Nixtáá nákha 1954 náa Estados Unidos mbá xuajen rí mbiʼyuu Saint Paul (Minnesota), bi̱ nikúwá náa goʼwóoʼ nigún náa guʼwá ndxajkun ga̱jma̱a̱ na̱nguá má niguaʼdáá wéñuʼ ni má na̱nguá mingínii wéñuʼ. Ikhúúnʼ ninindxu̱u̱ ragajmi̱i̱ rí mbáa witsáanʼxu. Nákha chíʼgiúnʼ ninigajmaa náa mbá escuela ndrígóo guʼwá ndxajkun ma̱ngaa niyambáá asndu ndiéjunʼ má eyóoʼ ikhí, mú na̱nguá ejmañuʼ wéñuʼ dí naʼthí náa Biblia. Maski ajndu niku̱mu̱ʼ rí xtáa mbáa Dios bi̱ niʼniwíi xúgíʼ dí rígá, mú nindáti̱ga̱a̱ fe ndrígóo náa guʼwá ndxajkun.

Índo̱ nigíʼdu̱u̱ ranigajmaa náa escuela William Mitchell ga̱jma̱a̱ numuu xtángoo, xa̱bi̱i̱ Jeobá nidi̱i̱ xkrugo̱ʼ. Mbiʼi rí niguwáʼ, xtáá rajñáa xtíñúʼ, ikha jngó ikhiin nithi rí maguwáʼ imbo̱ʼ mbiʼi. Índo̱ nitangiín, niniu̱u̱n a̱jma̱ graxe̱: “Náá numuu rí bi̱ nuni dí raʼkhí itháan má májánʼ kúwá ki xóo bi̱ nuni rí májánʼ rá. Ndiéjunʼ eyóoʼ mu makuwáanʼ gagi rá.” Nigruígú libro rí mbiʼyuu La verdad que lleva a vida eterna ga̱jma̱a̱ la Traducción del Nuevo Mundo de las Santas Escrituras, dí maxaʼ. Ma̱ngaa  nigruígú rí manigajmaa gajmíi̱nʼ. Mbaʼa wéñuʼ rí nijmañuʼ. Ra̱ʼkhá tháán niniguʼ rí nijmañuʼ dí Reino ndrígóo Dios nindxu̱u̱ mbáa xa̱bu̱ ñajunʼ bi̱ ndayúlú wéñuʼ ga̱jma̱a̱ rí ikhaa maʼtáñajunʼ náa Ku̱ba̱ʼ. Nikro̱ʼo̱ʼ dí xa̱bu̱ ñajunʼ bi̱ kúwá náa Ku̱ba̱ʼ nda̱a̱ rí nijmiin gúni, i̱ndó niniñaaʼ gaʼkhu, dí tsingíná, dí raʼkhí ga̱jma̱a̱ gamiéjunʼ náa numbaaʼ.

Nixnaxíminaʼ náa Jeobá nákha tsiguʼ 1982 ga̱jma̱a̱ nijngúnʼ iyááʼ tsiguʼ má rúʼko̱ náa mbáa asamblea rí ajtsú mbiʼi dí nigumbiʼyuu “Verdad del Reino” náa nda̱wi̱i̱n mbaʼin xa̱bu̱ rí mbiʼyuu St. Paul Civic Center. Mbá xmáná nda̱wa̱á, nitangaánʼ ikhí mu mani mbá examen mu mba̱yo̱o̱ á mu maxtrigúnʼ mañajunʼ xóo abogado. Índo̱ nigi̱ʼdu̱u̱ gu̱nʼ octubre ndi̱yo̱o̱ rí nixtrigún mañajunʼ.

Náa asamblea rúʼko̱, niniʼniiʼ Mike Richardson bi̱ niñajunʼ náa Betel ndrígóo Brooklyn (Nueva York) niʼthúnʼ dí náa Guʼwá dí nuxna ikha xúgíʼ numbaaʼ ndiʼkhún nirígá Náa nuñajunʼ bi̱ nunimbánii xkujndu índo̱ nanujngorámún mbá Xtángoo. Mbá nacha̱ ni̱ʼkha̱ náa edxu̱ʼ ajngáa dí niʼthí eunuco bi̱ na̱ʼkha̱ raʼthí náa Hechos 8:36 ga̱jma̱a̱ niraximi̱na̱ʼ: “Dí erikhooʼ ikhúúnʼ mu maxnaxíminaʼ mañajunʼ Náa nuñajunʼ bi̱ nunimbánii xkujndu índo̱ nanujngorámún mbá Xtángoo rá. Ikha jngó nixnajxí solicitud mu mañajunʼ náa Betel.

Anu̱ʼ ga̱jma̱a̱ ru̱dúʼ na̱nguá ninigu̱nʼ rí manindxu̱ʼ xa̱bi̱i̱ Jeobá. Anu̱ʼ niraxu̱ʼ nguáthá gáda̱ʼ rí mañajunʼ náa Watchtower rí ni̱ndxu̱ʼ abogado. Ikhúúnʼ niriʼñuu dí ikhúúnʼ nixnaxíminaʼ mañajunʼ xuʼkhíínʼ ma̱ngaa rí muxnuʼ 75 dólares mámbáa gu̱nʼ, xúʼko̱ nixnúún bi̱ niñajunʼ náa Betel nákha ikhú.

Índo̱ nigíʼdúu ninimbánuu tikhu xkujndu náa mbá tribunal, nákha tsiguʼ 1984 nigíʼdu̱u̱ niñajunʼ náa Betel dí rígá náa Brooklyn. Nikhánuʼ mañajunʼ Náa nuñajunʼ bi̱ nunimbánii xkujndu índo̱ nanujngorámún mbá Xtángoo. Rí niñajunʼ má náa tribunal nimbáyuʼ wéñuʼ.

Nákha noviembre tsiguʼ 1983, xa̱bi̱i̱ Jeobá nitsi guʼwá Teatro Stanley, dí rígá náa xuajen Jersey (Nueva Jersey). A̱ngiu̱lú nithúún xa̱bu̱ ñajunʼ mu muni májáanʼ cable ndrígóo aguʼ ga̱jma̱a̱ iyaʼ dí rígá náa guʼwá rúʼko̱. Índo̱ niwíinʼ xa̱bu̱ ñajunʼ bi̱ kúwá náa xuajen rúʼko̱, nitamijná rí xa̱bi̱i̱ Jeobá nandún majmúún guʼwá náa nirígá teatro mu makuwi̱i̱n asamblea. Mú na̱nguá nindúún. Xó má naʼthí xtángoo dí rígá náa xuajen rúʼko̱, rí i̱ndó ma̱ndoo muwíin mu mbuyamajkuíí Dios náa goʼwóo mbáa xa̱bu̱. Numuu rí guʼwá teatro gíiʼ mijngii náa naxtagujua ikha jngó na̱nguá nindúún. Na̱nguá nimbáñún índo̱ a̱ngiu̱lú ninda̱ʼa̱ rí mumbañún.

 Índo̱ maʼni mbá xmáná dí xtáá náa Betel, a̱ngiu̱lú nigún ku̱ñu̱u̱n i̱yi̱i̱ʼ dí munda̱ʼa̱ permiso náa tribunal federal ndrígóo xuajen. Numuu rí niñajunʼ má a̱jma̱ tsiguʼ náa tribunal federal ndrígóo Saint Paul (Minnesota), niniʼnúu májánʼ má xkujndu rúʼko̱. Mbáa abogado bi̱ ni̱jkha̱ ga̱jma̱á nindxuxu niʼthí rí guʼwá Teatro Stanley nijmaa mu magajnúu mixtiʼkhu enii dí mbuyáá mbaʼin xa̱bu̱, ikhí nigájnuu mbaʼa película ga̱jma̱a̱ ajmúú ndrígóo rock. Ikha jngó náá numuu rí xándoo marigá ikhí náa munigajmaa numuu Biblia. Tribunal ndiʼyoo xkujndu ga̱jma̱a̱ niʼthí dí xa̱bu̱ ñajunʼ bi̱ kúwá náa Jersey City na̱nguá nini xó má kaʼyoo ga̱jma̱a̱ niʼtáñajunʼ rí makhánun permiso. Xúʼko̱ ni̱jkhánú ndi̱yo̱o̱ rí Jeobá naʼni tsajkurámuuʼ ñajunʼ dí nuni abogados mu mumbayíí xuajñuu ikhaa mu maʼga̱ rajoo má xúʼko̱ ñajunʼ dí nuni. Ra̱ʼkhá tháán nadxuʼ dí nandoo nayambáá mbá chíʼgíʼ.

A̱ngiu̱lú nigi̱ʼdi̱i̱ nini májáanʼ guʼwá rí asndu táʼni mbá tsiguʼ niguámbuun. Nákha 8 ñajunʼ gu̱nʼ septiembre tsiguʼ 1985, nirígá graduación clase 79 ndrígóo Galaad. Nda̱wa̱á ikhí nijmaʼnuu náa Guʼwá rí narígá asamblea ndrígóo Jersey City. Ra̱ʼkhá tháán nidxu̱ʼ rí niyambáá xóo abogado mu mambáyúu xuajñuu Jeobá ki xóo náa i̱ʼwáʼ xkujndu dí ninimbánuu nákha xóó tsetoʼoʼ mañajunʼ Betel. Asndu na̱nguá nindxa̱ʼo̱o̱ edxu̱ʼ rí Jeobá maxnúʼ i̱ʼwáʼ ñajunʼ xóo rígi̱.

Xúgíʼ tsiguʼ dí 1980, mbaʼin médico ga̱jma̱a̱ mbaʼa hospital na̱nguá eyamajkhún índo̱ xa̱bi̱i̱ Jeobá nithi rí tsíñún mataʼáán eʼdi. Gu̱ʼu̱ endi̱i̱n niguaʼdáá itháan xkujndu numuu rí bi̱ ni̱ndxu̱ún jueces nuthi rí ikhiin rakáʼñun muthi dí xataʼáán eʼdi numuu rí á mu nakháñun nda̱wa̱a̱ tsáa gáñewu̱u̱n ada̱.

Nákha 29 ñajunʼ gu̱nʼ diciembre tsiguʼ 1988, ndxájulú Denise Nicoleau ra̱ʼkhá tháán niʼniuu eʼdi mbiʼ nda̱wa̱á rí nixtáa a̱ʼdióo. Hemoglobina ndrígóo nánguá ñajunʼ májánʼ, ikha jngó médico ndrígóo niʼthún rí mata̱ʼa̱a̱ eʼdi, mú ikhaa táʼndoo. Imbo̱ʼ néjtsuu bi̱ kúwá náa hospital nitháán mbáa juez maʼniuu firmar i̱yi̱i̱ʼ náa naʼthí rí ma̱ndoo mata̱ʼa̱a̱ eʼdi. Juez niʼniuu firmar, mú na̱nguá niʼthúu̱n ndxájuu ni má ajmbio̱o̱ Nicoleau.

Viernes 30 ñajunʼ gu̱nʼ diciembre, bi̱ kúwá náa hospital nixuda̱a̱ eʼdi maski ajndu ajmbio̱o̱ ga̱jma̱a̱ eʼwíinʼ bi̱ kaʼñún nithi rí xándoo muxuda̱a̱. Ma̱ngaa niru̱gui̱i̱n tikhun bi̱ kaʼñún ga̱jma̱a̱ bi̱ kuya̱ edxu̱u̱ náa congregación. Nini tsudu̱ún rí ikhiin tuxnáá mato̱ʼo̱o̱ xa̱bu̱ bi̱ makudaaʼ eʼdi. Imbo̱ʼ néjtsuu rí maʼni sábado 31 ñajunʼ gu̱nʼ diciembre, nidxawíín xúgínʼ xa̱bu̱ bi̱ kúwá náa Nueva York ga̱jma̱a̱ xuajen dí nirígá mijngii ikhí rí nirugui̱i̱n a̱ngiu̱lú.

Nijkhuáxu náa tribunal rí itháan gíʼdoo numuu  mu mambanúu xkujndu, ga̱jma̱a̱ miʼcha̱ lunes nitamijná gajmuʼ mbáa juez bi̱ niyéjkha̱ edxu̱u̱ bi̱ mbiʼyuu Milton Mollen. Ni̱thu̱u̱n dí nirígá ma̱ngaa ni̱thu̱u̱n rí imba̱a̱ juez niʼthí rí mata̱ʼa̱a̱ eʼdi rí asndu tákúwá bi̱ kaʼñún bi̱ nandoo kháñuu. Juez Mollen niʼthúnʼ rí maʼgá náa kraʼaa wakhííʼ rúʼko̱ mu mathu̱u̱n xóo phú nirígá ga̱jma̱a̱ xú káʼnii xtángoo rí ma̱ndoo majmaa. Ni̱jkha̱ gajmuʼ superintendente ndrígóʼ bi̱ mbiʼyuu Philip Brumley. Juez ma̱ngaa niʼthúu̱n maʼga̱ abogado ndrígóo hospital. Ra̱ʼkhá tháán mijkoo nitamíjnáxu. Ndxájulú Philip niʼnirámáʼ náa cuaderno ndrígóʼ niʼthí: “Ataxruiguu aʼwáaʼ”. Ra̱ʼkhá tháán májánʼ nindxu̱u̱ rí niʼthúnʼ, numuu rí xóo niʼthí imba̱a̱ abogado niʼni makiʼnún wéñuʼ.

Nda̱wa̱á rí nijngoo mbá hora dí nitamíjnáxu gakhii, juez Mollen niʼthí rí xkujndu rí nanduxu munimbánii, maguma mbánúu timbá hora rí imbo̱ʼ mbiʼi. Índo̱ nigájnáanxu náa kraʼaa juez, ikhaa niʼthí rí abogado ndrígóo hospital maʼni mingíjyúuʼ marigá xóo nandoo ikhaa. Niku̱mu̱ʼ rí asndu xóo Jeobá xtáa raʼthún rí ikháanʼ maʼnguxu. Ra̱ʼkhá tháán mitsaanʼ ndi̱yo̱o̱ rí Dios ejmiuu ga̱jma̱á nindxuxu mu mambanúu rí nandoo ikhaa.

Asndu tikhu nduʼun ninúʼxu numuu rí niniratháxu dí muthaxu. Tribunal nirígáa mijngii náa Betel ndrígóo Brooklyn, ikha jngó mbaʼin a̱ngui̱nʼ bi̱ niñajunʼxu Náa nuñajunʼ bi̱ nunimbánii xkujndu índo̱ nanujngorámún mbá Xtángoo, nigún ga̱jma̱a̱ rajkhún asndu ikhí. Nda̱wa̱á rí nidxawíín rí nitaxu, a̱jkhui̱i̱n juez bi̱ kúwá runimbáníí xkujndu nithi rí xataʼaa eʼdi. Tribunal niʼtambáyuu ndxájulú Nicoleau ga̱jma̱a̱ niʼthí dí índo̱ naguma firmar mbá i̱yi̱i̱ʼ rí asndu xudxawíínʼ rí gáʼthi bi̱ nandoo kháñuu, nanújngorámuu xtángoo.

Nda̱wa̱á, tribunal rí itháan gíʼdoo numuu dí rígá náa Nueva York niʼthí rí ndxájulú Nicoleau maguma thanáá rí xáta̱ʼa̱a̱ eʼdi. Ikhaa nindxu̱u̱ timbá rí a̱jkhu̱ náa niʼnguxu dí nitaxu ga̱jma̱a̱ numuu eʼdi náa mbaʼa tribunal rí itháan gíʼdoo numuu dí nirígá náa Estados Unidos (atayáá kúgumaʼá “ Xkujndu rí nimbánuu náa mbaʼa tribunal rí itháan gíʼdoo numuu”). Ma̱ngaa niñajunʼ náa Betel gajmíi̱n eʼwíinʼ abogado náa ndiyóoʼ magumambánuu índo̱ narígá xkujndu náa mbá guʼwíin, índo̱ naxtagujua̱a̱ mbaaʼ, ga̱jma̱a̱ índo̱ nuríyaʼ awan mu muni guʼwá.

Índo̱ niniʼniiʼ Dawn, ninindxu̱u̱ mbáa a̱ʼgu̱ bi̱ niguanáa ga̱jma̱a̱ gíʼdiin ajtsíin e̱ji̱i̱n. Niñajunʼ ga̱jma̱a̱ ninindxu̱u̱ precursora. Maski ajndu ra̱ʼkhá tháán gakhii nixtáa, niʼniuu tsiánguá índo̱ ndi̱yo̱o̱ xú káʼnii eʼni ñajuunʼ Jeobá ga̱jma̱a̱ xúgíʼ a̱jkiu̱u̱n. Nákha 1992, ni̱jkuáxu náa asamblea rí Distrito rí ndiyá edxu̱u̱ “Portadores de Luz” náa xuajen Nueva York ga̱jma̱a̱ ni̱thu̱u̱n rí nandoʼ maniʼníiʼ itháan. Nidamijnáxu mbá tsiguʼ nda̱wa̱á, mú niñajunʼ má xúʼko̱ náa Betel. Dí nigúʼdaa mbáa a̱ʼgu̱ bi̱ ra̱ʼkhá tháán nandoo kaʼyoo Jeobá ga̱jma̱a̱ nadxuu má xúʼko̱, ndi̱yo̱o̱ rí nindxu̱u̱ mbá regalo dí nixnuʼ Jeobá. Xó má naʼthí náa Proverbios 31:12, Dawn ra̱ʼkhá tháán májáanʼ ga̱jma̱á ni̱ndxu̱ʼ náa xúgíʼ mbiʼi rí nikuwáanʼxu.

Índo̱ nidamijnáxu, mbáa a̱ʼdióo gíʼdoo 11, imba̱a̱ gíʼdoo 13 imba̱a̱ gíʼdoo 16 tsiguuʼ. Numuu rí nindoʼ mani̱ndxu̱ʼ májáanʼ anún, niniminaʼ maguxnuu ga̱jma̱a̱ magíʼ mani xúgíʼ dí naʼthí náa i̱yi̱i̱ʼ ndrígúlú ga̱jma̱a̱ numún bi̱ guáʼdiin ejín skejñún. Mbaʼa má xkujndu niraʼnííxu índo̱ ni̱jkha̱ ranújngoo tsiguʼ, mú nadxuʼ numuu rí e̱ji̱i̱n nduyoʼ xóo mbáa anún bi̱ nandoo kaʼñún ga̱jma̱a̱ mbáa bi̱ ma̱ndoo mambájxuun májánʼ gajmiún. Naguwáʼ náa guʼwúxu bi̱ nambájxuun gajmiún ga̱jma̱a̱ niniguxu wéñuʼ rí maguwáʼ.

Tsiguʼ 2013, ikhúúnʼ gajmuʼ Dawn, ni̱jkua̱ gakuwáanʼxu náa Wisconsin mu muñewu̱u̱n anu̱xu. Mú niʼniuʼ tsiánguá rí nindxaʼoʼ mañajunʼ xóó náa Betel. Nithu̱nʼ mambáñún nguáthá igu̱nʼ mu mayambáá xóo abogado.

Nákha septiembre tsiguʼ 2018, ndi̱yo̱o̱ rí nánguá ejmuu gáthá májánʼ. Médico na̱nguá nijmaa gaʼthúnʼ náa numuu rí xúʼko̱ gíʼnuʼ. Nda̱wa̱á, imba̱a̱ doctor niʼthúnʼ rí maʼgá náa mbáa médico bi̱ najmañuu ga̱jma̱a̱ numuu ngañáʼ. Nákha enero tsiguʼ 2019, médico buʼko̱ niʼthúnʼ dí gúʼdoʼ mbá nandii mbiiʼ ga̱jma̱a̱ rí nda̱wa̱á maʼniuʼ itháan náa xúgíʼ xuyúʼ.

Nijngooʼ ajtsú mbiʼi nda̱wa̱á, índo̱ xtáá rajká kruámuʼ ga̱jma̱a̱ patines náa hielo, nixpátrigunʼ ga̱jma̱a̱ nijuiʼngún aphu ñawun mújúnʼ. Ikhú ni̱jkhánú ndi̱yo̱o̱ rí nánguá ñajunʼ májánʼ xuyuʼ. Ikhúúnʼ niniguʼ maʼgá kruámuʼ má xúʼko̱ náa hielo xúgíʼ mbiʼi rí nixtáá. Nandii rí gúʼdóʼ nda̱ja̱a̱ itháan nacha̱ ma̱ngaa nánguá eyoo gátha májánʼ, rí mambayimínaʼ ga̱jma̱a̱ rí nánguá ejmún miʼkhu jngúnʼ nimbá.

Ninindxu̱u̱ mitsaanʼ wéñuʼ, rí mambáyúu Reino ndrígóo Dios xóo abogado. Ma̱ngaa ninindxu̱u̱ mitsaanʼ wéñuʼ dí niniraʼmáʼ mbaʼa revista kiejunʼ ma̱ngaa dí nitha náa inún mbaʼin médico bi̱ najmañún. Xúgíʼ rígi̱ niʼngo̱o̱ niʼni rí nindoo nimbáñún xa̱bi̱i̱ Jeobá índo̱ gúraʼwíí xóo maguma thanún ga̱jma̱a̱ rí xataʼáán eʼdi. Maski ajndu xúʼko̱, natha ikháá má xóo bi̱ niʼnirámáʼ Lucas 17:10, ni̱ndxu̱ʼ yumbáá bi̱ nda̱a̱ rí ejmaa nditháan. I̱ndó nini rí ndiyóoʼ má mani.