1, 2. Bi̱ ni̱ndxu̱lú xa̱bi̱i̱ Jeobá, ndiéjunʼ dí itháan nanigulúʼ muʼthá rá.

RÍ KAʼYOO maʼtáñajunʼ Jeobá ga̱jma̱a̱ rí maguma kaʼwii mbiʼyuu, gíʼdoo wéñuʼ numuu rí xúgiáanʼ gíʼmaa mbuʼyáá. Nanigulúʼ muʼtá rígi̱ bi̱ ni̱ndxu̱lú xa̱bi̱i̱ Jeobá. A̱jma̱ rígi̱ nindxu̱u̱ mixtiʼkhu, mú, rígá mbá rí naʼni mbríguii ga̱jma̱a̱.

² Xúgiáanʼ nijmañulúʼ dí gíʼmaa muʼni kaʼwii mbiʼyuu Dios ga̱jma̱a̱ musngajmá rí xóo kaʼyoo maʼtáñajunʼ Jeobá nindxu̱u̱ itháan májánʼ. Gíʼmaa mbuʼyáá a̱jma̱ enii rígi̱ ga̱jma̱a̱ mbuʼyamajkuíí.

3. Asndu ndiéjunʼ i̱ʼwáʼ nandoo gáʼthúu̱n mbiʼyuu Jeobá rá.

³ Índo̱ nuʼthá mbiʼyuu Jeobá Dios ndrígúlú mbaʼa dí eyoo gáʼthúu̱n, asndu xóo dí kaʼyoo maʼtáñajunʼ. Ikha jngó índo̱ nuʼthá dí gíʼdoo numuu muʼni kaʼwi̱i̱ mbiʼyuu Dios, ma̱ngaa kuwáanʼ ruʼthá dí gíʼmaa musngajmá dí xóo eʼtáñajunʼ Jeobá nindxu̱u̱ itháan májánʼ. Mbiʼyuu nambáni̱i̱ ga̱jma̱a̱ rí xóo mbáa bi̱ kaʼyoo Maʼtáñajunʼ náa xúgíʼ numbaaʼ (atayáá kúgumaʼá “ I̱ʼwáʼ dí ndayóoʼ mbuʼyáá”).

4. a) Ndiéjunʼ eʼthí náa Salmo 135:13 ga̱jma̱a̱ numuu mbiʼyuu Dios rá. b) Xú káʼnii graxe̱ gúriʼña̱a̱ náa artículo rígi̱ rá.

⁴ Mbiʼyuu Jeobá nindxu̱u̱ kiejunʼ wéñuʼ (atraxnuu Salmo 135:13). * Ndíjkha rí gíʼdoo wéñuʼ numuu rá. Ndiéjunʼ nindxu̱u̱ timbá dí nini mu muni tsagáá mbiʼyuu xá. Ndiéjunʼ eʼni Dios mu maʼni kaʼwii mbiʼyuu rá. Ndiéjunʼ gándoo muʼni mu muʼtámbáyii xá. Gi̱jyooʼ gáxti̱ʼña̱a̱ graxe̱ rígi̱.

5. Índo̱ nuʼthá ga̱jma̱a̱ numuu rí muʼni kaʼwi̱i̱ mbiʼyuu Dios, ndiéjunʼ gáʼni mundxaʼwami̱jna̱ tikhun rá.

⁵ Jesús niʼthí dí índo̱ guʼtájkáan gíʼdoo wéñuʼ numuu muʼthá rígi̱: “Gaguma kaʼwi̱i̱ mbiʼyaaʼ” (Mateo 6:9). Ndiéjunʼ eyoo gáʼthúu̱n rígi̱ rá. Dí mitsúʼkháan ga̱jma̱a̱ kaʼwu. Mbáa tikhun mundxaʼwami̱jna̱: “Lá na̱nguá má mikaʼwu ga̱jma̱a̱ mitsúʼkháan mbiʼyuu Jeobá rá. Ndíjkha rí gíʼmaa muʼni kaʼwi̱i̱ rá. Mu muriʼña̱a̱ graxe̱ rígi̱, gíʼmaa mundxaʼwáá edxu̱lúʼ ndiéjunʼ i̱ʼwáʼ nandoo gáʼthúu̱n mbiʼyuu Dios.

6. Ndíjkha rí gíʼdoo wéñuʼ numuu mbiʼyuu mbáa xa̱bu̱ rá.

⁶ Mbiʼyuu mbáa xa̱bu̱ raʼkháa i̱ndó nindxu̱u̱ mbá ajngáa dí nagumaraʼmáʼ o rí najuiʼthá. Náa Biblia naʼthí: “Itháan májánʼ rí majmaʼníín xóo mbáa xa̱bu̱ bi̱ májáánʼ ki xóo dí maraʼdáá wéñuʼ” (Prov. 22:1, nota; Ecl. 7:1). Ndíjkha rí gíʼdoo wéñuʼ numuu rá. Numuu rí xóo endxaʼwami̱jna̱ eʼwíinʼ ga̱jma̱a̱ numuu mbiʼyuu, xóo muʼthá rí xóo ejmaʼnii. Na̱nguá gíʼdoo numuu xóo egumaraʼmáʼ o xóo najuiʼthá, rí itháan gíʼdoo numuu nindxu̱u̱ rí xóo endxaʼwámijna xa̱bu̱ índo̱ nudxawíín o nduyáá mbiʼi rúʼko̱.

7. Xú káʼnii eni xa̱bu̱ rí mundxaʼwami̱jna̱ dí raʼkhí ga̱jma̱a̱ numuu Dios rá.

⁷ Índo̱ nuthi dí mindu̱wa̱ʼ ga̱jma̱a̱ numuu Jeobá, naʼni mundxaʼwami̱jna̱ dí raʼkhí numuu ikhaa xóo muʼthá nuni tsagáá mbiʼyuu. Timbá aʼphu̱ rí nini mundxa̱ʼwa̱a̱ edxu̱ún dí raʼkhí numuu mbiʼyuu Dios ninindxu̱u̱ náa ixi̱ ri̱ʼi̱ Edén. Guʼyáá dí gándoo gajmañulú ga̱jma̱a̱ numuu rí nirígá ikhú.

8. Ndiéjunʼ rí nininuuʼ má Adán ga̱jma̱a̱ Eva rá. b) Xú káʼnii graxe̱ eʼni mundxaʼwamíjna̱ rá.

⁸ Adán ga̱jma̱a̱ Eva raʼkháa i̱ndó nininuuʼ mbiʼyuu Jeobá ma̱ngaa ndiyáá i̱ʼwáʼ dí gíʼdoo numuu, xóo bi̱ Niʼniwíi xúgíʼ dí rígá, bi̱ niʼni Ku̱ba̱ʼ mitsaanʼ náa makuwíin, bi̱ nixniún mbáa bi̱ májáanʼ mbu̱ya̱a̱ (Gén. 1:26-28; 2:18). Mú, lá mundxaʼwami̱jna̱ má xúʼko̱ dí Jeobá niʼni ga̱jma̱á ni̱ndxu̱ún xáʼ. Lá muni rí maʼga̱ rajo̱o̱ má xúʼko̱ ngajua dí guaʼdáá náa ikhaa ga̱jma̱a̱ dí muxna̱a̱ má xúʼko̱ núma̱aʼ xáʼ. Nikujmaa kaʼwu xóo extiʼña̱a̱ graxe̱ rígi̱ índo̱ bi̱ sia̱nʼ ga̱jma̱a̱ Dios nigruigi̱i̱n tsáʼkhá.

9. a) Xó má naʼthí náa Génesis 2:16, 17 ga̱jma̱a̱ 3:1-5, ndiéjunʼ niʼthún Jeobá Adán ga̱jma̱a̱ Eva rá. b) Ndiéjunʼ niʼni makujmaa Gixa̱a̱ rá.

 ⁹ (Atraxnuu Génesis 2:16, 17; * 3:1-5). * Gixa̱a̱ nijmiuu a̱bu̱nʼ mu maʼniuu graxe̱ Eva: “Lá gajkhun rí niʼthála Dios dí ragíʼmaa muphula xúgíʼ xndúu ixi̱ dí rígá náa ixi̱ ri̱ʼi̱ ráʼ.” Gixa̱a̱ niʼni graxe̱ rígi̱ mu Eva xákumuu kaʼyoo Dios. Dios niʼthún dí xándoo mu̱phu̱ mbóó ixi̱ dí gíʼdoo xndúu, mú, i̱ʼwáʼ ma̱ndoo. Adán ga̱jma̱a̱ Eva niguaʼdáá mbaʼa wéñuʼ enii ixi̱ dí gíʼdoo xndúu rí ma̱ndoo mu̱phu̱ (Gén. 2:9). Nikujmaa kaʼwu dí Jeobá nixnúún rí májánʼ dí gíʼdoo. Mú, ga̱jma̱a̱ graxe̱ dí niʼni Gixa̱a̱, nisngájma rí Dios na̱nguá exná dí gíʼdoo. Mbáa Eva nikumu̱u̱ dí rígá mbá rí májánʼ dí Dios naʼni gaʼduunʼ maxnúu.

10. Ndiéjunʼ dí raʼkhí niʼthí Gixa̱a̱ ga̱jma̱a̱ mbiʼyuu Dios rá. Ma̱ngaa ndiéjunʼ nirígá ga̱jma̱a̱ numuu rúʼko̱ rá.

¹⁰ Nákha niʼni graxe̱ rúʼko̱, Eva ndiʼyoo rí Jeobá nindxu̱u̱ bi̱ xóó Naʼtáñajunʼ. Numuu rí nijmuu ajngáa xóo má rí Dios niʼthúún índo̱ niriʼñuu Satanás. Asndu niʼthí dí ragíʼmaa murugua ixi̱ rúʼko̱. Ndiʼyoo má rí Dios niʼthúún dí á mu tsénimbu̱ún makhañún. Ikhú Gixa̱a̱ niʼthún: “Xaʼguanú makhañála” (Gén. 3:2-4). Xúʼko̱ niʼthí dí raʼkhí ga̱jma̱a̱ mbiʼyuu Dios, numuu rí nindoo gáʼthi dí Jeobá niʼninduwaaʼ. Xúʼko̱ niʼni dí Satanás nirtaximinaʼ Gixa̱a̱, rí nandoo gáʼthúu̱n bi̱ niʼthí dí raʼkhí. Eva niguma nduwaaʼ mbá kayuʼ ga̱jma̱a̱ ninimboo dí niʼthí Gixa̱a̱ (1 Tim. 2:14). Ninimboo kaʼyoo itháan ikhaa ki xóo Jeobá. Rúʼko̱ niʼni dí xánimboo kaʼyoo Dios, índo̱ ni̱ʼkhu̱ xndúu ixi̱ dí ikhaa niʼthí dí ragíʼmaa mikhu. Nda̱wa̱á nixnúu Adán mikhu ma̱ngaa (Gén. 3:6).

11. Ndiéjunʼ ndiyóoʼ maʼni Adán ga̱jma̱a̱ Eva rá.

¹¹ Gundxaʼwámijna mbá xngaa xú káʼnii ndiyóoʼ mariʼña̱a̱ Eva. Gundxaʼwamijna á mu niʼthún xígi̱: “Na̱nguá eniʼníín ikháán, mú i̱ndóó Anu̱ʼ Jeobá naniʼníiʼ, nandoʼ ka̱yo̱o̱ ga̱jma̱a̱ naku̱mu̱ʼ ka̱yo̱o̱. Ikhaa nixnúxu xúgíʼ dí guaʼdááxu. Xárata dí raʼkhí ga̱jma̱a̱ numuu ikhaa, ¡Ayuʼ kaníí!”. Ra̱ʼkhá tháán gáʼdxuu Jeobá á mu wáxioo nisngájma dí nindoo kaʼyoo ga̱jma̱a̱ ajngáa xóo rúʼko̱ (Prov. 27:11). Mú, ikhaa ni má Adán tusngajmáá Jeobá rí nandún kuyáá wéñuʼ. Ikhaa jngó tumbayíí mbiʼyuu Anu̱ún.

12. Xú káʼnii niʼni Gixa̱a̱ dí Eva xáʼnimboo rá. Ndiéjunʼ táʼni Adán ga̱jma̱a̱ Eva rá.

¹² Xó má ndiʼyáá Gixa̱a̱ nigi̱ʼdu̱u̱ niʼni gachúu mbiʼyuu Jeobá índo̱ niʼni rí Eva manimboo dí  ikhaa na̱nguá nindxu̱u̱ mbáa májáanʼ Anu̱u̱. Ikha jngó Adán ga̱jma̱a̱ Eva na̱nguá nitambayíí mbiʼyuu Jeobá, rúʼko̱ niʼni dí munimbún dí niʼthí Gixa̱a̱ ga̱jma̱a̱ rí xunimbún kuyáá Jeobá. Mbiʼi xúgi̱ Gixa̱a̱ naʼni ikháá kayuuʼ xó má nákha ikhú. Naʼni gachúu mbiʼyuu Jeobá índo̱ naʼthí dí raʼkhí ga̱jma̱a̱ numuu, ma̱ngaa bi̱ nunimbúún náa mindu̱wa̱ʼ, naʼni dí muni gaʼduunʼ rí Jeobá kaʼyoo maʼtáñajunʼ.

13. Ndiéjunʼ dí nagájnuriyooʼ dí na̱ʼkha̱ náa Biblia xó má naʼthí náa Ezequiel 36:23 rá.

¹³ Lá niniñuuʼ Jeobá dí muni gachíí mbiʼyuu rí asndu xaʼtambáyumi̱na̱ʼ xáʼ. Na̱nguá. Náa kañiʼ Biblia na̱ʼkha̱ raʼthí xú káʼnii Jeobá niʼni mu masngájma dí Gixa̱a̱ niʼthí náa ixi̱ ri̱ʼi̱ Edén nindxu̱u̱ mindu̱wa̱ʼ (Gén. 3:15). Dí phú gajkhun nindxu̱u̱ rí ajngáa dí itháan nagájnuriyooʼ náa Biblia nindxu̱u̱: Ga̱jma̱a̱ numuu Reino dí gajkuáa ñawúunʼ A̱ʼdióo Jeobá, naʼni kaʼwi̱i̱ mbiʼyuu ma̱ngaa naʼni marigá dí tsímáá ga̱jma̱a̱ rí jmbu náa tsu̱du̱u̱ Ku̱ba̱ʼ. Náa Biblia na̱ʼkha̱ raʼthí dí nambáyulúʼ makru̱ʼu̱lú xú káʼnii eʼni kaʼwii mbiʼyuu Jeobá (atraxnuu Ezequiel 36:23). *

14. Xú káʼnii niʼni Jeobá mu maʼni kaʼwi̱i̱ mbiʼyuu rá.

¹⁴ Mbaʼa xóo eʼni Gixa̱a̱ mu Jeobá xáʼni kaʼwi̱i̱ mbiʼyuu, mú nditháan tséʼngo̱o̱ gárikhoo. Náa Biblia na̱ʼkha̱ raʼthí xóo káʼnii eʼni Jeobá ga̱jma̱a̱ nasngájma dí nda̱wa̱a̱ nimbá xóo ikhaa. Gajkhun má rí Jeobá nigawúunʼ wéñuʼ numuu dí Gixa̱a̱ ga̱jma̱a̱ bi̱ nagún kidxuuʼ túnimbu̱ún (Sal. 78:40). Mú ikhaa ndiʼyoo májánʼ xóo maʼni, numuu rí najmañuu, naʼngo̱o̱ a̱jkiu̱u̱n ga̱jma̱a̱ naʼni rí jmbu. Ma̱ngaa mbaʼa nuthu nisngájmaa tsiakii dí nditháan tsétumuu dí gíʼdoo. Ga̱jma̱a̱ náa xúgíʼ dí naʼni nasngájmaa dí gíʼdoo ngajua (1 Juan 4:8). Jeobá nañajunʼ má xúʼko̱ mu maʼni kaʼwi̱i̱ mbiʼyuu.

15. Rí mbiʼi xúgi̱ xú káʼnii eʼni ndu̱wa̱ʼ Gixa̱a̱ ga̱jma̱a̱ numuu mbiʼyuu Dios, ga̱jma̱a̱ náá numuu eʼni xúʼko̱ xá.

¹⁵ Rí mbiʼi xúgi̱ Gixa̱a̱ naʼthí má xúʼko̱ dí mindu̱wa̱ʼ ga̱jma̱a̱ numuu Jeobá. Naʼni rí xa̱bu̱  xunimbún rí Dios gíʼdoo tsiakii, dí naʼni rí jmbu, dí najmañuu wéñuʼ ga̱jma̱a̱ rí nandoo kaʼyulú. Mbá xkri̱da, naʼni rí xa̱bu̱ makumún rí Jeobá na̱nguá xtáa. Á mu mbáa naku̱mu̱u̱ dí xtáa, ikhaa naʼni mbaʼyoo dí ikha ndrígóo nindxu̱u̱ raʼkhí ga̱jma̱a̱ rí mingíjyúuʼ muʼnimbaníí. Asndu naʼni rí xa̱bu̱ mundxaʼwami̱jna̱ dí Jeobá nindxu̱u̱ mbá Dios bi̱ tsegáwi̱i̱nʼ a̱jkiu̱u̱n numuu rí natsikhíin xa̱bu̱ náa aguʼ. Mbáa tikhun bi̱ nunimbu̱ún náa mindu̱wa̱ʼ rúʼko̱ muni gaʼduunʼ rí Jeobá kaʼyoo maʼtáñajunʼ. Xúgi̱ rí kaʼnííʼ xóó xtáa Gixa̱a̱ maʼthí má xúʼko̱ dí mindu̱wa̱ʼ ga̱jma̱a̱ numuu Jeobá ma̱ngaa maʼni rí matani tsínguminaʼ náa ikhaa. Lá maʼngo̱o̱ maʼni xó má eyoo ikhaa xáʼ.

16. Ndiéjunʼ gándoo muʼni ikháanʼ dí Adán ga̱jma̱a̱ Eva túni rá.

¹⁶ Jeobá nandoo dí ikháanʼ bi̱ ni̱ndxu̱lú xa̱bu̱ aʼkhá mumbáyii muʼni kaʼwi̱i̱ mbiʼyuu. Ikha jngó mámbáa dí ikháanʼ ma̱ndoo maʼni dí Adán ga̱jma̱a̱ Eva táʼni. Maski ajndu náa numbaaʼ dí kúwáanʼlú kúwá xa̱bu̱ bi̱ nuthi wéñiʼ ma̱ngaa nuthi dí mindu̱wa̱ʼ ga̱jma̱a̱ numuu Jeobá. Ikháanʼlu ma̱ndoo muʼthá dí gajkhun rí Jeobá nindxu̱u̱ kaʼwi̱i̱, jmbii, májáanʼ ga̱jma̱a̱ nandoo kaʼyulú (Is. 29:23). Ma̱ndoo musngajmá dí nandulú rí ikhaa maʼtáñajunlú ga̱jma̱a̱ muʼthúún xa̱bu̱ dí i̱ndó ikhaa naʼtáñajunʼ jmbu, ma̱ngaa maʼni rí makuwá tsímáá ga̱jma̱a̱ gagi xúgínʼ (Sal. 37:9, 37; 146:5, 6, 10).

17. Ndiéjunʼ niʼni Jesús mu maʼni rí majmaʼnuunʼ mbiʼyuu Anuu rá.

¹⁷ Índo̱ nuʼtámbáyii mbiʼyuu Jeobá kuwáanʼlu ruʼyáridáá Jesucristo (Juan 17:26). Jesús raʼkháa i̱ndó niʼsngáa xóo mbiʼyuu Anu̱u̱ ma̱ngaa niʼsngáa xóo phú nindxu̱u̱. Mbá xkri̱da índo̱ fariseos nisngajma ga̱jma̱a̱ rí xóo nithi dí Jeobá nindxu̱u̱ mbáa bi̱ na̱nda̱ʼa̱ rí xáʼngulú guʼni, bi̱ tsikro̱ʼo̱o̱ xóo kuwáanʼ, bi̱ nanigu̱u̱ʼ maʼni gínáanʼ ga̱jma̱a̱ bi̱ tsegáwi̱i̱nʼ a̱jkiu̱u̱n, ikhú Jesús nimbáñun xa̱bu̱ mbuyáá dí Jeobá nindxu̱u̱ bi̱ ndaʼyoo dí maʼngo̱o̱ muʼni, bi̱ nakro̱ʼo̱o̱ xóo kuwáanʼ, bi̱ nandoo kaʼyulú ga̱jma̱a̱ bi̱ nagáwiinʼ a̱jkiu̱u̱n kaʼyulú. Ma̱ngaa nimbáñun xa̱bu̱ muniʼnííʼ Jeobá numuu rí xóo nixtáa nisngájma rí ndiʼyáridoo Anu̱u̱ (Juan 14:9).

18. Xú káʼnii gándoo muʼni gaʼduunʼ índo̱ nuthi dí raʼkhí ga̱jma̱a̱ rí mindu̱wa̱ʼ numuu mbiʼyuu Jeobá xá.

¹⁸ Xó má niʼni Jesús, ma̱ndoo muʼthúún eʼwíinʼ dí nduʼyáá ga̱jma̱a̱ numuu Jeobá, muʼthá dí nandoo kaʼyulúʼ ma̱ngaa dí májánʼ a̱jkiu̱u̱n. Xúʼko̱ nuʼni gaʼduunʼ índo̱ nuthi dí raʼkhí  ma̱ngaa rí mindu̱wa̱ʼ ga̱jma̱a̱ numuu. Nuʼni kaʼwi̱i̱ mbiʼyuu Jeobá ga̱jma̱a̱ numbaʼñún xa̱bu̱ mbuyáá dí mbiʼyuu nindxu̱u̱ kaʼwu. Maski ajndu ikháanʼ ni̱ndxu̱lú xa̱bu̱ aʼkhá ma̱ndoo mbuʼyaridáá Jeobá (Efes. 5:1, 2). Xóo nuʼni ikháanʼ ga̱jma̱a̱ rí xóo nuʼthá numbáñulú xa̱bu̱ mbuyáá xú káʼnii phú nindxu̱u̱ Jeobá ma̱ngaa xúʼko̱ numbáyii Jeobá rí maʼni kaʼwi̱i̱ mbiʼyuu. Nusngajmá rí ikhaa kaʼyoo maʼtáñajunʼ índo̱ numbaʼñúún xa̱bu̱ rí xundxaʼwami̱jna̱ dí raʼkhí numuu Dios. * Ma̱ngaa nuʼni kaʼwii mbiʼyuu Jeobá índo̱ naguajunlú jmbu náa ikhaa maski ajndu ni̱ndxu̱lú xa̱bu̱ aʼkhá (Job 27:5).

19. Xó má naʼthí náa Isaías 63:7, ndiéjunʼ rí itháan dí gíʼdoo numuu muʼni índo̱ nuʼsngáa ga̱jma̱a̱ numuu Biblia rá.

¹⁹ Rígá imbo̱ʼ dí ma̱ndoo muʼni mu maʼni kaʼwi̱i̱ mbiʼyuu Jeobá. Índo̱ nuʼsngáa ga̱jma̱a̱ numuu Biblia, mbaʼa nuthu nuʼthá dí Jeobá kaʼyoo maʼtáñajunʼ. Gajkhun má rí Jeobá kaʼyoo maʼtáñajunʼ náa xúgíʼ numbaaʼ. Maski ajndu gíʼdoo numuu muʼthá ga̱jma̱a̱ numuu xtángoo ndrígóo Dios, rí itháan dí gíʼdoo numuu nindxu̱u̱ dí mumbañún xa̱bu̱ maʼndún kuʼyáá ga̱jma̱a̱ maguajún jmbu náa Jeobá. Ikha jngó gíʼmaa muʼthá itháan mbaʼa rí májánʼ dí naʼni ga̱jma̱a̱ rí xú káʼnii nindxu̱u̱ Ikhaa (atraxnuu Isaías 63:7). * Á mu nuʼni xúgi̱ káʼnii, xa̱bu̱ munimbúúnʼ ga̱jma̱a̱ maʼndún kuyáá Jeobá numuu rí nandún maguajún jmbu náa ikhaa.

20. Xú káʼnii graxe̱ gúriʼña̱a̱ náa imbo̱ʼ artículo rá.

²⁰ Ga̱jma̱a̱ numuu xúgíʼ rí ndayóoʼ mu maguma kaʼwii mbiʼyuu Jeobá. Xú káʼnii gándoo guʼyáá á mu dí xóo kuwáanʼ ru̱ʼni̱ ma̱ngaa rí xóo nuʼsngáa, nuʼni rí maʼga̱ gamajkhu náa Dios ga̱jma̱a̱ dí rúʼko̱ gaʼni rí xa̱bu̱ magún kanuu náa ikhaa xá. Náa imbo̱ʼ artículo muriʼña̱a̱ graxe̱ rígi̱.