“Índo̱ primiʼ nigíʼdu̱u̱ nindxaʼwajmún, nigújthún aphuu ga̱jma̱a̱ nixngáwu̱u̱nʼ. Nindoʼ maxíyáa” (Paul).

“Índo̱ xtáá náa goʼwóʼ, ra̱ʼkhá tháán kasngáñuʼ ga̱jma̱a̱ mbá chíʼgíʼ má dí guthu̱nʼ. Naxpíʼthá asndu ndiéjunʼ má rígá mijngii” (Marco).

Mbáa ikháanʼ na̱nguá má eʼni wéñuʼ xúʼko̱ kaʼnii. Mú, nguáná naʼniulú mingíjyúuʼ muñewa̱a̱n dí muʼni. Náá numuu rá. Numuu rí naguwaʼ náa Adán ikha jngó nakiéʼkulu (Rom. 5:12). Tikhun xóo Paul ga̱jma̱a̱ Marco, naʼniún mingíjyúuʼ muñewa̱a̱n xóo nuni. Eʼwíinʼ nunimi̱jna̱ dí xámiñuu o rí xundxaʼwámi̱jna̱ dí raʼkhí. Kuwa eʼwíinʼ bi̱ naʼniún mingíjyúuʼ murikháá dí nagua̱ʼa̱ mubúúnʼ gajmiún mbáa, rí muwan iyaʼ najnga̱a̱ o rí mutsikha droga.

Bi̱ na̱nguá ñewa̱a̱n xóo nundxaʼwami̱jna̱, rí nuni ga̱jma̱a̱ dí nagua̱ʼa̱ muni, migamíi maʼni gachúu xóo kuwa. Xú káʼnii gándoo gurikháá mu xagíʼnulú rúʼko̱ rá. Gíʼmaa muñewa̱a̱n rí muʼni. Mbuʼyáá ajtsú graxe̱ dí mambáyulúʼ. Timbá, ndiéjunʼ eyoo gáʼthúu̱n dí muñewa̱a̱n rí muʼni rá. Raga̱jma̱, ndíjkha rí gíʼdoo wéñuʼ numuu rá. Ragajtsú, xú káʼnii gándoo gúʼni mu maguaʼdáá rígi̱ rí na̱ʼkha̱ náa “xi̱ʼ kaʼwu” rá. (Gál. 5:22, 23.) Á mu nguáná ndayúlú rí muñewa̱a̱n dí muʼni, mbuʼyáá ndiéjunʼ eyóoʼ maʼni mámbáa dí ikháanʼ.

Xa̱bu̱ bi̱ nañewu̱u̱n rí maʼni, nindxu̱u̱ mbáa bi̱ índo̱ nagua̱ʼa̱ maʼni dí raʼkhí, naʼni gaʼduunʼ. Na̱nguá eʼthí ga̱jma̱a̱ tséʼni mbá rí tsénigu̱u̱ʼ Dios.

Jesús nisngájma ga̱jma̱a̱ xkri̱da ndrígóo ndiéjunʼ nindxu̱u̱ rí muñewa̱a̱n rí muʼni. Náa Biblia naʼthí: “Índo̱ nithi dí raʼkhí ga̱jma̱a̱ numuu, ikhaa na̱nguá nitanga̱a̱ maʼthúún dí raʼkhí. Ga̱jma̱a̱ índo̱ xtáa ramínuuʼ na̱nguá niʼthúún maʼniún dí raʼkhí. Rí phú niʼni, niniñuuʼ náa ñawúunʼ bi̱ kaʼyoo maʼni dí jmbu” (1 Ped. 2:23). A̱ʼdióo Dios nisngájma cualidad rígi̱ índo̱ wrájkaa náa ixi̱ ga̱jma̱a̱ índo̱ bi̱ tsíñún gúyáá nitsijmaa (Mat. 27:39-44). Ma̱ngaa nisngájma índo̱ xa̱bu̱ ede̱ bi̱ tsíñún gúyáá nigíʼ muruguaaʼ “ga̱jma̱a̱ ajngóo má” (Mat. 22:15-22). Ga̱jma̱a̱ niniñuuʼ mbá májánʼ xkri̱da índo̱ mbá nguathiin judíos bi̱ ra̱ʼkhá tháán nikiʼníin nigíiʼ muxná ga̱jma̱a̱ itsí. Ikhaa na̱nguá nitanga̱a̱ maʼniún dí raʼkhí, rí phú niʼni “nirkaʼwumi̱na̱ʼ ga̱jma̱a̱ nigájna̱a̱ náa templo” (Juan 8:57-59).

Lá ma̱ndoo mbuʼyaridáá Jesús rá. Ma̱ndoo. Apóstol Pedro niʼnirámáʼ: “Cristo nimínuuʼ ga̱jma̱a̱ numulúʼ, niniñuʼ mbá xkri̱da mu mbuʼyaridáá tsumáá rí niʼni ikhaa” (1 Ped. 2: 21). Maski ajndu ni̱ndxu̱lú xa̱bu̱ aʼkhá, ma̱ndoo mbuʼyaridáá tsumáá wéñuʼ rí niʼni Jesús. Náá numuu rí gíʼmaa mbuʼyaridáá xá.

Á mu nandulú muʼni rí nandoo Jeobá, gíʼmaa muñewa̱a̱n rí muʼni. Maski ajndu niguajún jmbu mbayuuʼ tsiguʼ, migamíi muniʼñááʼ rambáxulú gajmiúlú ikhaa á mu tsíñewa̱a̱n rí nuʼthá ga̱jma̱a̱ rí nuʼni.

Guʼyáá xkri̱da ndrígóo Moisés, mbáa bi̱ “ninindxu̱u̱ mbáa xa̱biya̱ bi̱ itháan guabaaʼ náa xúgínʼ xa̱bu̱ bi̱ nikúwá náa tsu̱du̱u̱ ku̱ba̱ʼ” nákha ikhú (Núm. 12:3). Mbayuuʼ tsiguʼ ikhaa niʼngo̱o̱ a̱jkiu̱u̱n dí nixieʼkhá bi̱ israelitas. Mú mbóo mbiʼi tañewuunʼ rí niʼthí ga̱jma̱a̱ ra̱ʼkhá tháán nikiʼnáa ga̱jma̱á nindxúu̱n numuu rí nixieʼkhá mbu̱júu̱ rí nda̱a̱ iyaʼ. Niʼthún ga̱jma̱a̱ ajngáa gujkhuʼ: “¡Ikháanʼ bi̱ tsenimbala, gudxawíín! Lá nandala rí ikháanʼxu muríyaʼ iyaʼ náa xpátsí rígi̱ ráʼ.” (Núm. 20:2-11.)

Moisés ndiyóoʼ mañewu̱u̱n rí niʼthí. Na̱nguá nixnúu gamajkhu Jeobá ga̱jma̱a̱ numuu rí ikhaa niʼni milagro rí marigá iyaʼ (Sal. 106:32, 33). Numuu rúʼko̱ jngó Jeobá tániñuuʼ mato̱ʼo̱o̱ náa Ku̱ba̱ʼ rí niʼthí maxnún (Núm. 20:12). Mbáa asndu mbiʼi dí nikháñun nigáwiinʼ a̱jkiu̱u̱n ga̱jma̱a̱ numuu rí tañewu̱u̱n dí niʼthí (Deut. 3:23-27).

Ndiéjunʼ ejmañuluʼ rá. Dí maski ajndu mbayuuʼ má kúwáanʼ ru̱ʼni̱ ñajunʼ Jeobá, gíʼmaa muʼthúún má xúʼko̱ ga̱jma̱a̱ ajngáa gamajkhu bi̱ nuni makiʼnáanʼlu o bi̱ ndayóo muxprigún (Efes. 4:32; Col. 3:12). Gajkhun má rí ga̱jma̱a̱ numuu dí naʼni waniáán tséjyúu naʼni makiʼnáánʼ. Mú garmáʼáan a̱jkiu̱lúʼ kuʼyáá Moisés. Tsíyulú muʼni gachíí rí nikuwáanʼ mbayuuʼ ru̱ʼni̱ ñajuunʼ Jeobá ga̱jma̱a̱ mbá numuu rí túñewa̱a̱n muʼni o muʼthá. Mú, xú káʼnii gándoo guguaʼdáá cualidad rígi̱ dí ndayóo wéñuʼ rá.

Índo̱ guʼtajkáan gunda̱ʼa̱ xi̱ʼ kaʼwu. Ndíjkha rí gíʼmaa munda̱ʼa̱ rá. Numuu dí muñewa̱a̱n rí muʼni na̱ʼkha̱ náa xi̱ʼ kaʼwu ndrígóo Dios, ga̱jma̱a̱ ikhaa naxnún bi̱ nunda̱ʼa̱a̱ (Luc. 11:13). Ga̱jma̱a̱ xi̱ʼ ndrígóo Jeobá naxnúlú tsiakii muñewa̱a̱n rí muʼni (Filip. 4:13). Ma̱ngaa nambáyulúʼ muguaʼdáá i̱ʼwáʼ dí na̱ʼkha̱ náa xi̱ʼ kaʼwu, xóo ngajua, ikhaa mambáyulúʼ muñewa̱a̱n rí muʼni (1 Cor. 13:5).

Xúʼyáá nimbá rí maʼni dí xúñewa̱a̱n rí muʼni. Xúʼyáá náa internet o i̱ʼwáʼ náa na̱ʼkha̱ rí maxkaxáánʼ muʼni dí raʼkhí (Efes. 5:3, 4).  Gíʼmaa muʼni gaʼduunʼ rí maʼga̱ kaguáanʼ muʼni dí raʼkhí (Prov. 22:3; 1 Cor. 6:12). Mbá xkri̱da, mbáa xa̱bu̱ bi̱ naʼni dí nagua̱ʼa̱ xuyuuʼ, gíʼmaa maniñuuʼ raguxnuu libro o maniñuuʼ raʼyoo película náa nagájnún xa̱bu̱ bi̱ naʼphu̱ rawúún o i̱ʼwáʼ dí raʼkhí nuni.

Mbáa maʼniulú gakhii muʼnimbánii consejo rígi̱. Mú, á mu nuʼnimi̱jna̱, Jeobá maxnúlúʼ tsiakii mu xúʼni dí nagua̱ʼa̱ dí raʼkhí muʼni (2 Ped. 1:5-8). Mambáyulúʼ muñewa̱a̱n dí mundxaʼwáá edxu̱lúʼ, xóo muʼthá ga̱jma̱a̱ rí xóo muʼni. Xkri̱da ndrígóo Paul ga̱jma̱a̱ Marco bi̱ niʼthá ga̱jma̱a̱ numún náa nagi̱ʼdu̱u̱ artículo rígi̱, niʼngu̱u̱n niñewa̱a̱n xóo nuni índo̱ rígá dí naʼni makiʼníin. Guʼtá ga̱jma̱a̱ numuu mbáa ndxájulú bi̱ ra̱ʼkhá tháán nakiʼnáa índo̱ na̱jkha̱ kayóo carro, rí asndu nadxaʼwajmiin eʼwíinʼ bi̱ nagún kuñún carro. Ndiéjunʼ niʼni mu mariʼkuminaʼ xá. Ikhaa naʼthí: “Natajkáan xúgíʼ mbiʼi ga̱jma̱a̱ xúgíʼ tsiakii ndrígóʼ. Nanigajmaa̱ revista náa na̱ʼkha̱ raʼthí ga̱jma̱a̱ rí xú káʼnii muñewa̱a̱n rí muʼni ma̱ngaa na̱ni̱ magida̱ʼ edxu̱ʼ mbaʼa texto rí ma̱ndoo mambáyuʼ. Maski ajndu naniminaʼ má xúʼko̱ ga̱jma̱a̱ numuu rígi̱ mbayuuʼ tsiguʼ, mú mámbá mbiʼi nani tsiakimina̱ʼ dí xakiʼnún rúʼko̱ nambáyuʼ má xúʼko̱. Ma̱ngaa índo̱ rígá mbá náa maʼgá, nagájnuʼ wapháá mu xáʼgá mbá nacha̱”.

Nguáná na̱nguá eñaʼwa̱a̱n rí muʼni. Índo̱ narígá xúʼko̱, mbáa makumulúʼ dí rakáʼyoo muʼtajkáan. Mú ikhú itháan ndayóo muʼtájkáan mbá nacha̱. Guʼtákáñii Jeobá dí maʼni mba̱a̱ a̱jkiu̱u̱n kaʼyulúʼ, gunda̱ʼa̱a̱ dí mambáyulúʼ ga̱jma̱a̱ guʼnimi̱jna̱ dí xatangáánʼ muʼni ikháá má dí raʼkhí (Sal. 51:9-11). Ikhaa maʼdxaun dí muʼtajkáan á mu nuʼni ga̱jma̱a̱ xúgíʼ a̱jkiu̱lú dí magáwíinʼ a̱jkiu̱u̱n kaʼyulúʼ (Sal. 102:17). Apóstol Juan naʼni marmáʼáan a̱jkiu̱lúʼ dí eʼdiu a̱ʼdióo Dios “naʼni kaʼwáanʼ náa xúgíʼ aʼkhá” (1 Juan 1:7; 2:1; Sal. 86:5). Garmáʼáan a̱jkiu̱lú dí Jeobá naʼtulúʼ dí gíʼmaa muʼni mba̱a̱ a̱jkiu̱lú kuʼyamijná mbaʼa nuthu. Ikha jngó nandoo nduʼyáá gajkhun dí ikhaa maʼni xúʼko̱ ga̱jma̱á ni̱ndxu̱lú mangáanʼ (Mat. 18:21, 22; Col. 3:13).

Jeobá tániguuʼ nditháan dí Moisés tañewu̱u̱n xóo niʼthí náa ku̱ba̱ʼ mixooʼ. Mú niʼni mba̱a̱ a̱jkiu̱u̱n kaʼyoo. Ma̱ngaa náa Ajngá rawunʼ Dios naʼthí dí ikhaa nindxu̱u̱ mbá xkri̱da májánʼ bi̱ nigiʼdoo fe (Deut. 34:10; Heb. 11:24-28). Gajkhun má rí Jeobá tániñuuʼ mato̱ʼo̱o̱ náa Ku̱ba̱ʼ rí nikudaminaʼ maxnún, mú maniñuuʼ maxtáa náa Ku̱ba̱ʼ mitsaanʼ nda̱wa̱á ga̱jma̱a̱ maʼni rí maxtáa kámuu mbiʼi. Ikháanʼlu ma̱ngaa ma̱ndoo makuwáanʼ ikhí á mu nuʼnimi̱jna̱ má xúʼko̱ muñewa̱a̱n rí muʼni ga̱jma̱a̱ rí muʼthá (1 Cor. 9:25).