1. Xú káʼnii embáyulú 2 Corintios 3:1-3 mu mangajuluʼ dí muʼsngúún xa̱bu̱ majngún iyááʼ rá. (Atayáá xtiʼkhu rí na̱ʼkha̱ náa timbá ináa.)

XÚ KÁʼNII ku̱ma̱a̱ ikháán índo̱ mbáa bi̱ naʼnigajmaa Biblia najngúun iyááʼ rá. Mbáa ra̱ʼkhá tháán edxuu a̱jkia̱a̱nʼ (Mat. 28:19). Ga̱jma̱a̱ á mu ikháán nirasngáá bi̱ najngúun iyááʼ, itháán edxuu a̱jkia̱a̱nʼ índo̱ natayáá mbiʼi rúʼko̱ (1 Tes. 2:19, 20). Bi̱ ndiʼkhún nijngún iyááʼ nindxúu̱n xóo mbá májánʼ “i̱yi̱i̱ʼ náa maʼthí májánʼ náa ikháanʼ”, raʼkháa i̱ndó náa bi̱ niʼsngáa ma̱ngaa bi̱ kúwá náa xúgíʼ congregación (atraxnuu 2 Corintios 3:1-3). *

2. a) Xú káʼnii graxe̱ guʼyáá ga̱jma̱a̱ náá numuu rá. b) Ndiéjunʼ eyoo gáʼthúu̱n rí marasngáá mbáa rá. (Atayáá ma̱ngaa nota.)

² Ra̱ʼkhá tháán májánʼ nindxu̱u̱ dí nirígá náa a̱jkhu̱ tsiguʼ kidíiʼ, nijuiʼsngúún ga̱jma̱a̱ numuu Biblia * mbá 10 millón xa̱bu̱ náa mámbá igu̱nʼ náa xúgíʼ numbaaʼ. Ga̱jma̱a̱ ikháá má tsiguʼ rúʼko̱ nijngún iyááʼ itháan rí mbá 280,000 náa mámbá tsiguʼ. Xú káʼnii gumbáñuun xúgíinʼ xa̱bu̱ buʼko̱ majngún iyááʼ rá. Nákha  xóó Jeobá naniñuuʼ mbiʼi rí xa̱bu̱ mani̱ndxu̱ún xa̱bi̱i̱ Cristo ma̱ndoo muruguambáñuun majngún iyááʼ. Numuu dí nánguá guanúu mbayuʼ mbiʼi (1 Cor. 7:29a; 1 Ped. 4:7).

3. Ndiéjunʼ gajmañulú náa artículo rígi̱ rá.

³ Mu mbuʼyáá xú káʼnii gándoo mumbáñuun xa̱bu̱ majngún iyááʼ, Cuerpo Gobernante niraxi̱ náa mixtiʼkhu Betel xú káʼnii gándoo gúni. Náa artículo rígi̱ ga̱jma̱a̱ náa imbo̱ʼ, mbuʼyáá xú káʼnii gándoo gajmañulú náa a̱ngiu̱lú bi̱ nindxúu̱n precursor, misionero ga̱jma̱a̱ circuito (Prov. 11:14; 15:22). * Ikhiin nuthi ndiéjunʼ gíʼmaa muni bi̱ nusngáa numuu Biblia mangiin bi̱ kúwá runigajmaa mu marigá dí májánʼ. Náa artículo rígi̱ mbuʼyáá witsu enii rí ndayóoʼ muni xúgínʼ bi̱ nunigajmaa mu majngún iyááʼ.

4. Ndiéjunʼ gíʼmaa mbuʼyáá índo̱ nuʼnigajmaa Biblia gajmiúlú mbáa náa riejun goʼwóo rá.

⁴ Mbaʼin a̱ngiu̱lú nunigajmaa Biblia gajmiún xa̱bu̱ náa riejun guʼwún. Maski ajndu xígi̱ nigíʼdi̱i̱ niʼnigajmaa Biblia gajmiúlú xa̱bu̱, mu índo̱ nuʼtámíjná má xúʼko̱ gajmiúlú náa riejun guʼwún na̱nguá eʼtamíjná gajmiúlú mbayuuʼ ga̱jma̱a̱ na̱nguá eʼni xúgíʼ xmáná. Mu manigu̱u̱ʼ maʼnigajmaa itháan xa̱bu̱, tikhun nunda̱ʼa̱ número ndrígóo mu mutaraʼáá o muxu̱ʼma̱ mensaje inuu muthán itháan ga̱jma̱a̱ numuu Biblia. Índo̱ nuʼsngáá mbáa náa riejun goʼwóo, maʼni mingíjyúuʼ dí makro̱ʼo̱o̱ itháan ga̱jma̱a̱ majngúun iyááʼ.

5. Xó má niʼthí Jesús náa Lucas 14:27-33, ndiéjunʼ gándoo majmulú mumbáñuun bi̱ nuʼsngúún rá.

⁵ Mbá miʼtsú Jesús nijmuu mbá xkri̱da mu maʼthí ndiéjunʼ gíʼma maʼni bi̱ nandoo mani̱ndxu̱u̱ xa̱bi̱i̱. Niʼthí ga̱jma̱a̱ numuu mbáa xa̱bu̱ bi̱ nandoo maʼni mbá torre ga̱jma̱a̱ mbáa rey bi̱ maʼga̱ gaxmína̱ʼ. Jesús niʼthí ga̱jma̱a̱ numuu bi̱ nandoo maʼni mbá torre, rí “ginii nagi̱ʼi̱ mu mbaʼyoo nguáthá mbújkha̱a̱ gámbóo” maʼni gájxu̱u̱ torre, xúʼko̱ má rey ‹ginii nagi̱ʼi̱ ga̱jma̱a̱ ndaʼyoo› á mu xa̱bi̱i̱ maʼngu̱u̱n muxmijná gajmiún xa̱bu̱ sia̱nʼ (atraxnuu Lucas 14:27-33). * Xúʼko̱ má ndiʼyoo Jesús, rí mbáa xa̱bu̱  bi̱ nandoo mani̱ndxu̱u̱ xa̱bi̱i̱ gíʼma rí mbaʼyoo tsumáá ndiéjunʼ eyoo gáʼthúu̱n rí maʼga̱ kidxuuʼ. Ikha jngó guxkaxi̱i̱n bi̱ nandún mani̱ndxu̱ún xa̱bi̱i̱ ikhaa rí muʼnigajmaa gajmiúlú xúgíʼ xmáná. Xú káʼnii gándoo gúʼni rá.

6. Ndiéjunʼ gáʼyóoʼ muʼni mu mumbáyii itháan bi̱ nuʼsngáá rá.

⁶ Atagíʼdi̱i̱ mbajyáaʼ itháan índo̱ natanigajmaa náa riejun goʼwóoʼ xa̱bu̱. Mbáa ma̱ndoo mbu̱ya̱a̱ mbá rí na̱ʼkha̱ raʼthí náa Biblia mámbá índo̱ nadxuʼ ratayáá. Índo̱ xa̱bu̱ na̱jkha̱ raguʼwuun dí narasngáá mbayuuʼ, atraxi̱i̱ á mu ma̱ndoo mutrigáanʼ mutamijná itháan. Dí xóo gariʼña bi̱ narasngáá masngájma á mu ndaʼyoo rí gíʼdoo numuu maʼnigajmaa Biblia, mbáa ma̱ngaa ma̱ndoo matrajxi̱i̱ á mu maʼndoo maʼnigajmaa a̱jma̱ nuthu rí mbá xmáná, rúʼko̱ gámbáyúu majmañuu itháan. Mú raʼkháa i̱ndó rúʼko̱ eyóoʼ.

7. Xú káʼnii gándoo mbáa bi̱ naʼsngáa maʼnirataminaʼ májánʼ mámbá dí maʼsngáa numuu Biblia rá.

⁷ Mbáa bi̱ naʼsngáa gíʼmaa maʼni rataminaʼ májánʼ índo̱ naʼsngáa numuu Biblia. Ma̱ndoo matagíʼdi̱i̱ matraxnuu i̱yi̱i̱ʼ rí majmaʼ mu mataʼyáaʼ Biblia dí na̱ʼkha̱ ikhí. Ma̱ngaa atayáá ndiéjunʼ rí nagájnuriyoʼ, atatsaʼwáminaʼ rí kayá edxuu, atayáá subtítulo, graxe̱ rí majmaʼ, xtiʼkhu rí na̱ʼkha̱, Biblia náa naʼthí “atraxnuu”, ga̱jma̱a̱ atayáaʼ video rí ma̱ndoo matasngajmáá rí nambánii ga̱jma̱a̱ dí xtaa narasngáa. Nda̱wa̱á atatsaʼwáminaʼ xú káʼni gándoo maratha̱a̱n bi̱ narasngáá mu xáʼniuu mingíjyúuʼ makro̱ʼo̱o̱ rí magíʼ maʼni (Neh. 8:8; Prov. 15:28a).

8. Ndiéjunʼ eʼsngúlúʼ rí naʼthí Colosenses 1:9, 10 ga̱jma̱a̱ numuu rí muʼtájkáan numún bi̱ nuʼsngúún rá.

⁸ Índo̱ gátani rataminaʼ, aratakháñii Jeobá ga̱jma̱a̱ numuu bi̱ narasngáá ma̱ngaa ndiéjunʼ eyóoʼ ikhaa. Atanda̱ʼa̱a̱ Jeobá rí mambáyaʼ marasngáa rí maʼni maʼga̱ asndu náa a̱jkiu̱u̱n (atraxnuu Colosenses 1:9, 10). * Ataniminaʼ ma̱ta̱ya̱a̱ ndiéjunʼ rí maʼniuu mingíjyúuʼ makro̱ʼo̱o̱ mu matambáyii maʼga̱nú majngúun iyááʼ.

9. Xú káʼnii gándoo gúni bi̱ nusngáa mumbañún muniratamijná bi̱ nusngúún rá.

⁹ Nuguaʼthi̱i̱n rí nuʼsngáá mbáa xa̱bu̱ maʼni  rí manga̱jo̱o̱ dí niʼni Jeobá ga̱jma̱a̱ Jesús, rúʼko̱ gáʼni rí maʼndoo majmañuu itháan (Mat. 5:3, 6). Ndayóoʼ magíʼ edxu̱u̱ rí xtáa rajmañuu bi̱ najuiʼsngáá, rúʼko̱ gáʼni rí mambáyúu itháan. Mu maʼni xúʼko̱ gíʼdoo wéñuʼ numuu maratha̱a̱n rí maʼnirataminaʼ wapháá náa kaʼyoo maʼnigajmaa ma̱ngaa rí gíʼmaa mandxaʼwáminaʼ rí xú káʼni nambáyúu ikhaa. Mú, xú káʼnii gíʼmaa maʼni bi̱ naʼsngáa rá. Mbóó gátani rataminaʼ ga̱jma̱a̱ʼ mbá kíxnuu mu mbaʼyoo xóo gíʼmaa maʼnirataminaʼ. * Ma̱ngaa aratháán mariʼña̱a̱ xóo ekro̱ʼo̱o̱ náa graxe̱ dí natani̱i̱. Índo̱ gátani xúʼko̱, ikháán ma̱ta̱ya̱a̱ á mu nikro̱ʼo̱o̱ májánʼ náa xtáa raʼnigajma̱a̱. Mú rígá imbo̱ʼ rí ma̱ndoo maratha̱a̱n maʼni bi̱ narasngáá.

10. a) Náá numuu rí gíʼmaa maguxnuu Biblia xúgíʼ mbiʼi bi̱ nuʼsngáá rá. b) Ndiéjunʼ eyóoʼ maʼni mu makro̱ʼo̱o̱ itháan índo̱ naguxnuu Biblia xá.

¹⁰ Raʼkháa i̱ndó ndayóoʼ matanigajmaa̱ mámbá xmáná ga̱jma̱a̱ʼ bi̱ narasngáá, mú rígá tikhu rí gíʼmaa maʼni mbáwíi. Gíʼmaa maʼtámíjná ga̱jma̱a̱ Jeobá ma̱ngaa índo̱ ikhaa naguxnuu Biblia xúgíʼ mbiʼi naʼdxawuun dí naʼthúu̱n (Jos. 1:8; Sal. 1:1-3). Gusgajmáá xú káʼnii gándoo majmuu “Programa de lectura de la Biblia” rí ma̱ndoo maguma̱a̱ imprimir dí rígá náa jw.org. * Gajkhun má, mu mambáyúu itháan índo̱ naʼnigajmaa Biblia ndayóoʼ muʼthán rí mandxaʼwóo edxu̱u̱ ndiéjunʼ ejmañuu ga̱jma̱a̱ numuu Jeobá dí niguxnuu ga̱jma̱a̱ xú káʼnii gándoo magíʼ maʼnimbánuu ikha rí nijmañuu (Hech. 17:11; Sant. 1:25).

11. a) Xú káʼnii gándoo majmañuu maʼtájkháan bi̱ nuʼsngáá rá. b) Ndíjkha rí gíʼmaa maʼtákháñuu Jeobá xúgíʼ mbiʼi xá.

¹¹ Aratháán bi̱ narasngáá rí maʼtákháñuu Jeobá xúgíʼ mbiʼi. Índo̱ garasngáá, aratakháñii Jeobá ga̱jma̱a̱ʼ mbóó índo̱ natagíʼdi̱i̱ ga̱jma̱a̱ índo̱ gámbáʼ, ma̱ngaa arathá ga̱jma̱a̱ numuu ikhaa. Índo̱ gaʼdxawun dí naratájkáan, ikhaa majmañuu maʼthúu̱n Jeobá ga̱jma̱a̱ xúgíʼ a̱jkiu̱u̱n ma̱ngaa rí majmuu mbiʼyuu Jesucristo (Mat. 6:9; Juan 15:16). Rí matraxnuu xúgíʼ mbiʼi Biblia nindxu̱u̱ xóo matadxawíín rí naʼtháanʼ Jeobá ga̱jma̱a̱ rí maratajkáan nindxu̱u̱ xóo maratamíjná ga̱jma̱a̱ Jeobá. Rúʼko̱ gámbáyúu bi̱ narasngáá rí maʼga̱ kanuu itháan náa Dios (Sant. 4:8). Á mu naʼni rígi̱, maʼga̱ kayáa maxnáximinaʼ náa Jeobá ga̱jma̱a̱ majngúun iyááʼ.

12. Xkáʼnii gándoo mumbayíí bi̱ nuʼsngáá dí mambáxu̱u̱ májánʼ ga̱jma̱a̱ Jeobá rá.

¹² Nandulú rí bi̱ nuʼsngáá majmañuu numuu Jeobá, mú rí itháan nandulúʼ rí maʼga̱nú asndu náa a̱jkiu̱u̱n rí najmañuu mu maʼnimbánuu. Jesús mbaʼa rí niʼsngúún xa̱bu̱ ga̱jma̱a̱ ikhiin ninigu̱u̱nʼ majmañún rí ikhaa niʼsngáa. Ni̱jkha̱nú asndu náa a̱jkiu̱ún rí nidxawíín ikha jngó xa̱bu̱ nigún kidxuuʼ (Luc. 24:15, 27, 32). Bi̱ narasngáá gíʼmaa mbaʼyoo rí gajkhun xtáa Jeobá, mbáa bi̱ ma̱ndoo maʼtamíjná ga̱jma̱a̱, bi̱ ma̱ndoo mbaʼyoo xóo Anu̱u̱, xóo Dios ndrígóo ga̱jma̱a̱ mbáa bi̱ mambáxu̱u̱ májánʼ ga̱jma̱a̱ (Sal. 25:4, 5). Índo̱ xtaa narasngáa atani magajnúriyo̱o̱ rí xú káʼnii xa̱bu̱ nindxu̱u̱ Jeobá (Éx. 34:5, 6; 1 Ped. 5:6, 7). Tséʼniuu má asndu ndiéjunʼ xtaa narasngáa atani rí magajnúriyo̱o̱ rí xóo nindxu̱u̱ ikhaa. Gumbáyii bi̱ nuʼsngáá rí mbaʼyamajkuu xóo nindxu̱u̱ Jeobá rí ikhaa nandoo kaʼyulú, dí ra̱ʼkhá tháán májáanʼ ga̱jma̱a̱ dí nagáwi̱i̱n a̱jkiu̱u̱n. Jesús niʼthí rí ‹maʼndulú kuʼyáá Jeobá› “nindxu̱u̱ rí itháan mba̱a̱ ga̱jma̱a̱ timbá kiʼtáñajunʼ” (Mat. 22:37, 38). Atambáyii bi̱ narasngáá rí maʼndoo kaʼyoo Jeobá ga̱jma̱a̱ xúgíʼ a̱jkiu̱u̱n.

13. Atagíʼ mbá xkri̱da rí xóo gándoo matambáyii bi̱ narasngáá mbaʼyoo xóo nindxu̱u̱ Jeobá.

¹³ Índo̱ naratámíjná ga̱jma̱a̱ bi̱ narasngáá atani mbaʼyoo rí ikháán nandaaʼ xtayáá wéñuʼ Jeobá. Rígi̱ mambáyúu bi̱ narasngáá mbaʼyoo rí ndayóoʼ mambáxu̱u̱ ga̱jma̱a̱ Jeobá ga̱jma̱a̱ rí majmañuu ma̱ndoo kaʼyoo (Sal. 73:28). Mbá xkri̱da lá nitayáá mbá rí nimbáyaʼ náa i̱yi̱i̱ʼ ndrígúlú o índo̱ nitraxnuu náa Biblia náa naʼthí xóo nindxu̱u̱ Jeobá xóo ngajua ndrígóo, rí najmañuu wéñuʼ, rí ikhaa naʼni rí jmbu, o náa nisngájma tsiakii ndrígóo ráʼ. Ma̱ndoo maratha̱a̱n bi̱ narasngáá dí rúʼko̱ nindxu̱u̱ tikhu rí ikháán nandaaʼ xtayáá Anu̱lú. Rígá xóó i̱ʼwáʼ rí ma̱ndoo maratha̱a̱n bi̱ narasngáá rí ndayóoʼ maʼni mu maʼga̱ kayá majngúun iyááʼ.

14. Xó má naʼthí Hebreos 10:24, 25, ndiéjunʼ gáʼyóoʼ maʼni bi̱ nuʼsngáá rá.

¹⁴ Xúgiáanʼ nandulúʼ rí bi̱ nuʼsngúún majngún iyááʼ, mbá rí ma̱ndoo muʼni nindxu̱u̱ rí mumbáñuun magún náa nagimbáanʼ. Bi̱ najmañún nusngáa májánʼ nuthi rí índo̱ bi̱ nuʼsngúún nagún náa nagimbáanʼ ikhiin tséjyúu ejngúún iyááʼ (Sal. 111:1). Tikhun nutún bi̱ nusngúún rí á mu nagún náa nagimbáanʼ, ikhí majmañún itháan ki xóo rí á mu i̱ndó nunigajmaa  náa guʼwún gajmiún ikhiin. Guraxnuu Hebreos 10:24, 25 * gajmiúlú bi̱ nuʼsngáá ma̱ngaa guʼtháán i̱ʼwáʼ dí gámbáyúu á mu na̱jkha̱ náa nagimbáanʼ. Ma̱ndoo matasngajmáá video Káʼnii erigá náa Guʼwá nagimbáanʼ rá. * Atambáyii bi̱ narasngáá mbaʼyoo rí gíʼdoo numuu maʼga̱ náa nagimbáanʼ mámbá xmáná.

15. Ndiéjunʼ gándoo muʼni mu bi̱ nuʼsngáá maʼga̱ náa nagimbáanʼ mámbá xmáná rá.

¹⁵ Ndiéjunʼ gándoo matani á mu bi̱ narasngáá na̱nguá ejkha̱ náa nagimbáanʼ o na̱nguá ejkha̱ mámbá xmáná rá. Aratháán ga̱jma̱a̱ gagi mbá rí ndiʼkhún nijmañaʼ náa reunión, rúʼko̱ mambáyúu itháan ki xóo i̱ndó muʼthán rí maʼga̱, araxnáá i̱yi̱i̱ʼ Bi̱ Nayejngoo o i̱yi̱i̱ʼ Xóo kúwi̱i̱n ga̱jma̱a̱ xóo Etaraʼa cristianos rí najmulú náa nagimbáanʼ, aratháán ndiéjunʼ gajmañulú imbo̱ʼ xmáná ga̱jma̱a̱ atraxi̱i̱ ndiéjunʼ rí ikhaa maniguuʼ itháan mbaʼyoo. Índo̱ ga̱ʼga̱ timbá aʼphu̱ náa nagimbáanʼ bi̱ narasngáá mbaʼyoo rí mixtiʼkhu kayuʼ rí ndiʼyoo náa i̱ʼwáʼ religión (1 Cor. 14:24, 25). Ikhí maxkamii xa̱bu̱ bi̱ nugíʼ májánʼ xkri̱da bi̱ ma̱ndoo mbaʼyaridúún ga̱jma̱a̱ bi̱ ma̱ndoo mumbayíí majngúun iyááʼ.

16. a) Ndiéjunʼ gándoo muʼni mu bi̱ nuʼsngúún majngún iyááʼ rá. b) Ndiéjunʼ gajmañulú náa imbo̱ʼ artículo rá.

¹⁶ Ndiéjunʼ gándoo muʼni mu bi̱ nuʼsngúún majngún iyááʼ rá. Ma̱ndoo mumbáñuun rí munigajmaa má xúʼko̱ mámbá xmáná, rí muniratamijná náa munigajmaa, rí mutamijná gajmiún Jeobá xúgíʼ mbiʼi ga̱jma̱a̱ rí mambáxu̱u̱n májánʼ gajmiún ikhaa, ma̱ngaa guxkaxi̱i̱ a̱jkiu̱u̱n maʼga̱ náa guʼwá nagimbáanʼ. (Atayáá kúgumaʼá “ Rí gíʼmaa muni bi̱ nandún majngún iyááʼ”.) Náa i̱mba̱ artículo majmañulúʼ dí rígá imbá witsu enii rí mambáñún bi̱ nusngáa mu mumbañún majngún iyááʼ bi̱ nusngúún.