1. Ndiéjunʼ dí gíʼmaa muʼnilú xúgiáanʼ ga̱jma̱a̱ ndíjkha dí nguáná nindxu̱u̱ mingíjyúuʼ rá.

 XÚGÍʼ mbiʼi ndayóoʼ muraʼwi̱i̱ ndiéjunʼ gúʼni. Rígá má tikhu dí na̱nguá má mingíjyúuʼ, xóo ndiéjunʼ gúʼphu̱ miʼcha̱ o náá hora gúʼgua gúʼnuʼ. Mú rígá dí nindxu̱u̱ itháan mingíjyúuʼ. Mbá xkri̱da, ndiéjunʼ gúʼni mu xáʼniulú wéñuuʼ nandii, mu makuwáánʼ gagi o xóo gúʼni mu mbuʼyamajkuíí itháan Dios rá. Nandulúʼ dí xúgíʼ dí gúraʼwíí muʼni mambáyulú má ikháánʼ ga̱jma̱a̱ bi̱ kúwá náa guʼulúʼ, mú dí itháan nandulúʼ nindxu̱u̱ dí muʼni dí naniguuʼ Jeobá (Rom. 12:​1, 2).

2. Ndiéjunʼ gándoo gámbáyáaʼ mu matraʼwíí májánʼ dí matani̱ rá.

² Náa artículo rígi̱ mbuʼyáá mbá ajtsú enii dí ma̱ndoo mambáyáaʼ mu matraʼwi̱i̱ májánʼ dí matani̱: 1) Gajmañaaʼ xúgíʼ ga̱jma̱a̱ numuu dí nandaaʼ matani̱, 2) Atayáá ndiéjunʼ endxáʼwáminaʼ Jeobá ga̱jma̱a̱ numuu rúʼko̱, ga̱jma̱a̱ 3) matatsaʼwamínáʼ májánʼ ndiéjunʼ phú gátraʼwíí matani̱. Ma̱ngaa mbuʼyáá ndiéjunʼ gúʼni mu majmáanʼlú mundxaʼwamíjna̱ májánʼ (Prov. 2:11).

GAJMAÑAAʼ XÚGÍʼ GA̱JMA̱A̱ NUMUU DÍ NANDAAʼ MATANI̱

3. Aratá mbá xkri̱da, ndíjkha dí gíʼdoo numuu majmañaaʼ xúgíʼ nákha xóó tsétraʼwíí mbá dí matani̱ rá.

³ Timbá dí ndayóoʼ matani̱ mu matraʼwi̱i̱ májánʼ, nindxu̱u̱ dí mbaʼyóoʼ majmañaaʼ xúgíʼ ga̱jma̱a̱ numuu dí nandaaʼ matani. Ndíjkha dí gíʼdoo numuu rá. Gundxaʼwámíjná ga̱jma̱a̱ numuu mbáa xa̱bu̱ bi̱ na̱jkha̱ gáʼyoo médico numuu dí gíʼdoo mbá nandii mbiiʼ. Lá mbá nacha̱ gáraʼwíí médico xú káʼnii thana gáxnúu nákha xóó  tséʼyoo xóo phú xtáa o xóó tséʼniuu nimbá grajxe̱ xáʼ. Na̱nguá. Xúʼko̱ má kayuuʼ, ikháán ma̱ngaa ma̱ndoo matraʼwíí májánʼ dí matani̱ á mu ginii natayáá xúgíʼ xóo phú nindxu̱u̱ ga̱jma̱a̱ numuu dí nandaaʼ matani̱. Xú káʼnii gándoo matani̱ rá.

4. Xó má naʼthí náa Proverbios 18:​13, ndiéjunʼ gándoo gátani̱ mu majmañaaʼ xúgíʼ rí ndayóoʼ rá. (Atayáá ma̱ngaa xtiʼkhuu.)

⁴ Rí matani grajxe̱ ma̱ndoo mambáyáaʼ mu majmañaaʼ xúgíʼ dí ndayóoʼ. Mbá xkri̱da, atatsaʼwáminaʼ dí nutha̱nʼ mi̱dxu̱ʼ náa mbá convivio. Lá mi̱dxu̱ʼ rá.ʼ Á mu na̱nguá etatsuwiinʼ bi̱ phú niriyaʼ awan o á mu na̱nguá tayáá xú káʼnii awan niríyaʼ, ndayóoʼ matani̱i̱ grajxe̱ xóo rígi̱: “Náá mina̱a̱ʼ ga̱jma̱a̱ nguáná gáʼni convivio rá. Nguáthi̱i̱n xa̱bu̱ gágún rá. Tsáá gáyeʼga edxu̱u̱ rá. Tsáá gáʼga rá. Ndiéjunʼ gúni̱ xá. Lá marigá iya najnga̱a̱ ráʼ.” Xóo exti̱ʼña̱a̱ grajxe̱ rígi̱ mambáyáaʼ matraʼwi̱i̱ májánʼ dí matani̱ (atraxnuu Proverbios 18:13). a

5. Ndiéjunʼ gíʼmaa matani̱ nda̱wa̱á dí gátayaa xúgíʼ rígi̱ rá.

⁵ Índo̱ najmañaaʼ má xúgíʼ xóo gárígá, ikhú atatsaʼwáminaʼ xóo phú gárígá. Mbá xkri̱da, á mu natayáá dí náa ndxa̱a̱ rúʼko̱ makuwá xa̱bu̱ bi̱ na̱nguá enimbu̱ún ikha dí na̱ʼkha̱ náa Biblia o lá ndawa̱a̱ tsáá gáñewu̱u̱n mu muwa̱a̱n awa̱án iya najnga̱a̱ ráʼ. Lá migamíi dí náa ndxa̱a̱ rúʼko̱ marigá mbá dí asndu nánguá gúyáá dí gúni̱ xáʼ. (1 Ped. 4:3.) O ndiéjunʼ gátani̱  á mu mbaʼyóoʼ mandáti̱ga̱ʼ reunión o dí xándoo mi̱dxu̱ʼ gárataráʼa numuu dí mbaʼyóoʼ mi̱dxu̱ʼ ndxa̱a̱ rúʼko̱ rá. Dí ma̱ta̱ya̱a̱ xúgíʼ rígi̱, mambáyáaʼ matraʼwíí matani mbá rí májánʼ. Rúʼko̱ nindxu̱u̱ timbá dí ndayóoʼ matani̱ mú rígá itháan. Ikháán natayáá má ga̱jma̱a̱ numuu ndiéjunʼ gárígá, mú ndiéjunʼ endxa̱ʼwáminaʼ Jeobá rá. (Prov. 2:6.)

ATAYÁÁ NDIÉJUNʼ ENDXÁʼWÁMINAʼ JEOBÁ

6. Xó má eʼthí náa Santiago 1:​5, náá numuu dí gíʼmaa munda̱ʼa̱a̱ Jeobá dí mambáyulú rá.

⁶ Atanda̱ʼa̱a̱ Jeobá mambáyáaʼ makrua̱ʼa̱a̱ʼ ndiéjunʼ endxáʼwáminaʼ. Ikhaa nakudaminaʼ dí maxnún ku̱ma̱ mbá ‹xúgíinʼ ga̱jma̱a̱ xúgíʼ a̱jkiu̱u̱n ma̱ngaa xátanga̱a̱ maʼthí kikáá ga̱jma̱a̱ numuu rí naxná› (atraxnuu Santiago 1:5). Ku̱ma̱ rígi̱ mambáyulú makru̱ʼu̱lú á mu dí gúraʼwíí muʼni, manigu̱u̱ʼ ikhaa o na̱nguá.

7. Xú káʼnii gándoo ma̱ta̱ya̱a̱ xóo endxáʼwáminaʼ Jeobá rá. Atagíʼ mbá xkri̱da.

⁷ Nda̱wa̱á dí nitanda̱ʼa̱a̱ Jeobá maxnáaʼ ikha, atagíʼ ma̱ta̱ya̱a̱ xóo eriʼña̱a̱. Mbá xkri̱da. Á mu ikháán nadxuʼ náa mbá xuajen ga̱jma̱a̱ nindáti̱ga̱a̱n, mbáa maratha̱a̱n mambáyáaʼ mbáa bi̱ xtáa mijngii ikhí. Lá midxu̱u̱ má ikháán nákha xóó tséʼtháanʼ xáʼ. Rí phú matani̱ nindxu̱u̱ dí mataʼgíʼ májánʼ edxa̱a̱ʼ xúgíʼ dí gaʼthí mu ma̱ta̱ya̱a̱ xóo gídxúʼ. Ikháá má kayuuʼ, nda̱wa̱á dí niratháán Jeobá rí maxnáaʼ ku̱ma̱ ataniminaʼ mataʼyáʼ ikha náa Biblia dí nani mbríguíi ga̱jma̱a̱ xóo xtaa, mu “matadxawíín” xóo eriʼña̱a̱ Jeobá.  Gundxaʼwamíjna̱ mbu̱júu̱ ga̱jma̱a̱ numuu dí nithaanʼ midxu̱ʼ náa mbá ndxa̱a̱. Índo̱ xtaa matraʼwíí á mu mi̱dxu̱ʼ o na̱nguá, ma̱ndoo ma̱ta̱ya̱a̱ ndiéjunʼ eʼthí náa Biblia ga̱jma̱a̱ numuu ndxa̱a̱ náa tsíñewa̱a̱n dí eni̱, náa kúwá xa̱bu̱ bi̱ xúmbayáaʼ matani dí májánʼ ga̱jma̱a̱ ndíjkha dí gíʼdoo numuu matani ginii dí nandoo Jeobá ki xóo i̱ndó dí nandaaʼ ikháán rá. (Mat. 6:33; Rom. 13:13; 1 Cor. 15:33.)

8. Ndiéjunʼ gándoo gámbáyáaʼ mu mataxkamaa dí gátaʼyáʼ rá. (Atayáá ma̱ngaa xtiʼkhuu.)

⁸ Mbáa nguáná mbaʼyóoʼ mumbayáaʼ ma̱ta̱ya̱a̱ xúgíʼ dí gáʼyóoʼ mu mataxkamaa dí xtaa rataʼyáʼ. Mbáa ndxájulú xa̱biya̱ o a̱ʼgu̱ bi̱ najmañuu mbáa ma̱ndoo maʼtháanʼ dí ma̱ndoo mambáyáaʼ. Mú májánʼ má gáʼni dí ikháán mínaaʼ gátaʼyáʼ ma̱ngaa. Rígá mbaʼa wéñuuʼ dí ma̱ndoo mambáyáaʼ, xóo i̱yi̱i̱ʼ Ikha rí munigajmaa xa̱bi̱i̱ Jeobá ga̱jma̱a̱ libro Textos bíblicos para la vida cristiana. Garmáʼáan a̱jkia̱a̱nʼ dí ikháán nandaaʼ matraʼwíí matani̱ dí nanigu̱u̱ʼ Jeobá.

9. Xú káʼnii gúʼyáá dí manigu̱u̱ʼ Jeobá dí guraʼwi̱i̱ muʼni rá. (Efesios 5:17.)

⁹ Xú káʼnii gúʼyáá á mu dí gúraʼwi̱i̱ muʼni manigu̱u̱ʼ Jeobá rá. Ginii kayuuʼ ndayóoʼ dí muniʼníiʼlú májánʼ. Proverbios 9:10 naʼthí “rí ejmañaaʼ ga̱jma̱a̱ numuu bi̱ Mikaʼwii naʼni dí makrua̱ʼa̱a̱ʼ”. Rígi̱ eyoo gáʼthí dí mu makru̱ʼu̱lú májánʼ, ndayóoʼ muniʼniiʼ xóo nindxu̱u̱ Jeobá, dí nandoo maʼni ikhaa, dí naniguuʼ ga̱jma̱a̱ dí ikhaa tsénigu̱u̱ʼ. Atrajxi̱minaʼ: “Xúgi̱ dí naniʼníiʼ Jeobá, xú káʼnii gáraʼwíí ma̱ni̱ rí nanigu̱u̱ʼ ikhaa xá.” (Atraxnuu Efesios 5:17.)

10. Ndíjkha dí ikháanʼ eʼyáá rí itháán gíʼdoo numuu ikha dí na̱ʼkha̱ náa Biblia ki xóo dí nandún muni̱ bi̱ kúwá náa guʼwúlú o dí naguʼwún nuni̱ xa̱bu̱ xuajñulú rá.

¹⁰ Mu muʼni dí nanigu̱u̱ʼ Jeobá mbáa nguáná mbaʼyóoʼ dí xúʼni̱ dí nanigu̱u̱nʼ bi̱ kúwá náa guʼwúlú o bi̱ nambájxulú gajmiúlú. Mbá xkri̱da, mbáa kúwá xabuanii bi̱ nutsudaa wáxiu̱ún mbayáa mbáa bi̱ gíʼdoo mbújkha̱a̱ maski ajndu na̱nguá embájxu̱u̱ májánʼ ga̱jma̱a̱ Dios. Mbáa ikhiin i̱ndó nandún dí wáxiu̱ún maxtáa májánʼ dí xáʼyóoʼ nimbá. Mú, tsáá gámbáyúu mu mambájxu̱u̱ májánʼ ga̱jma̱a̱ Dios xá. Ndiéjunʼ endxáʼwáminaʼ Jeobá ga̱jma̱a̱ numuu rígi̱ rá. Nuxkamaa xóo exti̱ʼña̱a̱ náa Mateo 6:​33, náa naʼthúún cristianos dí “gíʼmaa mbuyáaʼ ginii Reino ndrígóo Dios”. Maski ajndu nduʼyamajkhuíí anu̱lú ga̱jma̱a̱ rudulú o mangiin xa̱bu̱ xuajñulú, mú ikháanʼ nduʼyáá dí itháan gíʼdoo numuu dí muʼni rí Jeobá maxtáa gagi.

ATATSAʼWÁMINAʼ MÁJÁNʼ NDIÉJUNʼ PHÚ GÁTRAʼWÍÍ MATANI̱

11. Xó má eʼthí náa Filipenses 1:​9, 10, ndiéjunʼ gámbáyáaʼ mu matraʼwi̱i̱ májánʼ dí matani̱ rá.

¹¹ Nda̱wa̱á dí nitraxnuu ikha dí na̱ʼkha̱ náa Biblia ga̱jma̱a̱ numuu dí nandaaʼ matraʼwíí matani̱, gíʼmaa matatsaʼwamínáʼ mu makrua̱ʼa̱a̱ʼ ma̱ta̱ya̱a̱ ndiéjunʼ dí gátraʼwíí matani̱ (atraxnuu Filipenses 1:​9, 10). Xú káʼnii gátani̱ rúʼko̱ rá. Atatsaʼwáminaʼ májánʼ mu ma̱ta̱ya̱a̱ ndiéjunʼ gárígá á mu natraʼwíí matani mámbá dí xtaa ratatsaʼwáminaʼ matani. Nguáná rígá dí ra̱mingíjyúuʼ muraʼwi̱i̱ muʼni, mú nguáná rígá dí tséʼyáá phú ndiéjunʼ gúʼni mu magajnúu májánʼ. Mú, dí matatsaʼwamínáʼ májánʼ mambáyáaʼ matraʼwi̱i̱ májánʼ dí matani̱ maski ajndu nindxu̱u̱ mingíjyúuʼ wéñuuʼ.

12, 13. Xú káʼnii gámbáyáaʼ rí matatsaʼwamínáʼ májánʼ mu matraʼwíí májánʼ ñajunʼ rá.

¹² Atatsaʼwáminaʼ ga̱jma̱a̱ numuu rígi̱. Xtaa ratayáaʼ mbá ñajunʼ mu maraxnu̱u̱n dí nda̱ñúunʼ bi̱ kúwá náa guʼwáaʼ ga̱jma̱a̱ nataxkamaa a̱jma̱ enii ñajunʼ. Natatsaʼwáminaʼ xúgíʼ ga̱jma̱a̱ numuu ñajunʼ rí gátraʼwíí, ndiéjunʼ gátani̱ náa ñajunʼ, náá hora gátiejunʼ, nguáthá mitsínguánʼ ga̱jma̱a̱ natatsaʼwáminaʼ i̱ʼwáʼ grajxe̱. Ñajunʼ rígi̱ na̱nguá má enújngo rámuuʼ dí na̱ʼkha̱ raʼthí náa Biblia. Mbáa matraʼwi̱i̱ matani dí itháan nanigua̱a̱ʼ o numuu dí muni̱ numaaʼ itháan. Mú rígá i̱ʼwáʼ dí gíʼmaa ma̱ta̱ya̱a̱ nákha xóó tsétraʼwíí dí matani.

 ¹³ Mbá xkri̱da, lá maʼni dí náa mbá ñajunʼ rúʼko̱ matatsiʼñáánʼ ra̱dxu̱ʼ tikhu reunión ráʼ. Lá maʼni dí xáguapháán matambáñún bi̱ kúwá náa guʼwáaʼ mu makuwá tsímáá ga̱jma̱a̱ gagi ma̱ngaa rí mambájxu̱u̱n gajmiún Dios xáʼ. Dí matrajximínaʼ rígi̱ mambáyáaʼ ma̱ta̱ya̱a̱ ndiéjunʼ dí itháan gíʼdoo numuu, xóo muʼthá, dí matani ñajuunʼ Jeobá ga̱jma̱a̱ dí ma̱ta̱ya̱a̱ ndiéjunʼ eñúnʼ bi̱ kúwá náa guʼwáaʼ ki xóo dí makánaʼ itháan mbújkha̱a̱. Ikhú ma̱ndoo matraʼwi̱i̱ mbá dí májánʼ matani dí Jeobá maʼni tsajkurámuuʼ.

14. Xú káʼnii gambáyulúʼ dí mundxaʼwamíjná májánʼ ma̱ngaa dí maʼndulú kuʼñúún eʼwíinʼ mu xúʼni̱ dí maʼni majngrádiinʼ xá.

¹⁴ Dí mundxaʼwamíjna̱ májánʼ mambáyúlú mbuʼyáá ndiéjunʼ gakumu̱ún eʼwíinʼ ga̱jma̱a̱ numuu dí guraʼwi̱i̱ muʼnilú, mu xúʼko̱ xúʼni̱ “dí majngrádiinʼ eʼwíinʼ” (Filip. 1:10). Rígi̱ gíʼdoo wéñuuʼ numuu xóo índo̱ nuraʼwi̱i̱ xtíin dí guʼgíiʼ ga̱jma̱a̱ xóo guʼni ratamijnálú. Mbá xkri̱da, mbáa rígá tikhu dí ikháanʼ nanigulúʼ. Mú ndiéjunʼ gúʼni á mu dí ikháanʼ nanigulúʼ naʼni  gawúunʼ ku̱ma̱ ndrígu̱ún eʼwíinʼ, tséʼniuu á mu kúwá o na̱nguá kúwá náa congregación rá. Dí mundxaʼwamíjna̱ wapháá mambáyulúʼ mbuʼyamajkuíí xóo ku̱mu̱ún. Ga̱jma̱a̱ rí nandulúʼ kuʼñúún mambáyulúʼ mbuʼyáʼ dí mambáñún “eʼwíinʼ” ma̱ngaa dí manindxu̱lú xa̱bu̱ guabaaʼ (1 Cor. 10:​23, 24, 32; 1 Tim. 2:​9, 10). Xúʼko̱ guraʼwi̱i̱ muʼni mbá dí masngájma dí nandulúʼ kuʼñúún ga̱jma̱a̱ nduʼyamajkhún eʼwíinʼ.

15. Ndiéjunʼ gíʼmaa matatsaʼwamínáʼ wapháá nákha xóó tsétani mbá dí gíʼdoo numuu rá.

¹⁵ Á mu dí matraʼwi̱i̱ matani̱ nindxu̱u̱ mbá dí gíʼdoo wéñuuʼ numuu, atatsaʼwáminaʼ náa xúgíʼ dí ndayóoʼ matani mu matanimbánii. Jesús niʼsngúlúʼ dí gíʼmaa mbuʼyáá “nguáthá mba̱a̱ mbújkha̱a̱ gáraʼaa” (Luc. 14:28). Ikha jngóo atatsaʼwáminaʼ ga̱jma̱a̱ numuu mbiʼi, mbújkha̱a̱ ga̱jma̱a̱ tsiaki̱i̱ dí gáʼyóoʼ matani mu matanimbánii dí nitagíminaʼ. Nguáná, ndayóoʼ maratamíjná gajmiáanʼ bi̱ kúwá náa guʼwáaʼ mu ma̱ta̱ya̱a̱ ndiéjunʼ gándoo muni̱ ikhiin mu muñambáá náa nitraʼwíí matani. Ndíjkha dí gíʼdoo wéñuuʼ numuu matani̱ xúʼko̱ rá. Numuu dí mbáa marigá dí ikhiin mbuyáá dí mbaʼyóoʼ matriʼkui̱i̱ tikhu dí matani o marigá mbá dí itháan májánʼ xóo matani. Ma̱ngaa, á mu natrajxu̱u̱n xóo endxaʼwamíjna̱ bi̱ xtañún o natadxawíín dí ikhiin nutha̱a̱nʼ, makuwá itháan xawii mumbayáaʼ mu xúʼko̱ magajnúu itháan májánʼ dí gátraʼwi̱i̱ matani (Prov. 15:22).

ATRAʼWÍÍ MATANI DÍ MAGAJNÚU MÁJÁNʼ

16. Ndiéjunʼ gíʼmaa matani̱ mu magajnúu májánʼ dí gátraʼwíí rá. (Atayáá ma̱ngaa kúgumaʼá “ Xóo ma̱ndoo matraʼwi̱i̱ májánʼ dí matani̱”.)

¹⁶ Á mu natani̱ xúgíʼ dí ni̱ʼkha̱ raʼthí gi̱i̱, xtaa xawii matraʼwi̱i̱ matani̱ mbá dí májánʼ. Rí xúgi̱ ikháán najmañaaʼ má xúgíʼ ga̱jma̱a̱ numuu dí nandaaʼ matani ma̱ngaa nitaʼyáʼ ikha náa mambáyáaʼ matani dí nanigu̱u̱ʼ Jeobá. Rí xúgi̱ rá, ma̱ndoo maratha̱a̱n Jeobá mambáyáaʼ mu magajnúu májánʼ xúgíʼ.

17. Ndiéjunʼ gámbáyáaʼ matraʼwíí májánʼ dí matani rá.

¹⁷ Mbáa mbaʼa dí nitani̱ nákha ginii nigájnuu má májánʼ. Maski ajndu xúʼko̱, garmáʼáan a̱jkia̱a̱nʼ dí ku̱ma̱ dí na̱ʼkha̱ náa Jeobá mambáyáaʼ matraʼwi̱i̱ matani dí májánʼ raʼkháa dí xóo natatsaʼwáminaʼ ikháán o dí najmañaaʼ ikháán. I̱ndó Jeobá ma̱ndoo mambáyáaʼ maʼni rí gajkhun majmañaaʼ, makrua̱ʼa̱a̱ʼ ga̱jma̱a̱ dí matatsaʼwamínáʼ májánʼ, rígi̱ gíʼdoo wéñuuʼ numuu mu maraʼdáá ku̱ma̱ (Prov. 2:​1-5). Xúʼko̱ kaʼnii, Jeobá ma̱ndoo mambáyáaʼ matraʼwíí matani̱ dí naniguuʼ ikhaa (Sal. 23:​2, 3).