1. Ndiéjunʼ ñajunʼ guaʼdáá a̱ngiu̱lú gu̱ʼu̱ náa xuajñuu Jeobá rá. Mú, ndiéjunʼ eraʼníí tikhun a̱ngiu̱lú gu̱ʼu̱ rá. (Atayáá xtiʼkhu rí na̱ʼkha̱ náa timbá ináa.)

RA̱ʼKHÁ tháán edxu̱lúʼ dí kúwá mbaʼin a̱ngiu̱lú gu̱ʼu̱ bi̱ nuñajunʼ gakhii náa congregación. Mbá xkri̱da, nuni comentar náa reunión, nagájnún gutaraʼa ga̱jma̱a̱ naxmiéjúnʼ gajkhun kuñúún a̱ngiu̱ún. Ma̱ngaa kúwá bi̱ nuni kaʼwii Guʼwá náa nagimbáanʼ. Mú tikhun nuraʼníí mbaʼa xkujndu. Tikhun nuñewu̱u̱n anu̱ún o rudún bi̱ guanii má, tikhun naʼngu̱u̱n numuu rí tsíñún gúñún bi̱ kúwá náa guʼwún, kúwá eʼwíinʼ bi̱ nunimbánii ndajkuíin e̱jñún ikha jngó ndayóoʼ muñajunʼ gakhii mu muxnún rí ndañúunʼ.

2. Náá numuu rí ndayóoʼ mumbáñuun a̱ngiu̱lú gu̱ʼu̱ rá.

² Náá numuu rí ndayóoʼ mumbañún a̱ngiu̱lú gu̱ʼu̱ rá. Numuu rí náa numbaaʼ na̱nguá eyamajkhún gu̱ʼu̱ xó má kaʼyoo, ma̱ngaa numuu rí náa Biblia naʼthí rí gíʼmaa mumbáñuun, mbá xkri̱da, apóstol Pablo niʼnirámáʼ carta náa a̱ngiu̱lú bi̱ Roma rí mudriguíin májánʼ Febe “mu mumbáyii náa rí ikhaa gáʼyóóʼ” (Rom. 16:1, 2). Pablo nákha ninindxu̱u̱ fariseo mbáa ikhaa ndiʼyoo rí gu̱ʼu̱ xóo bi̱ na̱nguá guaʼdáá numún, mú nda̱wa̱á rí ikhaa ninindxu̱u̱ cristiano ndiʼyáridoo Jesús ikha jngó ndiʼyamajkhún gu̱ʼu̱ ga̱jma̱a̱ niʼniún rí májánʼ (1 Cor. 11:1).

3. Xú káʼnii ndiʼñún gu̱ʼu̱ Jesús, ga̱jma̱a̱ xóo ndiʼñún bi̱ nini ñajuunʼ Anu̱u̱ xá.

³ Jesús ndiʼyamajkhún xúgínʼ gu̱ʼu̱ (Juan 4:27). Na̱nguá ndiʼñún gu̱ʼu̱ xó má xa̱bu̱ ede̱ judío bi̱ nikúwá nákha ikhú. Náa mbá i̱yi̱i̱ʼ rí naʼthí ga̱jma̱a̱ numuu Biblia naʼthí: “Jesús nditháan táʼthi  ni má táʼni rí táʼyamajkhún gu̱ʼu̱”. Mú, ikhaa ndiʼyamajkhún itháan gu̱ʼu̱ bi̱ nini ñajuunʼ Anu̱u̱, ndiʼñún asndu xóo a̱ngui̱i̱n (Mat. 12:50).

4. Ndiéjunʼ guʼyáá náa artículo rígi̱ rá.

⁴ Jesús nixtáa xawii mu mambáñun a̱ngui̱i̱n gu̱ʼu̱, mbaʼyangajui̱i̱n ga̱jma̱a̱ maʼtámbañun. Náa artículo rígi̱ mbuʼyáá xú káʼnii guʼyaridáá Jesús náa ajtsú enii rúʼko̱ mu musngajmá rí nduʼyamajkhún a̱ngiu̱lú gu̱ʼu̱.

5. Ndíjkha rí tikhun a̱ngiu̱lú naʼniún miʼskhaa rí mambáxu̱u̱n gajmiún eʼwíinʼ rá.

⁵ Tséʼniuu má tsáa ni̱ndxu̱lú xúgiáanʼ ndayúlú rí mambaxúlúʼ gajmiúlú eʼwíinʼ. Mú nguáná a̱ngiu̱lú gu̱ʼu̱ maʼniún mingíjyúuʼ. Náá numuu rá. Guʼdxawíín dí nuthi tikhun, mbáa ndxájulú bi̱ mbiʼyuu Jordan * naʼthí: “Numuu rí xóó tsénujunʼ, naku̱mu̱ʼ rí nda̱a̱ rí mani náa congregación ga̱jma̱a̱ rí asndu naku̱mu̱ʼ rí nda̱wa̱a̱ tsáa ni̱ndxu̱ʼ ikhí”. Kristen mbáa precursora bi̱ ni̱jkha̱ i̱mba̱ níʼkhá gáʼtaraʼa, niʼthí: “Índo̱ ndiʼkhún edxu̱ʼ náa mbá congregación nakumaaʼ rí xtaa mbáwiin”. Mangiin a̱ngiu̱lú xa̱bekha nakumu̱ún xúʼko̱ kayuʼ. Mbáa mangiin bi̱ kúwá gajmiún bi̱ na̱nguá ni̱ndxu̱ún xa̱bi̱i̱ Jeobá nakumu̱ún dí na̱nguá kúwá mbá kambáxu̱u̱n gajmiún ikhiin ni má bi̱ nagún náa congregación. Ma̱ngaa mbáa makumún rí kúwá ndajkuíin bi̱ nda̱a̱ xóo magajnún numuu rí nandoo kháñún o nuñewa̱a̱n bi̱ nandoo kháñuu. Annette naʼthí: “Numuu rí ikhúúnʼ ndiyóoʼ mañewu̱u̱n ru̱dúʼ ikha jngó niʼniuʼ miʼskhaa maʼgá náa nuthu̱nʼ”.

6. Xó má eʼyáá náa Lucas 10:38-42, xú káʼnii nimbáyúu Marta ga̱jma̱a̱ María Jesús rá.

⁶ Jesús niríyaʼ mbiʼi maxtáa gajmíi̱n a̱ngui̱i̱n gu̱ʼu̱ ga̱jma̱a̱ nimbáxu̱u̱ májánʼ gajmíi̱n. Gundxaʼwamíjna̱ xóo nimbáxu̱u̱ ga̱jma̱a̱ María ma̱ngaa Marta bi̱ xóó tsinujunʼ (atraxnuu Lucas 10:38-42). * Rí xóo niʼthí ga̱jma̱a̱ rí xóo niʼni Jesús, niʼni rí maʼndún mutamijná gajmiún. María asndu nigi̱ʼi̱ náa ago̱o̱ rajkúu mu majmañuu itháan. * Ma̱ngaa Marta tátiyuuʼ maʼthúu̱n numuu rí María na̱nguá embáyúu. Jesús nijmuu mbiʼi rúʼko̱ mu maʼsngúún mbaʼa ikha rí gíʼdoo numuu. Ma̱ngaa nisngájma rí nixmiéjuunʼ kaʼñúún ikhiin ga̱jma̱a̱ Lázaro índo̱ Jesús nitanga̱a̱ gáʼñúnʼ mbaʼa nuthu (Juan 12:1-3). Ma̱ngaa índo̱ Lázaro nindoo kháñuu wéñuʼ, Marta ga̱jma̱a̱ María ndiyáá rí ma̱ndoo muthán Jesús mambáñún (Juan 11:3, 5).

7. Ndiéjunʼ i̱ʼwáʼ ma̱ndoo muʼni mu muxnún tsiakii a̱ngiu̱lú gu̱ʼu̱ rá.

⁷ Tikhun a̱ngiu̱lú gu̱ʼu̱ nduyáá rí ma̱ndoo mutamijná gajmiún mbaʼin índo̱ narígá reunión. Ikha jngó gajmulú mbiʼi rúʼko̱ mu mudriguíin májánʼ, muʼtamíjná gajmiúlú ga̱jma̱a̱ musngajmúún rí naxmiéjunlú kuʼñúún. Jordan bi̱ niʼthá nákha ginii naʼthí: “Nda̱yo̱o̱ rí gíʼdoo numuu índo̱ eʼwíinʼ nuthu̱nʼ rí májánʼ niniu̱u̱n comentar, rí nuríyaʼ awan magajnúʼ gajmíi̱nʼ gátaraʼa ga̱jma̱a̱ rí mutaro̱ʼo̱ʼ o nuxuguanʼ mensaje inuʼ”. Gusngajmún a̱ngiu̱lú gu̱ʼu̱ rí  ikhiin guaʼdáá numún. Imba̱a̱ ndxájulú bi̱ mbiʼyuu Kia naʼthí: “Índo̱ nandátigoʼ mbá reunión nda̱yo̱o̱ rí muxunguanʼ mensaje inuʼ mutu̱nʼ á mu xtáá májánʼ. Rúʼko̱ naʼni mba̱yo̱o̱ rí kúwi̱i̱n a̱ngui̱i̱n bi̱ naxmiéjunʼ kuyoʼ”.

8. Xú káʼnii imbo̱ʼ ma̱ndoo mbuʼyaridáá Jesús rá.

⁸ Guʼni xó má niʼni Jesús, guriʼyáʼ mbiʼi makuwáanʼ gajmiúlú a̱ngiu̱lú gu̱ʼu̱. Mbáa ma̱ndoo muʼthúún maguwáʼ náa guʼwúlú muphiʼtsu o makuwáanʼ gajmiúlú mbá xngaa. Índo̱ gákuwáanʼ gajmiúlú guxnún tsiakii (Rom. 1:11 12). Bi̱ kuya̱ edxu̱u̱ gíʼdoo numuu muni xó má niʼni Jesús. Ikhaa má ni̱jkha̱nú ndiʼyoo rí maʼniún mingíjyúuʼ bi̱ kúwá ndajkuíin. Mú niniñuuʼ kaʼwu rí xákuwa gagi i̱ndó ga̱jma̱a̱ numuu rí nudamijná o á mu nuradíin e̱jñún. Rí phú maʼni makuwáanʼ gagi nindxu̱u̱ rí muʼgíiʼ muʼni ginii ñajuunʼ Jeobá (Mat. 19:12; Luc. 11:27 28).

9. Xú káʼnii gíʼmaa muni bi̱ kuya̱ edxu̱u̱ mumbañún a̱ngiu̱lú gu̱ʼu̱ rá.

⁹ Itháan má bi̱ kuya̱ edxu̱u̱ gíʼmaa mbuñún a̱ngiu̱lú gu̱ʼu̱ xóo a̱ngiu̱ún o xóo rudún (1 Tim. 5:1 2). Gíʼmaa muríyaʼ mbiʼi mutamijná gajmiún índo̱ inu magi̱ʼdu̱u̱ o índo̱ niguámbá reunión. Kristen niʼthí: “Mbáa bi̱ kayá edxu̱u̱ ni̱jkha̱nú ndiʼyoo dí ikhúúnʼ jngruigoʼ gi̱i̱ ñuʼún ikha jngó nindoo mbaʼyoo  xú káʼnii awan gúʼdoʼ mámbá mbiʼi, nixnáa wéñuʼ núma̱aʼ rí nixmiéjunʼ kaʼyoo”. Índo̱ bi̱ kuya̱ edxu̱u̱ nuriya mbiʼi mutamijná gajmiún a̱ngiu̱lú gu̱ʼu̱ nusngajmá rí naxmiéjúnʼ kuñúún. * Annete naʼthí i̱mba̱ rí nayambáá: “Ikhúúnʼ naniʼniúún itháan ga̱jma̱a̱ ikhiin nuniʼniún ikhúúnʼ. Ikha jngó índo̱ nagúʼdoʼ mbá xkujndu gakhii tséʼniuʼ mingíjyúuʼ mathu̱u̱n rí mumbayúʼ”.

10. Mu makuwá gagi a̱ngiu̱lú gu̱ʼu̱ ndiéjunʼ gámbañún xá.

¹⁰ Tséʼniuu á mu ni̱ndxu̱lú xa̱bekha o gu̱ʼu̱ nadxulú índo̱ nduʼyáá rí eʼwíinʼ nduyáá náa rí májánʼ eʼni ga̱jma̱a̱ ñajunʼ dí nuʼnilú. Mú á mu nimbáa na̱nguá eʼyoo, naʼni rí majmulú. Mbáa precursora bi̱ xóó tsinújunʼ bi̱ mbiʼyuu Abigaíl naʼthí rí nguáná naku̱mu̱u̱ rí na̱nguá endún gúyáá ikhaa naʼthí: “Kúwá a̱ngiu̱lú bi̱ nduyo̱ʼ xóo ndxájúún, eʼwíinʼ xóo aʼdiún mu nguáná naku̱mu̱ʼ rí nimbáa na̱nguá eʼyoo á mu xtáá”. Imba̱a̱ ndxájulú bi̱ mbiʼyuu Pam, maski ajndu nákha ginii ninindxu̱u̱ misionera, mú nitanga̱a̱ náa goʼwóo mu mañewu̱u̱n anu̱u̱ ga̱jma̱a̱ ru̱dúu̱, ikhaa xúgi̱ gíʼdoo 70 tsiguuʼ mú nindxu̱u̱ xóó precursora, ikhaa naʼthí: “Nambáyuʼ wéñuʼ índo̱ eʼwíinʼ nuthu̱nʼ rí nangajuun kuyoʼ”.

11. Xú káʼnii nisngájma Jesús rí ndiʼyangajui̱i̱n gu̱ʼu̱ bi̱ nimbayíí náa niʼtáráʼa rá.

¹¹ Jesús nixníin wéñuʼ núma̱aʼ gu̱ʼu̱ bi̱ ‹nijmún rí guaʼdáá› mu muni mbaʼwi̱i̱ (Luc. 8:1-3). Raʼkháa i̱ndó niniñuuʼ rí mumbayíí ma̱ngaa niʼthún mbaʼa rí gajkhun rí gíʼdoo wéñuʼ. Mbá xkri̱da, rí makhañúu ma̱ngaa rí matuxi̱i̱ (Luc. 24:5-8). Ikhaa niʼniratiin gu̱ʼu̱ xó má niʼni gajmíi̱n apóstoles ndrígóo mu muraʼníí xkujndu dí ga̱ʼkha̱ nda̱wa̱á (Mar. 9:30-32; 10:32-34). Gajkhun má rí tikhun apóstoles ndrígóo Jesús nigáñun índo̱ nixiyáa mú tikhun gu̱ʼu̱ bi̱ nimbayíí ikhaa nikúwi̱i̱n ga̱jma̱a̱ nindxu̱u̱ índo̱ ikhaa nikháñuu (Mat. 26:56; Mar. 15:40, 41).

12. Ndiéjunʼ ñajunʼ nixnúún muni gu̱ʼu̱ Jesús rá.

¹² Jesús nixnúún gu̱ʼu̱ mbá ñajunʼ rí gíʼdoo wéñuʼ numuu muni. Mbá xkri̱da, gu̱ʼu̱ bi̱ niguájun jmbu ninindxu̱ún timbíin bi̱ ndiyáá rí nigabi̱i̱ Jesús, ma̱ngaa niʼthúún rí muthúún apóstoles ndrígóo rí ikhaa nigabi̱i̱ (Mat. 28:5, 9, 10). Índo̱ niʼni ndxa̱a̱ Pentecostés tsiguʼ 33, mbáa gu̱ʼu̱ buʼko̱ mangiin nindrigú xi̱ʼ kaʼwu. Á mu rí xúʼko̱ gu̱ʼu̱ buʼko̱ nindoo nithi i̱ʼwáʼ ajngáa mu muthúún eʼwíinʼ xa̱bu̱ “numuu rí májánʼ rí maʼni Dios” (Hech. 1:14; 2:2-4, 11).

13. a) Xóo eni ñajuunʼ Jeobá a̱ngiu̱lú gu̱ʼu̱ rá. b) Xú káʼnii gándoo gusngajmá rí nangajulú ñajunʼ rí nuni xá.

¹³ Ndayóoʼ miʼthúún rí májánʼ eni a̱ngiu̱lú gu̱ʼu̱ ga̱jma̱a̱ xúgíʼ ñajunʼ rí nuni náa xuajñuu Jeobá. Tikhu ñajunʼ rúʼko̱ nindxu̱u̱ dí nuni ga̱jma̱a̱ rí nuni kaʼwi̱i̱ náa Guʼwá nagimbáanʼ, bi̱ nuyambáá náa nuthi mixtiʼkhu ajngáa, bi̱ nuñajunʼ náa Betel, bi̱ nuyambáá náa narígá mbá gamiéjunʼ, bi̱ nuyambáá miʼtájuíi i̱yi̱i̱ʼ ndrígúlú, bi̱ ni̱ndxu̱ún precursoras, bi̱ ni̱ndxu̱ún misioneras. Xó má a̱ngiu̱lú xa̱bekha, a̱ngiu̱lú gu̱ʼu̱ nagún náa escuela ndrígu̱ún precursor, náa Najuiʼsngúún bi̱ Nutaraʼa numuu Reino ga̱jma̱a̱ náa Galaad. Ma̱ngaa bi̱ guáʼdiin ajmbiún bi̱ guaʼdáá mbá ñajunʼ náa xuajñuu Jeobá numbañún wéñuʼ. A̱ngiu̱lú buʼko̱ maʼni mingíjyúuʼ mani̱ndxu̱ún “xóo regalo” á mu guʼñún na̱nguá embañún (Efes. 4:8). Lá ma̱ndoo mundxaʼwamíjná i̱mba̱ náa ma̱ndoo mumbaʼñún a̱ngiu̱lú gu̱ʼu̱ numuu xúgíʼ rí nuni náa Jeobá ráʼ.

14. Xó má eʼthí náa Salmo 68:11, ndiéjunʼ eni a̱ngiu̱lú bi̱ kuya̱ edxu̱u̱ rá.

¹⁴ A̱ngiu̱lú bi̱ kuya̱ edxu̱u̱ naguánu nduyáá  rí a̱ngiu̱lú gu̱ʼu̱ ni̱ndxu̱ún “mbaʼin wéñuʼ” bi̱ kúwá xawii muñajunʼ ga̱jma̱a̱ mbaʼin dí ikhiin nutaráʼa itháan májánʼ (atraxnuu Salmo 68:11). * Ikha jngó bi̱ kuya̱ edxu̱u̱ nuthúún mumbañún numuu rí najmañún. Abigaíl bi̱ niʼthá ga̱jma̱a̱ numuu ginii naʼthí rí nadxuu wéñuʼ índo̱ a̱ngiu̱lú nuraxi̱i̱ xú káʼnii eʼni mu ma̱ndoo maʼtámijná gajmíi̱n xa̱bu̱ náa na̱jkha̱ gáʼtaraʼa. Ikhaa naʼthí: “Rúʼko̱ naʼni mba̱yo̱o̱ rí gúʼdoʼ numuʼ náa xuajñuu Jeobá”. Ma̱ngaa a̱ngiu̱lú bi̱ kuya̱ edxu̱u̱ nduyáá rí a̱ngiu̱lú gu̱ʼu̱ bi̱ guanii ga̱jma̱a̱ bi̱ najmañún ma̱ndoo mumbañún a̱ngiu̱lú bi̱ wa̱ʼxa̱ʼ mu muraʼníí xkujndu (Tito 2:3-5). Xó má eʼyáá, ndayóoʼ muxniin núma̱aʼ ga̱jma̱a̱ mangajulúʼ ñajunʼ dí nuni a̱ngiu̱lú gu̱ʼu̱.

15. Nguáná gándoo mumbañún ga̱jma̱a̱ muʼtámbañún a̱ngiu̱lú gu̱ʼu̱ rá.

¹⁵ Nguáná a̱ngiu̱lú gu̱ʼu̱ ndayóoʼ mumbañún ga̱jma̱a̱ muʼtámbañún índo̱ gáʼyóoʼ (Isa. 1:17). Mbá xkri̱da, mbá ndxájulú bi̱ nikháñuu ajmbio̱o̱ o mbá bi̱ ajmbio̱o̱ niniñuuʼ mbaʼyóoʼ mumbañún náa rí naʼni ajmbio̱o̱ nákhá ginii, mbáa ndxájulú nikhi̱i̱ mbaʼyóoʼ mixtambáyii maʼtamijna gajmíi̱n médico, mbáa precursora bi̱ naʼni i̱ʼwáʼ ñajunʼ náa xuajñuu Jeobá mbaʼyóoʼ miʼtambáyii índo̱ nuta numáá numuu tsegájnun wéñuʼ gáʼtaraʼa xóo eʼwíinʼ precursores. Xú káʼnii i̱ʼwáʼ gándoo mumbáñuun a̱ngiu̱lú gu̱ʼu̱ rá. Guʼyáá i̱ʼwáʼ xkri̱da dí niniñuuʼ Jesús.

16. Xú káʼnii niʼtámbáyúu María Jesús xó má naʼthí náa Marcos 14:3-9 rá.

¹⁶ Jesús índo̱ ndiʼyoo rí nithi dí raʼkhí ga̱jma̱a̱ numún a̱ngui̱i̱n gu̱ʼu̱, ikhaa mbá nacha̱ niʼtámbañún, mbá xkri̱da niʼtámbáyúu María índo̱ Martha niʼthí numuu (Luc. 10:38-42). Niʼtámbáyúu María mbu̱júu̱ʼ índo̱ eʼwíinʼ nithi dí raʼkhí niʼni (atraxnuu Marcos 14:3-9). * Jesús nikro̱ʼo̱o̱ náá numuu rí xúʼko̱ niʼni María ikha jngó niʼthí: “Ikhaa niʼniuʼ rí májánʼ wéñuʼ. [...] Ikhaa niʼni rí niʼngo̱o̱”. Ma̱ngaa niʼtáriyaʼ rí “asndu náa gajuiʼtáraʼa ajngáa rí májánʼ, ma̱ngaa miʼthá rí niʼni a̱ʼgu̱ bugi̱, mu mbuyáá rí niʼni” xó má nakujmaa náa artículo rígi̱. ¡María ra̱ʼkhá tháán niʼni a̱jkiu̱u̱n ga̱jma̱a̱ ajngáa rí niʼthí Jesús! Mitsaanʼ wéñuʼ dí Jesús niʼthí rí mawán náa xúgíʼ numbaaʼ dí niʼni María.

17. Arathá mbá xkri̱da rí xú káʼnii gíʼmaa maratambáyíi mbáa ndxájulú a̱ʼgu̱.

¹⁷ Lá nuʼtámbáñún a̱ngiu̱lú gu̱ʼu̱ índo̱ ndayóoʼ ráʼ. Gundxaʼwáminaʼ rí mbaʼin a̱ngiu̱lú nduyáá dí mbáa ndxájulú bi̱ gíʼdaa ajmbio̱o̱ bi̱ na̱nguá nindxu̱u̱ xa̱bi̱i̱ Jeobá rí mbaʼa nuthu najkhanú wakhaʼ reunión ga̱jma̱a̱ mbá nacha̱ najkha̱a̱ índo̱ naguámbá ma̱ngaa nguánáa e̱ʼkha̱ kagui̱i̱n e̱ji̱i̱n. Nuraximijna náá numuu rí tséraʼwíí mbájkhu rí maʼni ga̱jma̱a̱ ajmbio̱o̱ ga̱jma̱a̱ nuthi numáá má xúʼko̱. Mú ikhaa naʼni xó má eʼngo̱o̱, ra̱ʼkhá ikhaa eʼtáñajunʼ xkáʼnii gíʼmaa majmuu hora ni má ra̱ʼkhá i̱ndó ikhaa kaʼyoo maʼtáñajunʼ ndiéjunʼ muni e̱ji̱i̱n. Ndiéjunʼ gándoo muʼni rá. Á mu nuʼtháán dí májánʼ eʼni ndxájulú ga̱jma̱a̱ nuʼthúún eʼwíinʼ, rúʼko̱ gáʼnii rí eʼwíínʼ ní xutanumáá.

18. Xú káʼnii i̱ʼwáʼ gándoo gumbáñuun a̱ngiu̱lú gu̱ʼu̱ rá.

 ¹⁸ I̱mba̱ rí xóo musngajmá rí nangajulú kuʼñúún nindxu̱u̱ rí mumbaʼñún (1 Juan 3:18). Annette, mbáa ndxájulú bi̱ niñewu̱u̱n ru̱dúu̱ bi̱ nindoo kháñuu, naʼthí: “Bi̱ nambáxuʼ gajmíi̱nʼ nguáná niguwáʼ gúmbáyuʼ mu ma̱ndoo mani i̱ʼwáʼ ñajunʼ o naguwáʼ kudúún ganitsu. Nini maku̱mu̱ʼ rí nandún kuyoʼ ga̱jma̱a̱ dí xtáá má xúʼko̱ náa congregación”. Ma̱ngaa Jordan niʼthí rí mbáa ndxájulú niʼthúu̱n xkáʼnii gíʼmaa maʼni májáanʼ kárriu̱u̱, ikhaa naʼthí: “Ra̱ʼkhá tháán mitsaanʼ eyo̱o̱ rí a̱ngiu̱lú naxmiéjuunʼ kuyoʼ gajkhun”.

19. Xú káʼnii imbo̱ʼ gándoo gumbáñuun a̱ngiu̱lú gu̱ʼu̱ bi̱ kuya̱ edxu̱u̱ rá.

¹⁹ Bi̱ kuya̱ edxu̱u̱ ndayóoʼ mbuyáá náa eyóoʼ mixtambáñuun a̱ngiu̱lú gu̱ʼu̱. Nduyáá rí Jeobá ndaʼyoo xóo naxtiewu̱u̱n (Sant. 1:27). Bi̱ kuya̱ edxu̱u̱ nduyaridáá Jesús índo̱ nakru̱ʼu̱u̱n kuñúún ga̱jma̱a̱ ni̱ndxu̱ún míjíinʼ xa̱bu̱ (Mat. 15:22-28). Índo̱ ndu̱ya̱ʼ mumbañún a̱ngiu̱lú gu̱ʼu̱ ikhú ikhiin nakumu̱ún rí naxmiéjunʼ kuñún. Xúʼko̱ nigíʼnuu Kia índo̱ ni̱jkha̱ gaxtáa i̱mba̱ níʼkhá, índo̱ bi̱ kayá edxu̱u̱ náa grupo ndrígóo ndiʼyoo, ikhú mbá nacha̱ niríyaʼ awan mu a̱ngiu̱lú mumbayíí. “Rúʼko̱ niʼni rí xájmúʼ wéñuʼ” eʼthí Kia. “A̱ngiu̱lú bi̱ kuya̱ edxu̱u̱ nisngajmá rí na̱nguá xtáá mbáwun índo̱ gúʼdoʼ mbá gamiéjunʼ ga̱jma̱a̱ rí gúʼdoʼ numuʼ náa congregación, índo̱ nuxnuʼ tsiakii ga̱jma̱a̱ nimbáyuʼ”.

20, 21. Xú káʼnii gusngajmá rí nangajulú kuʼñúún xúgínʼ a̱ngiu̱lú gu̱ʼu̱ rá.

²⁰ Índo̱ nduʼyáá náa congregación ndrígúlú nduʼñún mbaʼin a̱ngiu̱lú gu̱ʼu̱ bi̱ nugíʼ májánʼ xkri̱da bi̱ ndayóoʼ mumbáñuun. Á mu nduʼyaridáá Jesús, muriʼyáʼ mbiʼi rí makuwáanʼ gajmiúlú ga̱jma̱a̱ muniʼnún. Ma̱ngaa gíʼmaa musgajmá rí nduʼyamajkuíí ñajunʼ dí nuni ga̱jma̱a̱ numuu Dios. Ma̱ngaa guʼtámbáñuun índo̱ gáʼyóoʼ.

²¹ Náa iwáá kayuʼ carta dí niʼnirámáʼ apóstol Pablo náa a̱ngiu̱lú Roma, niʼthí mbiʼñún mbá mijna gu̱wi̱i̱nʼ a̱ngiu̱lú gu̱ʼu̱ (Rom. 16:1, 3, 6, 12, 13, 15). Ikhiin ra̱ʼkhá tháán nidxún índo̱ nidxawíín rí Pablo niʼthí ga̱jma̱a̱ numún. Mangáanʼ gíʼmaa mbuʼyamajkún a̱ngiu̱lú gu̱ʼu̱ bi̱ kúwá náa congregación ndrígúlú, xúʼko̱ gusngajmá rí nangajulú kuʼñúún ga̱jma̱a̱ rí kúwáanʼ mbá kambáxulú.