Náa Eclesiastés 5:8 nindxu̱u̱ mbá versículo rí naʼni mundxaʼwáá edxu̱lúʼ numuu rí naʼthí: “Xáʼniaʼ tsiánguá á mu natayáá rí náa xuajñanʼ na̱nguá egumaa rí jmbu ni ma rí kaʼyoo mbáa xa̱bu̱ gínáa. Numuu rí xa̱bu̱ ñajunʼ buʼko̱ gíʼdaa imba̱a̱ bi̱ itháan mba̱a̱ ki xóo ikhaa mu mbaʼyoo, mú kúwá bi̱ itháan guaʼdáá numún ki xóo ikhiin”.

Gajkhun ma rí xóo na̱ʼkha̱ raʼthí ikhí nakujmaa rí naʼthí ga̱jma̱a̱ numún xa̱bu̱ ñajunʼ bi̱ kúwá náa numbaaʼ. Mú ma̱ngaa na̱ʼkha̱ raʼthí ga̱jma̱a̱ numuu Jeobá rí naʼni mani̱i̱ a̱jkiu̱lúʼ.

Eclesiastés 5:8 na̱ʼkha̱ raʼthí ga̱jma̱a̱ numuu mbáa xa̱bu̱ ñajunʼ bi̱ naʼni dí mumíniiʼ ga̱jma̱a̱ naʼniún dí raʼkhí xa̱bu̱ gíníi. Xa̱bu̱ buʼko̱ gíʼmaa marmáʼáan a̱jkiu̱u̱n dí xtáa imba̱a̱ bi̱ itháan gíʼdoo numuu ki xóo ikhaa bi̱ ndaʼyoo. Phú migínáa numuu rí xúgínʼ xa̱bu̱ ñajunʼ bi̱ kúwá náa numbaaʼ nunda̱ʼa̱ itháan, ikha jngó xa̱bu̱ numíniiʼ.

Mú maski ajndu nakujmaa rí nánguá kaʼnii marigá rí májánʼ, ma̱ndoo maʼnii a̱jkiu̱lúʼ rí Jeobá nayexu̱u̱n bi̱ guaʼdáá ñajunʼ mba̱ʼu̱ náa xa̱bu̱ ñajunʼ bi̱ kúwá náa numbaaʼ. Ma̱ndoo munda̱ʼa̱a̱ Dios rí ikhaa mambáyulúʼ (Sal. 55:22; Filip. 4: 6, 7). Nduʼyáá rí “iduu Jeobá xtáa rayexi̱ náa xúgíʼ tsu̱du̱u̱ ku̱ba̱ʼ mu maʼni káwíin bi̱ guáʼdáá mbá a̱jkiu̱ún káxi̱ náa ikhaa” (2 Crón. 16:9).

Xó má eʼyáá Eclesiastés 5:8 naʼniulú mundxaʼwáá edxu̱lúʼ: Rí náa xa̱bu̱ ñajunʼ bi̱ kúwá náa numbaaʼ xtáa imba̱a̱ bi̱ itháan gíʼdoo numuu. Rí nagájnuriyoʼ náa versículo rígi̱ nindxu̱u̱ rí Jeobá gíʼdoo ñajunʼ rí itháan mitsidanʼ dí tsembrígui ga̱jma̱a̱ nimbáa. Rí xúgi̱, ikhaa xtáa rambáyúuʼ A̱ʼdióo Jesucristo mu maʼtáñajunʼ, bi̱ ni̱ndxu̱u̱ Rey náa Reino ndrígóo ikhaa. Bi̱ gíʼdoo Xúgi̱ tsiakii ndaʼyoo xúgíʼ rí xtáa rarígá ma̱ngaa ikhaa ni̱ndxu̱u̱ jmbii ga̱jma̱a̱ naʼni rí májánʼ xúʼko̱ má A̱ʼdióo ma̱ngaa.