Rí mambáyáaʼ matraʼwi̱i̱: Mbá ikha dí mbaʼin nuraʼwi̱i̱ muni̱
Mbaʼin xa̱bu̱ náa numbaaʼ nduyáá dí ndiéjunʼ nindxu̱u̱ dí májánʼ ga̱jma̱a̱ dí ra̱májánʼ. Mbaʼin tsénigu̱u̱nʼ dí nutsijmiin ga̱jma̱a̱ tsiakii gu̱ʼu̱ o i̱ji̱n, dí nuradíin xa̱bu̱. Mú mbaʼin nanigu̱u̱nʼ dí mbáa mani̱ndxu̱u̱ májánʼ xa̱bu̱, dí makru̱ʼu̱u̱n kuñún eʼwíinʼ ga̱jma̱a̱ dí maguma xó má gíʼmaa. Mú, xóo endxaʼwamíjna̱ ga̱jma̱a̱ i̱ʼwáʼ rá. Xóo dí mata̱ba̱a̱ʼ ga̱jma̱a̱ʼ mbáa, marata o xárata dí gajkhun o xú káʼnii gátani̱ mba̱ji̱i̱n e̱ji̱n. Mbaʼin naku̱mu̱ún dí rígá mbaʼa xóo matani̱ rí májánʼ ga̱jma̱a̱ dí asndu ndiéjunʼ má dí rígá matani nindxu̱u̱ májánʼ. Ikha jngóo mbaʼin xa̱bu̱ nuraʼwi̱i̱ mu̱ni̱ xó má ku̱mu̱ún ikhiin o xóo ku̱mu̱ún eʼwíinʼ. Mú, lá rígi̱ nindxu̱u̱ rí itháán májánʼ xóo mu̱ʼni̱ ráʼ.
RÍ NANDXA̱ʼWÁMINAʼ MÁMBÁA RÍ NINDXU̱U̱ MÁJÁNʼ
Dí iwáá nuʼni, nindxu̱u̱ rí nuraʼwíí muʼni xó má kumulú ikháanʼ dí májánʼ ga̱jma̱a̱ dí ra̱májánʼ (Romanos 2:14, 15). Asndu e̱ji̱n majkhiinʼ, nduyáá nguáná ndiéjunʼ nindxu̱u̱ ra̱májánʼ ga̱jma̱a̱ naʼnigawúúnʼ índo̱ nuni mbá dí raʼkhí. Índo̱ na̱jkha̱ raʼni guaniáánʼ bi̱ nakuwáanʼ gajmiúlú, xóo bi̱ kúwá náa guʼwúlú, bi̱ nambájxu gajmiúlú, maestros ndrígulú, xa̱bu̱ xuajin, ma̱ngaa religión ndrígulú, náa kuwáánʼlú, nuni̱ rí ku̱ma̱ ndrígulú maʼga raxtiʼkhuu. Ikha jngóo, índo̱ nuraʼwi̱i̱ rí muʼnilú, ku̱ma̱ ndrígulú naʼthúlúʼ á mu nambánii ga̱jma̱a̱ dí nijmañulúʼ o na̱nguá.
Ku̱ma̱ ndrígulú ma̱ndoo maʼni dí ma̱ʼkha̱ a̱jkiu̱lú makru̱ʼu̱lú xóo ku̱mu̱ún eʼwíinʼ, muxna̱a̱ núma̱aʼ, muʼnilú rí jmbu ga̱jma̱a̱ magáwíinʼ a̱jkiu̱lú eni eʼwíinʼ. Ma̱ngaa ku̱ma̱ ndrígulú ma̱ndoo maʼni dí xúʼni̱ mbá dí maʼni gawúunʼ mbáa bi̱ nandulúʼ kuʼyáá o rí maʼni mati̱yu̱lú ga̱jma̱a̱ rí makumulúʼ dí nikiéʼkulú o nijngraʼánʼ.
Lá májánʼ nindxu̱u̱ dí muʼni má xúʼko̱ xóo kumulúʼ ikháanʼ dí májánʼ ráʼ. Índo̱ Garrick ninindxu̱u̱ xóó ndxáma̱á, niraʼwíi maxtáa xó má ku̱mu̱u̱ ikhaa dí májánʼ. Mú nda̱wa̱á ndiʼyoo rí tségájnuu májánʼ dí naraʼwíi maʼni xó má ku̱mu̱u̱ ikhaa dí májánʼ. Ikhaa eʼthí dí niʼni ‹dí raʼkhí kayuuʼ, rí nibóoʼ gajmíi̱n gu̱ʼu̱, rí nijmuu drogas, niʼni xúgíʼ eni̱ dí raʼkhí kayuuʼ›.
RÍ NUNDXAʼWAMÍJNA̱ EʼWÍINʼ RÍ NINDXU̱U̱ MÁJÁNʼ
Índo̱ nuraʼwi̱i̱ rí muʼni, raʼkháa i̱ndó nuʼni xóo kumulúʼ ikháanʼ ma̱ngaa nduʼyáá xóo gundxaʼwamíjna̱ eʼwíinʼ ga̱jma̱a̱ numuu dí niraʼwíí muʼni. Rígi̱ gámbáyulú majmañulúʼ rí nijmañún ikhiin. Índo̱ nuʼni mbá rí nduyáá dí májánʼ nindxu̱u̱ familia ndrígulú, bi̱ nambájxulú gajmiúlú ga̱jma̱a̱ eʼwíinʼ xa̱bu̱ xuajin, ikhiin naguánu nduyamajkulú.
Lá májánʼ nindxu̱u̱ dí muʼni má xúʼko̱ xóo ku̱mu̱ún eʼwíinʼ dí májánʼ ráʼ. Índo̱ Priscila ninindxu̱u̱ xóó ndxáʼgú niʼni xó má eni̱ bi̱ nambájxu gajmíi̱n, xóo rí mabóoʼ gajmíi̱n mixtiʼkuiin jiámá maski ajndu xóó tsénújúnʼ. Mú, ikhaa na̱nguá ni̱jkha̱nú ndiʼyoo dí nixtáa gagi índo̱ naʼni rí eʼwíinʼ nundxaʼwamíjna̱ rí nindxu̱u̱ májánʼ. Ikhaa naʼthí: “Rí ma̱ni̱ xóo eni̱ xúgíinʼ na̱nguá niʼni dí maxtáá gagi. Niraʼwíí ma̱ni̱ xóo mbáa skágunʼ ga̱jma̱a̱ dí asndu gamíi magíʼnuʼ itháan dí raʼkhí”.
LÁ RÍGÁ MBÁ RÍ ITHÁAN MÁJÁNʼ XÓO MUʼNI RÁʼ.
Índo̱ gúraʼwíí mbuʼyáá ndiéjunʼ nindxu̱u̱ dí májánʼ, gíʼdoo má numuu rí mundxaʼwamíjna̱ xóo ku̱mu̱ún eʼwíinʼ ga̱jma̱a̱ xóo kumulúʼ ikháanʼ. Mu magajnúu májánʼ rí gúʼni̱, raʼkháa i̱ndó gíʼmaa mbuʼyáá rígi̱. Ikháanʼ nguáná na̱nguá ejmáánʼ gúʼyáá xóo gúʼni gawúúnʼ eʼwíinʼ o ikháanʼ ga̱jma̱a̱ dí gúraʼwíí muʼni (Proverbios 14:12). Ma̱ngaa, maski ajndu ikháanʼ nakumulú rí nundxaʼwamíjna̱ o dí naku̱mu̱ún eʼwíinʼ nindxu̱u̱ májánʼ, mbáa ma̱ndoo majngawáanʼ. ¡Mbáa nda̱wa̱á maxtiʼkhuu! Numuu rí nákhá wajyúuʼ mbaʼa rí nikumu̱ún dí ra̱májánʼ mú xúgi̱ nduyáá rí májánʼ nindxu̱u̱. Ga̱jma̱a̱ nákha ginii mbaʼa dí ma̱ndoo matani̱ mú xúgi̱ ní xándoo matani̱.
Lá májánʼ nindxu̱u̱ dí muʼni má xúʼko̱ xóo ku̱mu̱ún eʼwíinʼ dí májánʼ ráʼ.
Lá rígá mbá ikha rí itháán májánʼ ráʼ. Mbá dí gajkhun mambáyulú mbuʼyáá ndiéjunʼ nindxu̱u̱ dí májánʼ ga̱jma̱a̱ dí ra̱májánʼ ráʼ. Lá rígá mbá ikha dí mambáyulú mu maʼthúlú xóo gíʼmaa makuwáánʼ mu nda̱wa̱á xájmáa a̱jkiu̱lú ga̱jma̱a̱ numuu dí niraʼwíí ráʼ.
Phú májánʼ dí rígá ikha dí gajkhun mambáyulú, tséʼniuu tsáa nindxu̱lú o asndu náa kuwáanʼlu. Náa imbo̱o̱ artículo mambáyulúʼ mbuʼyáá ndiéjunʼ ikha nindxu̱u̱ rí itháán májánʼ mu muʼni má xúʼko̱ dí májánʼ.