1. Ndiéjuunʼ embáyulú dí muʼniriya̱a̱ʼ mámbá tsiguʼ dí nikháñúu Jesús rá.

 MBÁ dí mitsaanʼ wéñuuʼ dí nimínáaʼlú nindxu̱u̱ dí nijuiʼtsiwáánʼ (2 Cor. 9:15). Ga̱jma̱a̱ numuu dí Jesús nixnáximinaʼ, ma̱ndoo mambájxulú májánʼ gajmiúlú Jeobá ga̱jma̱a̱ ma̱ndoo makuwáánʼ kámuu mbiʼi. Kuaʼdáá mbaʼa numuu mu muxnáa núma̱aʼ Jeobá, bi̱ nimínáaʼlú rígi̱ numuu dí nandoo kaʼyulú wéñuuʼ (Rom. 5:8). Mu mambáyulú muxnáa má xúʼko̱ núma̱aʼ ga̱jma̱a̱ dí nditháan xámbumulú dí nijuiʼtsiwáánʼ, Jesús niʼthí dí muʼniriya̱a̱ʼ mámbá tsiguʼ dí nikháñúu (Luc. 22:​19, 20).

2. Ndiéjunʼ guʼyáá náa artículo rígi̱ rá.

² Tsiguʼ rígi̱ Conmemoración marigá mbáa sábado 12 ñajunʼ gu̱nʼ abril tsiguʼ 2025. Xúgiáánʼ nandulúʼ makuwáánʼ ikhí. Májánʼ gáʼni dí muríyaʼ mbiʼi nákha xóó tsérígá Conmemoración ga̱jma̱a̱ nda̱wa̱á dí gájngoo mu mundxaʼwamíjna̱ a xúgíʼ dí Jeobá ga̱jma̱a̱ A̱ʼdióo niʼni ga̱jma̱á nindxu̱lú. Náa artículo rígi̱ mbuʼyáá ndiéjunʼ eʼsngúlú dí nijuiʼtsiwáánʼ ga̱jma̱a̱ numuu Jeobá ma̱ngaa ga̱jma̱a̱ numuu Jesús. Náa i̱mba̱ artículo mbuʼyáá xú káʼnii nimbáyulúʼ dí nijuiʼtsiwáánʼ ga̱jma̱a̱ xú káʼnii gándoo musngajmá dí nuxníin núma̱aʼ.

DÍ NAJMAÑULÚ GA̱JMA̱A̱ NUMUU JEOBÁ NÁA DÍ NIJUIʼTSIWÁÁNʼ

3. Náá numuu dí maʼngo̱o̱ dí nikháñúu mbáwíi xa̱biya̱ maʼni káwíin mbaʼin wéñuuʼ xa̱bu̱ rá. (Atayáá ma̱ngaa xtiʼkhuu.)

³ Dí nijuiʼtsiwáánʼ naʼsngúlú dí Jeobá naniguuʼ dí jmbu (Deut. 32:4). Ndíjkha nuʼthálu xígi̱ rá. Numuu dí Adán táʼnimbo̱o̱ kaʼyoo  Jeobá, ikha jngóo xúgiáánʼ bi̱ niguwáʼlu náa ikhaa nindriʼgúulú aʼkhá ga̱jma̱a̱ dí nakháñulú (Rom. 5:12). Jeobá nikungua̱a̱nʼ Jesús mu maʼni káwáánʼlú náa aʼkhá ga̱jma̱a̱ dí nakháñulú. Mú, xú káʼnii gáʼngo̱o̱ dí mbáwíi xa̱bu̱ maʼnikáwíin mbaʼin wéñuuʼ rá. Apóstol Pablo niʼthí xígi̱ kaʼnii: “Xó má rí mbaʼin xa̱bu̱ niguánú ninindxu̱ún xa̱bu̱ aʼkhá ga̱jma̱a̱ numuu rí táʼnimbo̱o̱ mbáwíí xa̱bu̱ [Adán], xúʼko̱ má mbaʼin niguánú ninindxu̱ún xa̱bu̱ jmbiin ga̱jma̱a̱ numuu rí niʼnimbo̱o̱ mbáwíí xa̱bu̱ [Jesús]” (Rom. 5:19; 1 Tim. 2:6). Xó muʼthá, á mu dí xúgíinʼ xa̱bu̱ numbaaʼ niguánú nini̱ndxu̱ún xa̱bu̱ aʼkhá ga̱jma̱a̱ nakháñún numuu dí mbáwíi xa̱bu̱ jmbii tánimboo kaʼyoo Dios, ikha jngóo ma̱ndoo má mbáwíi xa̱biya̱ jmbii bi̱ gánimboo kaʼyoo Dios maʼnikáwáánʼlú.

4. Náá numuu dí Jeobá tániñuuʼ dí bi̱ naguwáʼ náa Adán bi̱ gúnimbu̱ún makuwá kámuu rá.

⁴ Mú, lá ndiyóoʼ tsiaki̱i̱ makhañúu Jesús mu maʼni káwáanʼ ráʼ. Náá numuu dí Jeobá tániñuuʼ dí bi̱ gáguwáʼ náa Adán bi̱ gúnimbu̱ún kuyáá ikhaa makuwá kámuu mbiʼi rá. Ikháanʼ dí nindxu̱lú xa̱bu̱ aʼkhá mbáa makumulú dí rúʼko̱ nindxu̱u̱ itháan májánʼ, mú garmáʼáan a̱jkiu̱lú dí xúgíʼ dí naʼni Jeobá nindxu̱u̱ jmbu. Ikhaa xándoo maniñuuʼ manújngoo xúʼkhíin dí nditháan táʼnimbo̱o̱ Adán ga̱jma̱a̱ maʼni dí asndu nda̱a̱ dí nirígá.

5. Náá numuu nduʼyáá gajkhun dí Jeobá maʼni má xúʼko̱ dí nindxu̱u̱ jmbu rá.

⁵ Á mu dí Jeobá na̱nguá niʼtsiwáanʼ ga̱jma̱a̱ niniñuuʼ dí e̱ji̱i̱n Adán bi̱ na̱nguá nindxu̱ún jmbiin makuwá kámuu mbiʼi. Ndiéjunʼ gárígá rá. Mani̱ndxu̱u̱ asndu xóo maniñuuʼ kaníí ikha ndrígóo dí nindxu̱u̱ jmbu, ga̱jma̱a̱ xa̱bu̱ mundxaʼwamíjna̱ dí xígi̱ má gatanga̱a̱ maʼni mbu̱júu̱ nda̱wa̱á. Mbáa maku̱mu̱ún dí xáʼnimbánuu tikhu dí nikudaminaʼ maʼni nda̱wa̱á. Mú xáyóo má maxmiéjunlú ga̱jma̱a̱ numuu rígi̱, numuu dí Jeobá niʼni dí jmbu, maski ajndu ndiyóoʼ dí maxnájxi̱i̱ A̱ʼdióo bi̱ ra̱ʼkhá tháán nandoo kaʼyoo. Ikha jngóo nandoo nduʼyáá gajkhun dí ikhaa maʼni má xúʼko̱ dí nindxu̱u̱ jmbu.

6. Xú káʼnii embáyulú dí nijuiʼtsiwáánʼ mbuʼyáá nguáthá eyoo kaʼyulú Jeobá rá. (1 Juan 4:​9, 10.)

⁶ Dí nijuiʼtsiwáánʼ nasngájma dí Jeobá nindxu̱u̱ jmbii, mú itháan má nagájnuriyooʼ dí ra̱ʼkhá tháán eyoo kaʼyulú (Juan 3:16; atraxnuu 1 Juan 4:​9, 10). Jeobá nikungua̱a̱nʼ A̱ʼdióo mu makhañúu ga̱jma̱a̱ numulú numuu dí nandoo dí makuwáánʼ kámuu mbiʼi ga̱jma̱a̱ dí manindxu̱lú e̱ji̱i̱n. Atatsaʼwáminaʼ ga̱jma̱a̱ numuu rígi̱, índo̱ Adán nikudaminaʼ aʼkhá niniñuuʼ ranindxu̱u̱ a̱ʼdióo Jeobá. Ikha jngó xúgiáánʼ ikháanʼ tágumáánʼ xóo e̱ji̱i̱n Dios. Mú, ga̱jma̱a̱ numuu dí nijuiʼtsiwáánʼ, xa̱bu̱ bi̱  gaguaʼdáá fe náa Dios ga̱jma̱a̱ bi̱ munimbu̱ún kuyáá, mbóoʼ mbiʼi maguánú mani̱ndxu̱ún e̱ji̱i̱n ikhaa. Mú asndu má mbiʼi xúgi̱, Jeobá nandoo naʼni mba̱a̱ a̱jkiu̱u̱n kaʼyoo aʼkhúlú ga̱jma̱a̱ nandoo nambájxulú gajmiúlú ikhaa ga̱jma̱a̱ a̱ngiu̱lú. ¡Ra̱ʼkhá tháán eyoo kaʼyulú Jeobá! (Rom. 5:​10, 11).

7. Jesús nimínuuʼ wéñuuʼ mu maʼtsiwáánʼlú, ndiéjunʼ eʼsngúlú rígi̱ ga̱jma̱a̱ numuu dí nandoo kaʼyulú Jeobá rá.

⁷ Ma̱ndoo makru̱ʼu̱lú dí ra̱ʼkhá tháán eyoo kaʼyulú Jeobá á mu nundxaʼwamíjna̱ nguáthá mba̱a̱ ndiyóoʼ maʼni numuu mu maʼni káwáánʼlú. Gixa̱a̱ niʼthí dí nimbáa xa̱bi̱i̱ Dios xáʼngo̱o̱ gáwi̱ji̱ jmbu á mu namínuʼ wéñuuʼ. Mu masngájma dí rúʼko̱ ragájkhun nindxu̱u̱, Jeobá niniñuuʼ dí Jesús mamínuuʼ nákha xóo tsekháñu (Job 2:​1-5; 1 Ped. 2:21). Índo̱ xa̱bu̱ nitsijmaa Jesús ga̱jma̱a̱ índo̱ soldados nixnáá ga̱jma̱a̱ nidujmaa náa ixi̱, Jeobá ndiʼyoo xúgíʼ rúʼko̱ asndu mekhuíí. Ma̱ngaa ndiʼyoo xú káʼnii nimínuuʼ wéñuuʼ A̱ʼdióo bi̱ nandoo kaʼyoo índo̱ nikháñúu (Mat. 27:​28-31, 39). Jeobá ma̱ndoo marikhoo dí xúxiyáa. Mbá xkri̱da, ma̱ndoo mambáyúu nákha xa̱bu̱ nithi: “Rí xúgi̱ gaʼni kríyaaʼ Dios á mu nandoo mambáyúu” (Mat. 27:​42, 43). Mú á mu nimbáyúu, xándoo majuiʼtsiwáán ga̱jma̱a̱ xa̱bu̱ numbaaʼ xándoo makuwá kámuu mbiʼi nda̱wa̱á. Ikha jngóo Jeobá niniñuuʼ dí A̱ʼdióo mamínuuʼ asndu makhañúu.

8. Xú káʼnii eʼyáá dí Jeobá nigawúunʼ índo̱ ndiʼyoo dí A̱ʼdióo nimínuuʼ wéñuuʼ xá. (Atayáá ma̱ngaa xtiʼkhuu.)

⁸ Gajkhun má dí Jeobá na̱nguá nijmuu tsiaki̱i̱ ndrígóo mu A̱ʼdióo xámínuuʼ wéñuuʼ, mu raʼkháa rúʼko̱ eyoo gáʼthí dí ikhaa na̱nguá nigawúunʼ. Jeobá niʼniáanʼ xó má ikhaa, dí nandoo nakumulú ikha jngóo nandoo nduʼyáá dí ikhaa ma̱ngaa naku̱mu̱u̱. Ma̱ngaa asndu náa má Biblia naʼthí dí nikúwá tikhuun xa̱bu̱ bi̱ “nini magawúunʼ a̱jkiu̱u̱n” ga̱jma̱a̱ “nini maxtáa ngíná” (Sal. 78:​40, 41). Gundxaʼwámíjná ga̱jma̱a̱ numuu Abrahán ga̱jma̱a̱ Isaac. Jeobá niʼthúu̱n Abrahán dí maxnájxi̱i̱ a̱ʼdióo xóo tsigijñaʼ (Gén. 22:​9-12; Heb. 11:​17-19). Mbáa Abrahán nixtáa ngíná wéñuuʼ ga̱jma̱a̱ nixmiéjuunʼ índo̱ xtáa raʼnirataminaʼ maxíyáa a̱ʼdióo. Mú xú káʼniilá nikumu̱u̱ Jeobá índo̱ ndiʼyoo dí ninigínáa wéñuuʼ A̱ʼdióo asndu nixiyáa xá. Asndu tséʼngo̱o̱ gundxaʼwamíjna̱ xú káʼnii nigawúunʼ ga̱jma̱a̱ nimínuuʼ wéñuuʼ. (Atayáá náa jw.org video dí mbiʼyuu Guʼyaridáá fe ndrígúun: Abrahán (Níʼkhóo 2).

9. Ndiéjuunʼ eʼsngáaʼ dí naʼthí náa Romanos 8:​32, 38, 39 ga̱jma̱a̱ numuu dí Jeobá nandoo kaʼyaaʼ ikháán ga̱jma̱a̱ xúgíinʼ xa̱bi̱i̱ rá.

⁹ Dí nijuiʼtsiwáánʼ naʼsngúlú dí ndawa̱a̱ imba̱a̱ bi̱ nandoo kaʼyulú wéñuuʼ xóo Jeobá, ni má bi̱ nambájxulú itháan májánʼ gajmiúlú ni má bi̱ kuʼyáá itháan mijngii (atraxnuu Romanos 8:​32, 38, 39). Jeobá nandoo kaʼyulú itháan ki xóo ikháanʼ má eyulú kuʼyamijná. Atatsaʼwáminaʼ ga̱jma̱a̱ numuu rígi̱: Lá nandaaʼ maraxtaa kámuu mbiʼi ráʼ. Jeobá nandoo  itháan dí maraxtaa kámuu mbiʼi ki xóo ikháán. Lá nandaaʼ dí magudi̱i̱ aʼkháanʼ ráʼ. Jeobá nandoo itháan maʼni mba̱a̱ a̱jkiu̱u̱n kaʼyaaʼ. I̱ndó dí na̱ndu̱ʼu̱lú muʼni nindxu̱u̱ dí musngajmá dí nuxnáa núma̱aʼ dí niʼtsiwáanʼ índo̱ nuʼnimbulú ga̱jma̱a̱ nuguaʼdáá fe náa ikhaa. Dí nijuiʼtsiwáánʼ nindxu̱u̱ mbá náa nakujmaa dí Dios ra̱ʼkhá tháán eyoo kaʼyulú. Ga̱jma̱a̱ náa numbaaʼ nuxi̱ʼ majmañulú itháan ga̱jma̱a̱ numuu dí Jeobá nandoo kaʼyulú (Ecl. 3:11).

DÍ NAJMAÑULÚ GA̱JMA̱A̱ NUMUU JESÚS NÁA DÍ NIJUIʼTSIWÁÁNʼ

10. a) Ndiéjunʼ dí niʼni maxmiéjuunʼ wéñuuʼ Jesús nákha xóó tsékháñuu rá. b) Xú káʼnii niʼni kaʼwi̱i̱ Jesús mbiʼyuu Jeobá rá. (Atayáá ma̱ngaa kúgumaʼá “ Índo̱ Jesús niwi̱ji̱ jmbu, niʼni kaʼwi̱i̱ mbiʼyuu Jeobá”.)

¹⁰ Jesús naxmiéjuunʼ dí nundxaʼwamíjná xa̱bu̱ ga̱jma̱a̱ numuu Anu̱u̱ (Juan 14:31). Nixmiéjuunʼ wéñuuʼ ga̱jma̱a̱ numuu dí niguma tsu̱di̱i̱ dí naʼthí nduwaaʼ, dí nindxu̱u̱ xa̱bu̱ ra̱májáanʼ numuu dí rígi̱ naʼni gachúu mbiʼyuu Anu̱u̱. Ikha jngóo niʼthí: “Anu̱ʼ, á mu nandoo atiéxingaa copa rígi̱” (Mat. 26:39). Numuu dí Jesús niwi̱ji̱ jmbu asndu índo̱ nikháñúu, ikha jngóo nindoo niʼni kaʼwi̱i̱ mbá kayuuʼ mbiʼyuu Jeobá.

11. Xú káʼnii nisngájma Jesús dí ra̱ʼkhá tháán nindoo kaʼñún xa̱bu̱ rá. (Juan 13:1.)

¹¹ Dí nijuiʼtsiwáánʼ ma̱ngaa naʼsngúlú dí Jesús naxmiéjuunʼ wéñuuʼ kaʼñúún xa̱bu̱, itháan má bi̱ nindxu̱ún xa̱bi̱i̱ (Prov. 8:31; atraxnuu Juan 13:1). Jesús ndiʼyoo dí índo̱ gaxtáa náa tsu̱du̱u̱ Ku̱ba̱ʼ, maraʼnuu mbaʼa gamiéjunʼ ga̱jma̱a̱ dí mamínuuʼ wéñuuʼ índo̱ gakháñuu. Mú, na̱nguá niʼnimbánuu ñajunʼ ndrígóo i̱ndó ga̱jma̱a̱ numuu dí Jeobá nixnúu, niʼnimbánuu numuu dí nindoo kaʼñún xa̱bu̱, nisngájma rígi̱ índo̱ ikhaa niʼtáráʼa, niʼsngáa ga̱jma̱a̱ nimbáñún eʼwíinʼ. Ga̱jma̱a̱ asndu mbiʼi dí inu makhañúu, niríyaʼ mbiʼi maʼjñáa rajkúún apóstoles ndrígóo, maxnún tsiaki̱i̱ ga̱jma̱a̱ maʼsngúún dí gíʼdoo numuu (Juan 13:​12-15). Ga̱jma̱a̱  nda̱wa̱á, índo̱ kiʼdujmaa má náa ixi̱, niʼthúu̱n mbáa xa̱bu̱ bi̱ kiʼdujmaa náa níjniúu dí maxtáa náa Ku̱ba̱ʼ mitsaanʼ ga̱jma̱a̱ niʼthúu̱n Juan dí mañewu̱u̱n María, bi̱ nindxu̱u̱ ru̱dúu̱ (Luc. 23:​42, 43; Juan 19:​26, 27). Jesús nisngájma dí nindoo kaʼñúún wéñuuʼ xa̱bu̱ índo̱ nixtáa náa tsu̱du̱u̱ ku̱ba̱ʼ ga̱jma̱a̱ dí asndu nixnájximinaʼ makhañúu ga̱jma̱a̱ numún.

12. Ndiéjunʼ eʼni Jesús mu mambáyulú má xúʼko̱ asndu mbiʼi xúgi̱ rá.

¹² Cristo “nikháñuu mbóó miʼtsú asndu kámuu”, mú xtáa má rambáyulú má xúʼko̱ (Rom. 6:10). Nañajunʼ má xúʼko̱ mu maxnúlú mbaʼa dí májánʼ dí nayambáá náa dí nijuiʼtsiwáánʼlú. Atatsaʼwáminaʼ xúgíʼ dí naʼni ikhaa xóo Rey, xóo Ndxajkun bi̱ phú kayá edxu̱u̱ ga̱jma̱a̱ bi̱ kayá edxu̱u̱ náa congregación (1 Cor. 15:25; Efes. 5:23; Heb. 2:17). Ikhaa kaʼyoo magímbíin bi̱ kaxtaʼwíin ga̱jma̱a̱ xa̱bu̱ bi̱ mbaʼin wéñuuʼ, mbá ñajunʼ dí mambóo raʼni nákha xóó tsíguámbá gaʼkhu dí majphú mba̱a̱ (Mat. 25:32; Mar. 13:27). b Ma̱ngaa náa iwáá mbiʼi rígi̱, naxnún ganitsu dí na̱ʼkha̱ náa Dios xa̱bi̱i̱ bi̱ naguájun jmbu (Mat. 24:45). Ga̱jma̱a̱ índo̱ Gáʼtañajunʼ mbá Míí Tsiguʼ, maxtáa rañajunʼ má xúʼko̱ mu mambáyulú. Xó má eʼyáá, índo̱ Jeobá nixnájxi̱i̱ A̱ʼdióo, raʼkháa i̱ndó nixnájxi̱i̱ mu makhañúu, ma̱ngaa mu mbaʼa enii xóo gambáyulú.

NDITHÁAN XÁTATSIʼÑÁÁʼ RAJMAÑAAʼ

13. Xú káʼnii gámbáyáaʼ majmañaaʼ itháan xóo eyoo kaʼyulú Jeobá ga̱jma̱a̱ Jesús dí matatsaʼwamínáʼ rá.

¹³ Dí matatsaʼwamínáʼ mambáyáaʼ majmañaaʼ itháan ga̱jma̱a̱ numuu xóo eyoo kaʼyulú Jeobá ga̱jma̱a̱ Jesús. Mbáa ma̱ndoo matraxnuu mbóó o itháan dí na̱ʼkha̱ raʼthí náa Evangelios índo̱ inu marigá ga̱jma̱a̱ índo̱ gájngoo Conmemoración dí kaʼyoo tsiguʼ rígi̱. Ma̱ndoo mataniminaʼ dí xátraxnuu wéñuuʼ mbá nacha̱, ma̱ndoo mi̱dxu̱ʼ ratraxnuu mañu mañúú mu mataʼyáʼ itháan ndíjkha dí gíʼmaa maʼndulú kuʼyáá Jeobá ga̱jma̱a̱ Jesús. Ga̱jma̱a̱ xámbumaaʼ dí marathu̱u̱n eʼwíinʼ dí xtaa rajmañaʼ.

14. Xó má naʼthí náa Salmo 119:97 ga̱jma̱a̱ nota, ndiéjunʼ gíʼmaa muʼni mu majmañulú itháan ga̱jma̱a̱ numuu dí nijuiʼtsiwáánʼ ma̱ngaa i̱ʼwáʼ kiʼsngáa rá. (Atayáá ma̱ngaa xtiʼkhuu.)

¹⁴ Á mu naʼni má mbayuuʼ tsiguuʼ dí ikháán nijnguáanʼ iyááʼ, mbáa matrajximínáʼ á mu rígá xóó dí ma̱ndoo majmañaaʼ xóó ga̱jma̱a̱ numuu xóo dí Dios naʼni dí jmbu, dí nandoo kaʼyulú ga̱jma̱a̱ dí nijuiʼtsiwáánʼ. Rí phú gajkhun, ga̱jma̱a̱ numuu rígi̱ nditháan xuniʼñááʼ ramajñulúʼ.  Ndiéjunʼ gámbáyáaʼ majmañaaʼ má xúʼko̱ rá. Dí matraxnuu xúgíʼ dí na̱ʼkha̱ raʼthí náa i̱yi̱i̱ʼ ndrígúlú. Á mu natraxnuu mbá versículo ndrígóo Biblia dí na̱nguá ekruaʼaaʼ, atayáʼ ma̱ta̱ya̱a̱ itháan. Ga̱jma̱a̱ nda̱wa̱á atatsaʼwáminaʼ náa xúgíʼ mbiʼi ga̱jma̱a̱ numuu dí nitaxkamaa ma̱ngaa dí nijmañaaʼ ga̱jma̱a̱ numuu Jeobá, numuu A̱ʼdióo ga̱jma̱a̱ xóo eñún kuyulú ikhiin (atraxnuu Salmo 119:97 ga̱jma̱a̱ nota). c

15. Ndíjkha gíʼmaa mbuʼyáʼ má xúʼko̱ dí gíʼdoo numuu rí na̱ʼkha̱ náa Biblia rá.

¹⁵ Xákaguabáanʼ á mu raʼkháa xúgíʼ mbiʼi nataxkamaa mbá dí nuxi̱ʼ o mbá dí maʼni manigua̱a̱ʼ wéñuuʼ índo̱ natraxnuu Biblia. Rí matanigajma̱a̱ Biblia nindxu̱u̱ asndu xóo mataʼyáaʼ oro. Mbaʼin xa̱bu̱ ndajñúúnʼ mbayuuʼ índo̱ nduyáaʼ oro. Naʼngo̱o̱ a̱jkiu̱ún ga̱jma̱a̱ nduyáʼ má xúʼko̱ numuu dí ikhiin nduyáá dí asndu mbá chíʼgííʼ dí gúxkamaa gíʼdoo wéñuuʼ numuu. Mú, rí gíʼdoo numuu dí nuxkamaa náa Biblia gíʼdoo itháan numuu ki xóo oro (Sal. 119:127; Prov. 8:10). Ikha jngóo gaʼngo̱o̱ a̱jkia̱a̱nʼ, xátatsiʼñááʼ ratraxnuu ga̱jma̱a̱ matanigajma̱a̱ Biblia (Sal. 1:2).

16. Xú káʼnii gándoo guʼyaridáá Jeobá ga̱jma̱a̱ Jesús rá.

¹⁶ Índo̱ gátanigajma̱a̱ Biblia, atayáá xóo matanimbánii dí nadxu̱ʼ rajmañaʼ. Mbá xkri̱da, ma̱ndoo matayaridáá Jeobá dí naʼni dí jmbu índo̱ mataniu̱u̱n dí májánʼ xúgíinʼ xa̱bu̱ dí xátraʼwíinʼ. Ma̱ndoo matayaridáá Jesús dí nindoo kaʼyoo Anu̱u̱ ga̱jma̱a̱ nindoo kaʼñúún xa̱bu̱ dí asndu nixtáa xawii makhañúu ga̱jma̱a̱ numuu mbiʼyuu Dios, índo̱ natambáñún a̱ngiu̱lú maski ajndu ndayóoʼ matani mbá tsiaki̱i̱ mba̱a̱ ga̱jma̱a̱ índo̱ naratáraʼa, mu xúʼko̱ eʼwíinʼ xa̱bu̱ ma̱ndoo mambáñún dí nijuiʼtsiwáánʼ.

17. Ndiéjunʼ guʼyáá náa imbo̱ʼ artículo rá.

¹⁷ Índo̱ nakru̱ʼu̱lú itháan ga̱jma̱a̱ nduʼyáá dí gíʼdoo numuu dí nijuiʼtsiwáánʼ, itháan má gaʼndulúʼ kuʼyáá Jeobá ga̱jma̱a̱ A̱ʼdióo. Ikhú ikhiin maʼndún kuyulú itháan mangáánʼ (Juan 14:21; Sant. 4:8). Ikha jngóo gajmulú xúgíʼ dí Jeobá naxnúlú mu majmañulú má xúʼko̱ ga̱jma̱a̱ numuu dí nijuiʼtsiwáánʼ. Náa imbo̱ʼ artículo majmañulú xú káʼnii embáyulú dí nijuiʼtsiwáánʼ ga̱jma̱a̱ ndiéjunʼ gándoo muʼni mu musngajmá dí nuxnáa núma̱aʼ ga̱jma̱a̱ numuu dí Jeobá nindoo kaʼyulú.