ARTÍCULO RÍ MUʼNIGAJMAA 1
AJMÚÚ 2 Ikháán mbiʼyaaʼ Jeobá
Gu̱ʼni̱ mba̱a̱ Jeobá
TEXTO RÍ KAʼYOO TSIGUʼ 2025: “Gu̱ni̱ mba̱a̱ mbiʼyuu Jeobá xó má kaʼyoo” (SAL. 96:8).
EDXU̱U̱
Mbuʼyáá xóo ma̱ndoo muʼni mba̱a̱ Jeobá xó má kaʼyoo.
1. Ndiéjunʼ dí itháán naxmiéjúnʼ muni̱ xa̱bu̱ dí mbiʼi xúgi̱ rá.
DÍ MBI’I xúgi̱ mbaʼin xa̱bu̱ i̱ndó naxmiéjúúnʼ kuyamijná ikhiin. Mbá xkri̱da, kúwá tikhuun bi̱ najmún Internet mu musngajmúún xúgíinʼ rí eni̱ ga̱jma̱a̱ dí naʼngu̱u̱n nuni̱. Mú, káaʼ nguéjmi̱i̱n bi̱ nuni̱ mba̱a̱ Jeobá Dios. Náa artículo rígi̱ mbuʼyáá ndiéjunʼ eyoo gáʼthúu̱n dí matani̱ mba̱a̱ Jeobá ga̱jma̱a̱ ndíjkha dí gíʼmaa muʼni mba̱a̱ ikhaa. Ma̱ngaa mbuʼyáá xú káʼnii gúʼni̱ mba̱a̱ Dios xó má kaʼyoo ga̱jma̱a̱ mbuʼyáá xú káʼnii ikhaa ginuu má maʼni mba̱a̱ mbiʼyuu.
NDIÉJUNʼ EYOO GÁʼTHÚU̱N DÍ MU̱ʼNI̱ MBA̱A̱ JEOBÁ RÁ.
2. Xú káʼnii nisngájma Jeobá nguáthá mba̱a̱ tsiaki̱i̱ gíʼdoo náa kúbá Sinaí rá. (Atayáá ma̱ngaa xtiʼkhuu.)
2 Náa Biblia naʼthí dí Jeobá nindxu̱u̱ mbáa Dios bi̱ ra̱ʼkhá tháán mba̱a̱. Nguáthá mbiʼi nda̱wa̱á dí bi̱ israelitas niguma káwíin náa Egipto, nisngájmúún dí nindxu̱u̱ mbáa Dios bi̱ ra̱ʼkhá tháán mba̱a̱. Gundxaʼwamíjna̱ dí nirígá: Mbaʼin israelita nigimbíin náa mijngii kúbá Sinaí mu mudxawíín dí gáʼthí Dios. Mbá du̱u̱n skuniʼ narugoo kúbá, ikhú naʼxma ga̱jma̱a̱ náa kúbá nagájnuu mbá gúní, naxpíbínʼ, narmidá a̱jkhu̱u̱n ga̱jma̱a̱ nawáán gakhi̱i̱ wéñuuʼ aʼwóo chi̱ji̱ʼ (Éx. 19:16-18; 24:17; Sal. 68:8). Mbáa israelitas ra̱ʼkhá tháán niguanún tsiánguá ga̱jma̱a̱ numuu dí Jeobá nisngájma dí gíʼdoo wéñuuʼ tsiaki̱i̱.
Náa kúbá Sinaí, Jeobá nisngájmúún israelitas nguáthá mba̱a̱ tsiaki̱i̱ gíʼdoo. (Atayáá kutriga̱ 2).
3. Xú káʼnii gándoo muʼni mba̱a̱ Jeobá rá.
3 Ikháánʼlú ma̱ngaa ma̱ndoo mu̱ʼni̱ mba̱a̱ Jeobá índo̱ nuʼthúún eʼwíinʼ xa̱bu̱ ga̱jma̱a̱ numuu tsiaki̱i̱ dí ikhaa gíʼdoo ga̱jma̱a̱ xóo nindxu̱u̱. Ma̱ngaa nuʼni mba̱a̱ índo̱ nuxnáá gamajkhu índo̱ rígá dí najmáan’ nuʼni ga̱jma̱a̱ numuu tsiaki̱i̱ ndrígóo (Is. 26:12). Rey David nigíʼ mbá májánʼ xkri̱da índo̱ ikhaa niʼtájkáan náa inún mbaʼin xa̱bu̱ Israel, ikhaa niʼthí: “Ikháán ndrígáaʼ Tátá Jeobá, dí mba̱ʼu̱, tsiaki̱i̱, rí mitsiʼyá, gamajkhu ga̱jma̱a̱ rí naxpíbínʼ, numuu dí ndrígáaʼ ikháán mbá xúgíʼ dí rígá náa mekhu ga̱jma̱a̱ náa ku̱ba̱ʼ”. Índo̱ niguámbóo niʼtájkáan, “ikhú mbá xúgíinʼ xa̱bu̱ xuajin nini̱ mba̱a̱ Jeobá” (1 Crón. 29:11, 20).
4. Xú káʼnii niʼni Jesús mu maʼni mba̱a̱ Jeobá rá.
4 Índo̱ Jesús nixtáa náa tsu̱du̱u̱ Ku̱ba̱ʼ mbaʼa enii xóo niʼni mba̱a̱ Anu̱u̱. Mbá xkri̱da, mámbá índo̱ niʼni milagro niʼthí dí najmuu tsiaki̱i̱ ndrígóo Jeobá (Mar. 5:18-20). Ma̱ngaa niʼni mba̱a̱ ga̱jma̱a̱ dí xóo niʼthí ma̱ngaa dí xóo niʼniún eʼwíinʼ. Mbá miʼtsú, Jesús nixtáa raʼsngáa náa guʼwá rí nduyamajkuíí Dios, ikhí ma̱ngaa nixtáa mbáa a̱ʼgu̱ bi̱ naʼni má mbá 18 tsiguʼ rí gíʼdaa giñán xkawi̱i̱ʼ (giñán guéen). Ga̱jma̱a̱ numuu xa̱bu̱ wéñiiʼ buʼko̱ ra̱ʼkhá tháán ni̱ʼkha̱ ndi̱jtsu̱u̱ dí nánguá eyoo mawi̱ji̱ jmbu, ra̱ʼkhá tháán niʼni mamínuuʼ. Índo̱ Jesús ndiʼyoo, nigáwi̱i̱nʼ a̱jkiu̱u̱n kaʼyoo ga̱jma̱a̱ niʼthúu̱n: “Náná, gaʼni̱i̱ a̱jkia̱a̱nʼ ga̱jma̱a̱ nandii rí xtaʼdáá. Ikhú nixkrámáaʼ ga̱jma̱a̱ núkhu niwi̱ji̱i̱ jmbu a̱ʼgu̱, ikhú nigíʼdu̱u̱ nixnáa núma̱aʼ Dios” (Luc. 13:10-13). A̱ʼgu̱ bugi̱ niʼni̱i̱ a̱jkiu̱u̱n, ikha jngóo ni’ni mba̱a̱ Jeobá; ikháánʼlú ma̱ngaa kuaʼdáá mbaʼa numuu mu muʼni mba̱a̱ Jeobá.
NÁÁ NUMUU DÍ NUʼNI MBA̱A̱ JEOBÁ RÁ.
5. Náá numuu nduʼyamajkuíí Jeobá rá.
5 Nuʼni mba̱a̱ Jeobá numuu dí nduʼyamajkuíí wéñuuʼ. Rígá mbaʼa numuu mu mbuʼyamajkuíí. Jeobá gíʼdoo xúgíʼ tsiaki̱i̱; ga̱jma̱a̱ tsiaki̱i̱ ndrígóo nditháan tsétumuu (Sal. 96:4-7). Náa xúgíʼ dí niʼniwíi nakujmaa dí najmañuu wéñuuʼ. Ikhaa niʼni makuwáánʼ ga̱jma̱a̱ naxnúlú rí ndayúlú mu makuwáánʼ má xúʼko̱ (Apoc. 4:11). Ikhaa nindxu̱u̱ jmbii (Apoc. 15:4). Nagájnuu májánʼ náa xúgíʼ dí naʼni ma̱ngaa naʼnimbánuu rí nakudaminaʼ maʼni (Jos. 23:14). Ikha jngóo profeta Jeremías niʼthúu̱n: “Náa xúgíinʼ xa̱bu̱ bi̱ najmañún bi̱ kúwá náa xúgíʼ xuajin, ndawa̱a̱ i̱mba̱a̱ xóo ikháán” (Jer. 10:6, 7). Nakujmaa dí rígá mbaʼa numuu mu mbuʼyamajkuíí Anu̱lú bi̱ xtáa mekhuíí. Mú, raʼkháa i̱ndó kaʼyoo dí mbuʼyamajkuíí, ma̱ngaa kaʼyoo dí maʼndulú kuʼyáá.
6. Náá numuu dí nandulúʼ kuʼyáá Jeobá rá.
6 Nuʼni mba̱a̱ Jeobá numuu dí nandulúʼ kuʼyáá ga̱jma̱a̱ xúgíʼ a̱jkiu̱lú. Rígá mbaʼa rí xóo nindxu̱u̱ Jeobá dí naʼni maʼndulú kuʼyáá. Mbá xkri̱da, nagáwíinʼ a̱jkiu̱u̱n ga̱jma̱a̱ naʼngo̱o̱ a̱jkiu̱u̱n (Sal. 103:13; Is. 49:15). Índo̱ numíníiʼ, ikhaa nakro̱ʼo̱o̱ kaʼyulú ga̱jma̱a̱ nagawúunʼ ma̱ngaa (Zac. 2:8). Nambáyulú muʼgua kanuu náa ikhaa ga̱jma̱a̱ mambájxulú gajmiúlú (Sal. 25:14; Hech. 17:27). Ma̱ngaa, tséʼnimbaminaʼ ga̱jma̱a̱ “naginduti̱ga̱ mu mbaʼyoo mekhu ga̱jma̱a̱ ku̱ba̱ʼ, mu makuxi̱i̱ xa̱bu̱ guabaaʼ náa yujndaʼ” (Sal. 113:6, 7). Tsáá lá tsíyoo maʼni mba̱a̱ Dios bi̱ ra̱ʼkhá tháán májáanʼ rá. (Sal. 86:12.)
7. Ndiéjunʼ dí ma̱ndoo muʼni rá.
7 Nuʼni mba̱a̱ Jeobá numuu rí nandulúʼ dí xa̱bu̱ muniʼniiʼ. Mbaʼin xa̱bu̱ nundxaʼwamíjna̱ dí raʼkhí ga̱jma̱a̱ numuu Dios, numuu dí Gixa̱a̱ niʼni majuiʼthá dí minduwaʼ ga̱jma̱a̱ numuu ma̱ngaa nirugoo ku̱ma̱ ndrígu̱ún (2 Cor. 4:4). Niʼni makujmaa dí Jeobá nakiʼnáa ga̱jma̱a̱ rí tséxmiéjuun kaʼyulú ma̱ngaa dí ikhaa gíʼdoo aʼkhúun rí narígá dí raʼkhí náa numbaaʼ. Mú ikháánʼlú nduʼyáá ndiéjunʼ nindxu̱u̱ gajkhun. Ma̱ndoo mumbáñún xa̱bu̱ mbuyáá xóo phú nindxu̱u̱ Dios ndrígúlú, mu xúʼko̱ mu̱ni̱ mba̱a̱ (Is. 43:10). Rí xúgi̱ mbuʼyáá tikhu versículos ndrígóo Salmo 96, náa naguma mba̱a̱ Jeobá. Rígi̱ mambáyulú mbuʼyáá xóo gándoo muʼni mba̱a̱ Dios xó má kaʼyoo.
XÚ KÁʼNII GÁNDOO MUʼNI MBA̱A̱ JEOBÁ XÓ MÁ KAʼYOO RÁ.
8. Ndiéjunʼ nindxu̱u̱ mbá rí ma̱ndoo muʼni mu muʼni mba̱a̱ Jeobá rá. (Salmo 96:1-3.)
8 (Atraxnuu Salmo 96:1-3). a Ma̱ndoo muʼni mba̱a̱ Jeobá ga̱jma̱a̱ numuu rí nuʼthá numuu ikhaa. Náa versículos rígi̱ najuiʼthúún xa̱bi̱i̱ Dios dí muni̱ mba̱a̱ Jeobá, muʼni tsajkurámaaʼ mbiʼyuu, muthi ajngáa dí májánʼ dí xóo niʼni káwíin ga̱jma̱a̱ muni̱ mba̱a̱ náa majñu̱únʼ xa̱bu̱ xuajin. Xúgíʼ rúʼko̱ nindxu̱u̱ xóo ma̱ndoo muʼni mba̱a̱ Anu̱lú bi̱ xtáa mekhuíí. Xó má judíos bi̱ niguájun jmbu ga̱jma̱a̱ cristianos bi̱ nikúwá nákha siglo timbá, nini xó má niʼngo̱o̱ dí mutambáyii mbiʼyuu Jeobá ga̱jma̱a̱ nithi dí májánʼ rí Dios niʼni ga̱jma̱á nindxu̱ún ikhiin (Dan. 3:16-18; Hech. 4:29). Xú káʼnii gúʼyaridúún xá.
9, 10. Ndiéjunʼ ejmañaaʼ náa xkri̱da ndrígóo Angelina rá. (Atayáá ma̱ngaa xtiʼkhuu.)
9 Guʼyáá xkridoo Angelina b mbáa ndxájulú bi̱ xtáa náa Estados Unidos. Ikhaa támíñúu ga̱jma̱a̱ niʼtambáyúu mbiʼyuu Jeobá náa nañajunʼ. Numuu dí ndiʼkhú nito̱ʼo̱o̱ mañajunʼ ikha jngóo nitháán maʼga̱ náa nagimbíi̱n xúgíinʼ bi̱ ndiʼkhú nitu̱ʼu̱u̱n muñajunʼ mu muthi ga̱jma̱a̱ numún, mu xúʼko̱ eʼwíinʼ muniʼnúnʼ itháan májánʼ. Ikhaa niʼniratoo dí maʼthí ga̱jma̱a̱ tikhu foto mu masngájma dí nadxuu a̱jkiu̱u̱n dí xtáa raʼni ñajuunʼ Jeobá. Mú, ginii niʼthí mbáa xabiya bi̱ nañajunʼ ga̱jma̱a̱, dí ikhaa nigaja̱a̱ xóo xa̱bi̱i̱ Jeobá mú nigíʼdu̱u̱ niʼthí dí raʼkhí ga̱jma̱a̱ numuu rí nuʼsngáa. Angelina naʼthí: “Niku̱mu̱ʼ dí a̱jkiu̱nʼ nikijxi̱i̱. Mú, nirajximínáʼ: ‹Lá maniʼñúuʼ dí mbáa maʼthí dí mindu̱wa̱ʼ ga̱jma̱a̱ numuu Jeobá ráʼ. O matambáyúu dxe̱ʼ.›”
10 Índo̱ bi̱ nañajunʼ ga̱jma̱a̱ niguámbóo raʼthí, ikhú Angelina niʼtájkáan mañúú. Nda̱wa̱á niʼthí ga̱jma̱a̱ ajngáa gamajkhu, niʼthúu̱n: “Ikhaa má xóo ikháán, ikhúún ma̱ngaa nigaju̱u̱n xóo xa̱bi̱i̱ Jeobá ga̱jma̱a̱ kaʼníí má nindxu̱ʼ xóó”. Nikujmaa dí niʼni makiʼnáa, mú Angelina na̱nguá nikiʼnáa. Ikhú ginii nisngájma tikhu foto dí mitsaanʼ náa nakujmaa mixtiʼkhu enii xóo eʼni ñajuunʼ Dios, nda̱wa̱á niʼtámbáyúu ga̱jma̱a̱ gamajkhu dí ikhaa xtáa rajmañuu (1 Ped. 3:15). Índo̱ ikhaa niguámbóo niʼthí, ikhú bi̱ nañajunʼ ga̱jma̱a̱ nánguá nikiʼnáa, asndu ni̱jkha̱nú niʼthí dí rígá mbaʼa dí mitsaanʼ rí narmáʼáan a̱jkiu̱u̱n nákha ikhaa nigaja̱a̱ xóo xa̱bi̱i̱ Jeobá. Angelina naʼthí: “Jeobá kaʼyoo dí muʼtámbáyii mbiʼyuu. Rúʼko̱ nindxu̱u̱ mbá dí mitsaanʼ wéñuuʼ”. Ikháanʼlú ma̱ngaa nduʼyáá dí ra̱ʼkhá tháán mitsaanʼ rí muʼni mba̱a̱ mbiʼyuu Jeobá ga̱jma̱a̱ dí mbuʼyamajkuíí maski ajndu eʼwíinʼ nuthi dí raʼkhí ga̱jma̱a̱ numuu.
Ma̱ndoo muʼni mba̱a̱ Jeobá ga̱jma̱a̱ dí nuʼthá (Atayáá kutriga̱ 9, 10). f
11. Xú káʼnii nini xa̱bi̱i̱ Dios náa xúgíʼ tsiguʼ dí nirígá mu nunimbáníí rí naʼthí náa Salmo 96:8 rá.
11 (Atraxnuu Salmo 96:8). c Ma̱ndoo muʼni mba̱a̱ Jeobá ga̱jma̱a̱ dí kuaʼdáálú rí gíʼdoo wéñuuʼ numuu. Asndu nákha wajyúuʼ xígi̱ kaʼnii nini mba̱a̱ Jeobá bi̱ gajkhun nindxu̱ún xa̱bi̱i̱ (Prov. 3:9). Mbá xkri̱da, israelitas nixna mbújkha̱a̱ mu maguma ga̱jma̱a̱ maxtiewa̱a̱n templo (2 Rey. 12:4, 5; 1 Crón. 29:3-9). Tikhuun xa̱bi̱i̱ Jesús nijmún “dí guaʼdáá” mu muni̱ mbaʼwi̱i̱ ikhaa ga̱jma̱a̱ apóstoles (Luc. 8:1-3). Nákha siglo timbá, cristianos nixunguaʼ mbújkha̱a̱ mu mumbañún náa nda̱ñúunʼ a̱ngiu̱ún bi̱ nuni̱ ñajuunʼ Dios (Hech. 11:27-29). Rí mbiʼi xúgi̱ ma̱ngaa ma̱ndoo muʼni mba̱a̱ Jeobá índo̱ nuxná mbújkha̱a̱ dí nagájnuu náa a̱jkiu̱lú.
12. Xú káʼnii eʼni mba̱a̱ Jeobá ga̱jma̱a̱ mbújkha̱a̱ dí nuxná rá. (Atayáá ma̱ngaa xtiʼkhuu.)
12 Guʼyáá mbá xkri̱da náa nasngájma rí nuʼni mba̱a̱ Jeobá ga̱jma̱a̱ mbújkha̱a̱ dí nuxná. Nákha tsiguʼ 2020, ga̱jma̱a̱ numuu dí mbayuuʼ na̱nguá nixnúu ruʼwa náa Zimbabue, mbaʼin xa̱bu̱ nigíʼ makhañún. Mbáa dí ikhaa ninindxu̱u̱ ndxájulú a̱ʼgu̱ bi̱ mbiʼyuu Prisca. Maski ajndu nirígá ewiʼ, ikhaa tániñuuʼ raʼtáraʼa mámbá miércoles ga̱jma̱a̱ viernes, maski ajndu ni̱jkha̱nú má gu̱nʼ dí ndiyóoʼ muñajunʼ. Xa̱bu̱ bi̱ nikúwá náa mijngii xtáa, nitsijmaa numuu dí naʼtáraʼa raʼkháa na̱jkha̱ gáñajunʼ, ga̱jma̱a̱ nitháán: “¡Makhañáaʼ gáʼni ewiʼ!”. Mú, ikhaa nariʼña̱a̱ ga̱jma̱a̱ xúgíʼ a̱jkiu̱u̱n: “Jeobá nditháan na̱nguá eniñúún xa̱bi̱i̱”. Nguáthá mbayuʼ nda̱wa̱á, xuajñuu Jeobá nindoo nimbáyúu Prisca ga̱jma̱a̱ eʼwíinʼ ga̱jma̱a̱ numuu mbújkha̱a̱ dí nuxná. Tikhuun bi̱ kúwá náa mijngii xtáa, niguanún tsiánguá ga̱jma̱a̱ nitháán: “Dios nditháan tániñáánʼ. Nanduxuʼ mbuya̱a̱ itháan ga̱jma̱a̱ numuu ikhaa”. Ga̱jma̱a̱ mbá juwiin dí ikhiin nigi̱ʼdi̱i̱ nigún reunión.
Ma̱ndoo muʼni mba̱a̱ Jeobá ga̱jma̱a̱ dí gíʼdoo numuu dí kuaʼdáálú. (Atayáá kutriga̱ 12). g
13. Xó má naʼthí náa Salmo 96:9, ndiéjunʼ gáʼyóoʼ muʼni mu muʼni mba̱a̱ Jeobá rá.
13 (Atraxnuu Salmo 96:9). d Ma̱ndoo muʼni mba̱a̱ Jeobá ga̱jma̱a̱ dí xóo nuʼnilú. Ndxajkuun ndrígióo Jeobá ndiyóoʼ dí maʼni mikaʼwiin índo̱ nuni̱ ñajuunʼ náa guʼwá xtíin dí ndiyamajkuíí ikhaa ga̱jma̱a̱ náa templo (Éx. 40:30-32). Ikháánʼlú ma̱ngaa ndayóoʼ maʼni mikaʼwáánʼ dí mbájníí, mú dí itháan gíʼdoo numuu nindxu̱u̱ dí muniʼñááʼ rundxa̱ʼwámi̱jna̱ dí raʼkhí ga̱jma̱a̱ muniʼñááʼ ru̱ʼni̱ dí Jeobá tsénigu̱u̱ʼ (Sal. 24:3, 4; 1 Ped. 1:15, 16). Gíʼmaa muʼni xúgíʼ xó má eʼngo̱o̱ mu “muriʼkhu̱u̱ xóo xa̱bu̱ nindxu̱lú” mu “manindxu̱lú xóo imba̱a̱ nuxi̱i̱ʼ xa̱bu̱”. Xóo muʼthá, dí muniʼñááʼ rundxaʼwamijná dí raʼkhí ga̱jma̱a̱ xúʼni̱ dí ikhaa tsénigu̱u̱ʼ. Dí phú gíʼmaa muʼni nindxu̱u̱ dí mundxaʼwamíjná ga̱jma̱a̱ muʼni rí masngajmá dí nduʼyaridáá xóo májáanʼ xa̱bu̱ nindxu̱u̱ Jeobá (Col. 3:9, 10). Dios má nambáñúún asndu xa̱bu̱ bi̱ nixudami̱jna̱ aʼkhá ga̱jma̱a̱ bi̱ nini dí raʼkhí wéñuuʼ mu muriʼkumijná mu mani̱ndxu̱ún asndu xóo imba̱a̱ nuxi̱i̱ʼ xa̱bu̱.
14. Ndiéjunʼ eʼsngáaʼ náa xkri̱da ndrígóo Jack rá. (Atayáá ma̱ngaa xtiʼkhuu.)
14 Guʼyáá ga̱jma̱a̱ numuu Jack, mbáa xa̱biya̱ bi̱ najmangu̱u̱ʼ ga̱jma̱a̱ ra̱májánʼ kayuuʼ dí asndu nutháán xa̱bu̱ wéñiiʼ. Ga̱jma̱a̱ numuu xúgíʼ dí niʼni, índo̱ ninimbánii ga̱jma̱a̱ numuu nithi dí kaʼyoo makhañúu. Mú, índo̱ xtáa ragi̱ʼtu̱u̱n maʼga̱nú mbiʼi dí muxiyáa, nigruigú maʼniga̱jma̱a̱ Biblia ga̱jma̱a̱ ndxájulú bi̱ na̱jkha̱ raʼñún xa̱bu̱ náa guʼwá e̱jua̱nʼ. Maski ajndu ra̱ʼkhá tháán raʼkhí niʼni Jack nákha ginii, mú niriʼkuminaʼ, nda̱wa̱á nijngúun iyááʼ mu mani̱ndxu̱u̱ xa̱bi̱i̱ Jeobá. Ra̱ʼkhá tháán niriʼkuminaʼ dí índo̱ ni̱jkha̱nú mbiʼi makhañúu tikhuun bi̱ nuñewa̱a̱n guʼwá e̱jua̱nʼ asndu nimbiyaʼ nitagawíí. Bi̱ phú kayá edxu̱u̱ náa guʼwá e̱jua̱nʼ niʼthí: “Nákha ginii, Jack ninindxu̱u̱ bi̱ itháan ra̱májánʼ bi̱ niguáʼdaaxu. Mú rí xúgi̱, ikhaa nindxu̱u̱ bi̱ itháan májáanʼ”. Mbá xmáná nda̱wa̱á dí nikháñúu, índo̱ a̱ngiu̱lú nitangiín muni̱ reunión náa guʼwá e̱jua̱nʼ, ikhú ndiyáá rí ikhí xtáa imba̱a̱ xa̱bu̱ bi̱ nditháan táʼga nákha ginii. Ndiéjunʼ nixkajxi̱i̱ maʼga̱ mbiʼi rúʼko̱ xá. Numuu dí ra̱ʼkhá tháán niguanúu tsiánguá rí xóo Jack niriʼkuminaʼ, ikha jngóo nindoo mbaʼyoo ndiéjunʼ gáʼyóoʼ maʼni mu mbaʼyamajkuu Jeobá. Nakujmaa kaʼwu rí xóo nuʼnilú ma̱ndoo maʼni dí maʼga̱ gamajkhu náa Jeobá (1 Ped. 2:12).
Ma̱ndoo muʼni mba̱a̱ Jeobá ga̱jma̱a̱ dí xóo nuʼnilú. (Atayáá kutriga̱ 14). h
XÚ KÁʼNII GASNGÁJMA JEOBÁ DÍ I̱NDÓ IKHAA KAʼYOO MBIʼYAMAJKUÍÍ XÁ.
15. Ndiéjunʼ gáʼni Jeobá mu maʼni mba̱a̱ mbiʼyuu rá. (Salmo 96:10-13.)
15 (Atraxnuu Salmo 96:10-13). e Náa Salmo 96 naguámbóo raʼthí dí Jeobá nindxu̱u̱ xóo mbáa Rey bi̱ naʼni dí jmbu índo̱ naʼnimbánuu xkujndu. Xú káʼnii gáʼnii Jeobá dí maʼga̱ gamajkhu náa mbiʼyuu rá. Rí maʼni dí jmbu índo̱ gáʼnimbánuu xkujndu. Inu má maʼnigámbáa Babilonia rí Mba̱a̱ numuu dí niʼni gachúu mbiʼyuuʼ rí nindxu̱u̱ kaʼwu (Apoc. 17:5, 16; 19:1, 2). Tikhuun bi̱ gúyáá dí maguma gámbáa religión dí minduwaʼ mbáa muraʼwi̱i̱ mbuyamajkuíí Jeobá ga̱jma̱á nindxu̱lú. Nda̱wa̱á, índo̱ gárígá Armagedón, Jeobá maʼnigámbáa mbá kayuuʼ numbaaʼ ndrígóo Gixa̱a̱. Maʼnigámbíin mbá xúgíinʼ bi̱ tsíñún gúyáá ga̱jma̱a̱ bi̱ nuni̱ gachíí mbiʼyuu, mú maʼni káwíin xúgíinʼ bi̱ nandún kuyáá, bi̱ nunimbu̱ún kuyáá ga̱jma̱a̱ bi̱ nadxuu a̱jkiu̱ún dí muxnáá gamajkhu ikhaa (Mar. 8:38; 2 Tes. 1:6-10). Nda̱wa̱á índo̱ gájngoo mbá Míí Tsiguʼ dí Maʼtáñajunʼ Cristo, índo̱ gájngoo iwáá gaʼkhu, Jeobá maʼni kaʼwi̱i̱ mbá kayuuʼ mbiʼyuu (Apoc. 20:7-10). Ikhú, “náa tsu̱du̱u̱ ku̱ba̱ʼ majmaʼnuʼ gloria ndrígóo Jeobá xó má iyaʼ narugoo lamáa” (Hab. 2:14).
16. Ndiéjuunʼ xtaa xawii matani ikháán rá. (Atayáá ma̱ngaa xtiʼkhuu.)
16 ¡Ra̱ʼkhá tháán nagui̱i̱ gáʼni índo̱ náa xúgíʼ numbaaʼ gúni mba̱a̱ mbiʼyuu Jeobá xó má kaʼyoo! Xúgi̱ dí kuwáánʼ ruguaʼthi̱i̱n maʼgánú mbiʼi rúʼko̱, ma̱ndoo muʼni xúgíʼ xó má eʼngo̱o̱ mu muʼni mba̱a̱ Dios ndrígúlú. Numuu dí rígi̱ gíʼdoo wéñuuʼ numuu, ikha jngóo a̱ngiu̱lú Cuerpo Gobernante niraʼwi̱i̱ dí na̱ʼkha̱ raʼthí náa Salmo 96:8 mu mani̱ndxu̱u̱ texto dí kayá edxu̱u̱ tsiguʼ 2025: “Gu̱ni̱ mba̱a̱ mbiʼyuu Jeobá xó má kaʼyoo”.
¡Maʼga̱nú mbiʼi dí náa xúgíʼ numbaaʼ muni̱ mba̱a̱ mbiʼyuu Jeobá xó má kaʼyoo! (Atayáá kutriga̱ 16).
AJMÚÚ 12 Jeobá, Dios ndrígúlú bi̱ mba̱a̱
a Salmo 96:1-3: “Gu̱ni̱ ajmúú náa Jeobá mbá ajmúú nuxi̱ʼ. ¡Xúgíinʼ xa̱bu̱ bi̱ kúwá náa ku̱ba̱ʼ, gu̱ni̱ ajmúú náa Jeobá! 2 Gu̱ni̱ ajmúú náa Jeobá, guni̱ mba̱a̱ mbiʼyuu. Gutaráʼa tsejtsí mbiʼi ajngáa rí májánʼ rí maʼni káwáanʼlú. 3 Gu̱ni̱ mba̱a̱ náa xúgíʼ xuajen, guthu̱u̱n xúgíinʼ xa̱bu̱ xuajen ga̱jma̱a̱ numuu dí mitsaanʼ niʼniwíi”.
b Nixtiʼkhuu mbiʼñún tikhuun.
c Salmo 96:8: “Gu̱ni̱ mba̱a̱ mbiʼyuu Jeobá xó má kaʼyoo, gaguwaʼ kudala regalo ga̱jma̱a̱ gata̱ʼa̱la náa goʼwóo”.
d Salmo 96:9: “Gusmbatiga̱la náa inuu Jeobá numuu dí mikaʼwii. ¡Xúgíinʼ xa̱bu̱ numbaaʼ gamiñún gáʼni ikhaa!”.
e Salmo 96:10-13: “Gu̱thu̱u̱n xúgíinʼ xa̱bu̱ xuajen: ¡Jeobá ni̱jkha̱nú ninindxu̱u̱ rey! Ku̱ba̱ʼ nigi̱ʼi̱ gújkhúʼ; nditháan xáʼba̱a̱n. Ikhaa maʼni dí jmbu índo̱ gáʼnimbánuu xkujndu ga̱jma̱a̱ numuu xa̱bu̱ xuajen. 11 Gaʼdxuu a̱jkiu̱u̱n mekhu, gaʼdxuu a̱jkiu̱u̱n ku̱ba̱ʼ; gandxaʼwá lamáa ga̱jma̱a̱ xúgíinʼ bi̱ kúwá ikhí; 12 garigá dí gagi náa xanáá ga̱jma̱a̱ xúgíinʼ bi̱ kúwi̱i̱n ikhí. Xúʼko̱ má xúgíʼ ixi̱ dí rígá náa xaxi̱ gaʼdxuu 13 náa inuu Jeobá, numuu dí na̱ʼkha̱ maʼthí ndiéjunʼ gágíʼnuu ku̱ba̱ʼ. Maʼni dí jmbu índo̱ gáʼnimbánuu ga̱jma̱a̱ numuu. Ma̱ngaa maʼni dí májánʼ índo̱ gáʼnimbánuu ga̱jma̱a̱ numuu mámbá xuajen”.
