ARTÍCULO RÍ MUʼNIGAJMAA 34
Xúgiáánʼ kuaʼdáá numulúʼ náa xuajñuu Jeobá
“Xó má xuwiʼ nindxu̱u̱ mbóó, mú mbaʼa enii rí gíʼdoo, ga̱jma̱a̱ xúgíʼ rí gíʼdoo náa xuwiʼ rúʼko̱, maski ajndu mbaʼa, nindxu̱u̱ mbóó xuwiʼ, xúʼko̱ má ma̱ngaa nindxu̱u̱ Cristo” (1 COR. 12:12).
AJMÚÚ 101 Guʼni ñajuunʼ Dios mbá kambáxulú
RÍ MUʼNIGAJMAA *
1. Ndiéjunʼ rí mitsaanʼ kuaʼdáálu rá.
¡RA̱ʼKHÁ tháán mitsaanʼ nindxu̱u̱ rí makuwáanʼ náa xuajñuu Jeobá! Xúgiáánʼ kuwáánʼ tsímáá jma̱a̱ gagi rí mbuʼyamajkuíí Jeobá gajmiúlú a̱ngiu̱lú. Ndiéjunʼ ñajunʼ xtaʼdáá ikháán náa congregación rá.
2. Xkáʼnii xkri̱da nijmuu apóstol Pablo náa mbaʼa carta rí niʼnirámáʼ rá.
2 Ma̱ndoo majmañulúʼ numuu rígi̱ náa xkri̱da rí apóstol Pablo nijmuu mbaʼa nuthu náa carta dí niʼnirámáʼ. Niʼthí rí congregación nindxu̱u̱ xóo xuyuʼ xa̱bu̱ ma̱ngaa rí mámbáa bi̱ xtáa ikhí nindxu̱u̱ xóo mámbá dí gíʼdoo náa xuyulúʼ (Rom. 12:4-8; 1 Cor. 12:12-27; Efes. 4:16).
3. Xkáʼnii ajtsú ikha rí mbuʼyáá náa artículo rígi̱ rá.
3 Náa artículo rígi̱ mbuʼyáá ajtsú ikha rí gíʼdoo numuu rí ma̱ndoo majmañulúʼ náa xkri̱da rí nijmuu Pablo. Timbá, majmañulúʼ rí mámbáa dí ikháanʼ gíʼdoo numuu náa xuajñuu Jeobá. * Raga̱jma̱, mbuʼyáá ndiéjunʼ gándoo muʼni á mu naʼniulú mingíjyúuʼ mbuʼyáá dí gíʼdoo numulúʼ náa congregación. Ragajtsú, mbuʼyáá ndíjkha rí gíʼdoo numuu rí muʼni xó má eʼngo̱o̱ ñajunʼ dí nixnúlú Jeobá.
MÁMBÁA GÍʼDOO MBÁ ÑAJUNʼ NÁA XUAJÑUU JEOBÁ
4. Ndiéjunʼ eʼsngúlúʼ rí naʼthí náa Romanos 12:4, 5 rá.
4 Timbá ikha rí majmañulúʼ náa xkri̱da rí niʼthí Pablo nindxu̱u̱ rí mámbáa dí ikháanʼ gíʼdoo numuu náa xuajñuu Jeobá. Pablo nigíʼdu̱u̱ niʼthí xkri̱da xúgi̱ káʼnii: “Xó ma mbáa xa̱bu̱ gíʼdoo mbaʼa náa xuyuuʼ mu raʼkháa xúgíʼ naʼni ikháá ñajunʼ, xúʼko̱, maski ajndu mbaʼáanʼ, ni̱ndxu̱lú mbóó xuwiʼ kambáxulú gajmiúlú Cristo, mú mámbáa rí ikháanʼ kaʼyoo náa xuwiʼ rígi̱” (Rom. 12:4, 5). Ndiéjunʼ phú nindoo gáʼthi Pablo rá. Dí mámbáa dí ikháanʼ gíʼdoo mixtiʼkhu ñajunʼ náa congregación, mú xúgiáanʼ kuaʼdáá wéñuʼ numulú.
Mámbáa gíʼdoo mixtiʼkhu ñajunʼ náa congregación mú xúgiáánʼ kuaʼdáá numulú. (Atayáá kutriga̱ 5 asndu 12). *
5. Náa biʼyaa “regalo” rí nixná Jeobá náa xuajñuu rá.
5 Índo̱ natatsaʼwáminaʼ numún bi̱ guaʼdáá ñajunʼ náa congregación, mbáa, mbá nacha̱ tatsaʼwáminaʼ ga̱jma̱a̱ numún bi̱ kuya̱ edxu̱u̱ (1 Tes. 5:12; Heb. 13:17). Gajkhun má rí numuu Cristo, Jeobá “nixníin xa̱bekha xóo regalo” mu makuwá náa xuajñuu (Efes. 4:8). Xa̱bekha bi̱ ni̱ndxu̱ún mbá regalo nandoo gáʼthúu̱n Cuerpo Gobernante ga̱jma̱a̱ bi̱ numbañún, bi̱ ni̱ndxu̱ún Comité náa Betel, bi̱ nuñajunʼ náa circuito, bi̱ nusngúún a̱ngiu̱lú náa mixtiʼkhu escuela, bi̱ kuya̱ edxu̱u̱ náa congregación ma̱ngaa siervos ministeriales. Xúgínʼ a̱ngiu̱lú bugi̱ nixtaʼwíin ga̱jma̱a̱ xi̱ʼ kaʼwu mu muñewu̱u̱n mugiu̱u̱ Jeobá bi̱ guaʼdáá wéñuʼ numuu ma̱ngaa mu mumbáñuun bi̱ kúwá náa congregación (1 Ped. 5:2, 3).
6. Xó má naʼthí náa 1 Tesalonicenses 2:6-8, ndiéjunʼ eni tsiakimijna muni bi̱ nixtaʼwíin ga̱jma̱a̱ xi̱ʼ kaʼwu rá.
6 A̱ngiu̱lú nixtaʼwíin ga̱jma̱a̱ xi̱ʼ kaʼwu mu munimbánii mixtiʼkhu ñajunʼ. Xó má mixtiʼkhu dí gíʼdoo náa xuyuʼ mbáa xa̱bu̱, xóo rajkhúlú, ñawúnlú o i̱ʼwáʼ, nañajunʼ mu mambáyúu xúgíʼ xuyulúʼ, xúʼko̱ má a̱ngiu̱lú bi̱ nixtaʼwíin ga̱jma̱a̱ xi̱ʼ kaʼwu nuñajunʼ mu mumbáñuun bi̱ kúwá náa congregación. Na̱nguá eyaʼ dí mbuyamajkún ikhiin, ikhiin nuni tsiakimijna rí mumbañún ga̱jma̱a̱ muxnún tsiakii a̱ngiu̱lú (atraxnuu 1 Tesalonicenses 2:6-8). * Nuxnáalú núma̱aʼ wéñuʼ Jeobá ga̱jma̱a̱ numún a̱ngiu̱lú buʼko̱ bi̱ nakru̱ʼu̱u̱n májánʼ bi̱ tseguáʼthi̱i̱n mudaaʼ índo̱ numbayúlúʼ.
7. Xkáʼnii eguma tsajkurámii precursores ga̱jma̱a̱ misioneros rá.
7 Mbáa tikhun bi̱ kúwá náa congregación ni̱ndxu̱ún misionero, precursores especiales o precursores regulares. Dí phú muʼthá, mbaʼin a̱ngiu̱lú xa̱bekha ga̱jma̱a̱ gu̱ʼu̱ bi̱ kúwá náa xúgíʼ numbaaʼ niraʼwíí muni káxi̱ ñajunʼ rí mutaraʼa jma̱a̱ rí musngúún xa̱bu̱. Rí niraʼwi̱i̱ muni xúʼko̱, nimbañúún mbaʼin xa̱bu̱ mani̱ndxu̱ún xa̱bi̱i̱ Jesús. Maski ajndu a̱ngiu̱lú bugi̱ na̱nguá guaʼdáá wéñuʼ. Mú mixtiʼkhu enii xóo eʼni tsajkurámii Jeobá (Mar. 10:29, 30). ¡Ra̱ʼkhá tháán nangajulú kuʼñúún a̱ngiu̱lú bugi̱ ma̱ngaa nuxníin wéñuʼ núma̱aʼ rí kúwá náa congregación!
8. Náá numuu rí Jeobá ndaʼyoo rí gíʼdoo numuu mámbáa bi̱ naʼtaraʼa rá.
8 Lá i̱ndó a̱ngiu̱lú bugi̱ bi̱ nuni káxi̱ ñajuunʼ Jeobá guaʼdáá numún náa congregación rá. ¡Na̱nguá! Xúgínʼ bi̱ nutaraʼa guaʼdáá numún eʼyoo Jeobá ga̱jma̱a̱ guaʼdáá numún náa congregación (Rom. 10:15; 1 Cor. 3:6-9). Dí phú itháan gíʼdoo numuu rí maguma náa xuajñuu Jeobá nindxu̱u̱ rí musngúún xa̱bu̱ (Mat. 28:19, 20; 1 Tim. 2:4). Xúgínʼ bi̱ kúwá náa congregación bi̱ nijngún má iyááʼ ma̱ngaa bi̱ xóo tsejngúún nunimi̱jna̱ rí muni ginii ñajunʼ rígi̱ (Mat. 24:14).
9. Náá numuu dí nangajulú kuʼñúún a̱ngiu̱lú gu̱ʼu̱ rá.
9 Jeobá ndaʼyoo rí guaʼdáá wéñuʼ numún a̱ngiu̱lú gu̱ʼu̱ bi̱ kúwá náa congregación. Ra̱ʼkhá tháán ngajo̱o̱ kaʼñún bi̱ nuni ñajuunʼ ikhaa bi̱ guáʼdiin a̱jmbiu̱ún, bi̱ guáʼdiin e̱jñún, gu̱ʼu̱ bi̱ niguaná tígu̱u̱n ga̱jma̱a̱ bi̱ xóó tsénujunʼ. Náa Biblia na̱ʼkha̱ raʼthí mbaʼa nuthu numún gu̱ʼu̱ bi̱ niniñanʼ májánʼ xkri̱da bi̱ nini rí ninigu̱u̱ʼ Dios, ma̱ngaa numuu rí nijmañún wéñuʼ, rí niguaʼdáá fe, rí támiñún, rí nixná rí guaʼdáá ga̱jma̱a̱ nini mbaʼa enii rí májánʼ (Luc. 8:2, 3; Hech. 16:14, 15; Rom. 16:3, 6; Filip. 4:3; Heb. 11:11, 31, 35). ¡Ra̱ʼkhá tháán exnáalú núma̱aʼ Jeobá dí náa congregacion kúwá a̱ngiu̱lú bi̱ ni̱ndxu̱ún xúʼko̱!
10. Náá numuu eʼyáá rí guaʼdáá numún a̱ngiu̱lú bi̱ guanii rá.
10 Ma̱ngaa ra̱ʼkhá tháán májánʼ nindxu̱u̱ rí kuaʼdiin a̱ngiu̱lú bi̱ guanii. Tikhun nini ñajuunʼ Jeobá mbayuuʼ tsiguʼ. Eʼwíinʼ a̱ngiu̱lú bi̱ guanii mbáa ndiʼkhún nijmañún dí gajkhun. A̱ngiu̱lú bi̱ guanii mbáa naʼniún nandii ikha jngó tséʼngu̱u̱n gúni xó má eñún náa congregación ma̱ngaa náa nutaráʼa. Mú maski ajndu xúʼko̱ nuni xó má eʼngo̱o̱ magún gutaráʼa ga̱jma̱a̱ najmún tsiakii ndrígu̱ún mu muxnún tsiakii ma̱ngaa rí musngúún eʼwíinʼ. ¡Ikháanʼ nambáyulúʼ wéñuʼ rí ikhiin najmañún! Ikhiin ra̱ʼkhá tháán guaʼdáá numún eʼyoo Jeobá ma̱ngaa ikháanʼ nduʼyáá xúʼko̱ (Prov. 16:31).
11, 12. Xkáʼnii exnaaʼ tsiakii xkridún jiáma ga̱jma̱a̱ wa̱ʼxa̱ʼ bi̱ kúwá náa congregación ndrígáaʼ rá.
11 Gundxaʼwamíjna̱ ma̱ngaa náa jiáma ga̱jma̱a̱ wa̱ʼxa̱ʼ. Ikhiin nuraʼníí mbaʼa xkujndu náa numbaaʼ ndrígóo Gixa̱a̱ ma̱ngaa rí nuni nduwiinʼ ga̱jma̱a̱ ku̱ma̱ ndrígu̱ún xa̱bu̱ (1 Juan 5:19). Mú ra̱ʼkhá tháán naxnúlú tsiakii índo̱ a̱ngiu̱lú bugi̱ nuni̱i̱ comentar náa reunión, nagún gutaraʼa, ma̱ngaa rí tsémiñún muni gaʼduunʼ dí raʼkhí. ¡Jiáma ga̱jma̱a̱ wa̱ʼxa̱ʼ, ra̱ʼkhá tháán kuaʼdáá numala náa xuajñuu Jeobá! (Sal. 8:2).
12 Tikhun a̱ngiu̱lú naʼniún mingíjyúuʼ mbuyáá rí guaʼdáá numún náa congregación. Ndiéjunʼ gándoo gambáyulú mámbá dí ikháanʼ mu mbuʼyáá rí guaʼdáá numulú náa congregación rá. Guʼyáá.
ATAYÁÁ RÍ XTAʼDÁÁ NUMAAʼ NÁA CONGREGACIÓN
13, 14. Náá numuu rí tikhun nakumu̱ún rí na̱nguá guaʼdáá numún náa congregación rá.
13 Raga̱jma̱ ikha dí najmañulúʼ náa xkri̱da dí niʼthí Pablo naʼni mundxaʼwamíjna̱ xkujndu rí guaʼdáá mbaʼin xúgi̱, rí nakumu̱ún dí na̱nguá guaʼdáá numún náa congregación. Pablo niʼnirámáʼ: “Á mu rajkuáaʼ gáʼthi ‹numuu rí na̱nguá ni̱ndxu̱ʼ ñawáanʼ, na̱nguá kaʼyoʼ náa xuyaaʼ›, raʼkháa rúʼko̱ nandoo gáʼthúu̱n rí na̱nguá nindxu̱u̱ náa xuyaaʼ. Á mu chaʼwáanʼ gáʼthi ‹numuu rí na̱nguá ni̱ndxu̱ʼ idaaʼ, na̱nguá kaʼyoʼ náa xuyaaʼ›, raʼkháa rúʼko̱ nandoo gáʼthúu̱n rí na̱nguá nindxu̱u̱ náa xuyaaʼ” (1 Cor. 12:15, 16). Ndiéjunʼ ejmañuluʼ náa ajngáa rígi̱ rá.
14 Á mu nuʼni mbríguminaʼ gajmiúlú eʼwíinʼ bi̱ kúwá náa congregación, mbáa rúʼko̱ gáʼni mbuʼyáá dí na̱nguá kuaʼdáá numulúʼ. Tikhun a̱ngiu̱lú nusngáa májánʼ, nuríyaʼ májánʼ awan o najmiin numbañún a̱ngiu̱lú. Mbáa ikháanʼ makumulúʼ rí na̱nguá ejmáánʼ muʼni xóo ikhiin. Rúʼko̱ nasngájma rí ni̱ndxu̱lú xa̱bu̱ guabaaʼ ma̱ngaa rí nduʼyáá dí tséjmañulú (Filip. 2:3). Mú guñewumijna, numuu rí makawabáanʼ á mu nuʼni mbríguminaʼ má xúʼko̱ gajmiúlú eʼwíinʼ. Mbáa makumulúʼ xóo niʼthí Pablo, rí asndu mundxaʼwamíjna̱ rí nda̱a̱ dí eʼni náa congregación. Mú ndiéjunʼ gambáyulú mu xundxaʼwamíjna̱ xúʼko̱ rá.
15. Xó má eʼthí 1 Corintios 12:4-11, xkáʼnii eʼyulú Jeobá maski ajndu kuaʼdáá mixtiʼkhu ñajunʼ rá.
15 Gundxaʼwamíjna̱ numuu rígi̱: Nákha siglo timbá Jeobá nixnúún tikhun cristianos xi̱ʼ kaʼwu muni ñajunʼ, mú ra̱ʼkhá ikháá ñajunʼ nini xúgínʼ (atraxnuu 1 Corintios 12:4-11). * Jeobá niʼni rí muni mixtiʼkhu ñajunʼ jma̱a̱ rí majmañún muni, maski ajndu xúʼko̱ xúgínʼ guáʼdáá numún. Gajkhun má rí mbiʼi xúgi̱ na̱nguá eʼni mbá ñajunʼ numuu rí nikhánulú xi̱ʼ kaʼwu, mú ikha rígi̱ nambáyulúʼ xóó rí mbiʼi xúgi̱. Mbáa raʼkháa xúgiáánʼ ejmaaʼ muʼni ikháá ñajunʼ, mú xúgiáanʼ guaʼdáá numulúʼ eʼyoo Jeobá.
16. Ndiéjunʼ niʼthí Pablo dí gíʼmaa muʼni rá.
16 Xúʼni mbrígumijná gajmiúlú eʼwíinʼ a̱ngiu̱lú, guʼgíʼ muʼnimbánii rí niʼnirámáʼ Pablo náa Gálatas 6:4 náa naʼthí: “Mú mámbáa gáʼyoo rí naʼni, mu xúʼko̱ maʼdxuu ga̱jma̱a̱ rí niʼni, ga̱jma̱a̱ xambríguminaʼ ga̱jma̱a̱ imba̱a̱ xa̱bu̱” (Gál. 6:4).
17. Ndiéjunʼ gambáyulú á mu nuʼnimbánii dí niʼnirámáʼ Pablo rá.
17 Á mu nuʼnimbánii xóo niʼthí Pablo dí mbuʼyáá rí najmáán nuʼni, mbuʼyáá dí najmáán nuʼni mbá dí eʼwíinʼ na̱nguá eʼni. Mbá xkri̱da, mbáa bi̱ kayá edxu̱u̱ ma̱ndoo maku̱mu̱u̱ rí na̱nguá ejmaa maʼsngáa májánʼ náa plataforma mú najmaa naʼsngúún mbaʼin xa̱bu̱. O mbáa maku̱mu̱u̱ rí na̱nguá ejmaa maríyaʼ májánʼ awan mú najmanii xóo bi̱ nandoo kaʼñún mugu̱ bi̱ nanigu̱u̱nʼ mutamijná gajmiún ikhaa mu maxnún consejo dí na̱ʼkha̱ náa Biblia. O mbáa najmanii numuu rí naʼthúún a̱ngiu̱lú magún náa goʼwóo (Heb. 13:2, 16). Índo̱ nduʼyáá kaʼwu ndiéjunʼ dí najmáánʼ ga̱jma̱a̱ najmañulúʼ nuʼni rúʼko̱ gáʼni rí makumulúʼ rí nandoo nuñambáá náa congregación. Ma̱ngaa rúʼko̱ gáʼni rí xaxígulú kuʼñúún a̱ngiu̱lú bi̱ najmiin nuni i̱ʼwáʼ ñajunʼ dí ikháanʼ na̱nguá eʼnilu.
18. Xkáʼnii gándoo manindxu̱lúʼ bi̱ naʼsngáa itháan májánʼ rá.
18 Tséʼniuu má asndu ndiéjunʼ ñajunʼ kuaʼdáá náa congregación, mámbáa dí ikháanʼ gíʼmaa muʼgíiʼ muʼni itháan májánʼ ñajunʼ ndrígúlú ga̱jma̱a̱ rí muʼsngáa májánʼ. Jeobá naʼsngúlúʼ náa xuajñuu. Mbá xkri̱da, náa reunión dí rígá ta̱pha̱ xmáná najuiʼsngulu ikha rí xú káʼnii gíʼmaa muʼtáraʼa itháan májánʼ. Lá najmulú xó má eʼngo̱o̱ awan dí najmañulúʼ ikhí ráʼ.
19. Xkáʼnii gándoo muʼni mu mu̱ʼgua̱ Náa Najuiʼsngúún bi̱ Nutaraʼa numuu Reino rá.
19 Imbo̱ʼ dí najmuu Jeobá maʼsngulúʼ nindxu̱u̱ Náa Najuiʼsngúún bi̱ Nutaraʼa numuu Reino. Ikhí nagún a̱ngiu̱lú bi̱ nuni káxi̱ ñajuunʼ Jeobá bi̱ guaʼdáá 23 asndu 65 tsigúúnʼ. Mbáa makumulúʼ rí xáʼngo̱o̱ muʼgualu náa escuela rígi̱. Mú xundxaʼwamijná náá numuu rí tséndoo muʼgualu, itháan májánʼ gáʼni rí mundxaʼwamijná náá numuu rí nandulú mu̱ʼgua̱. Nda̱wa̱á guriʼyááʼ májánʼ awan rí mambáyulú muʼnimbánii dí gíʼma muni bi̱ nandún magún. Rí nakumulú dí xáʼngo̱o̱ gúʼni ma̱ndoo muʼni, Jeobá má gambáyulú ma̱ngaa tsiakii dí gúʼni ikháanʼlu.
GAJMULÚ RÍ NAJMAÑULÚʼ NUʼNI MU MUXNÚN TSIAKII A̱NGIU̱LÚ
20. Ndiéjunʼ ejmañuluʼ dí naʼthí náa Romanos 12:6-8 rá.
20 Ragajtsú rí najmañulúʼ náa xkri̱da rí nijmuu Pablo na̱ʼkha̱ raʼthí náa Romanos 12:6-8 (atraxnuu). * Gi̱i̱ ma̱ngaa na̱ʼkha̱ raʼthí dí xúgiáanʼ kuaʼdáá mixtiʼkhu rí najmañulúʼ nuʼni náa congregación. Mú, naʼthí kaʼwu rí mámbáa gíʼmaa majmuu rí najmañuu mu maxnún tsiakii ga̱jma̱a̱ mambáñún bi̱ kúwá náa congregación.
21, 22. Ndiéjunʼ ejmañuluʼ dí nigíʼnuu Robert ga̱jma̱a̱ Felice rá.
21 Guʼyáá xkri̱da ndrígóo Robert mbáa bi̱ kayá edxu̱u̱. Nda̱wa̱á rí niʼtáráʼa náa i̱mba̱ país, nitháán mañajunʼ náa Betel dí rígá náa xuajñuu. Maski ajndu nitháán dí na̱nguá niʼni dí raʼkhí, mú niʼthí: “Mbayuuʼ igu̱nʼ nindxa̱ʼwáminaʼ rí nándáa dí ejmúún. Nguáná nindoʼ maniʼñúuʼ rañajunʼ náa Betel”. Mú xkáʼnii niʼni rí maxtáa gagi mbu̱júu̱ʼ xá. Mbáa bi̱ kayá edxu̱u̱ niʼthúu̱n rí Jeobá naʼniratháánʼ náa asignación dí niguaʼdáá ginii mu majmáán itháan muʼni ñajunʼ dí kuaʼdáá xúgi̱. Robert ni̱jkha̱nú ndiʼyoo dí gíʼmaa mambumuu dí niʼni nákha ginii ga̱jma̱a̱ rí magíʼ mandxaʼwóoʼ edxu̱u̱ dí naʼngo̱o̱ naʼni mbiʼi xúgi̱.
22 Ndxájulú Felice Epíscopo niraʼnuu ikháá má xkujndu. Ikhaa ga̱jma̱a̱ a̱ʼgiu̱u̱ nigún Escuela ndrígóo Galaad nákha 1956 ga̱jma̱a̱ niñajunʼ xóo circuito náa Bolivia. Nákha 1964 nigua̱ʼda̱a̱ mbáa ada̱. Felice niʼthí: “Niʼniuxu gakhii muniʼñáánʼ ñajunʼ ndrígúxu̱. Ndijyúuʼ mbá tsiguʼ rí nixtáá ngíná. Mú Jeobá nimbáyuʼ mariʼkhuu xóo niku̱mu̱ʼ, mu mani̱ndxu̱ʼ mbáa májáanʼ anu̱u̱ ada̱”. Lá nakumulúʼ mangáán xóo Robert o Felice ráʼ. Lá najmúlúʼ numuu rí nánguá kuaʼdáá mbá ñajunʼ dí niʼni nákha ginii ráʼ. Á mu xúʼko̱, makuwáanʼ itháan gagi á mu nduʼyáá rí naʼngo̱o̱ nuʼni xúgi̱ mu muʼni ñajuunʼ Jeobá ma̱ngaa dí mumbáñuun a̱ngiu̱lú. Guʼni má xúʼko̱ ñajunʼ, gajmulú dí najmañulúʼ nuʼni mu mumbaʼñúún eʼwíinʼ. Xúʼko̱ gáʼni rí makuwáanʼ gagi índo̱ nuxnún tsiakii bi̱ kúwá náa congregación.
23. a) Ndiéjunʼ rí ndayóoʼ mundxaʼwáá edxu̱lúʼ rá. b) Xkáʼnii graxe̱ gáxti̱ʼña̱a̱ náa imbo̱ʼ artículo rá.
23 Mámbáa dí ikháanʼ gíʼdoo wéñuʼ numuu eʼyoo Jeobá. Ikhaa nandoo rí makuwáanʼ náa xuajñuu. Á mu nuriʼyáʼ mbiʼi mundxaʼwáá edxu̱lúʼ xú káʼnii gándoo guxnún tsiakii a̱ngiu̱lú ga̱jma̱a̱ á mu nuʼni tsiakimijna muʼni, rúʼko̱ gáʼni mbuʼyáá rí kuaʼdáá numulú náa congregación. Mú, xú káʼnii eʼñúún eʼwíinʼ rá. Xkáʼnii gándoo musngajmá rí nangajulú kuʼñúún xá. Náa imbo̱ʼ artículo gáxti̱ʼña̱a̱ graxe̱ rígi̱ dí gíʼdoo wéñuʼ numuu.
AJMÚÚ 24 Guʼgua̱ náa kúbá ndrígóo Jeobá
^ párr. 5 Xúgiáanʼ nandulú makumulúʼ rí kuaʼdáá numulúʼ eʼyoo Jeobá, mú mbáa nguáná naʼni muraximijnalú xú káʼnii gúʼni mu majmáán náa inuu ikhaa. Náa artículo rígi̱ mbuʼyáá rí mámbáa dí ikháanʼ gíʼdoo numuu náa congregación.
^ párr. 3 KU̱MA̱ RÍ GÍʼDOO NUMUU: Índo̱ nuʼthá ga̱jma̱a̱ numuu ñajunʼ rí kuaʼdáá náa xuajñuu Jeobá nandoo gáʼthúu̱n dí naʼni mámbáa dí ikháanʼ mu makuwáanʼ mbá kambáxulú náa congregación. Dí muʼni rígi̱ na̱nguá má eʼniuu náa eguwáʼ, á mu kuaʼdáá wéñuʼ o na̱nguá, tsíin ni̱ndxu̱ún bi̱ kúwá náa guʼwúlú, ga̱jma̱a̱ á mu ni̱jkua̱ o túʼgua mitsidanʼ escuela.
^ párr. 6 1 Tesalonicenses 2:6-8: “Na̱nguá ndiʼyáʼxu rí mbuyamajkuxu xa̱bu̱, asndu má ikháanʼla ni má náa eʼwíinʼ, maski ajndu ma̱ndoo má munda̱ʼa̱xu mbújkha̱a̱ numuu rí nindxu̱xu̱ apóstol ndrígóo Cristo. Rí phú ninixu, nini̱ndxu̱xu̱ʼ májánʼ a̱jkiu̱xuʼ náa ikháanʼla, xóo mbáa a̱ʼgu̱ bi̱ nañewu̱u̱n májánʼ e̱ji̱i̱n. Ikha jngó, numuu rí ninduxu ku̱ya̱la, ikháanʼxu raʼkháa i̱ndó ninduxu mutala ajngáa rí májánʼ rí na̱ʼkha̱ náa Dios, ma̱ngaa ninduxu makhañúxu ga̱jma̱á numala, numuu rí ni̱jkuánuxu ninduxu ku̱ya̱la wéñuʼ.”
^ párr. 15 1 Corintios 12:4-11: “Rígá mbaʼa enii rí ma̱ndoo muʼni, mú rígá mbóó espíritu; ga̱jma̱a̱ rígá mbaʼa enii ñajunʼ, mú xtáa mbáwíi Señor; ga̱jma̱a̱ rígá mbaʼa enii rí ma̱ndoo muʼni, mú nindxu̱u̱ ikháá má Dios bi̱ naʼni xúgíʼ náa xúgínʼ. Mú, mambáa nakhánáá xi̱ʼ kaʼwu mu mambáñún eʼwíinʼ. Bi̱ nakhánáá xi̱ʼ kaʼwu naʼni rí mbáa makro̱ʼo̱o̱ wéñuʼ, ikháá má xi̱ʼ rúʼko̱ naʼni rí imba̱a̱ majmañuu maʼthí májánʼ, xi̱ʼ má rúʼko̱ naʼni rí imba̱a̱ magiʼdoo fe, imba̱a̱ rí maʼni thanún eʼwíinʼ, imba̱a̱ mu maʼni milagru, imba̱a̱ mu maʼtáriyaʼ dí marigá nda̱wa̱á, imba̱a̱ mu mbaʼyoo á mu náa Dios e̱ʼkha̱ mbá ajngáa, imba̱a̱ mu majmañuu maʼthí imbo̱o̱ ajngáa ga̱jma̱a̱ imba̱a̱ maʼtájuíi ajngáa. Dios naxnúu xi̱ʼ kaʼwu mambáa xó má nandoo ikhaa mu maʼni mixtiʼkhu ñajunʼ rígi̱.”
^ párr. 20 Romanos 12:6-8: “Numuu rí mixtiʼkhu rí najmañulúʼ nuʼni xó má májánʼ wéñuʼ rí nikhánulú, á mu nindxu̱u̱ mbá kiʼtáriyaʼ, guʼtáriyaʼ xó má mba̱a̱ fe rí nikhánulú; o rí muʼtáraʼa, gakuwaanʼ ruʼtáraʼa; o bi̱ naʼsngáa, gaxtáa raʼsngáa; o bi̱ naʼtáñajunʼ, gaxtáa raʼtáñajunʼ; bi̱ naxnáraʼa, gáʼni ga̱jma̱a̱ xúgíʼ a̱jkiu̱u̱n; bi̱ kayá edxu̱u̱, gaʼni nacha̱; bi̱ nagáwiinʼ a̱jkiu̱u̱n kaʼñún eʼwíínʼ, gaʼni ga̱jma̱a̱ gagi.”
^ párr. 65 NAʼTHÍ NUMUU XTIʼKHU: Náa ajtsú xtiʼkhu nakujmaa ndiéjunʼ erigá nákha xóó tsériga reunión, índo̱ xtáa rarígá ga̱jma̱a̱ nda̱wa̱á dí nijngoo. Xtiʼkhu 1: Mbáa bi̱ kayá edxu̱u̱ naraxi̱i̱ májánʼ mbáa bi̱ na̱ʼkha̱, i̱mba̱ ndxájulú ndaʼyoo á mu nawáán májánʼ micrófono, imba̱a̱ ndxájulú a̱ʼgu̱ naʼtámijna ga̱jma̱a̱ mbáa ndxájulú nikhi̱i̱. Xtiʼkhu 2: Xúgínʼ nuxuxi ñawún xóo jiáma, wa̱ʼxa̱ʼ ga̱jma̱a̱ xabuanii mu muxna comentario náa nunigajmaa Bi̱ Nayejngoo. Xtiʼkhu 3: Xa̱bu̱ gajmii nuñambáá náa guʼwá nagimbáanʼ, mbáa bi̱ gíʼdaa a̱ʼdióo nambáyuuʼ marajkuáa mbújkha̱a̱ náa caja, mbáa dxámá naxná i̱yi̱i̱ʼ ga̱jma̱a̱ mbáa ndxájulú naxnúu tsiakii mbáa ndxájulú bi̱ nikhi̱i̱.
