‹Xa̱bu̱ bi̱ kuwa mbiʼi xúgi̱ guaʼdáá tecnología, kuwa científico ga̱jma̱a̱ rígá mbújkha̱a̱ [...] ga̱jma̱a̱ xa̱bu̱ bi̱ kuwa mbiʼi xúgi̱ ni̱ndxu̱ún timbíi̱n bi̱ nagún runi gámbáa dí rígá náa numbaaʼ›. (Informe Global de Riesgos 2018 del Foro Económico Mundial).

NÁÁ NUMUU RÍ XA̱BU̱ BI̱ NDUYÁÁ GA̱JMA̱A̱ NUMUU RÍGI̱, NAXMIÉJÚNʼ XÓO GAKUWA NDA̱WA̱Á GA̱JMA̱A̱ RÍ GÁGÍʼNUU NUMBAAʼ RÁ. GUʼYÁÁ TIKHU XKUJNDU DÍ XTÁA RARÍGÁ NÁA NUMBAAʼ.

• XKUJNDU DÍ NARÍGÁ NÁA INTERNET. Náa periódico The Australian. Naʼthí rí náa Internet mámbá mbiʼi nanindxu̱u̱ itháán gamíi. Numuu rí ikhí xa̱bu̱ xkawiinʼ ma̱ndoo muni mbaʼa enii dí ra̱májánʼ. Ma̱ngaa rí itháán na̱jkha̱ rajoo náa xúgíʼ numbaaʼ nindxu̱u̱ rí xa̱bu̱ ma̱ndoo muni kuʼwáʼ datos ndrígaaʼ, ma̱ngaa náa Internet naʼni rí xa̱bu̱ musngajma xóo phú ni̱ndxu̱ún.

• RAʼKHÁA XÚGÍINʼ GUAʼDÁÁ MBUJKHAA. Náa informe rí nigájnuu xíkhóó ndrígóo Oxfam International naʼthí rí mbá 8 xa̱bu̱ bi̱ guaʼdáá wéñuʼ mbújkha̱a̱ náa xúgíʼ numbaaʼ guáʼdáá ikha̱á má mbújkha̱a̱ rí guáʼdáá mbá 3,600 millones xa̱bu̱ bi̱ itháan gíníi bi̱ kuwa náa numbaaʼ. Ga̱jma̱a̱ náa informe naʼthí rí xóo najmaa mbújkha̱a̱ tseyambáá numuu rí bi̱ guáʼdáá naguaʼdáá itháán ga̱jma̱a̱ bi̱ gíníi naʼni itháán gíníi, mu itháán náa gu̱ʼu̱. Tikhun xa̱bu̱ namíñúún numuu dí rígi̱ ma̱ndoo maʼni rí xa̱bu̱ magi̱ʼdu̱u̱n.

• GUERRA GA̱JMA̱A̱ RÍ NUXKÚN. Informe rí nirígá nákha tsiguʼ 2018 ndrígóo Agencia de las Naciones Unidas para los Refugiados niʼthí: Rí mbiʼi xúgi̱ nduyáá rí xa̱bu̱ bi̱ nagájnún náa xuajñún nanindxu̱ún itháán mbaʼin. Itháán rí mbá 68 millones xa̱bu̱ ndiyóoʼ magajnún náa guʼwún ga̱jma̱a̱ numuu guerra o rí nuxkúún. Náa informe ma̱ngaa naʼthí rí mámbá segundos rí nanújngoo a̱jmi̱i̱n xa̱bu̱ nagájnún náa xuajñún.

• NAGUMA GACHÍÍ XÚGÍʼ DÍ RÍGÁ. Informe Global de Riesgos 2018 naʼthí rí xujkhúʼ bi̱ kuwa ga̱jma̱a̱ plantas dí rígá na̱jkha̱ raguámbá ma̱ngaa rí giñánʼ ma̱ngaa iyaʼ niguma gachíí, rúʼko̱ naʼni rí xa̱bu̱ ma̱ndoo kháñuu wéñuʼ. I̱mba̱, náa mbaʼa xuajen a̱ʼma ga̱jma̱a̱ eʼwíinʼ xujkhú bi̱ nagún kudún ejndo̱o̱ʼ ri̱ʼi̱ na̱jkha̱ raguámbíin, á mu ikhiin naguámbíin mbá kayuʼ ni xándoo marigá i̱ʼwáʼ plantas. Ikha jngó científicos nuthi dí rígi̱ ma̱ndoo maʼni rí mambáa dí rígá náa numbaaʼ.

Lá ma̱ndoo muriʼkui̱i̱ mu numbaaʼ náa kuwáanʼ maʼni̱i̱n májaanʼ ráʼ. Mbaʼin xa̱bu̱ nakumu̱ún rí ndayóoʼ mu̱ʼgua̱ mbá escuela mu muʼni rígi̱. Á mu xúʼko̱, xú kaʼnii escuela gaʼyoo mu̱ʼgua̱ rá. Náa imbo̱ʼ artículo muriʼña̱a̱ graxe̱ rígi̱.