1. Ndiéjunʼ niniñuuʼ Jeobá muʼni rá.

JEOBÁ nandoo kaʼyoo mambáa dí ikháanʼ ikha jngó niniñuuʼ rí makuwáanʼ náa xuajñuu. Maski ajndu mambáa gíʼdoo mixtiʼkhu ñajunʼ mú xúgiáanʼ kuaʼdáá numulú, ikha jngó ndayóoʼ rí mumbaʼyúmíjná. Apóstol Pablo nimbáyulúʼ mbuʼyáá dí xúʼko̱ nindxu̱u̱. Xkáʼnii rá.

2. Xóo eʼthí Efesios 4:16, ndíjkha gíʼmaa mangajulú kuʼyamijná jma̱a̱ muñajunʼ mbá kambáxulú rá.

² Xó má nijuiʼthá náa texto rí kayá edxu̱u̱ rígi̱, Pablo niʼthí kaʼwu rí nimbáa dí ikháanʼ xándoo mayejxu̱u̱ imba̱a̱ xa̱bi̱i̱ Jeobá ga̱jma̱a̱ mandxaʼwáminaʼ: “Ikháán nda̱a̱ dí ejmáán” (1 Cor. 12:21). Á mu nandulú makuwáanʼ tsímáá náa congregación gíʼmaa mangajulú kuyamijná ga̱jma̱a̱ muñajunʼlú mbóó jnduʼ (atraxnuu Efesios 4:16). * Índo̱ nuñajunʼ mbá kambáxulú, xúgiáanʼ nuxnámijná tsiakii ga̱jma̱a̱ nandulú kuyamijná.

3. Ndiéjunʼ guʼyáá náa artículo rígi̱ rá.

³ Náá gándoo musngajmá rí nduʼyamajkhún a̱ngiu̱lú rá. Timbá rí mbuʼyáá náa artículo rígi̱, xú káʼnii gándoo bi̱ kuya̱ edxu̱u̱ musngajmá rí nduyamajkhún eʼwíinʼ bi̱ kuya̱ edxu̱ún. Raga̱jma̱, mbuʼyáá xkáʼnii gándoo mangajulú kuʼñúún a̱ngiu̱lú bi̱ xóó tsédamijná. Ragajtsú, majmañulúʼ xú káʼnii gusngajmá  rí nangajulú kuʼñúún bi̱ na̱nguá ethi májánʼ ajngulúʼ.

4. Ndiéjunʼ niʼthí Pablo náa Romanos 12:10 rí gíʼmaa muni bi̱ kuya̱ edxu̱u̱ rá.

⁴ Xúgínʼ bi̱ kuya̱ edxu̱u̱ bi̱ kúwá náa congregación nixtaʼwíinʼ ga̱jma̱a̱ xi̱ʼ kaʼwu ndrígóo Jeobá. Mú mambáa mixtiʼkhu dí najmaa naʼni ga̱jma̱a̱ rí najmañuu (1 Cor. 12:17, 18). Tikhun ndiʼkhún má ndi̱ya̱ edxu̱u̱ ga̱jma̱a̱ xóo tsíjmañún wéñuʼ, mú eʼwíinʼ wanii má ga̱jma̱a̱ naʼniún nandii ikha jngó tséʼngu̱u̱n guñambáá wéñuʼ. Mú bi̱ kayá edxu̱u̱ ragíʼmaa mundxaʼwami̱jna̱ rí eʼwíinʼ a̱ngiu̱ún “na̱nguá ejmiin”. Xúgínʼ gíʼmaa muni rí niʼthí Pablo náa Romanos 12:10 (atraxnuu). *

5. a) Xkáʼnii esngajmá bi̱ kuya̱ edxu̱u̱ rí nduyamajkhún a̱ngiu̱ún rá. b) Ndíjkha rí gíʼdoo wéñuʼ numuu muni xúʼko̱ xá.

⁵ Bi̱ kuya̱ edxu̱u̱ nusngajmá rí nduyamajkhún a̱ngiu̱ún índo̱ nudxawíín ga̱jma̱a̱ májánʼ dí nuthi. Rígi̱ ndayóoʼ muni índo̱ nagimbíi̱n mutamijná rí gíʼdoo numuu. Náá numuu rá. Atayáá dí na̱ʼkha̱ raʼthí náa La Atalaya dí nigájnuu nákha 1 ñajunʼ gu̱nʼ octubre tsiguʼ 1988 ikhí naʼthí: “Bi̱ kuya̱ edxu̱u̱ nduyáá rí Jesús ma̱ndoo mambáyúu asndu tsáa bi̱ kayá edxu̱u̱ ga̱jma̱a̱ xi̱ʼ kaʼwu mu mbaʼyoo xkáʼnii ikha ndrígóo Biblia mbaʼyóoʼ munimbánii mbá xkujndu o índo̱ nuraʼwíí muni mbá dí gíʼdoo numuu. (Hechos 15:6-15.) Xi̱ʼ kaʼwu na̱nguá embáyúu mbáwíi bi̱ kayá edxu̱u̱ nambañúún mbá xúgíinʼ”.

6. a) Ndiéjunʼ gámbañún bi̱ kuya̱ edxu̱u̱ muñajunʼ mbá kambáxu̱u̱n rá. b) Xú káʼnii embayúu congregación índo̱ nuni xúʼko̱ xá.

⁶ Á mu mbáa bi̱ kayá edxu̱u̱ ndaʼyamajkhún a̱ngui̱i̱n, xáʼthi má xúʼko̱ ginii ikhaa índo̱ nagimbíi̱n mutamijná. Xáʼni rí i̱ndó ikhaa eyóoʼ maʼthí ni xáku̱mu̱u̱ dí naʼthí ikhaa nindxu̱u̱ itháán májánʼ. Ikhaa naʼthí rí xóo eku̱mu̱u̱ mú ga̱jma̱a̱ ajngáa gua̱ba̱ʼ, ma̱ngaa ndaʼyoo má dí tsijmañuu wéñuʼ, naʼdxaun ga̱jma̱a̱  tsumáá rí nuthi eʼwíinʼ. Naniguuʼ mbaʼyoo ikha dí na̱ʼkha̱ raʼthí náa Biblia ga̱jma̱a̱ naʼnimbánuu ikha ndrígóo “yumbáá bi̱ jmbii ga̱jma̱a̱ nandxa̱ʼwáminaʼ májánʼ” (Mat. 24:45-47). Índo̱ bi̱ kuya̱ edxu̱u̱ nusngajma ngajua ga̱jma̱a̱ gamajkhu índo̱ nutamijná, xi̱ʼ kaʼwu nambáñún muraʼwíí muni mbá rí mambáyúu congregación (Sant. 3:17, 18).

7. Xú káʼnii ndiʼñún Jesús bi̱ xóo tsédamijná rá.

⁷ Náa congregación kúwi̱i̱n a̱ngiu̱lú bi̱ nidamijná, bi̱ guáʼdiin e̱jñún ga̱jma̱a̱ bi̱ xóó tsédamijná. Mú xkáʼnii gíʼmaa mbuʼñún bi̱ xóó tsédamijná rá. Ndayóoʼ mbuʼñún xó má Jesús. Nákha ikhaa nixtáa náa tsu̱du̱u̱ Ku̱ba̱ʼ na̱nguá ninigúnʼ, niriyaʼ itháan mbiʼi maʼnimbánuu ñajunʼ rí nikhánáá. Jesús nditháan taʼsngáa dí gíʼdoo numuu rí mbáa manigúnʼ, manujúnʼ o maguanún ndajkuíín. Mú niʼthí rí tikhun cristianos muraʼwíí rí xúnigu̱nʼ o xúnuju̱nʼ (Mat. 19:11, 12). * Jesús ndiʼyamajkhún bi̱ xóó tsénigu̱nʼ o bi̱ xóo tsénuju̱nʼ, ikhaa taʼñúún rí na̱nguá guaʼdáá numún.

8. Xó má niʼthí Pablo náa 1 Corintios 7:7-9, ndiéjunʼ gíʼmaa mundxaʼwami̱jna̱ rá.

⁸ Xó má Jesús, xúʼko̱ má kayuuʼ niʼni apóstol Pablo ma̱ngaa dí na̱nguá ninigúnʼ índo̱ niʼni ñajuunʼ Dios. Pablo niʼsngáa rí májánʼ má mudamijná xa̱bu̱, ni̱jkha̱nú ndiʼyoo dí rúʼko̱ kaʼyoo maraʼwíí maʼni mambáa. Mú niʼthí dí cristiano ma̱ndoo mundxaʼwami̱jna̱ á mu ma̱ndoo muni ñajuunʼ Jeobá ndajkuíín (atraxnuu 1 Corintios 7:7-9). * Pablo na̱nguá má nindxa̱ʼwáminaʼ rí cristianos bi̱ kúwi̱i̱n ndajkuíín na̱nguá guaʼdáá numún. Ikhaa niríyáaʼ Timoteo bi̱ na̱nguá ninigúnʼ mu maʼni itháán ñajunʼ náa congregación (Filip. 2:19-22). * Ikha jngó raʼkhí gánindxu̱u̱ rí mundxaʼwami̱jna̱ rí bi̱ xóó tsédamijná na̱nguá ejmañún (1 Cor. 7:32-35, 38).

9. Ndiéjunʼ gándoo muʼthá ga̱jma̱a̱ numún bi̱ nidamijná ma̱ngaa bi̱ xóó tsédamijná rá.

⁹ Ni Jesús ni má Pablo na̱nguá nisngáa dí  cristianos gíʼmaa munigu̱nʼ, munuju̱nʼ o makuwíin má xúʼko̱ ndajkuíín. Mú ndiéjunʼ gándoo muʼthá ga̱jma̱a̱ numún bi̱ nidamijná ma̱ngaa bi̱ xóó tsédamijná rá. Náa La Atalaya 1 ñajunʼ gu̱nʼ octubre tsiguʼ 2012, naʼthí kaʼwu: “Xó má bi̱ nidamijná ga̱jma̱a̱ bi̱ xóo kúwi̱i̱n ndajkuíin, nindxu̱u̱ mbá rí májánʼ wéñuʼ dí naxná Dios. Jeobá na̱nguá eʼyoo rí bi̱ xóó tsédamijná nindxu̱u̱ ma̱jti̱ʼ o ngíná”. Nakujmaa kaʼwu rí gíʼmaa mbuyamajkuíí rí nuraʼwíí muni a̱ngiu̱lú bi̱ kúwá náa congregación.

10. Xú káʼnii gusngajmá rí nduʼyamajkhún a̱ngiu̱lú bi̱ xóó tsédamijná rá.

¹⁰ Xú káʼnii gándoo gusngajmá rí nduʼyamajkhúún a̱ngiu̱lú bi̱ kúwi̱i̱n ndajkuíín rá. Gíʼmaa marmáʼáan a̱jkiu̱lú dí tikhun a̱ngiu̱lú nuraʼwíí maguanún ndajkuíín. Tikhun má nandún mudamijná mú xóó tsexkamaa bi̱ phú ma̱ndoo mbu̱ya̱a̱. Tikhun mbáa nikháñuu bi̱ ndi̱ya̱a̱. Asndu káʼnii má, ragíʼmaa muraxu̱u̱n náá numuu rí na̱nguá ndi̱ya̱a̱ mbáa, ni má á mu nandún mumbáʼñúún mbuʼyáaʼ bi̱ ma̱ndoo mbu̱ya̱a̱. Gajkhun má, a̱ngiu̱lú bugi̱ ma̱ndoo muraxu̱u̱n eʼwíinʼ mu mbuyáá tsáa kaʼnii mbu̱ya̱a̱. Á mu ikháanʼ nandulúʼ mumbáʼñúún, ginii ndayóoʼ mbuʼyáá xóo ekumu̱ún (1 Tes. 4:11; 1 Tim. 5:13). Guʼyáá dí nithi tikhun.

11, 12. Xkáʼnii gamíi muʼni rí a̱ngiu̱lú bi̱ xóó tsédamijná makuwíin ngíná rá.

¹¹ Mbáa ndxájulú circuito bi̱ xóo tsínigúnʼ bi̱ naʼni májánʼ ñajunʼ ndrígóo, naku̱mu̱u̱ rí itháán májánʼ nindxu̱u̱ rí maraxtaa mbawíín. Mú naʼthí rí naʼni majmúu índo̱ tikhun a̱ngiu̱lú nuraxi̱i̱ náá numuu rí xóó tsínigún. Mbáa ndxájulú bi̱ xóo tsínigún bi̱ xtáa rañajunʼ náa Betel niʼthí: “Nguáná nda̱yo̱o̱ rí tikhun a̱ngiu̱lú nundxaʼwamíjná rí bi̱ ndajkuíín mingíníi. Rígi̱ naʼni makujmaa dí na̱nguá májánʼ rí maraxtaa mbáwíín”.

¹² Mbáa ndxájulú a̱ʼgu̱ bi̱ xtáa rañajunʼ náa Betel naʼthí: “Tikhun a̱ngiu̱lú nakumu̱ún rí xúgínʼ bi̱ ndajkuíín nandún mudamijná o índo̱ nagún náa convivio nduyáá xóo náa rí ma̱ndoo muxkamaa tsáa bi̱ mbu̱ya̱a̱. Mbá miʼtsú índo̱ nijkha i̱mba̱ níʼkhá ga̱jma̱a̱ numuu mbá asignación rí nikhánuʼ, ni̱jkhánú mbá wakhííʼ índo̱ nirígá reunión. Ndxájulú bi̱ maguanúʼ náa goʼwóo niʼthúunʼ dí kúwi̱i̱n a̱jmi̱i̱n jiáma náa congregación bi̱ tsígún xóo ikhúúnʼ. Maski ajndu niʼthúunʼ rí na̱nguá xtáa rambáyuʼ maxkamaa novio. Mú, índo̱ ni̱jkuáxu náa Salón, nijkha kañúún asndu náa guájun a̱ngiu̱lú jiáma mu maniʼniún. ¡Ra̱ʼkhá tháán nitiyuxu mbá nájtsáanʼxu!”.

13. Ndiéjunʼ nixnúu tsiakii mbáa ndxájulú bi̱ xóo tsinujúnʼ rá.

¹³ Imba̱a̱ ndxájulú a̱ʼgu̱ bi̱ xtáa rañajunʼ náa Betel naʼthí: “Naniʼnúunʼ tikhun precursor bi̱ ndajkuíín, bi̱ nduyáá awáán dí muni, bi̱ nakúwi̱i̱n xawii mumbáñúún eʼwíinʼ, bi̱ kúwá gagi runi ñajunʼ ndrígu̱ún ga̱jma̱a̱ nuñambáá wéñuʼ náa congregación. Na̱nguá endxaʼwami̱jna̱ rí itháán guaʼdáá numún ikhiin ni má rí nda̱a̱ dí ejmiin numuu rí kúwá ndajkuíín o rí na̱nguá guáʼdiin e̱jñún”. Ra̱ʼkhá tháán mitsaanʼ nindxu̱u̱ dí maraxtaa náa congregación náa xúgínʼ nduyamajkumijná, nangaju̱u̱n kuyamijná, náa na̱nguá ekumu̱ún rí tikhun mingíníi, náa tsexígu̱u̱n kuyamijná, náa xúgínʼ nutamijná ga̱jma̱a̱ náa xúgínʼ nakumu̱ún rí nandún kuñúún.

14. Xkáʼnii esngajmá rí nduʼyamajkhún bi̱ xóó tsédamijná rá.

¹⁴ A̱ngiu̱lú bi̱ xóó tsédamijná maʼdxúún á mu ikháanʼ nangajulú kuʼñúún rí xóo  ni̱ndxu̱ún. Ragíʼmaa mbuʼñún rí mingíníi. Itháan májánʼ gaʼni rí mangajulu kuʼñúún numuu rí naguájun jmbu. Á mu nuʼni xúʼko̱, nditháan xákumu̱ún dí kuwáanʼ ruʼthúún rí “ikhiin nda̱a̱ dí ejmiin” (1 Cor. 12:21). Nandulúʼ makumu̱ún dí nduʼyamajkhún, rí nangajulú kuʼñúún ga̱jma̱a̱ numuu ñajunʼ rí guaʼdáá náa congregación.

15. Ndiéjunʼ rí nini tikhun a̱ngiu̱lú mu mutaraʼa itháán rá.

¹⁵ Náa iwáá tsiguʼ rí ninújngoo, mbaʼin publicadores nigímijna majmañún imbo̱ʼ ajngáa muni itháán ñajunʼ Dios. Índo̱ nini xúʼko̱, niniñaaʼ congregación náa nuthi ajngún mu magún náa nuthi imbo̱ʼ ajngáa ma̱ngaa náa ndayóoʼ miʼtáraʼa itháan (Hech. 16:9). Rígi̱ naraʼwíí mámbáa. Maski ajndu mbajyúuʼ mba̱yu̱u̱ʼ tsiguʼ majmañún muthi májánʼ ajngáa, mú nuyambáá wéñuʼ náa congregación. Rí xóo xa̱bu̱ ni̱ndxu̱ún ga̱jma̱a̱ rí najmañún nambáñun a̱ngiu̱lú. Lá ragájkhun dí nangajulú kuʼñúún a̱ngiu̱lú bugi̱ numuu tsiakii dí nuni ráʼ.

16. Ndiéjunʼ rí gíʼmaa mbuyáá bi̱ kuya̱ edxu̱u̱ á mu ma̱ndoo mbayá edxu̱u̱ o siervo ministerial mbáa rá.

¹⁶ Bi̱ kuya̱ edxu̱u̱ xáʼyóoʼ muni gaʼduunʼ rí mbáa ndxájulú bi̱ na̱nguá eʼthí májánʼ ajngáa dí nuthi náa congregación mu mani̱ndxu̱u̱ bi̱ mayéʼga edxu̱u̱ o siervo ministerial. Gíʼmaa mbuyáá dí naʼthí náa Biblia dí naʼnimbánuu má rí kaʼyoo muni bi̱ mbu̱ya̱ edxu̱u̱ o siervo ministerial, raʼkháa ga̱jma̱a̱ numuu rí tséʼthi májánʼ ajngáa (1 Tim. 3:1-10, 12, 13; Tito. 1:5-9).

17. Ndiéjunʼ gíʼmaa muni mbá guʼwíin bi̱ gágún gákuwá i̱mba̱ níʼkhá rá.

¹⁷ Tikhun bi̱ kúwá náa mbá guʼwíin nagún gákuwá i̱mba̱ níʼkhá mu mbuyáaʼ rí munikaumi̱jna̱ o mbuyaaʼ ñajunʼ. Mbáa e̱ji̱n magún escuela náa nuthi ajngáa dí nuthi ikhí jma̱a̱ anu̱ún e̱ji̱n mbaʼyóoʼ majmañún ajngáa rúʼko̱ mu muxkamaa ñajunʼ. Mú, á mu rígá congregación o grupo náa nuthi ajngún xá. Náá gíʼmaa magún xá. Lá magún náa ajngáa rí nuthi náa xuajen rí kúwi̱i̱n o magún náa nuthi ajngún má ikhiin dxe̱ʼ.

18. Xó má eʼthí Gálatas 6:5, xkáʼnii gusngajmá rí nduʼyamajkuíí rí guraʼwi̱i̱ muni bi̱ kuya̱ edxu̱u̱ rá.

¹⁸ Bi̱ kayá edxu̱u̱ náa mbá guʼwi̱i̱n gíʼmaa maraʼwíí náá congregación gágún. Gíʼmaa mbaʼyoo ndiéjunʼ rí itháán gambáñúún bi̱ kúwá náa goʼwóo (atraxnuu Gálatas 6:5). * Rígi̱ kaʼyoo maʼni ikhaa, gíʼmaa mbuyamajkuíí dí garaʼwíí maʼni. Asndu ndiéjunʼ má garaʼwíí maʼni, guʼyamajkuíí ga̱jma̱a̱ gundriʼguíín májánʼ náa congregación (Rom. 15:7).

19. Ndiéjunʼ gíʼmaa muni xabuanii á mu e̱jñún tsíkru̱ʼu̱u̱n májánʼ ajngáa rí nuthi náa congregación xá.

¹⁹ Nguáná, bi̱ kúwi̱i̱n náa mbá guʼwi̱i̱n ma̱ndoo  makuwi̱i̱n ruyambáá náa congregación náa nuthi ajngáa rí ikhiin nakru̱ʼu̱u̱n májánʼ, mú á mu e̱ji̱nʼ tsíkru̱ʼu̱u̱n májánʼ ajngáa dí nuthi anu̱ún. Rúʼko̱ gaʼniúún rí xikru̱ʼu̱u̱n dí ganújngoo náa reunión ga̱jma̱a̱ rí xágún kanuu náa Dios. Náa numuu rá. Numuu rí e̱ji̱nʼ nagún escuela náa nuthi imbo̱ʼ ajngáa. Á mu xúʼko̱ xabuanii ndayóoʼ rí mutakáñii Jeobá mu mbuyáá ndiéjunʼ gúni. Rígá a̱jma̱ dí ma̱ndoo muni, musngúún e̱jñún muthi májánʼ ajngáa dí ikhiin nuthi o magún náa imbo̱ʼ congregación náa nuthi ajngáa dí e̱jñún nakru̱ʼu̱u̱n. Asndu káʼnii má gúraʼwíí muni, bi̱ kúwá náa congregación dí gágun gíʼmaa mbuyamajkún ga̱jma̱a̱ mangaju̱u̱n kuñún.

20. Xkáʼnii gándoo gusngajmá rí nduʼyamajkhún bi̱ kúwi̱i̱n rajmañún imbo̱ʼ ajngáa rá.

²⁰ Náa xúgíʼ rí niʼthá, mbaʼa congregación kúwi̱i̱n a̱ngiu̱lú bi̱ nuni tsiakimijna majmañún imbo̱ʼ nuxi̱ʼ ajngáa. Mbáa naʼniún mingíjyúuʼ muthi xóo ekumu̱ún. Mú, á mu nduʼyáá rí najmiin nuni, mbuʼyáá dí ra̱ʼkhá tháán nandún kuyáá Jeobá ga̱jma̱a̱ rí nandún muni ñajuunʼ. Rúʼko̱ gáʼni rí mbuyamajkún ga̱jma̱a̱ rí mangajulú kuʼñúún. Xundxaʼwami̱jna̱ rí ikhiin na̱nguá ejmiin numuu rí tséthi májánʼ ajngulú.

21, 22. Náá numuu rí nuxnáa wéñuʼ núma̱aʼ Jeobá rá.

²¹ Nuxnáalú wéñuʼ núma̱aʼ Jeobá dí nixnulu mbá ñajunʼ náa congregación. Tséʼniuu á mu ni̱ndxu̱lú xa̱bekha, gu̱ʼu̱, ndajkuáán, niʼdamijná, jiáma, wa̱ʼxa̱ʼ, xabuanii o á mu nuʼthá májánʼ mbá ajngáa o ndiʼkhún kuwáánʼ rajmañulú: Xúgiáánʼ kuaʼdáá numulú eʼyoo Jeobá (Rom. 12:4, 5; Col. 3:10, 11).

²² Á mu nuʼgíʼ nuʼnimbánii ikha dí najmañulúʼ náa xkri̱da mitsaanʼ dí niʼthí Pablo ga̱jma̱a̱ numuu xuyuuʼ xa̱bu̱. Rúʼko̱ gáʼniulú mbuʼyáá rí gíʼdoo wéñuʼ numuu ñajunʼ rí kuaʼdáá ma̱ngaa rí kuaʼdáá eʼwíinʼ náa xuajñuu Jeobá.