XÚGIÁANʼ nduʼyáá dí Jeobá naxnúu ikha ga̱jma̱a̱ nañewu̱u̱n xuajñuu náa “iwáá mbiʼi” rígi̱ (2 Tim. 3:1). Mú, mámbáa dí ikháanʼ kaʼyoo maʼnimbo̱o̱. Xóo kuwáánʼ xúgi̱ nindxu̱u̱ xóo nikúwá bi̱ israelitas nákhá wájyúuʼ náa mbaaʼ mixooʼ. Ikhiin ndiyóoʼ munimbu̱ún índo̱ nawáán trompeta.

Jeobá niʼthúu̱n Moisés: “Atani a̱jma̱ trompeta ndrígóo plata dí matiejuínʼ ga̱jma̱a̱ martillo, ikhaa gajmaaʼ matagímbíin xa̱bu̱ israel ma̱ngaa mu muxkuijxi̱i̱ guʼwá xtíin ndrígu̱ún matuxu̱u̱n magún” (Núm. 10:2). Bi̱ ni̱ndxu̱ún ndxajkun ndiyóoʼ mudi̱i̱ trompeta mixtiʼkhu enii mu israelita mbuyáá ndiéjunʼ gúni (Núm. 10:3-8). Rí mbiʼi xúgi̱, xa̱bi̱i̱ Dios ma̱ngaa nundrigú mbaʼa enii xóo “nawáán trompeta”. Guʼyáá ajtsú xkri̱da rí xóo nambánii ga̱jma̱a̱ dí nidi̱i̱ trompeta nákhá wájyúuʼ: Índo̱ nutulúʼ mu̱ʼgua̱ náa nagimbáanʼ mbaʼánʼ, índo̱ nutún rí majuiʼsngúún bi̱ kuya̱ edxu̱u̱ ga̱jma̱a̱ índo̱ nuxna imbo̱ʼ nuxi̱ʼ ikha náa congregación.

Índo̱ Jeobá nandoo rí “xúgínʼ xa̱bu̱ israel” magimbíin náa inuu tabernáculo, bi̱ ni̱ndxu̱ún ndxajkun nudi̱i̱ a̱jma̱ trompeta (Núm. 10:3). Xúgínʼ israelita bi̱ kúwá náa a̱jkhu̱ níjniúu tabernáculo nudxawíín xóo nawáán trompeta. Mbáa israelita bi̱ kúwá mijngii tséjyúu má eguáʼnu. Mú, bi̱ kúwá itháan mitsínguánʼ ndajñúún itháan ga̱jma̱a̱ ndiyóoʼ muni itháan tsiakii mu muguáʼnu. Tséʼniuu má asndu xú káʼnii, Jeobá nindoo rí xúgínʼ magimbíin ga̱jma̱a̱ mudxawíín ikha rí gáxná.

Rí mbiʼi xúgi̱, ma̱ngaa najuiʼtulú mu̱ʼgua̱ náa nagimbáanʼ mbaʼánʼ. Mú, na̱nguá ejkua náa mbá tabernáculo, ikháanʼ na̱jkua̱ náa nagimbáanʼ rí ajtsú mbiʼi ga̱jma̱a̱ i̱ʼwáʼ reunión gajunʼ dí naguaʼdáálu náa najuiʼtúlúʼ ga̱jma̱a̱ nuxnulúʼ ikha rí gíʼdoo numuu. Náa xúgíʼ numbaaʼ, xa̱bi̱i̱ Dios bi̱ nagún ikhí nudxawíín ikháá má programa xóo mbóo xuajen gagi. Mu makuwíin, tikhun ndayóoʼ magún mitsínguánʼ wéñuʼ ki xóo eʼwíinʼ. Mú, xúgínʼ bi̱ nagún nduyáá rí gíʼdoo má numuu tsiakii rí nuni.

Mú, xú káʼnii erigá náa kúwá nguéjmi̱i̱n bi̱ naʼniún mitsínguánʼ wéñuʼ magún náa nagimbíi̱n mbaʼin rá. Ga̱jma̱a̱ numuu dí rígá ajua̱nʼ nuxi̱ʼ, mbaʼin dí ikhiin nandoo nduyáá programa dí narígá ga̱jma̱a̱ nakumu̱ún rí asndu mangiin kúwá ikhí. Mbá xkri̱da, nákha ni̱ʼkha̱ bi̱ na̱ʼkha̱ náa guʼwá rí naxná ikha náa Betel ndrígóo Benín, nini makujmaa programa náa Arlit (Níger), mbá xuajen rí gíʼdoo mina dí rígá náa mbaaʼ mixooʼ ndrígóo Sahara. Nikúwá mbá 21 a̱ngiu̱lú ga̱jma̱a̱ xa̱bu̱ bi̱ ninigu̱u̱nʼ mudxawíín. Maski ajndu nikúwá mitsínguánʼ wéñuʼ náa kúwá bi̱ 44,131 bi̱ nikúwi̱i̱n, nikumu̱ún  rí asndu mangiin kúwá náa reunión rúʼko̱ rí mba̱a̱ wéñuʼ. Mbáa ndxájulú niʼnirámáʼ: “Nanduxu muxnalá wéñuʼ núma̱aʼ numuu rí ninila dí ma̱ndoo mbu̱ya̱a̱xu reunión rígi̱. Rígi̱ nisngájmuxu rí nagíwáanʼ má xúʼko̱ a̱jkia̱la kuyuxu”.

Índo̱ ndxajkun nudi̱i̱ mbóó trompeta, nixuʼmamijná i̱ndó “bi̱ ni̱ndxu̱ún jefe ndrígu̱ún míi xa̱bu̱ Israel” náa guʼwá xtíin rí najmaa mu magimbíin (Núm. 10:4). Ikhí, Moisés niʼthúún ga̱jma̱a̱ niʼsngúún rí mambáñún munimbaníí ñajunʼ dí guaʼdáá náa tribu ndrígu̱ún. Á mu ikháanʼ ninindxu̱lú jefe nákha ikhú, lá xúʼni mbá tsiakii makuwáanʼ ikhí majmañulúʼ dí gúthi xáʼ.

Rí mbiʼi xúgi̱, bi̱ kuya̱ edxu̱u̱ na̱nguá ni̱ndxu̱ún “jefe” náa congregación ni má “ragíʼmaa munimbaʼumijnala” náa mugiu̱u̱ Dios bi̱ nuñawu̱u̱n (1 Ped. 5:1-3). Mú, nuni mbá tsiakii muñawu̱u̱n májánʼ mugu̱. Ikha jngó nundrigú ga̱jma̱a̱ gagi índo̱ nutún dí majuiʼsngúún itháan, xóo náa Najuiʼsngúún ga̱jma̱a̱ numuu Reino. Xúʼko̱ naʼni rí majmañún itháan mu munimbaníí ñajunʼ rí guaʼdáá náa congregación. Ga̱jma̱a̱ numuu ikha rí nakhánun, a̱ngiu̱lú xa̱bekha ga̱jma̱a̱ gu̱ʼu̱ bi̱ kúwá náa congregación nuxuʼmamijná itháan náa Jeobá. Maski ajndu na̱nguá ni̱jkua̱ náa najuiʼsngáa rígi̱, ma̱ndoo mambáyulú dí nijmañún bi̱ kuya̱ edxu̱u̱.

Nguáná índo̱ ndxajkun bi̱ ni̱ndxu̱ún israelita nudi̱i̱ nángi eʼni trompeta. Rúʼko̱ nandún gúthi rí Jeobá nandoo rí xúgínʼ bi̱ kúwá ikhí matuxu̱u̱n magún (Núm. 10:5, 6). Índo̱ matuxu̱u̱n magún ra̱ʼkhá tháán mitsaanʼ niʼni, numuu rí mbá kambáxu̱u̱n egún. Mú ma̱ngaa ndiyóoʼ rí mbá xúgínʼ muni mbá tsiakii. Mbáa tikhun niʼniún mingíjyúuʼ wéñuʼ muni rígi̱. Náá numuu rá.

Mbáa tikhun nakumu̱ún rí índo̱ nudi̱i̱ nángi eʼni, nindxu̱u̱ mbaʼa nuthu ga̱jma̱a̱ nudi̱i̱ mbiʼi rí ikhiin tseguáʼthi̱i̱n. Náa Biblia naʼthí rí “du̱u̱n nagui̱ji̱ mbóó mbruʼun asndu imbo̱ʼ néjtsuu” mú nguáná “a̱jma̱ mbiʼi, mbá gu̱nʼ o itháan” índo̱ natu̱xu̱u̱ mbu̱júu̱ du̱u̱n (Núm. 9:21, 22). Nguáthá nuthu ndiyóoʼ matuxu̱u̱n magún má xúʼko̱ mbá xúgínʼ israelita rá. Náa capítulo 33 ndrígóo Números naʼthí mbá 40 enii náa nigún raguájun.

Mbáa tikhun israelita nixkamaa mbá náa rígá xkamijxa, mbá rí májánʼ wáa náa “mbaaʼ mixooʼ rúʼko̱ rí mba̱a̱ wéñuʼ ga̱jma̱a̱ migamíi” (Deut. 1:19). Ikha jngó mbáa nindxaʼwami̱jna rí á mu nagún i̱mba̱ níʼkha̱ xánindxu̱u̱ májánʼ.

Índo̱ nudi̱i̱ trompeta nángi eʼni, xúgínʼ israelitas nudxawíín, mú ra̱ʼkhá xúgínʼ natuxu̱u̱n magún mbóó jnduʼ. Mbáa tikhun israelita tséʼngu̱u̱n guguaʼthi̱i̱n asndu índo̱ kaʼñún magún ikhiin. Índo̱ nudi̱i̱ trompeta nángi eʼni, nandoo gáʼthi rí timbíin bi̱ gíʼmaa matuxu̱u̱n magún ni̱ndxu̱ún bi̱ kúwá xígií náa nakraʼáanʼ a̱jkha̱ʼ bi̱ tribu ndrígóo Judá, Isacar ga̱jma̱a̱ Zabulón (Núm. 2:3-7; 10:5, 6). Nda̱wa̱á rí nigún ikhiin, dxajkun nudi̱i̱ mbu̱júu̱ trompeta nángi eʼni mu muthi rí kaʼñún magún mbá ajtsíin tribu bi̱ kúwá náa sur. Xúʼko̱ ma eni asndu matuxu̱u̱n magún xúgínʼ israelita.

Mbáa niʼniulúʼ mingíjyúuʼ mundrígú i̱mba̱ nuxi̱ʼ ikha náa xuajñuu Jeobá. Mbáa naʼni maxmiéjunlú numuu dí rígá mbaʼa rí nixtiʼkhu̱u̱ mbiʼi rí tseguaʼthi̱i̱nlú o mbáa ninigulú xóo kaʼnii nákha ginii rí asndu nimbá tsíyulú maxtiʼkhu̱u̱. Tséʼniuu má asndu xú káʼnii nindxu̱u̱, mbáa nikumulú rí ndiyóoʼ maʼngo̱o̱ a̱jkiu̱lú ma̱ngaa rí ndiyóoʼ mbayuuʼ mbiʼi mu maguʼunlu. Mú, nduʼyáá rí ndayóoʼ muʼni. Á mu nuʼni tsiakimijna, mbuʼyáá xú káʼnii Dios gaʼni tsajkurámáanʼlu.

Nákha mbiʼi rí nixtáa Moisés, Jeobá nixnúún ikha mbaʼin wéñuʼ xa̱bekha, gu̱ʼu̱ ga̱jma̱a̱ i̱ji̱n índo̱ kúwá ragún náa mbaaʼ mixooʼ. Ikhiin xáʼngo̱o̱ gakáwiin á mu ikhaa tañewu̱u̱n ga̱jma̱a̱ táxnún ikha. Náa iwáá mbiʼi rí migamíi rígi̱, Jeobá naxnúlú ikha ga̱jma̱a̱ nañewunlú mu mambáxu má xúʼko̱ gajmiúlú ikhaa. Ikha jngó guʼni xúgíʼ xó má eʼngo̱o̱ munimbulú, xó má nini bi̱ israelita bi̱ ninimbu̱ún índo̱ niwáán trompeta nákhá wájyúuʼ.