Jesús ni̱jkha̱nú Ndiyá Edxu̱u̱ náa Ndxajkun nda̱wa̱á rí nijngún iyááʼ, nákha tsiguʼ 29. Xú káʼnii eʼyáá rá. Guʼyáá, índo̱ nijngún iyááʼ, nisngájma rí nixtáa xawii mu maxnáximinaʼ náa altar rí nindxu̱u̱ xóo mbá xkri̱da rí nandoo gáʼthúu̱n ‹ñajuunʼ› Dios (Gál. 1:4; Heb. 10:5-10). Numuu dí altar rí nindxu̱u̱ mbá xkri̱da rígá má nákha Jesús nijngún iyááʼ, nduʼyáá má rí templo ndrígóo Dios ni̱jkha̱nú nirígá ikháá má mbiʼi rúʼko̱, numuu rí altar nindxu̱u̱ mbá rí gíʼdoo wéñuʼ numuu náa templo ndrígóo Dios. Templo ndrígóo Jeobá rí mba̱a̱, nandoo gáʼthúu̱n rí xúgíʼ rí naniñulúʼ muʼni ñajuunʼ ikhaa xó má kaʼyoo numuu rí Jesús nikháñuu (Mat. 3:16, 17; Heb. 5:4-6).

Índo̱ ni̱jkha̱nú nirígá templo ndrígóo Dios, ndiyóoʼ mbáa bi̱ mayéʼga edxu̱u̱ náa ndxajkun. Ikha jngó Jeobá, niríyaaʼ Jesús ga̱jma̱a̱ “xi̱ʼ kaʼwu ma̱ngaa tsiakii” (Hech. 10:37, 38; Mar. 1:9-11). Mú, xú káʼnii eʼyáá dí Jesús nigi̱ʼi̱ mu Mayéʼga Edxu̱u̱ náa Ndxajkun nákha xóó tsékháñuu ni má rí xóó tsiga̱bi̱i̱ xá. Na̱jkuánu nduʼyáá xúʼko̱ índo̱ nuʼnigajmaa numuu Aarón ma̱ngaa bi̱ ninindxu̱ún ndxajkun nda̱wa̱á, nákha nirígá Xtángoo ndrígóo Moisés.

Náa xtángoo naʼthí rí i̱ndó bi̱ kayá edxu̱u̱ náa ndxajkun ma̱ndoo mato̱ʼo̱o̱ náa rí Phú mikaʼwu wéñuʼ náa tabernáculo ma̱ngaa xúʼko̱ má nirígá nda̱wa̱á náa templo. Náa cortina rí naʼni wajíi náa Phú mikaʼwu wéñuʼ ga̱jma̱a̱ bi̱ kayá edxu̱u̱ náa ndxajkun nato̱ʼo̱o̱ káaʼ índo̱ naʼni mbiʼi rí Nagudi̱i̱ Aʼkhún (Heb. 9:1-3, 6, 7). Aarón ga̱jma̱a̱ bi̱ nikúwá nda̱wa̱á nitrigi̱i̱n mu muyegún edxu̱u̱ náa ndxajkun nákha xóó tsítu̱ʼu̱u̱n náa ‹cortina› ndrígóo tabernáculo. Xúʼko̱ má kayuuʼ Jesús ndiyóoʼ mani̱ndxu̱u̱ bi̱ Mayéʼga Edxu̱u̱ náa Ndxajkun náa templo ndrígóo Jeobá nákha xóó tsékháñuu ga̱jma̱a̱ nda̱wa̱á nito̱ʼo̱o̱ náa “cortina, xóo muʼthá, xuyuuʼ ikhaa” mu maxtáa mekhuíí (Heb. 10:20). Ikha jngó apóstol Pablo niʼthí dí Jesús “ni̱ʼkha̱ xóo bi̱ phú kayá edxu̱u̱ náa ndxajkun” ga̱jma̱a̱ nda̱wa̱á nito̱ʼo̱o̱ “náa guʼwá xtíin dí ikhaa nindxu̱u̱ ndxajkun itháan mba̱a̱ ga̱jma̱a̱ itháan májánʼ, raʼkháa dí nini xa̱bu̱”, “ikhaa nito̱ʼo̱o̱ náa mekhu” (Heb. 9:11, 24).

Pacto rí nuxi̱ʼ na̱nguá nigiʼdoo numuu ma̱ngaa na̱nguá nigiʼdu̱u̱ nijmaa mixtiʼkhu mbiʼi. Xú káʼnii eʼyáá rá. Numuu rí índo̱ Jesús nitsima̱a̱ mekhuíí ga̱jma̱a̱ nixnáximinaʼ mu makhañún ga̱jma̱a̱ numún xa̱bu̱ numbaaʼ, ikhú nigi̱ʼdu̱u̱ nigiʼdoo numuu pacto rí nuxi̱ʼ ga̱jma̱a̱ nigi̱ʼdu̱u̱ nijmaa. Nirígá ajtsú enii rí ndiyóoʼ maguma. Ndiéjunʼ nindxu̱u̱ rá.

Timbá, Jesús nixnáximinaʼ náa Jeobá. Raga̱jma̱, náa Anu̱u̱ nixnáxi̱ rí gíʼdoo wéñuʼ numuu rí nikháñuu. Ragajtsú, Jeobá nigruigú eʼdiuu Jesús índo̱ nixnáximinaʼ. Pacto rí nuxi̱ʼ nigi̱ʼdu̱u̱ nijmaa nda̱wa̱á dí nirígá xúgíʼ rígi̱.

Náa Biblia na̱nguá eʼthí náa phú mbiʼi nigruigú Jeobá rí nixnáximinaʼ Jesús. Ikha jngó xándoo mbuʼyáá kaʼwu náa phú mbiʼi nigiʼdoo numuu ga̱jma̱a̱ náa phú mbiʼi nigi̱ʼdu̱u̱ nijmaa pacto rí nuxi̱ʼ. Mú, nduʼyáá rí Jesús nitsima̱a̱ mekhuíí gu̱wa̱ʼ mbiʼi wapháá nákha xóó tsigi̱ʼdu̱u̱ ndxa̱a̱ Pentecostés (Hech. 1:3). Nguáthá mbiʼi nda̱wa̱á rí nitsima̱a̱ mekhuíí, nixnáxu Jeobá rí gíʼdoo numuu rí nikháñuu ga̱jma̱a̱ ikhaa nigruigú (Heb. 9:12). Náa ndxa̱a̱ Pentecostés, nikujmaa kaʼwu rí Jeobá nigruigú tsigijñaʼ rí nixnáxi Jesús (Hech. 2:1-4, 32, 33). Mbiʼi rúʼko̱ nikujmaa rí pacto nuxi̱ʼ nigiʼdoo má numuu.

Rí nagájnuriyooʼ rí niʼthá nindxu̱u̱ rí nigi̱ʼdu̱u̱ nijmaa ga̱jma̱a̱ nigiʼdoo numuu pacto rí nuxi̱ʼ, índo̱ Jeobá nigruigú eʼdiuu Jesús dí nixnáximinaʼ, ma̱ngaa Jesús nigíʼdu̱u̱ ninindxu̱u̱ bi̱ Mambáyulú xóo bi̱ Kayá Edxu̱u̱ náa Ndxajkun (Heb. 7:25; 8:1-3, 6; 9:13-15).