Náa versículo rígi̱ na̱ʼkha̱ raʼthí mbá mijna gu̱wa̱ʼ cualidad rí gíʼmaa maguaʼdáá cristiano. Ikhí naʼthí: “Xi̱ʼ kaʼwu nambáyulúʼ muguaʼdáá ngajua, gagi, tsímáá, rí maʼngo̱o̱ a̱jkiu̱lúʼ, manindxu̱lúʼ xa̱bu̱ májáanʼ, muʼni rí májánʼ, fe, rí xákiʼnááʼ, rí muñewa̱a̱n rí muʼni”. Mú, ra̱ʼkhá i̱ndó rígi̱ nindxu̱u̱ cualidad rí naxnulúʼ xi̱ʼ kaʼwu ndrígóo Dios mu mambáyulúʼ musngajmá.

Guʼyáá dí niʼnirámáʼ apóstol Pablo náa versículo rí na̱ʼkha̱ tsudií: “Rí naʼni xuwiʼ [...] nindxu̱u̱ bi̱ nuxuda̱mi̱jna̱ aʼkhá gajmiún mbáa, bi̱ nuni rí mitsaga wéñuʼ, bi̱ nuxuda̱mi̱jna̱ aʼkhá rí asndu tsítiñuunʼ nditháan, bi̱ nduyamajkhún xándú, bi̱ nuni xawan, bi̱ naguaʼdáá sia̱nʼ kuyamijná, bi̱ nuxmijná, bi̱ naxíñu̱u̱n, bi̱ najmangunʼ wéñuʼ, bi̱ nagiʼdu̱u̱n má xúʼko̱, bi̱ nuniwajimijna, bi̱ nuniwajimijna mu murtaxi̱i̱ ku̱ma̱ ndrígóo Dios, bi̱ naxígu̱u̱n, bi̱ najngi̱i̱n, bi̱ tsiñewa̱a̱n rí eni índo̱ nagún náa ndxa̱a̱, ga̱jma̱a̱ i̱ʼwáʼ dí xóo rígi̱” (Gál. 5:19-21). Mú rígá i̱ʼwáʼ rí ma̱ndoo maʼthí Pablo rí “naʼni xuwiʼ” xóo rí na̱ʼkha̱ raʼthí náa Colosenses 3:5. Xúʼko̱ má kayuuʼ niʼni apóstol índo̱ niʼthí mbá mijna gu̱wa̱ʼ cualidad dí májánʼ rí na̱ʼkha̱ raʼthí náa Gálatas 5:22, 23. Náa lista rúʼko̱, na̱nguá niʼnirámáʼ xúgíʼ cualidad dí na̱ʼkha̱ náa xi̱ʼ kaʼwu.

Nuʼthá xígi̱ numuu dí índo̱ nuʼni mbrígui̱i̱ dí naʼthí náa Gálatas ga̱jma̱a̱ rí Pablo niʼnirámáʼ náa congregación dí rígá náa Éfeso: “Numuu rí bi̱ xtáa náa aguʼ naʼni xúgíʼ dí na̱ʼkha̱ ikhí, xóo índo̱ naʼni xúgíʼ eni dí májánʼ, naʼni rí jmbu ga̱jma̱a̱ naʼthí dí gajkhun” (Efes. 5:8, 9). Xó má eʼyáá “muʼni rí májánʼ”, ma̱ngaa muʼni rí jmbu ga̱jma̱a̱ muʼthá rí gajkhun, nindxu̱u̱ dí na̱ʼkha̱ “náa aguʼ”, mú ma̱ngaa nindxu̱u̱ mbá dí na̱ʼkha̱ náa “xi̱ʼ kaʼwu”. Maski ajndu Pablo na̱nguá niʼthí rí muʼni dí jmbu ga̱jma̱a̱ muʼthá rí gajkhun náa Gálatas 5:22, 23, mú ma̱ngaa ma̱ndoo maʼthí jnu.

Xúʼko̱ má kayuuʼ índo̱ Pablo niʼthúu̱n Timoteo rí gíʼmaa magiʼdoo mbá majun cualidad rígi̱ índo̱ niʼthúu̱n: “Atayáaʼ matani rí jmbu, rí mbiyamajkuíí Dios, rí maraʼdáá fe, ngajua, rí maʼnga̱a̱ ga̱jma̱a̱ rí xákiʼnáá” (1 Tim. 6:11). Káaʼ ajtsú dí na̱ʼkha̱ náa lista dí na̱ʼkha̱ náa “xi̱ʼ kaʼwu”, ikhaa nindxu̱u̱, fe, ngajua ga̱jma̱a̱ rí xákiʼnááʼ. Mú Timoteo ndiyóoʼ ikha ndrígóo xi̱ʼ kaʼwu mu masngájma i̱ʼwáʼ cualidad dí Pablo niʼthúu̱n xóo: Maʼni rí jmbu, rí maʼni ñajuunʼ i̱ndó Dios, ga̱jma̱a̱ rí maʼngo̱o̱ (atayáá ma̱ngaa dí na̱ʼkha̱ náa Colosenses 3:12; 2 Pedro 1:5-7).

Ikha jngó náa Gálatas 5:22, 23 na̱nguá eʼthí xúgíʼ cualidad dí na̱ʼkha̱ náa xi̱ʼ kaʼwu ndrígóo Dios dí gíʼmaa maguaʼdáá cristianos. Rígi̱ ma̱ndoo mambáyulúʼ musngajmá mbá mijna gu̱wa̱ʼ dí na̱ʼkha̱ náa “xi̱ʼ kaʼwu”. Mú rígá i̱ʼwáʼ cualidad rí ma̱ndoo mambáyulúʼ mu manindxu̱lúʼ mbáa cristiano bi̱ najmañuu rí “gíʼmaa muriʼkhumijná dí xóo xa̱bu̱ ni̱ndxu̱lú, dí muʼni rí jmbu ma̱ngaa muʼthá rí gajkhun xó má nandoo Dios” (Efes. 4:24).