1. Nguáná gándoo maʼni mingíjyúuʼ rí muʼni ñajuunʼ Jeobá rá.

NGUÁNÁ gaʼni itháan mingíjyúuʼ muʼni ñajuunʼ Jeobá rá. Lá índo̱ kuaʼdáá xkujndu o índo̱ na̱nguá dxe̱ʼ. Índo̱ kuaʼdáá xkujndu, mbá nacha̱ eʼyáaʼlú Jeobá. Mú ndiéjunʼ eʼni índo̱ nánguá kuaʼdáá xkujndu rá. Lá migamíi mambumulú muʼni ñajuunʼ Jeobá ráʼ. Jeobá niʼthún israelitas ga̱jma̱a̱ numuu rí migamíi maʼni xúʼko̱ (Deut. 6:10-12).

2. Xkáʼnii xkri̱da májánʼ niʼgíiʼ Asá rá.

² Rey Asá ninindxu̱u̱ mbá májánʼ xkri̱da, ikhaa nikumu̱u̱ kaʼyoo káxi̱ Jeobá. Niʼni ñajuunʼ Jeobá raʼkháa i̱ndó náa mbiʼi rí nixtáa tsímáá ma̱ngaa niʼni índo̱ rí nigiʼdoo xkujndu. Asndu nákha ginii “Asá niʼni mbóó a̱jkiu̱u̱n mu mbaʼyamajkuu Jeobá” (1 Rey. 15:14). Asá nisngájma índo̱ niʼni jngudi̱i̱ xúgíʼ náa nduyamajkhún xándú náa Judá. Náa Biblia naʼthí “Niʼni gámbóo náa nuxnaxi̱ tsigijñaʼ ndrígu̱ún dioses ga̱jma̱a̱ náa nduyamajkhún xándú, nixpámiguu columnas rí mitsáʼkháan ga̱jma̱a̱ postes rí mitsáʼkháan” (2 Crón. 14:3, 5). Ma̱ngaa niʼni rí ní xánindxu̱u̱ reina Maacá bi̱ nindxu̱u̱ xíñúnʼ, numuu rí nixkajxi̱i̱n xa̱bu̱ mbuyamajkuíí xándú (1 Rey. 15:11-13).

3. Ndiéjunʼ guʼyáá náa artículo rígi̱ rá.

 ³ Asá raʼkháa i̱ndó niʼni gámbáa náa ndiyamajkuíí xándú. Ma̱ngaa nimbáñun xa̱bu̱ bi̱ kúwá náa Judá mú mbuyamajkuíí mbu̱júu̱ Jeobá. Dios ni’ni tsajkurámaaʼ Asá ga̱jma̱a̱ bi̱ kúwá náa Judá mu makuwá tsímáá. * Mbá gu̱wa̱ʼ tsiguʼ rí niʼtáñajunʼ rey Asá “túgiʼdu̱u̱n gajmiún ikhaa” (2 Crón. 14:1, 4, 6). Náa artículo rígi̱ mbuʼyáá ndiéjunʼ niʼni Asá mbiʼi rúʼko̱. Nda̱wa̱á mbuʼyáá xkri̱da ndrígu̱ún cristianos bi̱ nikúwá nakha siglo timbá, bi̱ nini xó má Asá rí nijmún májánʼ mbiʼi índo̱ nikúwá tsímáá. Nda̱wa̱á muriʼña̱a̱ graxe̱ rígi̱: Á mu rí kuwáánʼ náa mbá xuajen rí nuniñulúʼ muʼni ñajuunʼ Dios, xú kaʼnii gándoo majmulúʼ májánʼ mbiʼi rúʼko̱ rá.

4. Xó má eʼthí náa 2 Crónicas 14:2, 6, 7, xú káʼnii nijmuu Asá mbiʼi dí nirígá tsímáá rá.

⁴ (Atraxnuu 2 Crónicas 14:2, * 6, 7). * Asá niʼthúún xa̱bu̱ rí Jeobá ‹niʼni rí makuwá tsímáá›. Mú Asá nánguá nindxa̱ʼwáminaʼ rí nda̱a̱ rí gáʼni. Ikhaa nigíminaʼ maʼni májáanʼ xuajen, xtátsí, torres ga̱jma̱a̱ xkrugua. Niʼthún xa̱bu̱ xuajen bi̱ kuwa náa Judá: “Ikháanʼ xóó kaʼyulú muʼtáñajunʼ náa país”. Ndiéjunʼ nindoo gaʼthí Asá rá. Nindoo gaʼthí rí xa̱bu̱ ma̱ndoo majmúún ku̱ba̱ʼ rí Dios nixnúún rí asndu xa̱bu̱ sia̱nʼ ndaa rí gúní.  Niʼthún xa̱bu̱ xuajen rí majmúún májánʼ mbiʼi rí kuwa tsímáá.

5. Náa numuu rí Asá niʼniratiin mbaʼin soldado rá.

⁵ Asá nijmuu mbiʼi rí tsímáá mú maʼniratiin mbaʼin soldado (2 Crón. 14:8). Lá nindoo gaʼthí rí tákumu̱u̱ kaʼyoo Jeobá xáʼ. Na̱nguá. Ndiʼyoo dí ñajunʼ ndrígóo xóo rey rí maʼniratiin xa̱bu̱ xuajen mu muraʼníí xkujndu dí gáʼkha̱ nda̱wa̱á. Asá ndiʼyoo rí tsímáá dí rígá náa Judá xájyúuʼ má mbayuʼ, xúʼko̱ má gajkhun nirígá.

6. Xkáʼnii nijmún cristianos bi̱ nikúwá nákha siglo timbá mbiʼi rí nánguá niguaʼdáá xkujndu rá.

⁶ Maski ajndu cristianos bi̱ nikúwá nákha siglo timbá mbaʼa nuthu niguma gíníi, mú ma̱ngaa nikúwá tsímáá. Xú kaʼnii nijmún mbiʼi rúʼko̱ xá. Xa̱bekha ga̱jma̱a̱ gu̱ʼu̱ buʼko̱ nitaraʼa itháan ajngáa rí májánʼ. Náa Hechos na̱ʼkha̱ raʼthí rí “nijngrui̱gu̱u̱n má xúʼko̱ gajmiún Jeobá” numuu rí túniñanʼ rutaraʼa “ni̱jkha̱ raʼni mbaʼin má xúʼko̱”. Nikujmaa kaʼwu rí Jeobá niʼni tsajkurámuuʼ náa nitaraʼa ga̱jma̱a̱ gagi índo̱ rí nánguá niguaʼdáá xkujndu (Hech. 9:26-31).

7, 8. Ndiéjunʼ ni’ni Pablo ga̱jma̱a̱ eʼwíínʼ cristianos índo̱ nirígá dí tsímáá rá.

⁷ Cristianos bi̱ nikúwá nákha siglo timbá nini xúgíʼ xóo nindoo mu mutaraʼa má xúʼko̱. Mbá xkri̱da, apóstol Pablo niguanúu náa Éfeso numuu rí “mbá xkrugua mba̱a̱ nimbaʼtoo” mu maʼtáraʼa ga̱jma̱a̱ maʼsngúún xa̱bu̱ náa xuajen rúʼko̱ (1 Cor. 16:8, 9).

⁸ Pablo ga̱jma̱a̱ eʼwíínʼ cristianos ndiyáá rí ma̱ndoo mutaraʼa itháan nákha tsiguʼ 49 nda̱wa̱á rí nimbánuu xkujndu ga̱jma̱a̱ numuu rí murujtu xtóo sngu̱ún (Hech. 15:23-29). Índo̱ nijuiʼthá náa xúgíʼ congregación, xa̱bi̱i̱ Jesús nini mbá tsiakii rí mutaraʼa “ajngá rí májánʼ numuu Jeobá” (Hech. 15:30-35). Ndiéjunʼ nirígá rá. Náa Biblia naʼthí rí “bi̱ kúwá náa congregación niʼni itháán gújkhúʼ fe ndrígu̱ún ga̱jma̱a̱ mámbá mbiʼi ni̱jkha̱ raʼni itháán mbaʼin” (Hech. 16:4, 5).

9. Ndiéjunʼ erígá náa mbaʼa xuajen dí mbiʼi xúgi̱, ga̱jma̱a̱ ndiéjunʼ gíʼmaa murajximíjna̱ rá.

⁹ Náa mbaʼa xuajen dí rígá mbiʼi xúgi̱ nandoo nuʼtáraʼa numuu rí na̱nguá eguma gínáanʼ. Lá xtaa náa mbá xuajen rí nuniñaanʼ matani ñajuunʼ Dios xáʼ. Á mu xúʼko̱ atraxi̱mínáʼ, “xú kaʼnii ejmuʼ mbiʼi rúʼko̱ rá.” Náa iwáá mbiʼi rígi̱, xuajñuu Jeobá naríyaʼ awan rí ma̱ndoo majuiʼtáraʼa ga̱jma̱a̱ miʼsngáa náa xúgíʼ xuajen dí rígá náa numbaaʼ (Mar. 13:10). ¡Nagui̱i̱ wéñuʼ, rígá mbaʼa enii rí xóo ma̱ndoo muʼni náa xuajñuu Jeobá!

10. Ndiéjunʼ exkajxáanʼ muʼni rí naʼthí náa 2 Timoteo 4:2 rá.

¹⁰ Xú káʼnii gándoo majmulú májánʼ mbiʼi índo̱ xóó nánguá eguma gínáanʼ rá. (Atraxnuu 2 Timoteo 4:2.) * Guʼyáá xóo kuwáanʼlu. Gundxa̱ʼwámijna á mu ikháanʼlu o mbáa bi̱ xtáa náa guʼwúlú ma̱ndoo maʼtáraʼa itháan o mani̱ndxu̱u̱ precursor. Raʼkháa mbújkha̱a̱ o rí maguaʼdáá itháan eyóoʼ mbuʼyáaʼ xúgi̱, numuu rí ikhaa mandáti̱ga̱a̱ índo̱ gaʼni majphú mba̱a̱ gaʼkhu (Prov. 11:4; Mat. 6:31-33; 1 Juan 2:15-17).

11. Ndiéjunʼ nini tikhun mu ma̱ndoo mutaruʼúún eʼwíinʼ xa̱bu̱ ajngáa rí májánʼ rá.

¹¹ Mbaʼin publicadores nijmañún muthi imbo̱ʼ ajngáa mu ma̱ndoo mutaraʼa ga̱jma̱a̱ musngúún eʼwíinʼ xa̱bu̱. Náa xuajñuu Dios  nayambáá wéñuʼ mú maguwí i̱yi̱i̱ʼ rí nagájnuu náa Biblia náa mbaʼa ajngáa. Mbá xkri̱da nákha tsiguʼ 2010, i̱yi̱i̱ʼ ndrígúlú nirígá náa mbá 500 ajngáa. Mú, rí mbiʼi xúgi̱ rígá itháan rí 1,000 ajngáa.

12. Xú káʼnii ekumu̱ún tikhun xa̱bu̱ índo̱ nudxawíín náa ajngún ga̱jma̱a̱ numuu Reino rá. Arathá mbá xkri̱da.

¹² Xú kaʼnii ekumu̱ún xa̱bu̱ rí nudxawíín náa ajngún índo̱ nuthúún ga̱jma̱a̱ numuu Jeobá xá. Guʼyáá xóo nigíʼnuu mbáa ndxájulú a̱ʼgu̱, bi̱ nixtáa asamblea dí nirígá náa Memphis, (Tennessee, Estados Unidos) náa nithi ajngóo ikhaa. Náa asamblea nijuiʼtá náa ajngáa kiniaruanda, mbá ajngáa rí nuthi náa Ruanda, náa República Democrática del Congo ga̱jma̱a̱ náa Uganda. Nda̱wa̱á rí nijngoo asamblea ndxájulú niʼthí: “Naʼni mbá 17 tsiguʼ rí xtáá náa Estados Unidos, mú xúgi̱ nindxu̱u̱ timbá aʼphu̱ rí nikro̱ʼo̱ʼ káxi̱ dí ninújngoo náa asamblea”. Nikujmaa kaʼwu rí ni̱jkha̱nú asndu náa a̱jkiu̱u̱n índo̱ niʼdxawuun náa ajngóo ikhaa. Á mu nandoo, lá ma̱ndoo majmañaaʼ imbo̱ʼ ajngáa mu matambáñun tikhun xa̱bu̱ náa naratáraʼa rá. Mani̱ndxu̱u̱ mitsaanʼ wéñuʼ á mu náa kaʼyoo maʼtáraʼa congregación ndrígúlú kúwá xa̱bu̱ bi̱ nuthi imbo̱ʼ ajngáa. Mbaʼa rí májánʼ gakánaʼ á mu natani xúʼko̱.

13. Xú kaʼnii nijmún a̱ngiu̱lú bi̱ kúwá náa Rusia índo̱ nikúwá tsímáá rá.

¹³ Náa tikhu xuajen a̱ngiu̱lú na̱nguá xóo mutaraʼa numuu rí xa̱bu̱ ñajunʼ tséniñuunʼ. Mbá xkri̱da, guʼyáá ga̱jma̱a̱ numún a̱ngiu̱lú bi̱ kúwá náa Rusia. Mbayuuʼ tsiguʼ niguma gíníi, mú nákha marzo tsiguʼ 1991 nijuiʼthá rí ma̱ndoo muni ñajunʼ Dios. Nákha ikhú nikúwá mbá 16,000 bi̱ nutaraʼa náa Rusia. Mbá skiñúʼ tsiguʼ nda̱wa̱á nikúwá itháan rí 160,000 bi̱ nutaraʼa. Nikujmaa kaʼwu rí a̱ngiu̱lú nijmún májánʼ mbiʼi. Maski ajndu  tájyúuʼ rí nikúwá tsímáá, nuni má xúʼko̱ ñajuunʼ Jeobá ga̱jma̱a̱ gagi ma̱ngaa nuni xó má eʼngo̱o̱ maski ajndu naguma gíníi.

14, 15. Xú káʼnii nijmuu tsiakii ndrígóo Jeobá mu mambáyúu Asá rá.

¹⁴ Nákha mbiʼi rí nixtáa Asá, ni̱jkha̱nú mbiʼi rí nánguá nikúwá tsímáá. Numuu dí ra̱ʼkhá tháán mbaʼin soldado bi̱ naguwáʼ náa Etiopía, bi̱ naʼtáñajunʼ nindxu̱u̱ Zérah niguwáʼ mu muni gámbáa Judá, nikumu̱ún gajkhun rí ikhiin maʼngu̱u̱n. Mú rey Asá nikumu̱u̱ kaʼyoo Jeobá, ikha jngó niʼtájkáan: “Jeobá Dios ndrígúxu̱, atambáyuxu numuu rí naku̱mu̱xu kuyaaʼ ikháán, ga̱jma̱a̱ numuu mbiʼyaaʼ ikháán rí nigúwaʼxu guxmijná gajmiúxu xa̱bu̱ bugi̱” (2 Crón. 14:11).

¹⁵ Maski ajndu soldado bi̱ niguwáʼ náa Etiopía ra̱ʼkhá tháán mbaʼin ki xóo bi̱ kúwá náa Judá, mú Asá ni̱jkha̱nú ndiʼyoo rí Jeobá gíʼdoo tsiakii maʼnikríyaaʼ xuajñuu. Jeobá má gajkhun niʼni káwíin mú soldado bi̱ niguwáʼ náa Etiopía niguma gámbíin (2 Crón. 14:8-13).

16. Xkáʼnii eʼyáá rí nánguá guanúu mbayuuʼ rí kuwáanʼ tsímáá rá.

¹⁶ Maski ajndu na̱nguá eʼyáá ndiéjunʼ gagíʼnuu mámbáa xa̱bi̱i̱ Dios nda̱wa̱á, mú nduʼyáá gajkhun rí xájyúuʼ má mbayuuʼ rí makuwáanʼ tsímáá. Jesús má niʼtáriyaʼ rí índo̱ gáʼni iwáá mbiʼi xa̱bu̱ ‹xáʼndun guñúún› xa̱bi̱i̱ (Mat. 24:9). Xúʼko̱ má kayuuʼ niʼthí apóstol Pablo ma̱ngaa “xúgínʼ bi̱ nandún muni i̱ndó ñajunʼ Dios ga̱jma̱a̱ Cristo Jesús mangiin murugui̱i̱n mu maguma gíníin” (2 Tim. 3:12). Ma̱ngaa, Gixa̱a̱ “nakiʼnáa wéñuʼ” ga̱jma̱a̱ mumíniiʼ índo̱ ikhaa gáʼni gínáanʼ (Apoc. 12:12).

17. Ndiéjunʼ gúni bi̱ nandún muniʼñáʼ ru̱ʼni̱ ñajuunʼ Dios rá.

¹⁷ Ní xájyúuʼ má rí maguma gínáanʼlu numuu rí nuʼni ñajuunʼ Dios. Náa xúgíʼ numbaaʼ “marigá majphú mba̱a̱ gaʼkhu. Rí nimbá miʼtsú tárígá gaʼkhu xóo rúʼko̱ asndu má nákha nigi̱ʼdu̱u̱ nirígá numbaaʼ ni má xátanga̱a̱ marigá” (Mat. 24:21). Índo̱ gáʼni mbiʼi rúʼko̱ mbáa bi̱ kuʼñúún xáʼndun gúyulú ga̱jma̱a̱ rí xa̱bu̱ ñajunʼ xáʼndun muʼni ñajunʼ ndrígúlú (Mat. 10:35, 36). Guraximijná: Lá maku̱mu̱ʼ ka̱yo̱o̱ Jeobá xó má Asá rí ikhaa má gámbáyuʼ ga̱jma̱a̱ mañe̱wu̱nʼ ráʼ.

18. Xó má eʼthí Hebreos 10:38, 39, ndiéjunʼ gambáyuluʼ muʼni ratamíjná mu muguajún jtiin dí ga̱ʼkha̱ rá.

 ¹⁸ Jeobá nandoo makuwáanʼ xawii mu maguajún jtiin rí ga̱ʼkha̱, ikha jngó naʼsngúlú xóo muʼni gujkhuʼ fe ndrígúlú. Najmiuu “yumbáá bi̱ jmbii ga̱jma̱a̱ nandxa̱ʼwáminaʼ májánʼ” mu maxnúlúʼ ganitsu dí nda̱yúlúʼ mu maguajún jmbu (Mat. 24:45). Mú ikháanʼlu ndayóoʼ muʼni tsiakimijna muguaʼdáá fe gujkhuʼ náa Jeobá (atraxnuu Hebreos 10:38, 39). *

19, 20. Xó má naʼthí náa 1 Crónicas 28:9, xkáʼnii graxe̱ gíʼmaa muʼni, ga̱jma̱a̱ ndíjkha rí gíʼmaa muʼni rá.

¹⁹ Xó má niʼni Asá, gíʼmaa ‹mbuʼyáaʼ Jeobá› (2 Crón 14:4; 15:1, 2). Nigíʼdi̱i̱ ndiʼyáaʼlu Jeobá índo̱ niniʼníiʼlu ikhaa ga̱jma̱a̱ índo̱ nijngulú iyááʼ. Rí xúgi̱ guʼni xó má eʼngo̱o̱ rí maʼndulú kuʼyáá itháan Jeobá, mu mbuʼyáá á mu nandulú kuʼyáá, ma̱ndoo muraximijnalú, lá na̱jkhá xúgíʼ reunión ráʼ. Índo̱ na̱jkuá ikhí nduʼyáalu tsiakii mu muʼni má xúʼko̱ ñajuunʼ Jeobá ga̱jma̱a̱ a̱ngiu̱lú nuxnulu tsiakii (Mat. 11:28). Ma̱ngaa ma̱ndoo muraximijnalú: “Lá naríyaʼ mbiʼi manigajmaa mbáwun rá. Á mu xtáá gajmíi̱n bi̱ kúwá náa goʼwóo, lá nuríyaʼxu mbiʼi mámbá xmáná mu munigajmaa mbáa guʼwáanʼxu ráʼ. Ma̱ngaa lá nataráʼa xó má eʼngo̱o̱ ga̱jma̱a̱ nasngúún xa̱bu̱ ráʼ.”

²⁰ Náá numuu rí gíʼmaa mundxaʼwamíjná rúʼko̱ rá. Náa Biblia naʼthí rí Jeobá ndaʼyoo rí nundxa̱ʼwáá edxu̱lúʼ ga̱jma̱a̱ ndaʼyoo rí gíwanʼ náa a̱jkiu̱lú. Ikha jngó mangáanʼ gíʼmaa mbuʼyáá (atraxnuu 1 Crónicas 28:9). * Á mu nduʼyáá rí ndayóoʼ muriʼkhui̱i̱ rí xóo kaʼniáánʼ, rí xóo endxawamíjnalú ga̱jma̱a̱ rí xóo endxaʼwáá edxu̱lúʼ muʼni nda̱wa̱á, ma̱ndoo munda̱ʼa̱a̱ Jeobá rí mambáyulúʼ muriʼkumijná. Xúgi̱ ndayóoʼ muʼni ratamíjná mu muguajún jti̱i̱n rí ga̱ʼkha̱ nda̱wa̱á. Guʼni rí nimbá nda̱a̱ dí gárikhulú mu majmulú májánʼ mbiʼi rí kuwáánʼ tsímáá.