ARTÍCULO RÍ MUʼNIGAJMAA 26
“Gagutangáanʼ náa ikhúúnʼ”
“Gagutangáanʼ náa ikhúúnʼ, ga̱jma̱a̱ ikhúúnʼ matangu̱ún náa ikháanʼla” (MAL. 3:7).
AJMÚÚ 102 Gumbáñun bi̱ nakáwabiinʼ
RÍ MUʼNIGAJMAA *
1. Xú káʼnii ku̱mu̱u̱ Jeobá índo̱ natanga̱a̱ mbáa mugu̱ bi̱ nindáti̱ga̱a̱ rá.
XÓ MÁ ndiʼyáá náa artículo dí ginii, Jeobá naʼnimbríguminaʼ xóo mbáa báxtúu bi̱ májáanʼ bi̱ nañewu̱u̱n ga̱jma̱a̱ ngajua mámbáa mugu̱ ndrígóo ma̱ngaa na̱jkha̱ gáyáaʼ bi̱ nindáti̱ga̱a̱. Mbá miʼtsú niʼthún bi̱ Israelita bi̱ nini tsíngumi̱jna̱ náa ikhaa: “Gagutangáanʼ náa ikhúúnʼ, ga̱jma̱a̱ ikhúúnʼ matangu̱ún náa ikháanʼla”. Ga̱jma̱a̱ nduʼyáá rí mbiʼi xúgi̱ nakumuu má xúʼko̱ kayuuʼ numuu rí ikhaa niʼthí “tsiriʼkuminaʼ” (Mal. 3:6, 7). Ma̱ngaa Jesús niʼthí dí Jeobá gajmíi̱n ángeles ra̱ʼkhá tháán edxún índo̱ natanga̱a̱ mbáa mugu̱ bi̱ nindáti̱ga̱a̱ (Luc. 15:10, 32).
2. Ndiéjunʼ guʼyáá náa artículo rígi̱ rá.
2 Náa artículo rígi̱ mbuʼyáá ajtsú xkri̱da dí niʼthí Jesús náa nasngájma xú káʼnii extambáñuun bi̱ ninitsingumi̱jna̱ náa Jeobá. Mbuʼyáá xú káʼnii cualidad ndayúlú mu mumbáñuun matangi̱i̱n náa ikhaa ma̱ngaa mbuʼyáa ndíjkha gíʼdoo numuu mumbaʼñúún bi̱ guabiinʼ.
GUʼYÁAʼ RÍ GÍʼDOO NUMUU DÍ NINDÁTI̱GA̱
3, 4. Náá numuu rí a̱ʼgu̱ bi̱ na̱ʼkha̱ raʼthí náa Lucas 15:8-10 ra̱ʼkhá tháán niʼni tsiakiminaʼ mu mbayáaʼ mbújkho̱o̱ rí nindáti̱ga̱ rá.
3 Rí muxkami̱i̱n bi̱ nandún matangi̱ínʼ náa Jeobá ndayóoʼ mbiʼi ga̱jma̱a̱ tsiakii. Náa i̱yi̱i̱ʼ ndrígóo Lucas, nuraxnulú mbá xkri̱da dí Jesús niʼthí ga̱jma̱a̱ numuu mbáa a̱ʼgu̱ bi̱ nindáti̱ga̱ káʼyúuʼ mbá mbújkha̱a̱ dí mbiʼyuu dracma mbá rí gíʼdoo wéñuʼ numuu. Dí nagájnuriyooʼ náa xkri̱da rígi̱ nindxu̱u̱ dí ra̱ʼkhá tháán eʼni tsiakimi̱na̱ʼ mu maxkamaa rí nindáti̱ga̱ káʼyúuʼ (atraxnuu Lucas 15:8-10). *
4 Nákha mbiʼi rí nixtáa Jesús, índo̱ nunu̱ju̱nʼ gu̱ʼu̱ bi̱ ni̱ndxu̱ún judías, tikhun rudún gu̱ʼu̱ bugi̱ nuxnún mbá 10 mbújkha̱a̱ dí mbiʼyuu dracma. Mbáa a̱ʼgu̱ bi̱ nijuiʼthá náa xkri̱da nindáti̱go̱o̱ mbá mbújkha̱a̱ rígi̱ dí plata. Nikumu̱u̱ dí nixpátrigu mbayííʼ, ikha jngó naskámuu aguʼ nayexi mbájndi, mú na̱nguá exkáma̱a̱. Mú, aguʼ na̱nguá eʼni mambiʼitiga májánʼ mu maxkamaa mbújkho̱o̱. Ikha jngó nagíʼxi̱i̱ tsumáá wéñuʼ náa xúgíʼ guʼwá. Nda̱wa̱á ndaʼyoo mbá dí naxpíbín náa yujndaʼ dí na̱gu̱xi̱i̱: ¡Nindxu̱u̱ mbújkho̱o̱ dí gíʼdoo wéñuʼ numuu! Jesús niʼthí rí ra̱ʼkhá tháán niʼni a̱jkiu̱u̱n ga̱jma̱a̱ nidxuu wéñuʼ rí asndu nidxaʼwúún bi̱ nambáxu̱u̱ gajmíi̱n ga̱jma̱a̱ bi̱ kuwa mijngii náa xtáa mu maʼthúún dí nixkamaa mbújkho̱o̱.
5. Náá numuu rí ndayóo tsiakii mbuʼñíinʼ bi̱ niniñaaʼ runi ñajuunʼ Jeobá rá.
5 Xkri̱da rí niʼthí Jesús naʼsngúlúʼ rí ndayóoʼ muʼni tsiakii mba̱a̱ mu muxkamaa mbá rí nindáti̱ga̱. Xúʼko̱ má erígá índo̱ nduʼñíinʼ bi̱ niniñaaʼ runi ñajuunʼ Jeobá. Numuu rí mbayuuʼ tsiguʼ nánguá exuʼmamijná náa congregación. Mbáa nigún gakuwa imbo̱ʼ xuajen náa a̱ngiu̱lú na̱nguá eniʼnu̱ʼ. Mú rí xúgi̱ mbáa mbaʼin dí ikhiin nandún matangi̱i̱n náa Jeobá. Nandún rí muñajunʼ mbóó gajmiún a̱ngiu̱ún, mú ndayóo rí ikháanʼ mumbaʼñún.
6. Xú káʼnii gándoo muñambáá xúgínʼ bi̱ kúwá náa congregación rí mbúñi̱i̱n bi̱ niniñaaʼ runi ñajuunʼ Jeobá rá.
6 Tsíin gándoo mbuñíinʼ bi̱ niniñaaʼ runi ñajuunʼ Jeobá rá. Xúgínʼ bi̱ kúwá náa congregación, bi̱ kuñúún, bi̱ kuya̱ edxu̱u̱, bi̱ ni̱ndxu̱ún precursor ga̱jma̱a̱ bi̱ ni̱ndxu̱ún publicador. Lá guáʼda̱a̱ mbáa bi̱ nambájxu gajmiúlú o mbáa bi̱ kuʼyáá bi̱ niniñuuʼ ra̱jkha̱ reunión ráʼ. Índo̱ nuʼtáraʼa náa kuwa mbaʼin xa̱bu̱ o náa mámbá guʼwá, lá nixkamaa mbáa bi̱ niniñuuʼ ra̱jkha̱ reunión rá. Á mu xa̱bu̱ nandoo maxnúlúʼ número ndrígóo ga̱jma̱a̱ náa xtáa, ma̱ndoo muʼthúún bi̱ kuya̱ edxu̱u̱ náa congregación ndrígúlú, á mu xtángoo xuajen náa kuwáanʼ naxnátiʼña.
7. Ndiéjunʼ ejmañaaʼ ikháán dí niʼthí mbáa bi̱ kayá edxu̱u̱ bi̱ mbiʼyuu Tomás rá.
7 Ndiéjunʼ gáʼyóoʼ muni bi̱ kuya̱ edxu̱u̱ mu muxkamin bi̱ nandún matangíinʼ náa Jeobá rá. Guʼyáá ndiéjunʼ eʼthí mbáa bi̱ kayá edxu̱u̱ bi̱ xtáa náa España bi̱ mbiʼyuu Tomás. * Ikhaa nimbáñun mbá a̱jma̱ skiñíin xa̱bi̱i̱ Jeobá matangi̱ín náa congregación. Naʼthí: “Ginii naraxu̱u̱n mbaʼin a̱ngiu̱lú bi̱ nduʼyáá náá kúwá xúgi̱ bi̱ niniñaaʼ runi ñajuunʼ Jeobá o naraxu̱u̱n bi̱ ni̱ndxu̱ún publicador á mu narmáʼáan a̱jkiún eʼni mbáa bi̱ nánguá e̱ʼkha̱ reunión. Mbaʼin nadxún índo̱ nduyáá dí mangiin kúwá ruñambáá mbuñíinʼ. Nda̱wa̱á, índo̱ na̱jkhá gáñu̱u̱ a̱ngiu̱lú bi̱ niniñaaʼ runi ñajuunʼ Jeobá, naraxu̱u̱n xú káʼnii kúwá e̱jñún o bi̱ kuñúún. Tikhun bi̱ niniñaaʼ runi ñajuunʼ Jeobá nigún kudiin e̱jñún náa reunión, mbáa ikhiin niguánu ninindxu̱ún publicador. Ikha jngó mangiin ndayóo mixtambáñúún matangi̱ín náa Jeobá”.
GUMBÁÑUUN BI̱ NINDÁTI̱GI̱I̱N MU MATANGI̱ÍN NÁA JEOBÁ
8. Xó má naʼthí náa Lucas 15:17-24, xú káʼnii niʼniuu a̱ʼdióo bi̱ nigáwiinʼ a̱jkiu̱u̱n mbáa xa̱bu̱ nikhi̱i̱ rá.
8 Xú káʼnii cualidad gíʼmaa musngajmá á mu nandulúʼ mumbáñuun bi̱ nandún matangi̱ín náa Jeobá rá. Guʼyáá xú káʼnii ikha eʼsngúlúʼ xkri̱da ndrígóo dxámá bi̱ nindáti̱ga̱a̱ (atraxnuu Lucas 15:17-24). * Jesús niʼthí rí nda̱wa̱á dxámá nigíiʼ a̱jkiu̱u̱n, ikha jngó niraʼwíí mata̱nga̱a̱ goʼwóoʼ. Anu̱u̱ dxámá nigáyúu gatsijnuu ga̱jma̱a̱ ndiyaráʼa mu masgájmuu rí nandoo kaʼyoo má xúʼko̱. Dxámá niʼni gawúunʼ ku̱ma̱ ndrígóo rí asndu nindxa̱ʼwáminaʼ dí rakáʼyoo maʼthúu̱n dí nindxu̱u̱ a̱ʼdióo. Anu̱u̱ dxámá nagáwiinʼ a̱jkiu̱u̱n kaʼyoo a̱ʼdióo numuu rí ndiʼyoo rí naʼthúu̱n xóo ku̱mu̱u̱ ga̱jma̱a̱ rí nagáwiinʼ a̱jkiu̱u̱n. Ikha jngó naʼni dí marigá ndxa̱a̱ ma̱ngaa naʼtáñajunʼ dí muxnáá magíiʼ xtíin rí itháan májánʼ. Xúʼko̱ nasngájma rí nigruiguíi xóo mbáa a̱ʼdióo bi̱ nandoo kaʼyoo ra̱ʼkhá xóo mbáa bi̱ nañajunʼ ga̱jma̱a̱.
9. Xú káʼnii cualidad gíʼmaa maguaʼdáá mu mumbáñuun bi̱ niniñaaʼ runi ñajuunʼ Jeobá matangi̱ín náa ikhaa xá. (Atayáá kúgumaʼá “ Xú káʼnii gumbáñuun bi̱ nandún matangi̱ín rá.”)
9 Jeobá nindxu̱u̱ xóo xa̱bu̱ nikhi̱i̱ náa xkri̱da rígi̱. Nandoo kaʼñúún a̱ngiu̱lú bi̱ niniñaaʼ runi ñajuunʼ ga̱jma̱a̱ nandoo matangi̱ín náa ikhaa. Á mu nduʼyaridáá, ma̱ndoo mumbaʼñúún matangi̱ín. Mú, ndayóoʼ dí ikháanʼlu maʼngo̱o̱ a̱jkiu̱lú, makru̱ʼu̱lú xóo kúwá ga̱jma̱a̱ musngajmá rí nandulú kuʼñúún. Náá numuu rí nda̱yúlúʼ cualidad rígi̱, ga̱jma̱a̱ xú káʼnii gándoo musngajmá rá.
10. Náá numuu rí ndayóo maʼngo̱o̱ a̱jkiu̱lú mu mumbáyii mbáa bi̱ niniñuuʼ ra̱jkha̱ reunión rá.
10 Ndayóoʼ rí maʼngo̱o̱ a̱jkiu̱lú numuu rí ndayóo mbayuuʼ mbiʼi rí xa̱bu̱ buʼko̱ mambaxúu mbu̱júu̱ ga̱jma̱a̱ Jeobá. Mbaʼin a̱ngiu̱lú bi̱ niniñaaʼ runi ñajuunʼ Jeobá nákha ginii, nuthi rí bi̱ kuya̱ edxu̱u̱ ga̱jma̱a̱ eʼwíinʼ a̱ngiu̱lú bi̱ kúwá náa congregación ndiyóoʼ magún gúñún mbaʼa nuthu nákha xóó tsétangiin náa Jeobá. Mbáa ndxájulú bi̱ mbiʼyuu Nancy, bi̱ naʼkha̱ náa sureste ndrígóo Asia, niʼnirámáʼ: “Mbáa bi̱ ra̱ʼkhá tháán májánʼ nimbáxuʼ gajmuʼ náa congregación nimbáyuʼ wéñuʼ. Nindoo kaʼyoʼ xóo ndxájuu bi̱ giʼnii. Niʼni marmáʼáan a̱jkiu̱nʼ rí májánʼ ninixu mbóó. Índo̱ nathu̱u̱n xóo ku̱mu̱ʼ, niʼdxaunʼ májánʼ wéñuʼ ga̱jma̱a̱ nixnúʼ consejo. Ninindxu̱u̱ mbáa bi̱ gajkhun nimbáxuʼ gajmuʼ, ikhaa nixtáa má xúʼko̱ mu mambáyuʼ náa ndiyóoʼ”.
11. Náá numuu rí ndayúlú makru̱ʼu̱lú xóo eku̱mu̱u̱ mbáa bi̱ nigawúu̱n eʼni mbáa rá.
11 Índo̱ mbáa nakiʼnáa ga̱jma̱a̱ mbáa, nindxu̱u̱ xóo índo̱ na̱ʼkhu̱ wéñuʼ náa nigawúunʼ. Rí makru̱ʼu̱lú xóo kumún nindxu̱u̱ xóo mbá thana dí mambáyúu maʼni a̱jkiu̱u̱n. Tikhun bi̱ niʼni gawúúnʼ mbáa ndxájulú bi̱ xtáa náa congregación ikha jngó niniñaaʼ ragún reunión, niyexi̱i̱ má xúʼko̱ sia̱nʼ mbayuuʼ tsiguʼ. Ikha jngó tsíñún matangi̱ín náa Jeobá. Tikhun mbáa nundxa̱ʼwa̱míjna̱ rí nigumiin mbá dí raʼkhí. Nda̱ñúunʼ rí mbáa maʼdxaun ga̱jma̱a̱ makru̱ʼu̱u̱n xóo ekumún (Sant. 1:19). Mbáa ndxájulú bi̱ mbiʼyuu María, bi̱ niniñuuʼ ra̱jkha̱ reunión, naʼthí: “Ndiyóoʼ mbáa bi̱ mathu̱u̱n xóo ekumuʼ, mbáa bi̱ mambáyuʼ, mbáa bi̱ maxnúʼ xpajpoo náa ma̱ndoo mambi̱ya̱ʼ”.
12. Xú káʼnii nindxu̱u̱ ngajua ndrígóo Jeobá xóo mbá jñuu rá.
12 Náa Biblia naʼthí rí ngajua dí gíʼdoo Jeobá náa xa̱bi̱i̱ nindxu̱u̱ xóo mbá jñuu. Xú káʼnii rá. Guʼgíʼ mbá xkri̱da. Atsaʼwáminaʼ rí ikháán na̱jkha̱ kañán ñambo̱o̱ rí mixkujyuuʼ wéñuʼ, mú, mbáa bi̱ wíji̱ náa rawuunʼ iyaʼ na̱da̱ʼ mbá jñuu rí mambáyaʼ mu xáʼga̱ kañán. Mú, ra̱ʼkhá i̱ndó rí murajtun jñuu gáʼyóoʼ. Numuu dí ñambo̱o̱ ra̱ʼkhá tháán mixkujyuuʼ, mu makríñanʼ ndayóoʼ rí mbáa maxumuuʼ jñuu mu magajnáaʼ náa ñambo̱o̱. Xúʼko̱ niʼthún Jeobá bi̱ israelita bi̱ nini tsingumijna náa ikhaa: “Nini rí maguwáʼ ga̱jma̱a̱ jñuu ndrígóo ngajua” (Os. 11:4). Rúʼko̱ rí nandoo Dios maʼni gajmíi̱n bi̱ niniñaaʼ runi ñajuunʼ ma̱ngaa bi̱ guaʼdáá wéñuʼ xkujndu ga̱jma̱a̱ naxmiéjuunʼ. Nandoo rí ikhiin mbuyáá rí Jeobá nandoo kaʼñún ga̱jma̱a̱ rí mambáñun matangi̱ín. Ga̱jma̱a̱ ikhaa ma̱ndoo maʼni dí ikháanʼ musngajmá ngajua rúʼko̱.
13. Xú káʼnii esngájma rí xóo nigíʼnuu Pablo dí ngajua rí guaʼdáá maʼni rí bi̱ niniñaaʼ runi ñajuunʼ Jeobá matangi̱ín náa ikhaa xá.
13 Gíʼdoo wéñuʼ numuu muʼthúún rí Jeobá nandoo kaʼñúún ga̱jma̱a̱ rí ikháanʼlu nandulú kuʼñúún bi̱ niniñaaʼ runi ñajuunʼ Jeobá. Pablo bi̱ niʼthá náa artículo rí ginii, niniñuuʼ ra̱jkha̱ reunión itháan dí mbá skíñúʼ gu̱wa̱ʼ tsiguʼ, naʼthí: “Mbá miʼcha̱ índo̱ nigájnuʼ náa goʼwóoʼ, mbáa ndxájulú nikhi̱i̱ niraxúún ga̱jma̱a̱ niʼthúnʼ ma̱ngaa nisngájmuʼ dí nandoo kaʼyoʼ. Nimbiyaʼ xóo mbáa ada̱. Ni̱thu̱u̱n rí asndu xóo Jeobá nikuʼmaa ma̱ʼkha̱ mu maʼtámijná ga̱jma̱á ni̱ndxu̱ʼ. Ikhú niraʼwíí rí matangaán náa Jeobá”.
GUMBAʼÑÚÚN GA̱JMA̱A̱ NGAJUA BI̱ GUABIINʼ
14. Xó má naʼthí náa Lucas 15:4, 5, ndiéjunʼ eʼni mbáa báxtúu índo̱ naxkamaa mbáa mugu̱ bi̱ nindáti̱ga̱a̱ rá.
14 Índo̱ bi̱ niniñaaʼ runi ñajuunʼ Jeobá natangi̱ín, gíʼmaa rí mumbáñuun má xúʼko̱ ga̱jma̱a̱ rí muxnún má xúʼko̱ tsiakii. Mbáa nagawúunʼ wéñuʼ, xóo dxámá bi̱ nindáti̱ga̱a̱ náa xkri̱da dí niʼthí Jesús. Ma̱ngaa numuu rí naguwáanʼ náa numbaaʼ ndrígóo Gixa̱a̱, mbáa na̱nguá mbájxuun májánʼ gajmiún Dios. Ikha jngó ndayóo mumbaʼñúún rí maguaʼdáá mbu̱júu̱ fe náa Jeobá. Náa xkri̱da dí niʼthí Jesús ga̱jma̱a̱ numuu mugu̱ bi̱ nindáti̱ga̱a̱, ikhaa niʼthí dí báxtúu nagui̱i̱ náa xpajpoo ga̱jma̱a̱ na̱jkha̱a̱ kayáa náa kúwá a̱ngui̱i̱n. Báxtúu niríyaʼ má mbiʼi ga̱jma̱a̱ tsiakii mu mbayáaʼ. Mú ndaʼyoo rí ndayóoʼ mambáyúu mata̱nga̱a̱ numuu rí ikhaa na̱nguá gíʼdoo tsiakii ma̱ʼkha̱a̱ mbáwíi (atraxnuu Lucas 15:4, 5). *
15. Xú káʼnii gándoo mumbáñuun bi̱ guabiinʼ bi̱ nandún matangi̱ín náa Jeobá rá. (Atayáá kúgumaʼá “ Mbóo i̱yi̱i̱ʼ dí ra̱ʼkhá tháán gíʼdoo numuu”.)
15 Mbáa mbaʼyóoʼ muriʼyáaʼ mbayuuʼ mbiʼi ga̱jma̱a̱ tsiakii mu mumbáñuun mambájxuun májánʼ gajmiún Dios bi̱ niniñaaʼ runi ñajuunʼ Jeobá (Rom. 15:1). Nambáyulúʼ xi̱ʼ kaʼwu ndrígóo Jeobá, Ajngá rawuunʼ, ga̱jma̱a̱ i̱yi̱i̱ʼ dí nakhánulú náa xuajñuu. Xú káʼnii gándoo mumbáñuun xá. Mbáa bi̱ kayá edxu̱u̱ bi̱ mbayuuʼ má nambáñun naʼthí: “Índo̱ nuraʼwíí rí matangi̱ín, mbaʼin bi̱ niniñaaʼ runi ñajuunʼ Jeobá ndayóoʼ rí mbáa publicador mambáñún maʼnigajmaa Biblia”. * Ikha jngó á mu mbáa bi̱ kayá edxu̱u̱ naʼthúlúʼ rí mumbáyii mbáa bi̱ niniñuuʼ ra̱ʼkha̱ reunión, guʼni ga̱jma̱a̱ gagi. Ikhaa má bi̱ kayá edxu̱u̱ naʼthí xóó: “Bi̱ niniñaaʼ runi ñajuunʼ Jeobá nda̱ñúunʼ rí publicador mani̱ndxu̱u̱ mbáa bi̱ ma̱ndoo mambaxúu májánʼ gajmiún, mbáa bi̱ ma̱ndoo makumún kuyáá”.
NARÍGÁ GAGI NÁA MEKHU GA̱JMA̱A̱ NÁA KU̱BA̱ʼ
16. Xú káʼnii eʼyáá dí numbayúlúʼ ángeles rá.
16 Rígá mbaʼa experiencia náa nakujmaa rí ángeles nuñambáá mu muxkamii bi̱ niniña̱a̱ʼ runi ñajuunʼ Jeobá bi̱ nandún matangi̱ín (Apoc. 14:6). Mbá xkri̱da, Silvio, bi̱ na̱ʼkha̱ náa Ecuador, nindo̱ʼo̱o̱ Jeobá rí mambáyúu mata̱nga̱a̱ náa congregación. Índo̱ xtáa raʼtákháñuu Jeobá, niwáán timbre dí rígá náa goʼwóo. Ni̱ndxu̱ún a̱jmi̱i̱n bi̱ kuya̱ edxu̱u̱, mbiʼi má rúʼko̱ nigi̱ʼdi̱i̱ nimbayíí.
17. Xú káʼnii eʼni makuwáanʼlu índo̱ numbaʼyíí mbáa bi̱ guabaaʼ rá.
17 Rí mumbáñuun bi̱ guabiinʼ matangi̱ín náa Jeobá maʼni rí makuwáanʼ wéñuʼ gagi. Guʼyáá dí naʼthí Salvador, mbáa precursor bi̱ naʼniminaʼ wéñuʼ mu mambáñún bi̱ niniña̱a̱ʼ runi ñajuunʼ Jeobá: “Nguáná nambiyaʼ numuu dí ra̱ʼkhá tháán nadxuʼ índo̱ nandxaʼwamínaʼ rí Jeobá niʼnikríyaaʼ náa numbaaʼ ndrígóo Gixa̱a̱ mbáa mugiu̱u̱ bi̱ nandoo kaʼyoo wéñuʼ ma̱ngaa rí ikhúúnʼ nindoo nimbáyúu Jeobá” (Hech. 20:35).
18. Á mu ikháán nitatsiñaaʼ ratani̱ ñajuunʼ Jeobá, ndiéjunʼ rí ma̱ndoo matayaa gajkhun rá.
18 Á mu ikháán nitatsíñaaʼ radxuʼ náa xuajñuu Jeobá, ma̱ndoo matayaa gajkhun rí Dios nandoo kaʼyaaʼ má xúʼko̱ ga̱jma̱a̱ rí nandoo matangaán. Mú, rígá tikhu rí ndayóoʼ matani. Garmáʼáanʼ a̱jkia̱nʼ xa̱bu̱ nikhi̱i̱ bi̱ na̱ʼkha̱ raʼthí náa xkri̱da ndrígóo Jesús. Jeobá xtáa ragíʼthun dí ikháán matangaán náa xuajñuu, ga̱jma̱a̱ rí ikhaa magruiʼguíín májánʼ.
AJMÚÚ 103 Bi̱ kuya̱ edxu̱u̱ ni̱ndxu̱ún bi̱ Dios nimínáanʼlu
^ párr. 5 Jeobá naʼthúún: “Gagutangáanʼ náa ikhúúnʼ” bi̱ mbayuuʼ má nánguá etaraʼa ga̱jma̱a̱ niniña̱a̱ʼ raguwáaʼ reunión. Xúgiáanʼ ma̱ndoo muxnúún tsiakii ikhiin bi̱ nandún mudrigú ajngáa rúʼko̱. Náa artículo rígi̱ mbuʼyáá xú káʼnii gándoo mumbáñuun matangi̱ín.
^ párr. 3 Lucas 15:8-10: “O tsáa lá a̱ʼguíiʼ bi̱ gíʼdoo gu̱wa̱ʼ mbújkha̱a̱ rí nagumbiʼyuu dracma mú nindáti̱go̱o̱ mbóoʼ, lá xaskámuu aguʼ ga̱jma̱a̱ magíʼxi̱i̱ goʼwóoʼ mu mbayáaʼ tsumáá asndu maxkamaa xáʼ. Ga̱jma̱a̱ índo̱ naxkamaa, nadxaʼwúún bi̱ nambáxu̱u̱ gajmíi̱n ma̱ngaa bi̱ kúwá mijngii náa xtáa mu maʼthúún: ‹¡Gaʼdxalá ga̱jma̱á ni̱ndxu̱ʼ, numuu rí nixka̱ma̱a̱ mbújkha̱a̱ dracma rí nindátigoʼ!›. Nathalá rí xúʼko̱ má kayuuʼ nadxún ángeles ndrígio̱o̱ Dios, índo̱ natanga̱a̱ a̱jkiu̱u̱n mbáa bi̱ nikudaminaʼ aʼkhá.”
^ párr. 7 Nixtiʼkhu̱u̱ mbiʼñún tikhun
^ párr. 8 Lucas 15:17-24: “Índo̱ nigíiʼ a̱jkiu̱u̱n, niʼthí: ‹¡Ra̱ʼkhá tháán mbaʼin bi̱ nuñajunʼ gajmíi̱n anu̱ʼ rí asndu napídunʼ rí naʼphu̱, mú ikhúúnʼ gi̱jyooʼ nandoo gakháñú xki̱dxu̱ʼ! Matangaán náa goʼwóo anu̱ʼ. Mathu̱u̱n: “Anu̱ʼ, nikuʼdáminaʼ aʼkhá náa Dios ga̱jma̱a̱ náa ikháán. Nánguá kaʼyoʼ marathu̱nʼ dí ni̱ndxu̱ʼ a̱ʼdiáaʼ. Ataniuʼ xóo mbáa bi̱ nañajunʼ ga̱jma̱á ni̱ndxa̱ʼ”›. Ikha jngó nitanga̱a̱ náa goʼwóo anu̱u̱. Índo̱ ikhaa kaʼnííʼ xtáa raʼkha̱a̱ mitsínguánʼ, anu̱u̱ niʼngo̱o̱ ndiʼyoo ga̱jma̱a̱ ra̱ʼkhá tháán nigáwiinʼ a̱jkiu̱u̱n. Nigáyúu gátsijnuu, ndiyaráʼaa ga̱jma̱a̱ nixnúu beso jma̱a̱ xúgíʼ a̱jkiu̱u̱n. Ikhú dxámá niʼthúu̱n: ‹Anu̱ʼ, nikuʼdáminaʼ aʼkhá náa Dios ga̱jma̱a̱ náa ikháán. Nánguá kaʼyoʼ marathu̱nʼ dí ni̱ndxu̱ʼ a̱ʼdiáaʼ›. Mú, anu̱u̱ dxámá niʼthúún ñumbáá ndrígóo: ‹¡Gáʼchala! Guríyáʼ xtíin rí mbi̱jua̱ rí itháan májánʼ mu mugíiʼla. Guxuʼdáaʼ mbáa anillo náa a̱ʼdióo ñawúunʼ ga̱jma̱a̱ raxtá náa rajkúu. Ma̱ngaa gaguwaʼ kuya̱a̱ mbáa aʼdá xédé bi̱ mba̱a̱, guxíyaalá mu muʼphíí, guʼni ndxa̱a̱ numuu rí ni̱ʼkha̱a̱, numuu rí a̱ʼdióoʼ bugi̱ nákha ginii nikháñuu, mú ni̱ga̱bi̱i̱, nindáti̱ga̱a̱, mú nixka̱ma̱a̱›. Ikhú nigi̱ʼdi̱i̱ nikúwá gagi.”
^ párr. 14 Lucas 15:4, 5: “Tsáa mbáa dí ikháanʼ, á mu gíʼdiin mbá 100 mugu̱, mú, mbáa dí ikhaa nandáti̱ga̱a̱, lá xaniñúún bi̱ mbá 99 náa xáná mu maʼga̱ gáyáaʼ bi̱ nindáti̱ga̱a̱ asndu maxkamaa xáʼ. Índo̱ naxkamaa, natamaaʼ náa xpajpoo ga̱jma̱a̱ ra̱ʼkhá tháán nadxuu.”
^ párr. 15 Tikhun bi̱ niniñaaʼ runi ñajuunʼ Jeobá ma̱ndoo mambáñún á mu nunigajmaa tikhu rí na̱ʼkha̱ raʼthí náa libro dí Guni rí Dios ma̱ndoo kaʼyalá, mú tikhun ma̱ndoo mambáñún munigajmaa tikhu rí na̱ʼkha̱ náa libro Acerquémonos a Jehová. Comité bi̱ nuxna Ikha náa Congregación mbuyáá tsáa bi̱ ma̱ndoo mambáyúu bi̱ niniñuuʼ raʼni ñajuunʼ Jeobá.
^ párr. 71 NAʼTHÍ NUMUU XTIʼKHU: Ajtsíin bi̱ mixtiʼkun a̱ngiu̱lú numbayíí mbáa bi̱ niniñuuʼ raʼni ñajuunʼ Jeobá bi̱ nandoo mata̱nga̱a̱. Índo̱ nutamijná má xúʼko̱ gajmiún, nutháán rí nandún kuyáá má xúʼko̱ ga̱jma̱a̱ nudxawíín dí ikhaa naʼthí.
