ARTÍCULO RÍ MU’NIGAJMAA 3
AJMÚÚ 124 Ganindxu̱lú mbáa xa̱bu̱ jmbii
Jeobá gámbáyáaʼ náa mbiʼi mingíjyúuʼ
“Ikhaa nindxu̱u̱ bi̱ nagíʼ mbiʼi” (IS. 33:6).
EDXU̱U̱
Ndiéjuunʼ gíʼmaa muʼni mu mambáyulú rí Jeobá naxnulú índo̱ nanújngulú mbiʼi mingíjyúuʼ rá.
1, 2. Ndiéjuunʼ xkujndu nuraʼníí xa̱bi̱i̱ Jeobá rá.
NGUÁNÁ mbá gamiéjunʼ maʼni dí mbá nacha̱ maxtiʼkhuu xóo kuwáanʼ. Guʼyáá tikhuʼ xkri̱da. Mbá mbiʼi, mbáa médico niʼthúu̱n ndxájulú Luis a rí gíʼdoo cáncer dí nda̱a̱ thanuu ga̱jma̱a̱ rí nánguá mba̱yu̱u̱ʼ mbiʼi xóo maʼngo̱o̱ maxtáa. Monika xtáa gagi raʼni ñajuunʼ Jeobá ga̱jma̱a̱ ajmbio̱o̱ bi̱ nindxu̱u̱ anciano. Mú mbá mbiʼi ni̱jkha̱nú niʼdxawuun rí ikhaa xtáa raʼni dí tsénigu̱u̱ʼ Jeobá. Olivia bi̱ xóó tséyáa xa̱bu̱, ndiyóoʼ dí magajnúu náa goʼwóo numuu dí maxnúu ruʼwa mbiʼ. Índo̱ nitanga̱a̱ ndiʼyoo dí niguámbáa mbá xúgíʼ. Mbá nacha̱ kayuuʼ nixtiʼkhu̱u̱ xóo nixtáa. Lá nigíʼnaa mbóo xígi̱ kaʼnii mangáánʼ ráʼ.
2 Mbá xúgíinʼ xa̱bi̱i̱ Jeobá bi̱ kúwá náa xúgíʼ numbaaʼ numíniiʼ eʼni xkujndu ga̱jma̱a̱ naʼniulú nandii. Ma̱ngaa ndayóoʼ maʼngulú ga̱jma̱a̱ rí nuni̱ gínáanʼ o rí nuxkulú xa̱bu̱ bi̱ tsíñún gúñún xa̱bi̱i̱ Dios. Gajkhun má Jeobá tsérikhoo dí xáguaʼníí dí ra̱májánʼ, mú ikhaa má naʼthúlú dí mambáyulú (Is. 41:10). Ma̱ndoo maʼdxulu má xúʼko̱, majmáán muraʼwi̱i̱ májánʼ dí muʼni ga̱jma̱a̱ maguajún jmbu maski ajndu muraʼníí xkujndu gakhi̱i̱, numuu rí Jeobá nambáyulú. Náa artículo rígi̱, mbuʼyáá mbá a̱jkhu̱ rí Jeobá naʼni mu mambáyulú náa xkujndu rí nuraʼníí. Ma̱ngaa muʼnigajma̱a̱ rí gíʼmaa muʼni mu mambáyulú ikhaa.
JEOBÁ MAÑEWU̱NLÚ
3. Índo̱ nuraʼníí mbá xkujndu rí gakhi̱i̱, ndiéjuunʼ rí maʼniulú gakhi̱i̱ muʼni rá.
3 Xkujndu. Á mu kuwáanʼ ranújngulú náa mbá xkujndu gakhi̱i̱, mbáa maʼniulú gakhi̱i̱ mundxaʼwáá májánʼ edxu̱lúʼ ga̱jma̱a̱ muraʼwíí májánʼ dí muʼni. Ndíjkha rá. Numuu rí kuwáanʼ ngíná ga̱jma̱a̱ naxmiéjunlú, rúʼko̱ gáʼni rí xájmáán gúndxaʼwáá májánʼ edxu̱lúʼ ga̱jma̱a̱ xúʼyáá dí muʼni. Xó má nikumu̱ún a̱ngiu̱lú bi̱ niʼthá nángii náa timbá kutriga̱. Olivia naʼthí: “Índo̱ giñánʼ mbiʼ ni̱jkha̱ kayóo goʼwóʼ, nijmúʼ wéñuuʼ ga̱jma̱a̱ nánguá ndi̱yo̱o̱ dí ma̱ni̱”. Monika bi̱ niʼninduwaaʼ ajmbio̱o̱ ga̱jma̱a̱ imba̱a̱ a̱ʼgu̱, naʼthí: “Ra̱ʼkhá tháán nixtáá ngíná. Niku̱mu̱ʼ asndu xóo nixnáá ga̱jma̱a̱ mbá puñete náa a̱jkiu̱nʼ. Rí asndu tséjmún gáni̱ rí naguʼun nani mámbá mbiʼi. Nditháan na̱nguá niku̱mu̱ʼ magíʼnuu rígi̱”. Xú káʼnii nikudaminaʼ Jeobá dí mambáyulú índo̱ nuraʼníí mbá xkujndu rí nakumulú rí nánguá maʼngulú rá.
4. Xó má naʼthí náa Filipenses 4:6, 7, ndiéjuunʼ rí nakudaminaʼ Jeobá rá.
4 Rí naʼni Jeobá. Náa Biblia naʼthí rí ikhaa nakudaminaʼ maxnulú “tsímáá ndrígóo Dios” (atraxnuu Filipenses 4:6, 7). Tsímáá rígi̱, naʼni rí maʼni̱i̱ a̱jkiu̱lú, núma̱aʼ má rí nambájxulú májánʼ gajmiúlú Jeobá. Ra̱ʼkhá tháán mitsaanʼ rí asndu “nimbáa xa̱bu̱ numbaaʼ tséʼngo̱o̱ gíkro̱ʼo̱o̱” o mandxaʼwáminaʼ. Lá mbá miʼtsú niratákáñííʼ Jeobá ga̱jma̱a̱ nda̱wa̱á niku̱ma̱a̱ʼ rí asndu xóo niʼni̱i̱ a̱jkia̱a̱nʼ ráʼ. Rúʼko̱ nindxu̱u̱ “tsímáá rí na̱ʼkha̱ náa Dios”.
5. Xú káʼnii eñawu̱u̱n tsímáá ndrígóo Dios a̱jkiu̱lú ga̱jma̱a̱ ku̱ma̱ ndrígulú rá.
5 Náa Filipenses 4:7, na̱ʼkha̱ raʼthí ga̱jma̱a̱ “tsímáá ndrígóo Dios” mú ma̱ngaa na̱ʼkha̱ raʼthí dí “mañewu̱u̱n a̱jkia̱la, mañewu̱u̱n ku̱ma̱ ndrígala”. Náa ajngáa griego “mañewu̱u̱n”, nindxu̱u̱ ajngáa rí najmún soldados bi̱ nuñewa̱a̱n xuajin mu xúʼko̱ xátuʼu̱u̱n xa̱bu̱ sia̱nʼ. Xa̱bu̱ bi̱ kúwá náa xuajin rúʼko̱, ma̱ndoo mu̱nuʼ tsímáá numuu rí nduyáá dí soldados guájun náa puerta mu muñewa̱a̱n xuajin. Xúʼko̱ má kayuuʼ, índo̱ “tsímáá ndrígóo Dios” nañewu̱u̱n a̱jkiu̱lú ga̱jma̱a̱ ku̱ma̱ ndrígulú, naʼni rí makuwáanʼ májánʼ ga̱jma̱a̱ tsímáá (Sal. 4:8). Maski ajndu nakujmaa tséxtiʼkhu̱u̱ xóo kuwáanʼ, mú ma̱ndoo maʼni̱i̱ a̱jkiu̱lú, asndu xóo ni̱jkha̱nú nikumu̱u̱ Ana (1 Sam. 1:16-18). Xúʼko̱ xáʼniulú gakhi̱i̱ mundxaʼwáá májánʼ edxu̱lúʼ ga̱jma̱a̱ muraʼwíí dí májánʼ muʼni.
Aratájkáan má xúʼko̱ asndu ma̱ta̱ya̱a̱ “tsímáá ndrígóo Dios” ma̱ngaa mu mañewu̱u̱n a̱jkia̱a̱nʼ ga̱jma̱a̱ ku̱ma̱ ndrígáaʼ. (Atayáá kutriga̱ 4-6).
6. Ndiéjuunʼ gándoo muʼni mu mambáyulú tsímáá ndrígóo Dios rá. (Atayáá xtiʼkhu ma̱ngaa.)
6 Rí ndayóoʼ muʼni ikháanʼ. Xó má xa̱bu̱ bi̱ kúwá náa xuajin ma̱ndoo munda̱ʼa̱a̱ mbáa soldado rí mañewu̱u̱n, xúʼko̱ ma̱ndoo munda̱ʼa̱a̱ Jeobá rí mañewu̱nlú mangáánʼ. Guʼtákáñíí má xúʼko̱ Jeobá asndu ‹maxnulú tsímáá ndrígóo› (Luc. 11:9; 1 Tes. 5:17). Rígi̱ nindxu̱u̱ dí niʼni Luis ga̱jma̱a̱ Ana bi̱ nindxu̱u̱ a̱ʼgiu̱u̱, índo̱ nitháán dí na̱jkha̱ rajngiyuu mbiʼi dí makhañúu. Luis naʼthí: “Índo̱ natagíʼníí xóo rígi̱, o náa i̱ʼwáʼ naʼniaaʼ gakhi̱i̱ ma̱ta̱ya̱a̱ ndiéjuunʼ gátani̱. Mú rí nimbáyuxuʼ, makuwáanʼ tsímáá náa xúgíʼ rígi̱, ikhaa nindxu̱u̱ rí mutajkáan”. Mbá nájmi̱i̱n nuthi rí nitakháñii má xúʼko̱ Jeobá mbaʼa nuthu ga̱jma̱a̱ nitháán rí makuwíin tsímáá, mañewu̱u̱n a̱jkiu̱ún ga̱jma̱a̱ ku̱ma̱ mu majmiin muraʼwi̱i̱ májánʼ dí muni̱. Ikhiin ndiyáá rí Jeobá niriʼñúún. Á mu mangáánʼ xtáa xúʼko̱ káʼnii, aratákáñíí má xúʼko̱ Jeobá. Ma̱ta̱ya̱a̱ xú káʼnii Jeobá maʼni maraxtaa tsímáá ga̱jma̱a̱ mañewu̱u̱n a̱jkia̱a̱nʼ ga̱jma̱a̱ ku̱ma̱ ndrígáaʼ (Rom. 12:12).
JEOBÁ GÁMBÁYÁAʼ
7. Xú káʼnii gákumulú índo̱ nanújngulú náa xkujndu gakhi̱i̱ rá.
7 Xkujndu. Á mu kuwáanʼ ranújngulú mbá xkujndu gakhi̱i̱, mbáa maʼniulú gakhi̱i̱ mbuʼyáá awa̱án dí gúʼni ga̱jma̱a̱ rí xundxaʼwamíjna ni má xúʼni̱ xó má kaʼyoo. Xó má mbá barco, índo̱ naxnúu ola ndrígóo lamáa mbaʼa nuthu eʼni giñán mbiʼ, mbáa makumulúʼ xúʼko̱ mangáánʼ. Rúʼko̱ dí nigíʼnuu a̱ʼgiu̱u̱ Luis índo̱ ikhaa nikháñuu. A̱ʼgiu̱u̱ naʼthí: “Nguáná naxtáá ngíná wéñuuʼ ga̱jma̱a̱ nagáwíinʼ a̱jkiu̱nʼ kayamínaʼ. Nguáná nakiʼnún kayamínaʼ mbu̱júu̱ numuu rí Luis nikháñuu”. Ma̱ngaa narígá mbiʼi rí naku̱mu̱ʼ dí xtáá mbawúún ga̱jma̱a̱ nakiʼnún numuu rí ndayóoʼ ma̱ni̱ dí Luis naʼni májánʼ nákha xtáa ikhaa. Ikhaa nikumu̱u̱ rí asndu xóo xtáa náa tu̱mba̱a̱ lamáa. Xú káʼnii embáyulú Jeobá índo̱ nakumulú rí nándáa tsiaki̱i̱ ga̱jma̱a̱ naʼniulú gakhi̱i̱ rá.
8. Xó má naʼthí náa Isaías 33:6, ndiéjunʼ dí nikudaminaʼ Jeobá rá.
8 Rí naʼni Jeobá. Ikhaa nikudaminaʼ rí maxnúlú tsiaki̱i̱ (atraxnuu Isaías 33:6). b Índo̱ naxnúu giñán mbiʼ, barco ma̱ndoo maʼba̱a̱n gakhi̱i̱. Mu xáʼni xúʼko̱, mbaʼa barco rígá náa mámbá nijniúu rí nañe̱wu̱u̱n mu xáʼga̱ nijnííʼ. Ikha jngóo vaivén ndrígóo barco naʼni wabaʼ ga̱jma̱a̱ xa̱bu̱ bi̱ nagún ikhí tsémiñún. Mbaʼa dí nambáyúu barco rígi̱, nañajunʼ májánʼ á mu dí barco na̱jkha̱. Xúʼko̱ má kayuuʼ, á mu nandulúʼ dí Jeobá mambáyulú mu maʼngulú náa xkujndu gakhi̱i̱, ndayóoʼ rí muʼni má xúʼko̱ ñajuunʼ.
Iyulú mambáyulú mu muʼni má xúʼko̱ ñajuunʼ Dios. (Atayáá kutriga̱ 8, 9).
9. Xú káʼnii gándoo gámbáyulú dí mbuʼyáʼ, mu mbuʼyáá awa̱án índo̱ nuraʼníí xkujndu rá. (Atayáá xtiʼkhu ma̱ngaa.)
9 Rí ndayóoʼ muʼni ikháanʼ. Á mu kuwáanʼ náa awúu̱n xkujndu rí naʼniulú gakhi̱i̱, guʼni asndu xó má gáʼngo̱o̱ rí muʼni má xúʼko̱ ñajuunʼ Jeobá. Gajkhun má dí nánguá majmáanʼ muʼni xó má nákha ginii, mú garmáʼáan a̱jkiu̱lú dí Jeobá nakro̱ʼo̱o̱ kaʼyulú (atayáá ma̱ngaa Lucas 21:1-4). Atríya̱ʼ mbiʼi matanigajma̱a̱ ma̱ngaa matatsaʼwamínáʼ dí naʼthí ikhí. Jeobá najmuu xuajñuu mu maguwíi rí ma̱ndoo mambáyulú ga̱jma̱a̱ videos mitsaanʼ mu xájmulú wéñuuʼ. Mu mataxkamaa rí ndayáaʼ, gajmaaʼ aplicación JW Library®, náa Índice de las publicaciones Watch Tower ga̱jma̱a̱ Ikha rí munigajmaa xa̱bi̱i̱ Jeobá. Monika bi̱ niʼthá ga̱jma̱a̱ numuu náa kutriga̱ dí nijngoo, ikhaa najmuu rígi̱, índo̱ ndaʼyoo dí maxtáa ngíná. Mbá xkri̱da ndayáʼ ajngáa xóo rígi̱ makiʼnáa, najuiʼni nduwáánʼ o rí mariejun jmbu, naguxnuu asndu índo̱ naʼni̱i̱ a̱jkiu̱u̱n. Ikhaa naʼthí: “Índo̱ ndiʼkhún nagíʼdu̱u̱ naʼnirámáʼ ga̱jma̱a̱ nagúxnuu najmúʼ wéñuuʼ, mú índo̱ na̱jkha̱ raguámbóʼ naguxnuu, ikhú na̱jkha̱ raʼni̱i̱ a̱jkiu̱nʼ, naku̱mu̱ʼ asndu xóo Jeobá nindxu̱u̱ bi̱ ndiyaruʼúún. Índo̱ itháan nagúxnuu nda̱yo̱o̱ dí Jeobá nakro̱ʼo̱o̱ dí xtáá ragíʼnuu ga̱jma̱a̱ ikhaa nambáyúʼ”. Jeobá ma̱ndoo mambáyáaʼ mangáánʼ mu ma̱ta̱ya̱a̱ awa̱án ga̱jma̱a̱ maʼnga̱a̱ʼ matraʼníí xkujndu (Sal. 119:143, 144).
JEOBÁ MAXNÚLÚ TSIAKI̱I̱
10. Xú káʼnii kuwáanʼ nda̱wa̱á dí niguáʼníí mbá gamiéjunʼ rá.
10 Xkujndu. Índo̱ numíniiʼ ga̱jma̱a̱ numuu mbá xkujndu, marigá mbiʼi dí makumulú dí nándáa tsiaki̱i̱ ga̱jma̱a̱ dí majmulú. Mbáa asndu makumulúʼ xóo mbá xa̱bu̱ bi̱ nagáyúu nacha̱ mú rí xúgi̱ nigawúunʼ ga̱jma̱a̱ na̱jkha̱ smigaʼ. Mbáa maʼniulú gakhi̱i̱ muʼni tikhuʼ ñajunʼ dí nákha ginii tséʼniulú gakhi̱i̱ muʼni o mbáa nandulúʼ muʼni ñajunʼ dí nákha ginii nanigulúʼ muʼni. Ikháá má xóo Elías, mbáa i̱ndó rí nandulúʼ muʼbulú ga̱jma̱a̱ muʼnuʼ má xúʼko̱ (1 Rey. 19:5-7). Ndiéjuunʼ rí nakudaminaʼ maʼni Jeobá índo̱ nakumulú dí nándáa tsiaki̱i̱ rá.
11. Xú káʼnii imbo̱o̱ nambáyulú Jeobá rá. (Salmo 94:18.)
11 Rí naʼni Jeobá. Ikhaa nakudaminaʼ rí maxnulú tsiaki̱i̱ (atraxnuu Salmo 94:18). c Xó má mbáa xa̱bu̱ bi̱ nagáyúu ndayóoʼ rí mixtambáyíí mu ma̱ndoo maʼga̱, mbáa xúʼko̱ má mangáánʼ, ndayulú rí mumbayulúʼ mu muʼni má xúʼko̱ ñajuunʼ Jeobá. Ikhú Jeobá naʼthúlú: “Xámíñáaʼ. Ikhúún mambáyáaʼ” (Is. 41:13). Índo̱ Rey David niraʼnuu mixtiʼkhu ñajunʼ ga̱jma̱a̱ nixkháá xa̱bu̱ sia̱nʼ ndrígóo, ndiʼyoo xóo Jeobá nimbáyúu, ikha ajngóo niʼthúu̱n: “Ñawáanʼ májánʼ nagutuñúnʼ” (Sal. 18:35). Mú, xú káʼnii nagujtun ñawúnlú Jeobá rá.
Araxníín núma̱aʼ bi̱ xtañún, mígiaaʼ ga̱jma̱a̱ ancianos numuu rí nimbáyaaʼ. (Atayáá kutriga̱ 11-13).
12. Tsáá ma̱ndoo majmiuu Jeobá índo̱ nakumulú rí nda̱a̱ tsiaki̱i̱ rá.
12 Mbaʼa nuthu, Jeobá nagujtun ñawúnlú muʼni mbá rí eʼwíinʼ xa̱bu̱ maxkajxi̱i̱n mumbayulúʼ. Mbá xkri̱da, mbá miʼtsu David nixtáa gíná wéñuuʼ, mú mígiu̱u̱ Jonatán, ni̱jkha̱ gáʼyoo ga̱jma̱a̱ nixnúu tsiaki̱i̱ (1 Sam. 23:16, 17). Mu ga̱jma̱a̱ numuu Elías, Jeobá nijmiuu Eliseo mu maxnúu tsiaki̱i̱ ga̱jma̱a̱ i̱ʼwáʼ rí gáʼyóoʼ (1 Rey. 19:16, 21; 2 Rey. 2:2). Ikháánʼlú rá. Jeobá ma̱ndoo majmiuu bi̱ kúwi̱i̱n náa guʼwúlú, mígiulú ga̱jma̱a̱ ancianos mu mumbayulúʼ. Gajkhun má dí índo̱ kuwáanʼ ngíná, i̱ndó rí nandulúʼ dí makuwáanʼ ndajkuáanʼ. Ga̱jma̱a̱ nimbáa xákro̱ʼo̱o̱ rígi̱. Ndiéjuunʼ gáʼyóoʼ muʼni mu mambáyulú Jeobá rá.
13. Ndiéjunʼ gíʼmaa muʼni mu mambáyulú Jeobá rá. (Atayáá xtiʼkhu ma̱ngaa.)
13 Rí ndayóoʼ muʼni ikháanʼ. Xúʼni̱ tsíngumijná. Índo̱ nuʼni tsíngumijná náa eʼwíinʼ, ikhú i̱ndó nundxaʼwamíjna̱ ga̱jma̱a̱ numulúʼ ikháanʼ ga̱jma̱a̱ xkujndu rí kuaʼdáá. Rúʼko̱ gáʼni rí xajmáánʼ gúraʼwíí májánʼ dí muʼni (Prov. 18:1). Gajkhun má xúgiáanʼ ndayóoʼ makuwáanʼ ndajkuáánʼ nguáná, itháán índo̱ rígá dí naʼni mumíniiʼ. Á mu nuríyaʼ mbiʼi rí makuwáanʼ i̱ndó ikháanʼ, mani̱ndxu̱u̱ asndu xóo tsíyulú dí Jeobá mambáyulú. Ikha jngóo, tséʼniuu á mu kuwáanʼ náa mbiʼi gakhi̱i̱, guʼdxawíín rí gúthi familia ndrígulú, mígiulú, ga̱jma̱a̱ ancianos. Guʼyáá xóo nindxu̱u̱: Rí xóo nambáyulú Jeobá mu maguajún (Prov. 17:17; Is. 32:1, 2).
JEOBÁ NAʼNI̱I̱ A̱JKIU̱LÚ
14. Ndiéjuunʼ rí gamíi maʼni míñúlúʼ rá.
14 Xkujndu. Mbáa marigá mbiʼi rí mamíñulú wéñuuʼ. Náa Biblia na̱ʼkha̱ raʼthí tikhuʼ numún xa̱bi̱i̱ Dios bi̱ niku̱mu̱ún xúʼko̱ káʼnii ma̱ngaa, rí asndu naguaʼiin rí namíñún eni̱ xa̱bu̱ sia̱nʼ ndrígu̱ún o i̱ʼwáʼ xkujndu gakhi̱i̱ dí niraʼníí (Sal. 18:4; 55:1, 5). Ikháánʼlú rá. Lá kuwáanʼ rumíniiʼ eni̱ a̱ngiu̱lú bi̱ náa nuʼnigajma̱a̱, náa nuñajunʼ, familia ndrígulú o xa̱bu̱ ñajunʼ ráʼ. Lá na̱jkha̱ rajngiyuu makhañúlúʼ ga̱jma̱a̱ numuu nandii rí nda̱a̱ thanuu dí kuaʼdáá ráʼ. Náa xóo rígi̱, nguáná maʼga̱nú makumulúʼ dí nánguá kuaʼdáá tsiaki̱i̱, xó má mbáa ada̱ chíʼgíiʼ. Ndiéjuunʼ eʼni Jeobá mu mambáyulú rá.
15. Ndiéjuunʼ na̱ʼkha̱ raʼthulú náa Salmo 94:19 rá.
15 Rí naʼni Jeobá. Ikhaa naʼni̱i̱ a̱jkiu̱lú (atraxnuu Salmo 94:19). d Gundxaʼwamíjna̱ ga̱jma̱a̱ numuu mbáa ada̱ bi̱ chíʼgíiʼ, ikhaa na̱nguá eyoo gígú, numuu rí namíñuu eʼni rí naxpíbi̱nʼ ga̱jma̱a̱ rí nawáán endxa̱ʼwa̱ a̱jkhu̱u̱n. Ikhú na̱ʼkha̱ anu̱u̱ ndayaráʼa ga̱jma̱a̱ naʼthúu̱n rí maʼni̱i̱ a̱jkiu̱u̱n asndu índo̱ naʼgu mbu̱júu̱ ada̱. Naxpíbi̱nʼ má xúʼko̱, mú ikhaa nánguá emíñuu numuu rí ndaʼyoo dí kayaráʼa anu̱u̱. Xúʼko̱ má kayuuʼ mangáánʼ, índo̱ namíñulú mbáa ikhú mangáánʼ ndayúlú dí mbuyaraʼánʼ, xóo muʼthá ndayúlú dí mbayaráʼánʼ Jeobá asndu índo̱ gáʼni̱i̱ a̱jkiu̱lú. Ndiéjuunʼ gáʼyoo muʼni mu Jeobá maʼni̱i̱ a̱jkiu̱lú rá.
Atatsíñaminaʼ rí Jeobá maʼni̱i̱ a̱jkia̱a̱n ga̱jma̱a̱ dí gátraxnuu náa Kiʼnirámáʼ. (Atayáá kutriga̱ 15, 16).
16. Ndiéjuunʼ ma̱ndoo muʼni mu mambáyulú rí maʼni̱i̱ a̱jkiu̱lú Jeobá rá. (Atayáá xtiʼkhu ma̱ngaa.)
16 Rí ndayóoʼ muʼni ikháanʼ. Gíʼdoo wéñuuʼ numuu rí muʼni guʼumíjná rí muʼtájkáan má xúʼko̱ ga̱jma̱a̱ muraxnuu Ajngá rawuunʼ Dios (Sal. 77:1, 12-14). Ikha jngóo índo̱ gákuwáanʼ xígi̱ káʼnii, mbáa itháán májánʼ rí muʼni ginii, dí muʼtákáñii Jeobá. Guʼtháán rí naʼni maxmiéjunlú, rí naʼni mamiñulúʼ ga̱jma̱a̱ guniʼñááʼ dí ikhaa mariʼñulúʼ ma̱ngaa dí maʼni̱i̱ a̱jkiu̱lú ga̱jma̱a̱ Biblia (Sal. 119:28). Rígá tikhuʼ texto ndrígóo Biblia náa naʼthí mbájmbu rí ndayúlú, mbá xkri̱da náa libro ndrígóo Job, Salmos ga̱jma̱a̱ Proverbios ma̱ngaa dí na̱ʼkha̱ náa capítulo 6 ndrígóo Mateo ajngáa rí niʼthí Jesús. Á mu ikháán naratá káñii Jeobá ga̱jma̱a̱ natraxnuu Ajngá rawuunʼ, ikháanʼ mínaaʼ gídxúʼnú ma̱ta̱ya̱a̱ xóo gáʼni̱i̱ a̱jkia̱a̱nʼ.
17. Ndiéjunʼ dí ragíʼmaa mambumulú rá.
17 Xámbumulú rígi̱: Itháán índo̱ kúwáanʼ náa mbiʼi mingíjyúuʼ, Jeobá maxtáa mambáyulú. Ikhaa nditháan xániñulú (Sal. 23:4; 94:14). Garmáʼáan a̱jkiu̱lú dí ikhaa nikudaminaʼ rí magujthun ñawúnlú, mambáyulú ga̱jma̱a̱ maʼni̱i̱ a̱jkiu̱lú. Isaías niʼthúu̱n Jeobá: “Matie̱wu̱u̱n bi̱ numbayúmíjná náa ikháán, matani rí makuwá tsímáá má xúʼko̱, numuu rí naku̱mu̱ún kuyaaʼ” (Is. 26:3). Gakumala ku̱ya̱a̱ Jeobá ma̱ngaa gajmala xúgíʼ rí ikhaa naxnalá. Á mu nu̱ʼni̱ xúʼko̱, maguaʼdáá tsiaki̱i̱ muʼni ñajuunʼ ikhaa asndu náa mbiʼi rí itháán gakhi̱i̱.
NDIÉJUUNʼ GATRIʼÑA̱A̱ RÁ.
-
Nguáná ma̱ndoo mbaʼyulú itháán dí Jeobá mambáyulú rá.
-
Náá dí a̱jkhu̱ enii nambáyulú Jeobá índo̱ naguáʼdáá xkujndu rá.
-
Ndiéjuunʼ dí ma̱ndoo muʼni mu mambáyulú rí naxnúlú Jeobá rá.
AJMÚÚ 12 Jeobá, Dios ndrígúlú bi̱ mba̱a̱
a Nixtiʼkhu̱u̱ mbiʼñún tikhun
b Isaías 33:6: “Ikhaa nindxu̱u̱ bi̱ naʼni rí xámiñaaʼ; bi̱ naʼni kriña̱a̱nʼ, bi̱ naxnáa ku̱ma̱, majmañaaʼ ga̱jma̱a̱ rí mamíñáaʼ xtayáá Jeobá, gíʼdoo wéñuuʼ numuu”.
c Salmos 94:18: “Índo̱ nitha: “Xtáá ga̱jma̱a̱ gamíi”, mú ngajua ndrígáaʼ, oh Jeobá, niñewu̱nʼ má xúʼko̱”.
d Salmo 94:19: “Índo̱ gamiéjunʼ niʼni maʼni néʼngo̱ʼ, ikháánʼ nitani̱i̱ a̱jkiu̱nʼ.”