Xa̱bu̱ Ñajunʼ ndrígóo Dios bi̱ nandulú rí ma̱ʼkha̱ maxtáa maʼtáñajunʼ náa tsu̱du̱u̱ ku̱ba̱ʼ ikhaa maʼni rí makuwáanʼ tsímáá ga̱jma̱a̱ mbá kambáxulú. Xó má naʼthí náa Salmo 72:7, “marigá wéñuʼ rí tsímáá” náa tsu̱du̱u̱ Ku̱ba̱ʼ. Mú, Náa mbi̱ʼi̱i̱ gáʼtañajunʼ Reino ndrígóo Dios rá. Xú káʼnii gáʼni xá. Xú káʼnii gándoo gámbáyáaʼ ikháán Reino bugi̱ rá.

Náa Biblia naʼthí rí marigá mbaʼa tsinaʼ rí masngájma dí Reino ndrígóo Dios ma̱ʼkha̱. Niʼthí rí marigá guerra náa xúgíʼ numbaaʼ, ewiʼ, nandii, gaʼxma ga̱jma̱a̱ marigá wéñuʼ dí ra̱májánʼ (Mateo 24:3, 7, 12; Lucas 21:11; Revelación 6:2-8).

Náa imbo̱ʼ kiʼtáriyaʼ naʼthí rí: “Índo̱ gáʼni iwáá mbiʼi maʼni mbiʼi gakhi̱i̱ ga̱jma̱a̱ maʼni mingíjyúuʼ makuwáanʼ. Numuu rí xa̱bu̱ maʼndún kuyamijná i̱ndó ikhiin, manigunʼ wéñuʼ mbújkha̱a̱, [...] xúnimbúu̱n kuñún anún, asndu núma̱aʼ xúxnáa, xúni rí jmbu, xáʼndun kuñún a̱ngiu̱ún, xaʼndún gunimbaníí xkujndu, munitsudúún eʼwíínʼ, xúñewa̱a̱n rí muni, manindxu̱ún xóo xujkhú xáná, xáʼndun guni rí májánʼ, [...] ra̱ʼkhá tháán gunimbamijna, itháan maʼndún muni rí nanigunʼ ikhiin ki xóo rí nandoo Dios” (2 Timoteo 3:1-4). Gajkhun má, rí nikuwa xa̱bu̱ xúʼko̱ kaʼnii mu rí mbiʼi xúgi̱ kuwa itháan.

Rí kiʼtáriyaʼ rígi̱ nigíʼdu̱u̱ nimbánuu nákha tsiguʼ 1914. Mbaʼin bi̱ niniraʼmáʼ xóo e̱ʼkha̱ rarígá, nithi rí tsiguʼ rúʼko̱ nigi̱ʼdu̱u̱ nixtiʼkhuu wéñuʼ. Mbá xkri̱da, mbáa xa̱bu̱ bi̱ naʼthí ga̱jma̱a̱ numuu historia bi̱ mbiʼyuu danés Peter Munch niniraʼmáʼ: “Guerra rí nirígá nakha tsiguʼ 1914 rúʼko̱ niʼni rí maxtiʼkhuu wéñuʼ xóo kuwa xa̱bu̱. Asndu mbiʼi rúʼko̱ nixtiʼkhuu wéñuʼ [...] nigíʼdu̱u̱ nikuwáanʼ phú ra̱májánʼ kayuʼ, xa̱bu̱ nigíʼdi̱i̱ niwiñu̱u̱nʼ kuyamijná ga̱jma̱a̱ náa xúgíʼ numbaaʼ nánguá rígá rí tsímáá”.

Xóo kuwáanʼ xúgi̱ nindxu̱u̱ asndu xóo índo̱ naxnúu ruʼwambiiʼ nduʼyáá gajkhun dí ruʼwa rúʼko̱ matuxi̱i̱. Xúʼko̱ má kayuʼ nindxu̱u̱ rígi̱ ma̱ngaa, xkujndu dí xtáa rarígá xúgi̱ nasngájma dí Reino ndrígóo Dios inu má maʼtáñajunʼ náa numbaaʼ. Jesús ma̱ngaa niʼthí rí: “Ga̱jma̱a̱ ajngáa rí májánʼ ndrígóo reino majuiʼtáraʼa náa xúgíʼ numbaaʼ mu mudxawíín xúgínʼ xa̱bu̱; ga̱jma̱a̱ ikhú ma̱ʼkha̱ fin” (Mateo 24:14).

Ajngáa rígi̱ nindxu̱u̱ rí nu̱tha̱ ikháanʼxu bi̱ nindxuxu bi̱ nutaraʼa numuu Jeobá. Ga̱jma̱a̱ i̱yi̱i̱ʼ ndrígúxu̱ rí najmaʼnuuʼ wéñuʼ nindxu̱u̱ Bi̱ Nayejngoo. Naʼtáraʼa numuu Reino ndrígóo Jeobá. Ikhí na̱ʼkha̱ raʼthí xúgíʼ rí gáʼni Reino ndrígóo Dios náa numbaaʼ.

Mu muriʼña̱a̱ graxe̱ rígi̱ guʼyáá a̱jkhu̱ enii rí marigá:

1. Reino bugi̱ xániñuʼ rí nimbáa Xa̱bu̱ Ñajunʼ bi̱ xtáa náa numbaaʼ maxtáa náa ikhaa maʼtáñajunʼ.

2. Xa̱bu̱ Ñajunʼ bi̱ kuwa náa numbaaʼ muni mijna muxmijná gajmiún Reino ndrígóo Dios (Salmo 2:2-9).

3. Reino ndrígóo Dios maʼni gámbíin Xa̱bu̱ Ñajunʼ bi̱ kuwa náa tsu̱du̱u̱ ku̱ba̱ʼ numuu rí ikhiin muni mijna muxmijná gajmiún (Daniel 2:44; Revelación 19:17-21). Guerra rígi̱ náa Biblia naxná mbiʼyuu Armagedón (Revelación 16:14, 16).

4. Xa̱bu̱ bi̱ nandún makuwá náa Reino bugi̱ ikhiin makáwíin náa Armagedón ga̱jma̱a̱ makuwá náa mbá numbaaʼ rí marigá rí tsímáá. Náa Biblia naʼthí rí ikhiin mani̱ndxu̱ún “ra̱ʼkhá tháán mbaʼin xa̱bu̱” (Revelación 7:9, 10, 13, 14).

Timbá rí ndayúlú mu makuwáanʼ náa Reino ndrígóo Dios nindxu̱u̱ ku̱ma̱. Náa mbá tsajkhun rí Jesús niʼni, niʼthí: “Rígi̱ eyoo gáʼthúu̱n rí maraxtaa kámuu mbiʼi, rí muninuwínʼ ikháán, mbáwiin ikháán bi̱ ni̱ndxa̱ʼ Dios gajkhun, ga̱jma̱a̱ Jesucristo bi̱ nitaxúnguanʼ” (Juan 17:3).

Rí matatsiʼniiʼ májánʼ Dios mbaʼa náa rí gámbáyáaʼ. Mbuʼyáá a̱jma̱ rí ikhaa. Timbá mambáyulúʼ maguaʼdáá mbá fe gújkhuʼ náa Dios. Á mu guaʼdáá fe mbuʼyáá gajkhun dí Reino ndrígóo Dios gíʼ mijngii ma̱ʼkha̱ (Hebreos 11:1). Rí maʼni a̱jma̱ nindxu̱u̱, maʼni rí maʼndulú kuʼyáá itháán Dios ga̱jma̱a̱ xa̱bu̱ numbaaʼ gajmiúlú. Á mu nandulú kuʼyáá Dios maxkaxáanʼ muʼnimbulúʼ kuʼyáá ga̱jma̱a̱ xúgíʼ a̱jkiu̱lú, ga̱jma̱a̱ rí maʼndulú kuʼyáá xa̱bu̱ numbaaʼ gajmiúlú maʼni rí muʼnimbánii xtágabu ndrígóo Jesús náa niʼthí: ‹Xóo má nandala rí xa̱bu̱ muni ga̱jma̱á nindxa̱la xúʼko̱ má gíʼmaa muʼni mangáanʼ› (Lucas 6:31).

Anu̱lú bi̱ xtáa mekhuíí nandoo rí ikháanʼ makuwáanʼ májánʼ. “Nandoo rí maguaʼdáá vida rí phú nindxu̱u̱ gajkhun” (1  Timoteo 6:19). Numuu rí vida rúʼko̱ na̱nguá guaʼdáá rí mbiʼi xúgi̱. Mbaʼin xa̱bu̱ nduyáá rí maraxtaa nindxu̱u̱ mingíjyúuʼ. Xú kaʼnii nindxu̱u̱ vida rí phú ikhaa rá. Guʼyáá tikhu rí mitsaan dí maʼni Reino ndrígóo Dios náa numbaaʼ.