Mbá miʼtsu ejínscuela nigún pasiá, mu tikhun jiáma nixruigi̱i̱n ga̱jma̱á numuu rí nirugua̱a̱ ga̱jma̱a̱ tsiakii mbáa ndxájúún. Xúgínʼ nunigajmaa náa mbá escuela rí najmaʼnuuʼ dí rígá náa Canadá. Nda̱wa̱á dí nirígá rígi̱, Leonard Stern niʼthí náa mbá periódico rí mbiʼyuu Ottawa Citizen: “Dí najmañún, escuela májánʼ dí nagún, rúʼko̱ tseni rí jiáma muniña̱a̱ʼ runi dí ra̱májánʼ”.

Náa mbá artículo ndrígóo Stern, ikhí niʼthí xóó: “Rí itháán májánʼ gáʼni rí xa̱bu̱ guanii musngúún e̱jñún mu mbuyáá rí nindxu̱u̱ májánʼ ga̱jma̱a̱ dí ra̱májánʼ. Mú rí phú narígá mbiʼi xúgi̱ xa̱bu̱ guanii i̱ndó naxmiéjúnʼ rí e̱jñún murawíi majan calificación ga̱jma̱a̱ rí maguaʼdáá mbá májánʼ ñajunʼ náa makhánun mba̱a̱ mbújkha̱a̱”.

Gajkhun má rí mi̱dxu̱ʼ escuela gíʼdoo numuu, mú maski ajndu escuela nindxu̱u̱ májánʼ, rúʼko̱ tséyambáá rí mbáa xa̱bu̱ maniñuuʼ raʼni dí ra̱májánʼ. Mú, xú káʼnii nindxu̱u̱ kiʼsngáa rí maxnúlúʼ ikha rí ndayúlú rá.

Biblia nindxu̱u̱ xóo mbá niwanʼ. Índo̱ nuraxnuu nandoo nduʼyáá ndiéjunʼ nindxu̱u̱ rí tséʼngulú guʼni ga̱jma̱a̱ náa ndayóoʼ muriʼkhumijná (Santiago 1:23-25). Ma̱ngaa Biblia ma̱ndoo mambáyulúʼ mu manindxu̱lúʼ mbáa xa̱bu̱ májaanʼ a̱jkiu̱u̱n, maʼngo̱o̱ a̱jkiu̱lú, muñewa̱a̱n rí muʼni ga̱jma̱a̱ maguaʼdáá ngajua, rígi̱ naʼni marigá rí tsímáá ga̱jma̱a̱ rí makuwáanʼ mbá kambáxulú. Ma̱ngaa náa Biblia naʼthí rí ngajua o dí maʼndulú kuʼyamijná nindxu̱u̱ mbá rí “naruwáanʼ májánʼ wéñuʼ” (Colosenses 3:14). Ndíjkha rí ngajua nindxu̱u̱ kiejunʼ rá. Atayáá rí naʼthí náa Biblia ga̱jma̱a̱ numuu rígi̱.

• “Rí maʼndulú kuʼñúún eʼwíínʼ gáʼni rí maʼngulú xúgíʼ ga̱jma̱a̱ muʼni rí májánʼ. Rí maʼndulú kuʼñúún eʼwíínʼ maʼni rí xaxígulúʼ, xúʼnimba̱mi̱jna̱, xúxuximíjna, xúʼni̱ nditháan dí raʼkhí, na̱nguá eʼyáaʼ i̱ndó rí nda̱yúlúʼ ikháanʼ, tsikiʼnáanʼlu nacha̱. Tsejkua kuʼyulú sia̱nʼ. Tsédxuu ga̱jma̱a̱ numuu dí ra̱májánʼ rí narígá, nadxuu ga̱jma̱a̱ numuu rí gajkhun. Xúgíʼ naʼngo̱o̱ a̱jkiu̱u̱n, xúgíʼ naʼnimbo̱o̱, xúgíʼ nagiʼtu̱u̱n ga̱jma̱a̱ xúgíʼ naʼngo̱o̱ naraʼnuu. Ngajua nimbá miʼtsú xámbáa” (1 Corintios 13:4-8).

• “Á mu nandaʼ xtayáá xa̱bu̱ numbaaʼ ga̱jma̱ʼ xátani̱i̱ nimbá dí raʼkhí” (Romanos 13:10).

• “Dí phú gíʼmaa muni, gaʼndala kuñu̱u̱n wéñuʼ eʼwíínʼ, numuu rí índo̱ nandala kuñu̱u̱n eʼwíínʼ nanujngorámúʼ mbaʼa aʼkhá” (1 Pedro 4:8).

Lá ragájkhun rí índo̱ kuwáanʼ gajmiúlú bi̱ nandulú kuʼñúún nakuwáanʼ tsímáá ga̱jma̱a̱ tsemíñuluʼ ráʼ. Nakumulú xúʼko̱ kaʼnii numuu rí nduʼyáá rí ikhiin xúniulúʼ nimbá dí ra̱májánʼ.

 Á mu guaʼdáá ngajua muʼni asndu xú kaʼnii má ga̱jma̱a̱ numún eʼwíinʼ ma̱ngaa ma̱ndoo muriʼkhu̱u̱ rí nuʼni. Mbá xkri̱da, mbáa xa̱bu̱ nikhi̱i̱ bi̱ muxná mbiʼí George, ikhaa nikhu nigumaa aʼdá xíníiʼ ga̱jma̱a̱ ra̱ʼkhá tháán eyoo maxtáa ga̱jma̱a̱, mu ikhaa natsikhá wéñuʼ ndíí, ikha jngó nigiúunʼ tsíyoo rí matsikhá ndíí náa inuu ada̱. Ndiéjunʼ niʼni George rá. Maski ajndu ikhaa naʼni má cincuenta tsiguʼ rí natsikhá ndíí, niniñuuʼ ratsikhá mu xúʼko̱ ma̱ndoo maxtáa ga̱jma̱a̱ aʼdá xíníiʼ. Xóo má eʼyáá rí ngajua ma̱ndoo maʼni asndu xú kaʼnii má, lá ragájkhun ráʼ.

Na̱nguá egumánʼ ga̱jma̱a̱ ngajua, ikha jngó ndayóoʼ majmañulúʼ mandu kuʼyamijná, ga̱jma̱a̱ xa̱bu̱ guanii ni̱ndxu̱ún bi̱ ma̱ndoo musngúún rí maʼndún kuyamijná e̱jñún. Numuu rí ikhiin nakuwa gajmiún má xúʼko̱, nuxniʼtsúún, nuñewu̱u̱n índo̱ naʼniún nandii ga̱jma̱a̱ numbañún náa ndañúunʼ. Xa̱bu̱ guanii bi̱ nuni mbanuu májánʼ e̱jñún nusngúún mu mbuyáá xú kaʼnii nindxu̱u̱ rí májánʼ ga̱jma̱a̱ dí ra̱májánʼ ma̱ngaa xóo nuni ikhiin nañambáá wéñuʼ mu e̱ji̱n muni xúʼko̱ kaʼnii ma̱ngaa.

Phú gíná rí tikhun xa̱bu̱ guanii tséni xúgi̱ kaʼnii. Lá rígi̱ eyoo gaʼthí rí e̱jñún xúni̱ rí xóo gíʼmaa xáʼ. Na̱nguá, numuu rí tikhun jiáma ga̱jma̱a̱ wa̱ʼxa̱ʼ bi̱ ninii náa aniún tséni rí májánʼ mú ikhiin niʼngu̱u̱n niriʼkumijná ga̱jma̱a̱ rí xúgi̱ nindxu̱ún míjiinʼ xa̱bu̱. Asndu xa̱bu̱ bi̱ naʼkhunʼ rí xáʼngu̱u̱n guriʼkhumijná niʼngu̱u̱n niriʼkumijná, xóo má mbuʼyáá náa imbo̱o̱ artículo.