náa Jeobá. Ma̱ngaa matasnga̱jmá rí nandaʼ xtayáá ndxájuaʼ, numuu rí bi̱ kuya̱ edxu̱u̱ muxpriguíí ga̱jma̱a̱ májánʼ ma̱ngaa mumbayíí mambaxúu májánʼ mbu̱júu̱ ga̱jma̱a̱ Jeobá (atraxnuu Levítico 5:1 * ga̱jma̱a̱ Gálatas 6:1). *

15, 16. Náa numuu rí Husai ndiyóoʼ rí xámiñuu mu mani̱ndxu̱u̱ jmbii náa Jeobá rá.

¹⁵ Mbáa bi̱ nimbáxu̱u̱ májánʼ wéñuʼ ga̱jma̱a̱ rey David ninindxu̱u̱ Husai. Ikhaa ndiyóoʼ rí xámiñuu mu mani̱ndxu̱u̱ jmbii náa Jeobá ga̱jma̱a̱ náa David. Náa numuu rá. Numuu rí xuajin nindúún mugíiʼ rey mbáa a̱ʼdióo David bi̱ nigumbiʼyuu Absalón. Husai ndiʼyoo rí Absalón ni̱ʼkha̱nú náa Jerusalén gajmíi̱n soldados ndrígio̱o̱ ga̱jma̱a̱ rí David nigáyúu (2 Sam. 15:13; 16:15). Ndiéjunʼ niʼni Husai rá. Lá niniñuʼ  rambáyúu David mu mambáyúu Absalón xáʼ. Na̱nguá. Maski ajndu David nikhi̱i̱ má ga̱jma̱a̱ mbaʼin nindúún muxi̱ya̱a̱ , Husai nindoo mani̱ndxu̱u̱ jmbii náa ikhaa numuu rí ndiʼyoo rí Jeobá nigíiʼ mu mani̱ndxu̱u̱ rey. Ikha jngó ni̱jkha̱ gáyáaʼ David náa kúbá rí mbiʼyuu Olivos (2 Sam. 15:30, 32).

¹⁶ David nindo̱ʼo̱o̱ Husai rí mata̱nga̱a̱ náa Jerusalén ga̱jma̱a̱ maʼni xóo rí nambáxu̱u̱ ga̱jma̱a̱ Absalón. Husai ndiyóoʼ maʼni rí Absalón maʼdxun xtágabu ndrígóo ki xóo xtágabu ndrígóo Ahitofel. Husai ndiyóoʼ rí xámiñuu mu maʼnimbo̱o̱ kaʼyoo David ga̱jma̱a̱ mani̱ndxu̱u̱ jmbii náa Jeobá. Náa numuu rá. Numuu rí á mu naʼni rí niʼthúu̱n David, asndu migamíi makhañúu. David niʼthá kháñuu Jeobá rí mambáyúu Husai. Ga̱jma̱a̱ Jeobá nimbáyúu. Absalón niʼdxuun xtágabu ndrígóo Husai ki xóo rí niʼthí Ahitofel (2 Sam. 15:31; 17:14).

17. Náa numuu rí ndayóoʼ rí xámiñulu mu manindxu̱lúʼ jmbii náa Jeobá rá.

¹⁷ Ikháanʼlu ma̱ngaa ndayóoʼ rí xámiñulu mu manindxu̱lúʼ jmbii náa Jeobá. Náa numuu rá. Numuu rí mbáa bi̱ kuʼñúún, bi̱ nuñajunʼ gajmiúlú o Xa̱bu̱ Ñajunʼ mutulú muʼni mbóo rí Jeobá tsénigu̱ʼ. Guʼyáá xkri̱da ndrígóo Taro, mbáa xa̱bi̱i̱ Jeobá bi̱ xtáa náa Japón. Asndu nákha chíʼgíʼ, niʼni xó má eʼngo̱o̱ mu anu̱u̱ ga̱jma̱a̱ ru̱dúu̱ makuwá gagi. Naʼnimbo̱o̱ dí nutháán numuu rí nandoo kaʼñún raʼkháa i̱ndó numuu rí gíʼmaa maʼni. Mú índo̱ nigíʼdu̱u̱ niʼnigajmaa̱ Biblia gajmíi̱n xa̱bi̱i̱ Jeobá, anu̱u̱ ga̱jma̱a̱ ru̱dúu̱ nitháán rí maniñuʼ raʼnigajmaa. Ikhaa nixtáa gíná wéñuʼ. Maski ajndu niʼniuu gakhi̱i̱ wéñuʼ ikhaa niʼthún rí maʼga̱ náa reunión. Taro naʼthí: “Nikiʼníin wéñuʼ rí asndu ndiyóoʼ manújngoo mba̱yu̱ʼ tsiguʼ mu muniñuʼ rí maʼgá gáñu̱u̱n. Nitha kháñuu Jeobá mu xáriʼkhuu rí nitha mani. Rí xúgi̱ niriʼkhuu rí xóo endxa̱ʼwa̱a̱ edxu̱ún, ga̱jma̱a̱ nandoo na̱jkhá gáñu̱u̱n nángi eʼni” (atraxnuu Proverbios 29:25). *

18. Ndiéjunʼ nijmañaʼ náa artículo rígi̱ rá.

¹⁸ Á mu nduʼyaridáá xkridoo David, Jonatán, Natán ga̱jma̱a̱ Husai, makuwáanʼ gagi numuu rí ni̱ndxu̱lú jmbii náa Jeobá. Xánindxu̱lú xóo Abner ga̱jma̱a̱ Absalón bi̱ túni rí jmbu. Gajkhun má rí ni̱ndxu̱lú xa̱bu̱ aʼkhá ga̱jma̱a̱ nakiéʼkulu, mú ma̱ndoo musngajmá rí itháan gíʼdoo numuu manindxu̱lúʼ jmbii náa Jeobá.