Rí mambáyáaʼ matraʼwi̱i̱: Náa Biblia na̱ʼkha̱ ikha dí kaʼnii matatsimbaaʼ
Á mu i̱ndó najmulú ku̱ma̱ ndrígúlú ga̱jma̱a̱ rí nundxa̱ʼwa̱míjna̱ eʼwíinʼ, índo̱ nuraʼwíí mu̱ʼni̱ rí májánʼ, xágájnuu májánʼ. Náa Biblia naʼthí náá numuu dí narígá xúʼko̱ kaʼnii. Ma̱ngaa ikhí naʼthúlú ndiéjunʼ ma̱ndoo mu̱ʼni̱ mu makuwáanʼ gagi. Náa Biblia na̱ʼkha̱ ikha rí phú ma̱ndoo mambáyulú.
NDAYÚLÚ DÍ DIOS MAXNÚLÚ IKHA
Náa Biblia naʼthí dí ndayúlú mambáyulú Jeobá, a numuu rí ikháanʼ na̱nguá nigumáánʼ mu muxnámíjná ikha (Jeremías 10:23). Ikha jngóo niniñuuʼ náa Biblia ikha rí ma̱ndoo mambáyulú mu muraʼwíí májánʼ dí mu̱ʼni̱. Nandoo kaʼyulú wéñuuʼ rí ikhaa tsíyóo muraʼwíí mbá dí muʼni i̱ndó mu mbuʼyáá ndiéjunʼ gárígá á mu najngawáan’, numuu dí á mu nuʼni xúʼko̱ i̱ndó naʼni gawúnlú ga̱jma̱a̱ naʼni rí makuwáanʼ ngíná (Deuteronomio 5:29; 1 Juan 4:8). Ikhaa nindxu̱u̱ bi̱ Niʼniáanʼ ga̱jma̱a̱ ra̱ʼkhá tháán ejmañuu ma̱ngaa naniniáánʼ májánʼ dí mbáwii ikhaa ma̱ndoo maxnúlú consejo rí itháán májánʼ (Salmo 100:3; 104:24). Dios nditháanʼ tsésudaaʼ mbáa mu maxtáa xó má naʼthí xtángoo ndrígóo.
Timbáa xabiya ga̱jma̱a̱ a̱ʼgu̱ bi̱ nixtáa, bi̱ nagumbiʼyuu Adán ga̱jma̱a̱ Eva, Jeobá nixnúún xúgíʼ rí ndiñúnʼ mu makuwá gagi (Génesis 1:28, 29; 2:8, 15). Ma̱ngaa nixnúún mbá ikha dí ragákhíi kayuuʼ munimbáníí, mú ikhaa má niniñuuʼ dí ikhiin má gúraʼwi̱i̱ á mu munimbu̱ún o na̱nguá (Génesis 2:9, 16, 17). Phú ngíná ninindxu̱u̱ dí Adán ga̱jma̱a̱ Eva niraʼwi̱i̱ makuwá xóo má nandún ikhiin, raʼkháa xóo nandoo Jeobá (Génesis 3:6). Lá nakuwáánʼ májánʼ índo̱ nuraʼwíí mu̱ʼni̱ rí nindxu̱u̱ májánʼ eʼyáá ikháanʼ ráʼ. Na̱nguá. Xóo niguwáʼ rakúwá xa̱bu̱ nasngájma rí xákuwáanʼ tsímáá ga̱jma̱a̱ gagi á mu nanújngurámulú ikha ndrígóo Jeobá (Eclesiastés 8:9).
Náa Biblia na̱ʼkha̱ ikha rí ma̱ndoo mambáyulú mu muraʼwíí dí májánʼ mu̱ʼni̱, tséʼniuu náa má náá kuwáánʼlu o náá guwáʼlú (2 Timoteo 3:16, 17; atayáá kúgumaʼá “ Mbá libro rí muraxnuu xúgíinʼ xa̱bu̱”). Rí xúgi̱ mbuʼyáá xú káʼnii exnulú ikha Dios ga̱jma̱a̱ Biblia.
Atayáá ndíjkha kájndii nindxu̱u̱ rí muʼthá dí Biblia nindxu̱u̱ “A̱jngóo Dios” (1 Tesalonicenses 2:13). Ata̱ʼa̱a̱ʼ náa jw.org ga̱jma̱a̱ atayáá video Tsáa nindxu̱u̱ bi̱ niʼthí xóo maguma Biblia rá.
DIOS NAXNÚLÚ IKHA NÁA BIBLIA
Biblia naʼthí xú káʼnii Dios nimbájxu̱u̱ gajmíi xa̱bu̱ asndu nákha nigi̱ʼdu̱u̱ numbaaʼ. Náa nuraxnuu Ajngáa rawuunʼ ma̱ndoo mbuʼyáá ndiéjunʼ nindxu̱u̱ rí májánʼ o dí ra̱májánʼ náa iduu Dios, rí ikhaa ndaʼyoo rí mambáyulú o na̱nguá (Salmo 19:7, 11). Xúʼkhíin nakánulú ikha rí nindxu̱u̱ májánʼ má xúʼko̱ ga̱jma̱a̱ rí naxnúlú ikha tsejtsíí mbiʼi.
Mbá xkri̱da, guʼyáá consejo rí nuxkamaa náa Proverbios 13:20: “Bi̱ najngruigo̱o̱ gajmíi̱n xa̱bu̱ bi̱ nundxa̱ʼwa̱a̱ májánʼ edxu̱ún, xúʼko̱ má gándxa̱ʼóo májánʼ edxu̱u̱ ma̱ngaa, mú bi̱ nambáxu̱u̱ gajmíi̱n xa̱bu̱ skágunʼ magiʼnuu dí ra̱májánʼ”. Consejo rígi̱ gíʼdoo wéñuuʼ numuu rí mbiʼi xúgi̱ xó má nákha ginii mú ra̱ʼkháa i̱ndó rígi̱ consejo rí gíʼdoo numuu dí nuxkamaa náa Biblia (atayáá kúgumaʼá “ Consejos rí kagu̱ Biblia nambáyulú má xúʼko̱”).
Mbáa natraximínáʼ: “Xú káʼnii gáyóo gajkhun rí nayambáá ikha rí na̱ʼkha̱ náa Biblia dí mbiʼi xúgi̱ rá.” Náa i̱mba̱ artículo mbuyáá tikhuu xkri̱da ndrígu̱ún xa̱bu̱ bi̱ kúwá rí mbiʼi xúgi̱.
a Dios mbiʼyuu Jeobá (Salmo 83:18).
