NÁA mbi̱ʼi̱i̱ rí niraxtaa itháan gagi ikháánʼ rá. Tikhun nuthi rí nindxu̱u̱ mbiʼi rí nidamijná. Eʼwíínʼ nuthi, índo̱ nixtáa timbáa aʼdiún. Mú mbáa ikháánʼ natayáá rí itháan gíʼdoo numuu índo̱ nijnguánʼ iyááʼ. A̱ngiu̱lú nidxún rí nitasngájma rí nandaʼ xtayáá Dios ga̱jma̱a̱ xúgíʼ a̱jkia̱nʼ, nímia̱nʼ, ku̱ma̱ʼ ga̱jma̱a̱ xúgíʼ tsiakii rí xtaʼdáá (Mar. 12:30).

Mbáa ikháánʼ xtaa gagi ratani̱ ñajunʼ Jeobá asndu nákha nijnguánʼ iyááʼ. Mú tikhun cristianos nánguá kuwa runi ñajunʼ Jeobá ga̱jma̱a̱ gagi. Náa numuu rá. Náa numuu rí ikháanʼ ma̱ndoo muʼni ñajunʼ Jeobá ga̱jma̱a̱ gagi rá. Guʼyáá.

Rí muʼtáraʼa ga̱jma̱a̱ numuu Reino naʼni makuwaanʼ gagi, numuu rí Jeobá nakudaminaʼ maʼni gámbáa numbaaʼ dí ra̱májánʼ ga̱jma̱a̱ maʼni rí marigá mbá ku̱ba̱ʼ mitsaan. Sofonías 1:14 naʼthí: “Mbiʼi ndrígóo Jeobá na̱ʼkha̱nú mijngii”. Maski ajndu xúʼko̱, mbáa makumulúʼ rí mbiʼi ndrígóo Jeobá ndajyúuʼ wéñuʼ. Á mu nundxa̱ʼwa̱míjna̱ xúʼko̱ kaʼnii, ní xákuwáanʼ gagi rí muʼni ñajunʼ Dios (Prov. 13:12).

Rí makuwáanʼ mba̱yu̱ʼ gajmiúlú a̱ngiu̱lú nambáyulúʼ muʼni ñajunʼ Dios ga̱jma̱a̱ gagi. Mbáa ikháanʼ nini̱ndxu̱lú xa̱bi̱i̱ Jeobá numuu rí ndiʼyáá rí ikhiin nuni rí májánʼ (1 Ped. 2:12). Mú, á mu mbáa ndxájulú naʼni dí ra̱májánʼ ga̱jma̱a̱ nuxpriguíí, mbáa ma̱ndoo maʼni rí makáguabáanʼ ga̱jma̱a̱ ní xákuwáanʼ gagi.

Imbo̱o̱ rí ma̱ndoo maʼni makáguabáanʼ nindxu̱u̱ rí maʼnda̱ʼ maraʼdáá itháan rí nandaʼ ga̱jma̱a̱ mbújkha̱a̱. Satanás ga̱jma̱a̱ numbaaʼ ndrígóo nandoo rí muʼnimbulúʼ rí ndayóoʼ mu̱ʼtsi̱ rí na̱nguá má eyúlú. Mú garmáʼáan a̱jkiu̱lú rí niʼthí Jesús: “Nimba xabo maxaxo majma naʼ inu ajmi xabo ri mbo miʼtsu, numu ri mba maxaxo gaʼyo, imba tsi maʼne akuinjaʼyo, o maʼnemajanmineʼ inu mba, imba tsi maxaxo gaʼyo. Maxaxo gajmaʼla naʼ inu Dios xi maguihuanʼ-güeño akianʼla-juya riqueza” (Mat. 6:24). Á mu nuʼgími̱jna̱ muguaʼdáá xúgíʼ rí naxná numbaaʼ xákuwáanʼlu tsímáá ruʼni ñajunʼ Jeobá.

Índo̱ nandulúʼ kuʼyáá Jeobá, tséʼni mingíjyúuʼ muʼni ñajunʼ (1 Juan 5:3). Jesús niʼthí: “Ahuala naʼ Ikun mba xuguianʼla tsanʼla nuñajunla jame juda eʼdala, Ikun mane ri mbuya xaʼla. Gurigula yugüiʼ naʼ rixaʼla muʼgua juyaʼla, gamañaʼla xo ini, masun jame huaba akuinʼ, aʼkue ri muxkamala naʼ ri mbaya xuʼ nimiaʼla. Ranguijiu-ma muʼgua juyaʼla yugüiʼ, jame huipi-ma ri jaguloʼ” (Mat. 11:28-30). Ikha jngó rí manindxu̱lúʼ xa̱bi̱i̱ Dios naʼni makuwáanʼ tsímáá ga̱jma̱a̱ gagi. Nduʼyáá kaʼwu dí rígá mbaʼa numuu rí muʼni ñajunʼ Jeobá ga̱jma̱a̱ gagi. Guʼyáá ajtsú enii (Hab. 3:18).

 Nuʼni ñajunʼ bi̱ Niʼni xúgíʼ, bi̱ nindxu̱u̱ Dios gagi (Hech. 17:28; 1 Tim. 1:11). Xúgiáanʼ nduʼyáá rí Jeobá niʼni rí makuwáanʼ. Rí mundxaʼwamíjna̱ rígi̱ mambáyulúʼ muʼni ñajunʼ ga̱jma̱a̱ gagi, tséʼniuu má nguáthá tsiguʼ rí nijngúlú iyááʼ.

Atatsaʼwáminaʼ ga̱jma̱a̱ numuu mbáa ndxájulú bi̱ nagumbiʼyuu Héctor. Ikhaa ninindxu̱u̱ superintendente viajante mbá 40 tsiguʼ. Maski ajndu rí mbiʼi xúgi̱ nikhi̱i̱ má, xóó xtáa gagi raʼni ñajunʼ Jeobá (Sal. 92:12-14). A̱ʼgiu̱u̱ nandoo kháñuu, ikha jngó ikhaa nánguá eʼni ñajunʼ xóo nákha ginii. Mú xtáa gagi má xúʼko̱. Ikhaa nagawúnʼ numuu rí a̱ʼgiu̱u̱ naʼniuu itháan nandii. Maski ajndu naʼniuu mingíjyúuʼ mañewu̱u̱n, mú tséniñuʼ dí rígi̱ maʼni maxtáa gíná. Índo̱ ikhaa nandxa̱ʼwáminaʼ rí Jeobá niʼnii ga̱jma̱a̱ mbá numuu, naʼni rí maʼndoo kaʼyoo itháan ma̱ngaa maʼni ñajunʼ ga̱jma̱a̱ xúgíʼ a̱jkiu̱u̱n. Ikha jngó naʼniminaʼ rí maʼtáraʼa má xúʼko̱ ga̱jma̱a̱ nandxa̱ʼwáminaʼ xú káʼnii gáxtáa náa Ku̱ba̱ʼ mitsaan. Rígi̱ nambáyúu maʼni má xúʼko̱ ñajunʼ Jeobá ga̱jma̱a̱ gagi.

Jeobá nikuʼmaa A̱ʼdióo makhañúu ga̱jma̱a̱ numulúʼ. Náa Biblia naʼthí “mapu-neʼne akuin Dios-jaʼyo numba ri nixnu Ade tsi mbahui, ikajngo jamba tsi najumu-jiʼya eʼne, maxandatiga, indo tsuʼkue tsi mbaʼya asjndo jamu” (Juan 3:16). Á mu kuaʼdáá fe náa rí nimínaanʼ Dios, ikhaa ma̱ndoo maʼni mba̱a̱ a̱jkiu̱u̱n kaʼyoo aʼkhá ndrígúlú ga̱jma̱a̱ maʼni rí makuwáanʼ kámuu mbiʼi. Rígi̱ nindxu̱u̱ mbá numuu májánʼ mu muxnáa núma̱aʼ. Rí muxnáa núma̱aʼ Dios maʼni rí muʼni ñajunʼ ga̱jma̱a̱ gagi.

Náa México, mbáa ndxájulú bi̱ nagumbiʼyuu Jesús nákha ginii nañajunʼ wéñuʼ. Nguáná asndu naraʼwíí mañajunʼ witsu turno mu madaaʼ itháan mbújkha̱a̱. Mú ikhú nininiʼ Jeobá ga̱jma̱a̱ nijmañuu rí ikhaa nixnáxi̱i̱ A̱ʼdióo bi̱ nandoo kaʼyoo wéñuʼ mu makhañúu ga̱jma̱a̱ numulúʼ. Ra̱ʼkhá tháán nindoo maʼni ñajunʼ Jeobá rí asndu niʼthúu̱n rí maxnáximinaʼ maʼni ñajunʼ. Ma̱ngaa, maski ajndu niñajunʼ náa mbá compañía mbá 28 tsiguʼ, mú niniñuʼ. Xúʼko̱ niʼni rí Jesús nigíʼdu̱u̱ raʼni ñajunʼ Dios ga̱jma̱a̱ gagi.

Bi̱ ñajunlú cristianos kuwáanʼ kaʼwu. Lá narmáʼáan a̱jkia̱nʼ xóo niraxtaa nákha xóó tsetatsiʼniʼ Jeobá ráʼ. Apóstol Pablo niʼni marmáʼáan a̱jkiu̱ún a̱ngiu̱lú bi̱ kuwa náa Roma rí nákha xóó tsénindxu̱ún cristianos ikhiin nixnaximi̱jna̱ náa aʼkhá, mú rí xúgi̱ nixnaximi̱jna̱ muni rí jmbu. Numuu rí nini dí májánʼ ikhiin ma̱ndoo makuwa kámuu mbiʼi (Rom. 6:17-22). Mangáanʼ nuʼnimbulúʼ xtángoo ndrígóo Dios. Ikha jngó na̱nguá eminiʼlú numuu rí na̱nguá kuwáanʼ ruʼni dí raʼkhí. Rúʼko̱ naʼni makuwáanʼ gagi.

 Guʼyáá rí niʼni mbáa ndxájulú bi̱ mbiʼyuu Jaime. Nákha xóó tsénindxu̱u̱ xa̱bi̱i̱ Jeobá ninindxu̱u̱ mbáa boxeador. Ma̱ngaa na̱nguá eku̱mu̱u̱ kaʼyoo Dios, ikhaa niʼnimbo̱o̱ náa evolución. Índo̱ nigíʼdu̱u̱ ra̱jkha̱ náa nagimbáanʼ, niguanúu tsiánguá índo̱ ndiʼyoo rí a̱ngiu̱lú nandún kuyamijná. Ikhaa nindoo mariʼkuminaʼ, mú ndiyóoʼ ma̱ndo̱ʼo̱o̱ Jeobá rí mambáyúu mu maku̱mu̱u̱ kaʼyoo ikhaa. Jaime naʼthí: “Mañúú mañúú nijkha ra̱yo̱o̱ rí Jeobá nindxu̱u̱ Anu̱lú bi̱ nandoo kaʼyulúʼ wéñuʼ ga̱jma̱a̱ nagáwiinʼ a̱jkiu̱u̱n kaʼyulúʼ”. Ikhaa ndaʼyoo májánʼ rí Dios niñewu̱u̱n numuu rí niʼnimbo̱o̱ kaʼyoo. Naʼthí rí á mu táriʼkuminaʼ mbáa ikhaa nikháñu xóo tikhun a̱ngui̱i̱n bi̱ nikuwa náa boxeo. Ikhaa ndaʼyoo májánʼ rí índo̱ nigíʼdu̱u̱ raʼni ñajunʼ Jeobá nixtáa itháan gagi.

Índo̱ kuwáanʼ ruguaʼthi̱i̱n rí mambáa numbaaʼ xkawiʼ rígi̱, ndiéjunʼ gíʼmaa muʼni rá. Kuwáanʼ má ruʼni rí nandoo Dios ga̱jma̱a̱ kuaʼthi̱i̱nlú makuwáanʼ kámuu mbiʼi. Ikha jngó guʼnimbulúʼ má xúʼko̱ xtágabu rí na̱ʼkha̱ náa Gálatas 6:8, 9: “Xáʼgáanʼ muʼni rí májánʼ, numuu rí maʼga̱nú mbiʼi muʼdaʼ á mu tséʼgáanʼ”. Gumbayúmíjná náa Jeobá ga̱jma̱a̱ guʼnimi̱jna̱ rí maʼngulú, ga̱jma̱a̱ rí manindxu̱lúʼ májánʼ xa̱bu̱ numuu dí rígi̱ gáʼyulúʼ índo̱ gárígá “majphú mba̱a̱ gaʼkhu” ga̱jma̱a̱ rí muʼni má xúʼko̱ ñajunʼ Dios ndrígúlú ga̱jma̱a̱ gagi (Rev. 7:9, 13, 14; Sant. 1:2-4).

Á mu naʼngulú, nduʼyáá májánʼ rí Jeobá maʼni tsajkurámáánʼ. Náa numuu rá. Numuu rí ikhaa ndaʼyoo xúgíʼ rí nuʼni ga̱jma̱a̱ numuu ma̱ngaa rí nandulúʼ kuʼyáá ikhaa ga̱jma̱a̱ mbiʼyuu. Á mu nuʼni má xúʼko̱ ñajunʼ ga̱jma̱a̱ gagi, makumulúʼ xóo David índo̱ niʼthí ajngáa rígi̱: “Náa xúgíʼ rí mani ginii ndaʼyaaʼ má xúʼko̱ Jeobá. Numuu rí ikhaa xtáa náa ñawun mújúnʼ, nda̱a̱ nimbá rí maʼni maxpátrigun. Ikha jngó a̱jkiu̱nʼ ra̱ʼkhá tháán edxuu” (Sal. 16:8, 9).