1. Xú káʼnii consejo naʼthúlúʼ náa Filipenses 2:3, ga̱jma̱a̱ ndiéjunʼ gayambáá á mu nuʼnimbánii rá.

BI̱ ÑAJUNLÚ xa̱bi̱i̱ Jeobá ni̱ndxu̱lú xa̱bu̱ guabaaʼ ga̱jma̱a̱ nuʼnimbulú ikha ndrígóo, numuu rí ikhaa nakro̱ʼo̱o̱ ndiéjunʼ eyúluʼ mu makuwáanʼ májánʼ (Efes. 4:22-24). Rí manindxu̱lúʼ xa̱bu̱ guabaaʼ naʼni rí muʼni ginii ñajuunʼ ikhaa ki xóo rí muʼni dí nandulú ikháanʼ ga̱jma̱a̱ rí mundxaʼwami̱jna̱ rí eʼwíinʼ guaʼdáá itháan numún ki xóo ikháanʼ. Índo̱ nuʼni xúʼko̱, nambáxulu itháan májánʼ gajmiúlú Jeobá ga̱jma̱a̱ a̱ngiu̱lú (atraxnuu Filipenses 2:3). *

2. a) Ndiéjunʼ ndiʼyoo Pablo rí ndayóoʼ rá. b) Ndiéjunʼ guʼyáá náa artículo rígi̱ rá.

² Á mu tsíñewa̱a̱n rí nuʼni, migamíi muʼni mbaʼumíjna̱ ga̱jma̱a̱ maxmiéjunlú kuʼyamijná i̱ndó ikháanʼ xó má eni xa̱bu̱ náa numbaaʼ ndrígóo Gixa̱a̱. * Nákha siglo timbá tikhun cristianos migamíi mugiʼníí rúʼko̱, ikha jngó apóstol Pablo nixná consejo rígi̱ náa congregación dí nirígá náa Roma: “Nathalá mámbáa rí ikháanʼ dí xundxa̱ʼwa̱a̱ edxa̱la rí ikháanʼ guaʼdáá itháan numala, gíʼmaa musngajmá rí awáán gundxaʼwa̱a̱ edxa̱la” (Rom. 12:3). Xó má eʼyáá, Pablo ndiʼyoo rí ndayóoʼ má rí makumulúʼ kuʼyamijná. Mú, rí manindxu̱lúʼ xa̱bu̱ guabaaʼ mambáyulú  mbuʼyáá awáán xóo ekumulú. Náa artículo rígi̱ mbuʼyáá ajtsú enii rí á mu ni̱ndxu̱lú xa̱bu̱ guabaaʼ mambáyulú rí xúʼyáá dí itháan guaʼdáá numulú ikháanʼ: 1) Bi̱ nidamijná, 2) bi̱ guaʼdáá ñajunʼ náa xuajñuu Jeobá, ga̱jma̱a̱ 3) índo̱ najmulú Internet muʼtámíjná gajmiúlú eʼwíinʼ.

3. a) Náa numuu rí narígá xkujndu náa xa̱bu̱ gajmii rá. b) Xú káʼnii endxa̱ʼwa̱a̱ edxu̱ún tikhun índo̱ nuraʼníí xkujndu rá.

³ Jeobá nandoo rí xa̱bu̱ gajmii makuwa gagi. Mú, numuu rí xúgiáanʼ ni̱ndxu̱lú xa̱bu̱ aʼkhá, ikha jngó narígá xkujndu xó má niʼthí Pablo rí mugíʼniin xa̱bu̱ gajmii (1 Cor. 7:28). Tikhun bi̱ nidamijná nakumu̱ún rí nagiʼdu̱u̱n má xúʼko̱, mbáa asndu nakumu̱ún dí raʼkhí nini rí nidamijná. Á mu nundxa̱ʼwa̱a̱ edxu̱ún xó má eni xa̱bu̱ numbaaʼ, i̱ndó mundxaʼwamíjna̱ ga̱jma̱a̱ numún ikhiin ga̱jma̱a̱ muthi rí itháan má májánʼ gaʼni rí muniñami̱jna̱.

4. Ndiéjunʼ dí ragíʼmaa mundxaʼwáá edxu̱lúʼ rá.

⁴ Xundxa̱ʼwa̱a̱ edxu̱lúʼ rí na̱nguá májánʼ ni̱ʼni̱ rí niʼdamijná. Nduʼyáá rí náa Biblia naʼthí rí i̱ndó ma̱ndoo muniʼñamíjná á mu nikudaminaʼ aʼkhá ga̱jma̱a̱ imba̱a̱ (Mat. 5:32). Índo̱ nuraʼníí xkujndu xó má niʼthí Pablo, xuʼnimbaʼumijna ga̱jma̱a̱ xúraxi: “Lá bi̱ ndi̱ya̱a̱ naʼni xó má eyoʼ ikhúúnʼ rá. Lá nandoo kaʼyoʼ xó má ikhúúnʼ eyóoʼ xá. Lá maxtáá itháan gagi á mu mba̱ya̱a̱ imba̱a̱ rá.” Bi̱ naraximinaʼ xúʼko̱, ¡I̱ndó nandxa̱ʼwáminaʼ ga̱jma̱a̱ numuu ikhaa! Bi̱ kúwá náa numbaaʼ muthi rí guʼdxawíín dí gáʼthi a̱jkiu̱lú ga̱jma̱a̱ rí mbuʼyáaʼ makuwáanʼ gagi ikháanʼlu, rí asndu tséʼniuu má rí muniʼñámijná. Mú, bi̱ nuniñami̱jna̱ rí ku̱ma̱ ndrígóo Dios maxnún ikha “na̱nguá xmiejúúnʼ kuyamijná i̱ndó ga̱jma̱a̱ numuu ikhiin, ma̱ngaa naxmiéjúnʼ kuñún eʼwíinʼ” (Filip. 2:4). Jeobá nandoo dí muñewa̱a̱n bi̱ ndiʼyáaʼ raʼkháa rí muniʼñáaʼ (Mat. 19:6). Jeobá nagi̱ʼthu̱u̱n rí mundxaʼwáá edxu̱lúʼ xóo ikhaa eyoo, raʼkháa dí nandulúʼ ikháanʼ.

5. Xó má naʼthí náa Efesios 5:33, xú káʼnii gíʼmaa muni bi̱ nidamijná rá.

 ⁵ Bi̱ nidamijná gíʼmaa maʼndún kuyamijná ga̱jma̱a̱ gíʼmaa mbuyamajkuíí bi̱ ndi̱ya̱a̱ (atraxnuu Efesios 5:33). * Náa Biblia naʼsngúlúʼ rí itháan gíʼmaa maxmiéjunlú nindxu̱u̱ rí muxná raʼkháa rí mudrigú (Hech. 20:35). Mu musngajmá rí nandún kuyamijná ga̱jma̱a̱ nduyamajkumijná gíʼmaa mani̱ndxu̱ún xa̱bu̱ guabiinʼ. Rúʼko̱ gayambáá mu mbuyáá rí ndayóoʼ imba̱a̱, raʼkháa i̱ndó rí mambáñun ikhiin (1 Cor. 10:24).

6. Ndiéjunʼ ejmañulú rí niʼthí Steven ga̱jma̱a̱ Stephanie rá.

⁶ Mbaʼin cristianos bi̱ nidamijná kúwá gagi, numuu rí ni̱ndxu̱ún xa̱bu̱ guabiinʼ. Mbá xkri̱da, mbáa ndxájulú bi̱ mbiʼyuu Steven naʼthí: “Á mu nduyamijná xóo mbá equipo, mumbaʼyúmijná má xúʼko̱, mú itháan índo̱ narígá mbá xkujndu. Nundxaʼwami̱jna̱, ‹ndiéjunʼ rí itháan gambáyuxu rá.› Raʼkháa ‹ndiéjunʼ rí itháan gámbáyuʼ ikhúúnʼ rá.›” A̱ʼgiu̱u̱ bi̱ mbiʼyuu Stephanie, xúʼko̱ má nandxa̱ʼwáminaʼ ma̱ngaa. Naʼthí: “Nimbáa tsénigu̱u̱ʼ maxtáa jma̱a̱ mbáa bi̱ nagi̱ʼdu̱u̱ má xúʼko̱ ga̱jma̱a̱. Índo̱ nugi̱ʼdu̱xu, nunimijnaxu mbu̱ya̱a̱ náá numuu. Ikhú nutajkháanxu, nuráxnúxu i̱yi̱i̱ʼ ga̱jma̱a̱ nutamijnaxu. Nunimijnaxu munimbánii xkujndu, raʼkháa rí mugiʼduxu”. Xa̱bu̱ gajmii makuwá itháan gagi á mu na̱nguá eyáá rí guaʼdáá itháan numún ikhiin ki xóo imba̱a̱.

7. Xú káʼnii gíʼmaa mani̱ndxu̱u̱ ndxájulú bi̱ nagruigú ñajunʼ náa xuajñuu Jeobá rá.

⁷ Ikháanʼ bi̱ ni̱ndxu̱lú xa̱bi̱i̱ Jeobá, nduʼyáá dí ra̱ʼkhá tháán mba̱a̱ gamajkhu nindxu̱u̱ rí muʼni ñajuunʼ (Sal. 27:4; 84:10). Ra̱ʼkhá tháán májánʼ rí mbáa ndxájulú nandoo maʼni itháan ñajunʼ náa xuajñuu Jeobá. Náa Biblia naʼthí: “Á mu mbáa xa̱biya̱ nandoo mani̱ndxu̱u̱ superintendente, nandoo magiʼdoo mbá ñajunʼ májánʼ” (1 Tim. 3:1). Mú, á mu nakhanáá mbá ñajunʼ, xákumuu rí ikhaa itháan ndaʼyoo (Luc. 17:7-10). Gíʼmaa rí mani̱ndxu̱u̱ xa̱bu̱ guabaaʼ índo̱ gambáñun eʼwíinʼ (2 Cor. 12:15).   

8. Ndiéjunʼ ejmañuluʼ ga̱jma̱a̱ numuu Diótrefes, Uzías ga̱jma̱a̱ Absalón rá.

⁸ Náa Biblia naʼthí ga̱jma̱a̱ numún xa̱bu̱ bi̱ nindxaʼwamíjna dí guaʼdáá itháan numún. Mbá xkri̱da, Diótrefes nikumu̱u̱ rí najmañuu má xúgíʼ ga̱jma̱a̱ niniguuʼ “maʼni rí ikhaa itháan gíʼdoo numuu” náa congregación (3 Juan 9). Uzías niʼnimbamínaʼ índo̱ niʼni mbá dí Jeobá táʼthún maʼni (2 Crón. 26:16-21). Absalón nindoo mani̱ndxu̱u̱ rey, ikha jngó kaʼníí niʼni rí nindoo kaʼñún xa̱bu̱ mu mumbayíí (2 Sam. 15:2-6). Xó má nasngájma xkri̱da dí na̱ʼkha̱ raʼthí náa Biblia, Jeobá nditháan tsénigu̱u̱ʼ kaʼñúún xa̱bu̱ bi̱ i̱ndó nanigu̱u̱nʼ rí maguaʼdáá itháan numún ikhiin (Prov. 25:27). Naguáʼdáá xkujndu xa̱bu̱ bi̱ nuni mbaʼumíjna̱ ga̱jma̱a̱ bi̱ nandún rí i̱ndó ikhiin maguaʼdáá numún (Prov. 16:18).

9. Xú káʼnii xkri̱da niniñuuʼ Jesús rá.

⁹ Mú, xkri̱da ndrígóo Jesús nindxu̱u̱ mixtiʼkhu. Náa Biblia naʼthí rí: “Nixtáa xó má Dios, na̱nguá nindxa̱ʼwáminaʼ rí mani̱ndxu̱u̱ xó má Dios” (Filip. 2:6). Jeobá gíʼdoo xúgíʼ tsiakii, mú Jesús nindxu̱u̱ bi̱ maʼni a̱jmi̱i̱n bi̱ gíʼdoo itháan tsiakii. Maski ajndu xúʼko̱, na̱nguá nindxa̱ʼwáminaʼ rí ikhaa gíʼdoo itháan numuu, niʼthúún xa̱bi̱i̱: “Bi̱ naʼni xóo mbáa bi̱ itháan chíʼgíiʼ náa xúgiáanʼ ikháanʼla, ikhaa nindxu̱u̱ bi̱ itháan mba̱a̱” (Luc. 9:48). Ra̱ʼkhá tháán mitsaanʼ rí muñajunʼ mbóó gajmiúlú bi̱ ni̱ndxu̱ún precursores, siervos ministeriales,  bi̱ kuya̱ edxu̱u̱ ga̱jma̱a̱ circuito bi̱ nduyaridáá xkridoo Jesús. Á mu ni̱ndxu̱lú xa̱bu̱ guabaaʼ, xúʼko̱ nusngajmá ngajua dí rígá náa xuajñuu Dios (Juan 13:35).

10. Ndiéjunʼ gíʼmaa muʼni á mu nakumulú dí xkujndu dí rígá náa congregación tséni mbáníí májánʼ xá.

¹⁰ Ndiéjunʼ gíʼmaa muʼni á mu nakumulú dí xkujndu dí rígá náa congregación tséni mbaníí májánʼ xá. Xuxiéʼkhá, ganindxu̱lú xa̱bu̱ guabaaʼ ga̱jma̱a̱ gumbáñuun bi̱ kuya̱ edxu̱u̱ (Heb. 13:17). Ndiéjunʼ gambáyulú muʼni xúʼko̱ rá. Guraximijnalú: “Lá xkujndu rí nda̱yo̱o̱ nindxu̱u̱ mbiiʼ wéñuʼ rá. Á mu rí ndayóoʼ maguma mbáníí, lá gíʼmaa miʼni má xúgi̱ rá. Lá kaʼyoo ikhúúnʼ manimbánuu ráʼ. Á mu nandxa̱ʼo̱o̱ májánʼ edxu̱ʼ, ndiéjunʼ eʼyáʼ rá. Lá rí makuwá mbá jnduʼ náa congregación o rí mani makujmaa dí ikhúúnʼ gúʼdóʼ itháan numuʼ dxe̱ʼ.”

11. Xó má naʼthí náa Efesios 4:2, 3, xú káʼnii gakuwáánʼ á mu ni̱ndxu̱lú xa̱bu̱ guabaaʼ rá.

¹¹ Itháan gíʼdoo numuu rí manindxu̱lúʼ xa̱bu̱ guabaaʼ eʼyoo Jeobá ki xóo rí najmañulúʼ nuʼni, ga̱jma̱a̱ itháan gíʼdoo numuu dí makuwáanʼ mbá kambáxulú ki xóo rí najmáán nuʼni mbá ñajunʼ. Ikha jngó guʼni tsiakimijna manindxu̱lúʼ xa̱bu̱ guabaaʼ índo̱ nuʼni ñajuunʼ Jeobá. Xúʼko̱ gaʼni rí makuwáanʼ mbá kambáxulú náa congregación (atraxnuu Efesios 4:2, 3). * Xuniʼñááʼ ruʼtáraʼa. Guʼni rí májánʼ ga̱jma̱a̱ numún eʼwíinʼ. Guʼthúún maguwáʼ náa guʼwúlú xúgínʼ a̱ngiu̱lú, raʼkháa i̱ndó bi̱ guaʼdáá mbá ñajunʼ (Mat. 6:1-4; Luc. 14:12-14). Á mu nuʼni xúʼko̱, eʼwíinʼ mbuyáá rí ni̱ndxu̱lú xa̱bu̱ guabaaʼ raʼkháa náa i̱ndó dí najmáán nuʼnilú.

12. Ndiéjunʼ eʼthí náa Biblia ga̱jma̱a̱ numuu rí mambajxu gajmiúlú mbáa rá.

¹² Jeobá nandoo rí muríyaʼ mbiʼi makuwáánʼ gajmiúlú bi̱ kuʼñúún ga̱jma̱a̱ bi̱ nambájxu gajmiúlú (Sal. 133:1). Asndu Jesús ma̱ngaa nigiʼdiin bi̱ nimbajxuu gajkhun gajmíi̱n (Juan 15:15). Ma̱ngaa náa Biblia naʼthí rí májánʼ nindxu̱u̱ rí maraʼdiin bi̱ mambajxáaʼ gajmiáanʼ (Prov. 17:17; 18:24). Ma̱ngaa naʼthí dí ragíʼmaa muʼni waʼjimijnalú (Prov. 18:1). Mbaʼin nakumu̱ún dí Internet nambáñun muguaʼdiin mbaʼin bi̱ mambájxuun gajmiún mu xakumún rí kúwá ndajkuíin. Mú, á mu najmulú gíʼmaa muñewa̱a̱n xóo gajmulú.

13. Náá numuu rí tikhun najmún índo̱ nduyáá rí nuxuda̱nʼ náa Internet xá.

¹³ Bi̱ nunigajmaa nuthi, rí bi̱ nduyáá mbayuuʼ dí nuthi náa internet ga̱jma̱a̱ nduyáá foto rí eʼwíinʼ nuxuda̱nʼ, naʼni rí makuwá itháan gínáa ga̱jma̱a̱ nakumu̱ún rí kúwá ndajkuíín. Náá numuu rá. Mbá rí ikhaa nindxu̱u̱ rí mbaʼin nuxuda̱nʼ i̱ndó foto rí itháan mitsaanʼ rí nikúwá runi: Náa nakujmiin mitsiʼñíin, náa timii bi̱ nambajxuun gajmiún, ga̱jma̱a̱ náa itháan mitsaanʼ rí nigún. Índo̱ bi̱ nduyáá xtiʼkhu rígi̱, tikhun nakumu̱ún rí ikhiin mingíníi ma̱ngaa rí na̱nguá kúwá tsímáá. Mbáa ndxájulú bi̱ gíʼdoo 19 tsiguuʼ naʼthí: “Nigi̱ʼdu̱u̱ nijmuʼ índo̱ ndi̱yo̱o̱ rí eʼwíinʼ nuni gagimijná sábado ga̱jma̱a̱ domingo, mú ikhúúnʼ nda̱a̱ rí eni náa goʼwóoʼ”.

14. Xú káʼnii embáyulú 1 Pedro 3:8 majmulú májánʼ Internet rá.

¹⁴ Gajkhun má, Internet ma̱ndoo mambáyaʼ, mbá xkri̱da, mu maratamíjná gajmiáanʼ bi̱ kúwá náa guʼwáaʼ ga̱jma̱a̱ bi̱ nambáxa̱ʼ gajmiáanʼ. Lá nduʼyáá rí mbaʼin nuxuda̱nʼ náa Internet mu eʼwíinʼ mbuyáá rí ikhiin kúwi̱i̱n itháan májánʼ ráʼ. Nakujmaa rí nandún dí eʼwíinʼ mbuyáá ndiéjunʼ eni. Tikhun nuthi ajngáa tsaga ga̱jma̱a̱ numuu fotiúun má ikhiin o foto ndrígu̱ún eʼwíinʼ. Mú na̱nguá mbánii rígi̱ rí kaʼyoo maʼni mbáa cristiano, á mu nandoo mani̱ndxu̱u̱ xa̱bu̱ guabaaʼ ga̱jma̱a̱ makro̱ʼo̱o̱ xóo kúwá eʼwíinʼ (atraxnuu 1 Pedro 3:8). *

15. Xú káʼnii embáyulú Biblia mu xúʼni mbaʼumijna rá.

 ¹⁵ Á mu najmulú Internet, guraximijnalú: Xú káʼnii nindxu̱u̱ ajngáa rí natha, foto ga̱jma̱a̱ video rí nakuʼdánʼ rá. Lá makujmaa rí nanimbamínaʼ rá. Lá mani rí eʼwíinʼ maxígu̱u̱n ráʼ. Náa Biblia naʼthí: “Xúgíʼ dí rígá náa numbaaʼ —rí nagua̱ʼa̱ xuyulúʼ, rí nagua̱ʼa̱ idulú ga̱jma̱a̱ ma̱ngaa rí nanigulúʼ muʼni mbaʼumíjna̱ ga̱jma̱a̱ rí kuaʼdáá— tséʼkha̱ náa Anu̱lú, na̱ʼkha̱ náa numbaaʼ” (1 Juan 2:16). Bi̱ ni̱ndxu̱lú cristianos tséyulú má dí eʼwíinʼ mbuyáá dí guaʼdáá numulú. Rí nuʼni nindxu̱u̱ rí na̱ʼkha̱ náa Biblia: “Xúʼni mbaʼumijnalú, asndu xúʼni rí magiʼdu gajmiúlú eʼwíinʼ, ni má rí maxiʼgúlú kuʼyamijná” (Gál. 5:26). Á mu ni̱ndxu̱lú xa̱bu̱ guabaaʼ, xúʼni xóo xa̱bu̱ náa numbaaʼ bi̱ nuni mbaʼumijna.

16. Náá numuu rí tsíyulú muʼni mbaʼumíjna̱ rá.

¹⁶ Gíʼmaa rí manindxu̱lúʼ xa̱bu̱ guabaaʼ, numuu rí bi̱ nuni mbaʼumijna tsesngajmá rí “awáán endxa̱ʼwa̱a̱ edxu̱ún” (Rom. 12:3). Ndu̱ya̱ʼ xkujndu ga̱jma̱a̱ nundxaʼwamijna i̱ndó ga̱jma̱a̱ numún ikhiin. Ma̱ngaa, rí xóo nundxaʼwamijna ga̱jma̱a̱ rí xóo nuni gawumijná má ikhiin ga̱jma̱a̱ eʼwíinʼ xa̱bu̱. Á mu tsériʼkhuu xóo endxaʼwamijna, Gixa̱a̱ marugoo idún ga̱jma̱a̱ maʼni gachúu ku̱ma̱ ndrígu̱ún (2 Cor. 4:4; 11:3). Mú, bi̱ ni̱ndxu̱ún xa̱bu̱ guabiinʼ nduyáá májánʼ xóo muni. Awáán eyamijná ga̱jma̱a̱ nduyáá rí eʼwíinʼ itháan guaʼdáá numún (Filip. 2:3). Ma̱ngaa, nduyáá rí “Dios tsíyoo gáʼñun bi̱ nuni mbaʼumíjna̱, mú ikhaa nandoo kaʼñún xa̱bu̱ guabiinʼ” (1 Ped. 5:5). Bi̱ nduyáá májánʼ xóo muni, nandún rí Dios ma̱ndoo kaʼñúún.

17. Ndiéjunʼ gíʼmaa muʼni á mu nandulú manindxu̱lúʼ má xúʼko̱ xa̱bu̱ guabaaʼ rá.

¹⁷ Á mu nandulú manindxu̱lúʼ xa̱bu̱ guabaaʼ gíʼmaa muʼnimbánii consejo rígi̱: “Guniʼñááʼ ranindxala xóo nákha ginii ga̱jma̱a̱ rí nunila, ga̱jma̱a̱ guʼgíʼ guriʼkumijná rí xú káʼnii nindxala”. Mu muʼni rúʼko̱ ndayóoʼ mbá tsiakii mba̱a̱, numuu rí ndayóoʼ muʼnigajmaa xkri̱da ndrígóo Jesús ga̱jma̱a̱ mbuʼyaridáá xó má eʼngo̱o̱ (Col. 3:9, 10; 1 Ped. 2:21). Tsiakii rí guʼni xánindxu̱u̱ ndíí. Á mu ni̱ndxu̱lú xa̱bu̱ guabaaʼ, makuwá itháan gagi bi̱ kúwá náa guʼwúlú, makuwáanʼ mbá kambáxulú náa congregación, ga̱jma̱a̱ majmañu majmulú májánʼ Internet índo̱ nuʼtámíjná. Mú rí itháan gíʼdoo numuu nindxu̱u̱ rí Jeobá maʼni tsajkuramáanʼlú ga̱jma̱a̱ ma̱ndoo kaʼyulú.