Rí xóo naʼsngáa Biblia gíʼdoo tsiakii mu mariʼkhu̱u̱ xóo nindxu̱u̱ mbáa xa̱bu̱. Guʼyáá xóo nimbáyúu Ricardo ga̱jma̱a̱ Andrés.

RICARDO. Índo̱ nigúʼdoʼ 15 tsíguʼ nito̱ʼo̱ʼ náa mbá pandilla. Numuu rí kaʼníín ninindxu̱ʼ mbá dxámá, rí nuni bi̱ nambáxuʼ gajmíʼ niniguʼ mani mangúún. Rí itháán nindoʼ mani ninindxu̱u̱ rí maʼgá náa guʼwá e̱jua̱nʼ mbá gu̱wa̱ʼ tsiguʼ. Asndu xóo rakáʼnii matatsimbaʼ mu ikhaa rúʼko̱ rí niniguʼ numuu rí náa nixtáá nduyamajkhún wéñuʼ bi̱ nikuwa náa guʼwá e̱jua̱nʼ.

Nixtáá rani̱ aʼkhá gajmínʼ mbaʼin gu̱ʼu̱, nijmuʼ droga ga̱jma̱a̱ ninindxu̱ʼ mbáa xa̱bu̱ bi̱ nanigu̱u̱ʼ magi̱ʼdu̱u̱ gajmíin eʼwíinʼ. Mbá mbruʼun nixmijnaxu̱ ga̱jma̱a̱ ajua̱nʼ. Nikumuʼ rí ikhí má gákháñúʼ mú nikríñun’. Ikhú nigíʼdu̱u̱ nindxa̱ʼwa̱mínáʼ náá numuu rí xúʼko̱ eni, ikhú nitha rí mariʼkuminaʼ, mú na̱nguá ndi̱yo̱o̱ xóo mani, asndu ni̱jkhánú nitha tsáá gándoo gámbáyuʼ rá.

Mbaʼin bi̱ ka̱ñu̱u̱n guáʼdáá wéñuʼ xkujndu ga̱jma̱a̱ na̱nguá kuwa tsímáá, mu nigúʼdaa mbáa a̱muʼ bi̱ ninindxu̱u̱ mixtiʼkuii. Nda̱yo̱o̱ rí ikhaa ga̱jma̱a̱ bi̱ kuwa náa goʼwóo ni̱ndxu̱ún míjínʼ xa̱bu̱ ga̱jma̱a̱ rí nunimbaníí gajkhun rí naʼthí náa Biblia. Ikhiin nithu̱nʼ rí mbiʼyuu Dios nindxu̱u̱ Jeobá. Nda̱wa̱á rí nikriñúuʼ náa rí nixmijnáxu, nitajkháan ga̱jma̱a̱ niriyaʼ mbiʼyuu Dios mu mambáyuʼ. Imbo̱ʼ mbiʼi mbáa bi̱ naʼtáraʼa numuu Jeobá niʼdu̱u̱ xkrugoʼ. Ikhú nigíʼdu̱u̱ ninigajmaa Biblia ga̱jmu̱ʼ ikhaa.

Niʼniuʼ mingíjyúuʼ, numuu rí bi̱ nimbáxuʼ gajmíʼ nákha ginii nutaroʼoʼ má xúʼko̱ rí magajnúʼ gajmíʼ. Mú ikhúún ni̱thu̱u̱n rí na̱nguá. Numuu rí ikhúún niraʼwíí manigajmaa Biblia ga̱jma̱a̱ nadxuʼ dí rúʼko̱ niraʼwíí mani. Numuu dí rúʼko̱ niriʼkhu̱u̱ xóo xtáá ga̱jma̱a̱ rí xúgi̱ xtáá gagi wéñuʼ.

Ikhúúnʼ nákha ginii nindoʼ maʼgá mbá gu̱wa̱ʼ tsiguʼ náa guʼwá e̱jua̱nʼ mu xúʼko̱ mbuyamajkhuʼ náa mbá pandilla. Ikha jngó nitakáñuu Dios rí maniñuʼ mbá gu̱wa̱ʼ tsiguʼ mathu̱u̱n xa̱bu̱ ga̱jma̱a̱ numuu Biblia. Dios niriʼña̱a̱ rí nitajkháan, numuu rí niniñuʼ mani ñajunʼ rígi̱ mbá 17 tsiguʼ, ga̱jma̱a̱ núma̱aʼ má ikhaa táʼgá guʼwá e̱jua̱nʼ.

Mbaʼin bi̱ nimbáxuʼ gajmíʼ nákha ginii kuwa náa guʼwá e̱jua̱nʼ ga̱jma̱a̱ eʼwíínʼ nikháñún. Rakha tháán naxníin núma̱aʼ familia ndrígóʼ bi̱ nutaraʼa ga̱jma̱a̱ numuu Jeobá numuu rí ikhiin ni̱ndxu̱ún mixtiʼkuiin ga̱jma̱a̱ rí nunimbánii rí naʼthí náa Biblia. Ga̱jma̱a̱ ikhiin ndayamajkhúún  wéñuʼ. Mú rí itháán nani nindxu̱u̱ rí naxnáá wéñuʼ núma̱aʼ Dios numuu rí nisngóʼ xóo maxtáá.

ANDRÉS. Nixtáá náa mbá xuajen migíná, náa rígá wéñuʼ drogas, nuradímíjná wéñuʼ xa̱bu̱, nuni kuʼwáʼ ga̱jma̱a̱ náa gu̱ʼu̱ nugujua̱ míjna. Anu̱ʼ ninindxu̱u̱ mbáa xa̱bu̱ bi̱ naʼga̱a̱n wéñuʼ iyaʼ najnga̱a̱ ga̱jma̱a̱ najmuu wéñuʼ droga. Ikhaa ga̱jma̱a̱ ru̱dúʼ nagiʼdu̱u̱n má xúʼko̱.

Ikha jngó mangúún nigíʼdu̱u̱ nigaʼ iyaʼ najnga̱a̱ ga̱jma̱a̱ nijmuʼ droga nákha ni̱ndxu̱ʼ mbáa dxámá. Xúgíʼ mbiʼi jngruigoʼ náa calle, nani kuʼwáʼ ga̱jma̱a̱ nagujua̱a̱ rí nani kuʼwáʼ. Tsiguʼ nda̱wa̱á, anu̱ʼ nisngóʼ magujua droga. Rúʼko̱ nini rí tájyúuʼ makhánúʼ mbújkha̱a̱ mú mbóʼ mbiʼi policía niguwáʼ náa goʼwóʼ ga̱jma̱a̱ nigún ku̱ñu̱u̱n náa guʼwá e̱jua̱nʼ numuu rí nigíʼ maxíyáa mbáa xa̱bu̱. Nithu̱nʼ rí maxtáá náa guʼwá e̱jua̱nʼ mbá witsu tsiguʼ.

Mboʼ mbiʼi nithúún xúgínʼ bi̱ kajchún náa guʼwá e̱jua̱nʼ rí magún náa mbá reunión rí muni bi̱ nutaraʼa numuu Jeobá ga̱jma̱a̱ ni̱jkhá. Ikhú ndi̱yo̱o̱ rí xúgíʼ rí nithi nindxu̱u̱ gajkhun ga̱jma̱a̱ nindoʼ manigajmaa Biblia. Ikhiin nithi xóo má e̱ʼkha̱ raʼthí náa Biblia ga̱jma̱a̱ nisngóʼ xóo phú nindxu̱u̱ xtángoo ndrígóo Dios.

Ikhú ndi̱yo̱o̱ rí ndayóoʼ mbáa tsáa mambáyuʼ mu mariʼkuminaʼ, ma̱ngaa rí eʼwíinʼ bi̱ kajchún náa guʼwá e̱jua̱nʼ nithu̱nʼ rí muxiñún numuu rí tsenigu̱u̱nʼ rí ikhúúnʼ nani gájmaa Biblia. Ikhú nindo̱ʼo̱o̱ Jeobá rí maxnúʼ tsiakii ga̱jma̱a̱ ku̱ma̱. Rúʼko̱ nimbáyuʼ dí ‹xámiñuʼ› mathu̱u̱n rí najmañuʼ.

Índo̱ ni̱jkha̱nú, mbiʼi rí magajnáaʼ náa guʼwá e̱jua̱nʼ nimíñuʼ wéñuʼ rí asndu nindoʼ maguanúʼ má ikhí. Índo̱ xtáá ragájnáanʼ tikhun nithu̱nʼ “atangáán guʼwáaʼ ndxajkun”.

Xúgi̱ ra̱ʼkhá tháán edxu̱ʼ rí niniʼñáminaʼ rí Dios maxnúʼ ikha ga̱jma̱a̱ naxnáá wéñuʼ núma̱aʼ numuu rí ikhaa nandoo kaʼyoʼ. a