Lá naku̱ma̱a̱ʼ ikháán rí maʼga̱nú mbá mbiʼi mambáa xkujndu dí rígá náa numbaaʼ rí naʼni xákuwáanʼ tsímáá ráʼ. Mu ma̱ndoo maguma thanáá mbá nandii ndayóoʼ mbiʼyáá ndiéjunʼ phú nindxu̱u̱ rí naʼni maku̱mu̱u̱, raʼkháa i̱ndó maguma thanáá náa na̱ʼkhu̱.

Guʼgíʼ mbá xkri̱da. Mbáa xa̱bu̱ bi̱ mbiʼyuu Tom nigiʼdoo mbá nandii ga̱jma̱a̱ nda̱wa̱á nikháñuu, náa numuu nikháñuu xá. Doctor bi̱ xtáa náa guʼwá thana náa ni̱jkha̱ Tom ikhaa naʼthí: “Nimbáa táyáʼ mbaʼyoo ndiéjunʼ phú nindxu̱u̱ nandii rí nigiʼdoo Tom, i̱ndó nixnáá thana mu maʼni̱i̱ náa na̱ʼkhu̱”.

Xúʼko̱ má rígá ga̱jma̱a̱ numuu xkujndu dí rígá náa numbaaʼ. Mbá xkri̱da, rí nuni Xa̱bu̱ Ñajunʼ mu xúradímíjná wéñuʼ xa̱bu̱, nurawíi xtángoo, nudrama camara mu mbaʼyoo dí xtaa rarígá ma̱ngaa nuni rí makuwá itháán policía mu muñewu̱u̱n xa̱bu̱. Rígi̱ nañambáá mbá chiʼgiiʼ mú tséʼni gámbóo xkujndu. Náa numuu rá. Numuu rí xa̱bu̱ nuni xóo má rí nandún ikhiin ga̱jma̱a̱ rí nundxa̱ʼwa̱míjna̱.

Daniel, bi̱ xtáa náa Sudamérica náa nda̱a̱ mbújkha̱a̱, naʼthí: “Nákha ginii kuwáanʼxu májánʼ, ga̱jma̱a̱ tsímíñuxu rí maguma kuwuxu̱, mú xúgi̱ nánguá kaʼnii maraxtaa tsímáá. Rí nándáa mbújkha̱a̱ rúʼko̱ nisngájma rí xa̱bu̱ i̱ndó ikhiin nandún maguaʼdáá ga̱jma̱a̱ rí nánguá eyamajkuíí vida ndrígu̱ún eʼwíínʼ xa̱bu̱ ga̱jma̱a̱ rí guáʼdáá”.

Mbáa xa̱bu̱ bi̱ ndiyóoʼ magajnúu náa Oriente medio ga̱jma̱a̱ numuu xkujndu, rí xúgi̱ naʼni gájmaa Biblia, ikhaa naʼthí: “Náa xuajen rí ndi̱ju̱u̱n, xa̱bu̱ ñajunʼ ga̱jma̱a̱ ndxajkun nutsudiin jiáma mu magún guerra mu xúʼko̱ musngajma rí nandún kuyáá xuajñún. Mú xa̱bu̱ bi̱ nuxmijná gajmiún xúʼko̱ má eni mangiin. Rígi̱ naʼni mba̱yo̱o̱ rí nda̱a̱ numuu makumulúʼ kuʼñúún Xa̱bu̱ Ñajunʼ bi̱ kuwa náa numbaaʼ”.

Atayáá rí naʼthí náa Biblia nindxu̱u̱ gajkhun:

• “Asndu nákha majkhinʼ xa̱bu̱ endxaʼwamíjna̱ muni̱ dí raʼkhí” (Génesis 8:21).

• “Nda̱a̱ imbo̱o̱ rí maʼni nduwánʼ itháan ki xóo a̱jkiu̱lúʼ ga̱jma̱a̱ ra̱ʼkhá tháán echo̱o̱. Tsáa gáʼngo̱o̱ mbaʼyoo xú káʼnii nindxu̱u̱ rá.” (Jeremías 17:9.)

• “Mbá xkri̱da, náa a̱jkiu̱lú naku̱mu̱u̱ xúgíʼ enii dí ra̱májánʼ, xóo rí muradíin xa̱bu̱, muxudamíjná aʼkhá gajmiún mbáa, muni kuʼwáʼ, rí muni nduwaʼ, mutsijmiin xa̱bu̱” (Mateo 15:19).

Xa̱bu̱ numbaaʼ tséʼngu̱u̱n gúni gámbáa dí ra̱májánʼ rí nagua̱ʼa̱ muni. Mámbá mbiʼi naʼni itháán xkawiʼ xóo má ndi’yáá náa artículo rí ninújngoo (2 Timoteo 3:1-5). Mbiʼi xúgi̱ nandoo nduʼyáá kaʼwu ndiéjunʼ dí xtáa rarígá, mú náá numuu rí tséʼngulú muʼni rí numbaaʼ marigá rí tsímáá ga̱jma̱a̱ makuwáanʼ májánʼ rá. Lá kuwáanʼ ru̱ʼni̱ xó má eʼngo̱o̱ ráʼ.

Maski ajndu á mu narígá mbá milagro mu mambáa xúgíʼ dí ra̱májánʼ dí rígá náa numbaaʼ, numbaaʼ xárígá rí tsímáá. Náa numuu rá. Numuu rí xa̱bu̱ numbaaʼ na̱nguá gíʼdoo tsiakii mu maʼni.

Rí phú gajkhun nindxu̱u̱ rí “xa̱bu̱ numbaaʼ na̱nguá kaʼyoo [...] maʼthí xú káʼnii maxtáa”  (Jeremías 10:23). Ikháanʼ na̱nguá nigumáanʼ mu muʼtáñajumijnálú. Á mu nuʼni mijna muʼtáñajumijná mani̱ndxu̱u̱ xóo muʼnimíjna̱ makuwáanʼ náa aʼwún iyaʼ.

Atatsaʼwáminaʼ rígi̱, lá naku̱ma̱a̱ʼ rí xa̱bu̱ bi̱ ramíjiinʼ manigu̱u̱nʼ á mu mbáa gáʼthún xú kaʼnii gíʼmaa makuwá xáʼ. Xóo gíʼmaa mbuyáá dí nugrájkhiín e̱ji̱n ga̱jma̱a̱ xóo muni mbanuu e̱jñún xáʼ. Rígi̱ nindxu̱u̱ tikhu rí naʼni rí xa̱bu̱ muni wajimijna. Maski ajndu naʼni mingíjyúuʼ muʼnimbulúʼ, mu rí naʼthí náa Biblia nindxu̱u̱ gajkhun. Ikháánʼ na̱nguá kaʼyulú muʼtáñajumijná. Mú tsáá gándoo gambáyulú rá.

Dios, i̱ndó ikhaa ma̱ndoo mambáyulúʼ numuu rí ikhaa nindxu̱u̱ bi̱ Niʼniááʼ. Mbaʼin nuthi rí ikhaa nimbumuu kaʼyulúʼ mú ragájkhun nindxu̱u̱ rúʼko̱. Xtágabu rí na̱ʼkha̱ náa Biblia nasngájma rí ikhaa naxmiéjunʼ kaʼyulú. Rí muniʼnuʼ Biblia mambáyulúʼ makru̱ʼu̱lú xóo phú ni̱ndxu̱lú ga̱jma̱a̱ makru̱ʼu̱lú náa numuu rí numbaaʼ rígá wéñuʼ dí ra̱májánʼ. Xóo má niʼthí mbáa filósofo alemán: “Xa̱bu̱ numbaaʼ ga̱jma̱a̱ Xa̱bu̱ Ñajunʼ nda̱a̱ rí nijmañún náa xúgíʼ rí ni̱ʼkha̱ rarígá, numuu rí nda̱a̱ rí enimi̱jna̱ muni á mu rígá mbá rí nijmañún”.

Jesús, bi̱ nindxu̱u̱ A̱ʼdióo Dios niʼthí mbá míʼtsú “ku̱ma̱ nakujmaa ga̱jma̱a̱ rí naguma” (Lucas 7:35). Guʼyáá mbá xkri̱da, Náa Salmo 146:3 naʼthí: “Xátagiwanʼ a̱jkia̱nʼ náa xa̱bu̱ bi̱ guaʼdáá numún, ni má náa a̱ʼdióo xa̱bu̱ numbaaʼ”. Xtágabu rígi̱ mambáyulúʼ mbuʼyáá rí xa̱bu̱ numbaaʼ xáʼngu̱u̱n guni májaanʼ raʼkhí dí rígá náa numbaaʼ. Kenneth bi̱ xtáa náa mbá xuajen dí rígá náa Norteamérica náa nuradímíjná wéñuʼ xa̱bu̱ naʼthí: “Xúgínʼ xa̱bu̱ bi̱ nutrigi̱i̱n mutañajunʼ nithi rí muni májánʼ dí xtáa rarígá mu tséʼngu̱u̱n. Rúʼko̱ nakujmaa kaʼwu rí gajkhun nindxu̱u̱ rí naʼthí náa Biblia”.

Daniel, bi̱ niʼthá ga̱jma̱a̱ numuu nákha ginii, ikhaa naʼthí xóó: “Mámbá mbiʼi nda̱yo̱o̱ itháán kaʼwu rí nimbáa xa̱bu̱ numbaaʼ xáʼngo̱o̱ ganindxu̱u̱ mbáa májaanʼ Xa̱bu̱ Ñajunʼ. Ma̱ngaa rí maraʼdáá wéñuʼ mbújkha̱a̱ raʼkháa rúʼko̱ eyoo gáthúu̱n rí maraxtaa tsímáá. Naniʼniúnʼ mbaʼin xa̱bu̱ bi̱ nákha ginii nindxa̱ʼwa̱míjna̱ xúʼko̱ kaʼnii mu xúgi̱ kuwa gíná numuu rí na̱nguá kuwa xóo ikhiin nikumu̱ún”.

Náa Biblia raʼkháa i̱ndó naʼthúlúʼ rí xúʼni̱ duwamijná, ma̱ngaa naʼthúlúʼ dí rígá mbá rí májánʼ makhánulúʼ nda̱wa̱á xóo má maʼga rajmañulú.