LÁ MA̱NDOO IKHÁÁNʼ MARATA̱ XÓO GÁRAXTAA NDA̱WA̱Á RÁʼ. Tikhun xa̱bu̱ nakumu̱ún rí xúʼko̱ má katsíñunʼ makuwá ga̱jma̱a̱ eʼwíínʼ nuthi rí xúʼko̱ má nindoo Dios. Ikha jngó, índo̱ tsegajnuu rí muni ikhú nuthi: “Xúʼko̱ má katsíñanʼ marigá”.

Tikhun xa̱bu̱ na̱da̱ʼ a̱jkiu̱ún índo̱ tsimbánuu dí ra̱májánʼ ga̱jma̱a̱ rí xa̱bu̱ nuni gíníi eʼwíínʼ. Mbáa nduyááʼ makuwa májánʼ, mú tsiakii ndrígu̱ún nindxu̱u̱ ndíí ga̱jma̱a̱ numuu guerra, rí nuxmijná xa̱bu̱, nandii o gamiéjunʼ mba̱a̱. Nda̱wa̱á naguánu nduyáá dí ragíʼdoo numuu muni rígi̱.

Gajkhun má rí xóo kuwáanʼ ma̱ndoo mariʼkhuu awan rí kuaʼdáá (Eclesiastés 9:11). Mú, xúgiáanʼ ma̱ndoo muraʼwíí á mu makuwáanʼ kámuu nda̱wa̱á. Ikha jngó náa Biblia naʼsngáa rí mámbáa kaʼyoo maraʼwíí ndiéjunʼ gáʼni nda̱wa̱á. Náa numuu rí nuʼthá xúʼko̱ rá.

Índo̱ xa̱bu̱ Israel inuu matu̱ʼu̱u̱n náa Ku̱ba̱ʼ rí Jeobá niʼthí maxnún, Dios nijmiuu Moisés mu maʼthí rígi̱: “Niʼgíʼ náa ikháánʼ vida ga̱jma̱a̱ rí makhañáaʼ, rí maguma tsajkurámáánʼ ga̱jma̱a̱ majuiʼtátsriguin; ga̱jma̱a̱ gíʼmaa mataʼyááʼ vida mu ma̱ndoo maraxtaa xóó, ikháánʼ gajmiáanʼ e̱jña̱ʼ, rí maʼnda̱ʼ xtayáá Jeobá Dios ndrígáʼ, matadxun aʼwóo ga̱jma̱a̱ mi̱dxu̱ʼ kanuu náa ikhaa” (Deuteronomio 30:15, 19, 20).

“Niʼgíʼ náa ikháánʼ vida ga̱jma̱a̱ rí makhañáaʼ, rí maguma tsajkurámáánʼ ga̱jma̱a̱ majuiʼtátsriguin; ga̱jma̱a̱ gíʼmaa mataʼyááʼ vida” (Deuteronomio 30:19).

Xúʼko̱, Dios niʼni káwíin israelitas índo̱ nikuwa náa xuajin Egipto xóo ñumbáá ga̱jma̱a̱ rí makuwá tsímáá náa ku̱ba̱ʼ rí Jeobá niʼthún maxnún. Xáʼkha̱ ikháá rí maguma tsajkurámiinʼ. Ikhiin ndiyóoʼ ‹mbuyááʼ vida›. Xú káʼnii gúni xá. Rí maʼndún kuyáá Dios, mudxawíín aʼwóo ga̱jma̱a̱ rí munimbu̱u̱n kuyáá ikhaa.

Ikháánʼ mbaʼyóoʼ matraʼwi̱i̱ ikhaa kayúʼ xóo rígi̱, ga̱jma̱a̱ rí gátraʼwi̱i̱ maʼtháanʼ xóo gáraxtaa nda̱wa̱á. Á mu natraʼwíí rí maʼnda̱ʼ xtayáá Dios, natadxuun aʼwóo ga̱jma̱a̱ natanimbaaʼ xtayáá ikhaa, maʼndoo matraʼwi̱i̱ rí maraxtaa kámuu mbiʼi náa Ku̱ba̱ʼ mitsaan. Mú ndiéjunʼ eyoo gáʼthúu̱n rí matanimbánii mámbá rígi̱ rá.

Ga̱jma̱a̱ numuu xi̱ʼ kaʼwu ndrígóo Dios, apóstol Juan niʼnirámáʼ “Dios nandoo kaʼñúún xúgínʼ”, ikhaa rúʼko̱ phú nindxu̱u̱ cualidad ndrígóo (1 Juan 4:8). Numuu rí Jesús ndaʼyoo, índo̱ niraxi̱i̱ náa biʼyaa kiʼtáñajunʼ rí itháan gíʼdoo numuu, ikhaa niriʼña̱a̱: “Gíʼmaa maʼnda̱ʼ xtayáá Jeobá Dios ndrígia̱ʼ ga̱jma̱a̱ xúgíʼ a̱jkia̱nʼ, ga̱jma̱a̱ xúgíʼ nímia̱nʼ ga̱jma̱a̱ xúgíʼ ku̱ma̱ ndrígáʼ” (Mateo 22:37). Ikha jngó rí mambaxáʼ májánʼ ga̱jma̱ʼ Dios nandoo gáʼthúu̱n rí maʼnda̱ʼ xtayáá, raʼkháa numuu rí namíñaʼ o numuu rí tsítayáá tsáa etanimbaʼ xtayáá. Mú, náa numuu rí gíʼmaa maʼndulú kuʼyáá Dios rá.

Rí Jeobá nandoo kaʼñún xa̱bu̱ numbaaʼ nindxu̱u̱ xóo rí naku̱mu̱u̱ mbáa xa̱bu̱ bi̱ gíʼdiin e̱ji̱n. Maski ajndu ni̱ndxu̱ún xa̱bu̱ aʼkhá, xa̱bu̱ guanii nuni tsiakimijna mu musngúún e̱jñún, muxnún tsiakii, mumbañún ga̱jma̱a̱ muxprigún e̱jñún ga̱jma̱a̱ ngajua numuu rí nandún makuwa gagi ga̱jma̱a̱ májánʼ. Ga̱jma̱a̱ ndiéjunʼ guáʼthi̱i̱n muni e̱jñún xá. Rí maʼndún kuñún, rí munimbu̱ún kuñún ga̱jma̱a̱ rí makru̱ʼu̱u̱n rí xúgíʼ rí nuthúún mambáñun má ikhiin. Lá ragájkhun rí Anu̱lú bi̱ xtáa mekhuíí bi̱ nindxu̱u̱ jmbii gíʼthu̱u̱n rí muʼnimbulúʼ kuʼyáá, maʼndulú kuʼyáá, ma̱ngaa muxnáa núma̱aʼ ga̱jma̱a̱ numuu xúgíʼ rí niʼni ga̱jma̱a̱ numulúʼ xáʼ.

Náa ajngáa rí phú nigumaraʼmáʼ náa Biblia, ajngáa atadxawíín mbaʼa nuthu nandoo gáʼthúu̱n “matanimbaaʼ”. Lá raʼkháa rúʼko̱ gíʼthu̱u̱n mbáa xa̱bu̱ bi̱ gíʼdaa a̱ʼdióo índo̱ gáʼthúu̱n: “Atadxawunʼ” ráʼ. Rí muʼdxawíín ajngóo Dios ndayóoʼ mbuʼyáá ndiéjunʼ endu̱ʼu̱lúʼ ga̱jma̱a̱ muʼgíʼ muʼni. Numuu rí mbiʼi xúgi̱ Dios na̱nguá eʼtámijná gajmíi̱n xa̱bu̱ numbaaʼ, mu muʼdxawíín rí gáʼthulúʼ, mbaʼyóoʼ muraxnuu Ajngá rawunʼ Dios ga̱jma̱a̱ muʼnimbánii rí naʼthí ikhí (1 Juan 5:3).

Mu mbuʼyáá rí gíʼdoo itháan numuu muʼdxawíín ajngóo Dios, Jesús niʼthí mbá miʼtsú: “Raʼka indo pan mago maxta gajma xabo, ri mago-ma maxta gajma mbamba ajnga ri nagriyoʼ raun Dios manga” (Mateo 4:4). Rí muphiʼtsu gíʼdoo wéñuʼ numuu, mu itháan gíʼdoo numuu rí muguaʼdáá ku̱ma̱ ndrígóo Dios náa edxu̱lúʼ. Náa numuu rá. Rey Salomón niʼthí: “Numuu rí á mu mbáa nagíiʼ naʼni rí najmañuu rúʼko̱ mañe̱wu̱u̱n xó má mbújkha̱a̱ ni̱ndxu̱u̱ mbóo dí mañe̱wa̱nʼ, mu itháan nayambáá ku̱ma̱ numuu dí naʼni maxtáa xa̱bu̱” (Eclesiastés 7:12). Rí najmañaʼ ga̱jma̱a̱ ku̱ma̱ ndrígóo Dios ma̱ndoo mañewu̱nlú rí mbiʼi xúgi̱ ga̱jma̱a̱ mambáyulúʼ mu̱ʼgua̱ náa kamba̱a̱ rí májánʼ: Rí maʼga̱ kaguáanʼ makuwáanʼ kámuu mbiʼi.

Náa artículo rí ninújngoo, niʼthá ga̱jma̱a̱ numuu ajngáa rí nijmuu Jesús náa naʼthí: “Chimajñaʼ xkrugua, jame chimajñaʼ-ma jamba ri naka jagun xabo naʼ ri mbuya, jame rambaʼin tsi nuxkama xkrugua ruʼkue” (Mateo 7:13, 14). Mu majngruigulú náa kamba̱a̱ rígi̱, maʼndulú rí mbáa xa̱bu̱ bi̱ naninuʼ májánʼ kamba̱a̱ maʼga̱ kaguáanʼ ga̱jma̱a̱ xarajñulú náa ikhaa mu muguáʼnu náa nandulúʼ: Náa makuwáanʼ kámuu mbiʼi. Ikha jngó, mbaʼyóoʼ rí xarajñulú náa Dios (Salmo 16:8). Mú, xú káʼnii gándoo gúʼni rá.

Xúgíʼ mbiʼi kuaʼdáá rí muʼni ga̱jma̱a̱ mbaʼa rí xóó nandulúʼ muʼni. Asndu tsiguapáanʼ nditháan o najngarígáanʼ rí naguanúu chíʼgíʼ mbiʼi mu mundxaʼwamíjna̱ rí Dios nandoo muʼni. Ikha jngó, Biblia naʼni marmáʼáan a̱jkiu̱lú: “Tsumáá gúya̱a̱ xú káʼnii majngruigala xáʼni xóo xa̱bu̱ bi̱ tséyáá, gíʼmaa muni xóo xa̱bu̱ bi̱ nduyáá wéñuʼ, gutsila xúgíʼ mbiʼi dí naguanúu, numuu dí mingíjyúuʼ wéñuʼ mbiʼi rí kuwáanʼlu” (Efesios 5:15, 16). Rí xarajñulú náa Dios nandoo gáʼthúu̱n rí muʼgíʼ ginii náa vida ndrígúlú rí nambáxúlú gajmiúlú ikhaa (Mateo 6:33).

Maski ajndu xándoo matani nimbá mu matriʼkhu̱u̱ rí xóo niraxtaa nákha ginii, mú rígá rí ma̱ndoo matani ikháánʼ gajmiáanʼ bi̱ kuwa náa guʼwáaʼ mu makhánun mbá rí májánʼ nda̱wa̱á. Náa Biblia naʼsngáa rí Anu̱lú Jeobá, bi̱ xtáa mekhuíí, nandoo kaʼyulú wéñuʼ ga̱jma̱a̱ naʼthúlúʼ rí ma̱ndoo muʼni. Atayáá ajngáa rí gaʼyee Miqueas niʼthí:

“Ikhaa niʼtháanʼ, oh xa̱biya̱, rí ñajunʼ májánʼ. Ndiéjunʼ enda̱ʼa̱ʼ Jeobá rí matani ikháánʼ rá. ¡I̱ndó matani rí májánʼ, ganindxu̱u̱ jmbu ngajua ndrígáʼ ga̱jma̱a̱ gani̱ndxa̱ʼ xa̱bu̱ guabaaʼ índo̱ gajngrui̱ga̱ʼ ga̱jma̱ʼ Dios!” (Miqueas 6:8).

Ikháánʼ rá. Lá majngrui̱ga̱ʼ ga̱jma̱ʼ Dios ráʼ. Á mu natrigú ajngáa rígi̱, maguma tsajkurámáánʼ kámuu mbiʼi, rí ikhaa naʼthí maxnún bi̱ nambáxu̱u̱ gajmíi̱n. Ikháánʼ kaʼyaʼ rí matraʼwi̱i̱ matani.