Nguáná naʼni mingíjyúuʼ marmáʼán a̱jkiu̱lú dí najmañulú. Mú, narmáʼáan májánʼ a̱jkiu̱lú dí Jesús niʼsngúlú, numuu dí mbaʼa nuthu nijmuu xkri̱da, ikha jngóo nandoo nundxaʼwamíjna̱ dí ikhaa niʼthí. Ikháá má kayuuʼ, ma̱ndoo marmáʼán itháán a̱jkiu̱lú dí gajmañulú á mu nuʼnimi̱jna̱ mundxaʼwamíjná dí nuraxnuu. Xú káʼnii gándoo gúʼni rá. Rí muʼni dibujo índo̱ gúʼnigajmaa.

Xa̱bu̱ bi̱ nuni̱ dibujo ga̱jma̱a̱ numuu i̱ʼwáʼ rí nuxi̱ʼ dí najmañún, niguánú ndiyáá dí nambáñúún mu makru̱ʼu̱u̱n itháán májánʼ dí na̱ʼkha̱ raʼthí, ma̱ngaa nambáñúún makru̱ʼu̱u̱n rí gíʼdoo numuu dí kúwá rajmañún. Dibujo dí nuni̱ na̱nguá ma nindxu̱u̱ mingíjyúuʼ wéñuuʼ. Ga̱jma̱a̱ xa̱bu̱ bi̱ najmañún nuthi dí bi̱ nindxu̱ún xa̱bu̱ wanii ma̱ndoo mambáñún rí muni̱ dibujo.

Índo̱ gátanigajmaa, ma̱ndoo matani̱ dibujo ga̱jma̱a̱ numuu dí xtaa rajmañaaʼ. Mbáa asndu maʼniaaʼ tsiánguá índo̱ gátayaa rí narmáʼáan a̱jkia̱a̱nʼ dí nitanigajma̱a̱.