Nákha ginii niʼthá rí oráculo ndrígóo Delfos niʼni nduwaʼ Creso, rúʼko̱ niʼni maxmínaʼ ga̱jma̱a̱ rey ndrígóo Persia ga̱jma̱a̱ rí Creso táʼngo̱o̱. Mú náa Biblia na̱ʼkha̱ raʼthí ga̱jma̱a̱ numuu rey ndrígóo Persia rí nimbánuu xó má rí nijuiʼtáriyaʼ marigá.

Mbá a̱jma̱ ciento tsiguʼ kidíiʼ, nákha xóó tségumaa rey, gaʼyee hebreo Isaías niʼthí ga̱jma̱a̱ numuu mbiʼyuu Ciro ga̱jma̱a̱ niʼthí xú káʼnii gáto̱ʼo̱o̱ náa xuajen mba̱a̱ Babilonia.

Isaías 44:24, 27, 28: “Rígi̱ rí niʼthí Jeobá, [...] Ikhaa tsí naʼthúu̱n iyaʼ me̱jno̱ʼ: ‹Mane mojndoʼ xúgíʼ mañu ndrígáʼ›; Ikhaa tsí naʼthá numuu Ciro: ‹Nindxu̱u̱ báxtúu ndrígóʼ ga̱jma̱a̱ mbá xúgíʼ rí nanigu̱ʼ, ikhaa maʼnimbánuu káxe̱›; índo̱ gáʼthi numuu Jerusalén: ‹Rí maguma̱a̱›, ga̱jma̱a̱ templo: ‹Maguma najkhúu›”.

Xó má niʼthí mbáa historiador griego Heródoto, ejército ndrígóo Ciro niʼni rí mañu maʼga̱ náa Éufrates, rí nanújngoo náa xuajen Babilonia. Ga̱jma̱a̱ numuu rígi̱, soldados nindoo nikidiin náa mañu ga̱jma̱a̱ nitu̱ʼu̱u̱n náa xuajen. Índo̱ niʼngo̱o̱ nito̱ʼo̱o̱, Ciro niʼni káwíin judíos bi̱ nikuwa xóo esclavos náa Babilonia ga̱jma̱a̱ niniñúnʼ matangi̱i̱n náa Jerusalén ga̱jma̱a̱ muni̱i̱la xuajen rí niguma gámbáa nákha 70 tsiguʼ kidíiʼ.

Isaías 45:1: “Ríge̱ nindxu̱u̱ rí niʼthúu̱n tsí ndiyáaʼ Jeobá, náa Ciro, tsí niʼgíiʼ náa ñawúunʼ mújúnʼ mu maʼtáñajunʼ náa inuu ikhaa rí mbá xúgíʼ xuajen, maʼni majti̱i̱nʼ reyes; rí mambáʼtoo xkrugua náa inuu ikhaa, ikha jngó rí xkrugua maguanúu jambaʼta”.

Persas nitu̱ʼu̱u̱n náa xuajen náa rígá a̱jma̱ xkrugua rí mba̱a̱ rí niniñaaʼ kambaʼta. Á mu babilonios niguánu ndiyáá rí eyoo maʼni Ciro, mbáa muruguáá xúgíʼ xkrugua dí rígá náa rawunʼ mañu. Numuu rí túni xúʼko̱, xuajen nánguá nixtiewa̱a̱n.

Rígi̱ nindxu̱u̱ mbaʼa rí nijuiʼtáriyaʼ rí nuxkamaa náa Biblia ga̱jma̱a̱ gajkhun nimbánuu xúgíʼ rígi̱. a Mixtiʼkhu nindxu̱u̱ rí nutajuíi xa̱bu̱ numbaaʼ, rí nguáná nuthi rí na̱ʼkha̱ náa dios bi̱ ragájkhun, rí nijuiʼtáriyaʼ náa Biblia na̱ʼkha̱ náa Dios bi̱ gajkhun, bi̱ nisngájmaminaʼ xóo “bi̱ naʼthí asndu nákha ginii dí marigá nda̱wa̱á, ga̱jma̱a̱ dí xóó tséjkha̱nú marigá” (Isaías 46:10).

I̱ndó Jeobá nindxu̱u̱ Dios gajkhun, bi̱ ma̱ndoo maʼthí xóo rígi̱. Mbiʼyuu nandoo gáʼthúu̱n “Ikhaa Naʼni dí Marigá”, rígi̱ nasngájma rí naʼngo̱o̱ maʼthí rí marigá nda̱wa̱á ga̱jma̱a̱ maʼnimbánuu rí nandoo.  Rígi̱ naʼthúlúʼ rí Dios maʼngo̱o̱ maʼnimbánuu xúgíʼ rí naʼthí maʼni.

Lá manigua̱ʼ ma̱ta̱ya̱a̱ ndiéjunʼ eʼtáriyaʼ náa Biblia rí marigá mbiʼi xúgi̱ ráʼ. Naʼni mbá a̱jma̱ mil tsiguʼ, náa Biblia niʼtáriyaʼ rí “iwáá mbiʼi” mani̱ndxu̱u̱ gakhi̱i̱ ga̱jma̱a̱ mingíjyúuʼ. Ndiéjunʼ nindxu̱u̱ iwáá mbiʼi rá. Raʼkháa Ku̱ba̱ʼ o xa̱bu̱, nandoo gáʼthúu̱n xkujndu, rí najma gíníi xa̱bu̱ ga̱jma̱a̱ tsingíná rí mba̱yu̱ʼ má tsiguʼ xtáa raʼni gawúunʼ xa̱bu̱ numbaaʼ. Guʼyáá tikhuu rí naʼtáriyaʼ índo̱ gáʼni “iwáá mbiʼi”.

2 Timoteo 3:1-5: “Índo̱ gáʼni iwáá mbiʼi [...,] xa̱bu̱ maʼndún kuyamijná i̱ndó ikhiin, manigunʼ wéñuʼ mbújkha̱a̱, majñekún, muxuximijna, mutinumáá Dios, xúnimbúu̱n kuñún anún, asndu núma̱aʼ xúxnáa, xúni rí jmbu, xáʼndun kuñún a̱ngiu̱ún, xaʼndún gunimbaníí xkujndu, munitsudúún eʼwíínʼ, xúñewa̱a̱n rí muni, manindxu̱ún xóo xujkhú xáná, xáʼndun guni rí májánʼ, muninduwiinʼ eʼwíínʼ, xudxun rí marathu̱u̱n, ra̱ʼkhá tháán gunimbamijna, itháan maʼndún muni rí nanigunʼ ikhiin ki xóo rí nandoo Dios, makujmaa rí nduyamajkhuíí Dios mu xáguaʼdáá tsiakii ndrígóo Dios”.

Lá natayáá rí xúgi̱ kuwa itháan xa̱bu̱ bi̱ xúʼko̱ ni̱ndxu̱ún ráʼ. Lá ragájkhun rí kuwáanʼ náa taphu̱u̱n xa̱bu̱ bi̱ nuni mbaʼumíjna̱ ga̱jma̱a̱ rí i̱ndó nundxa̱ʼwa̱míjna̱ ga̱jma̱a̱ numún ikhiin ga̱jma̱a̱ náa mbújkha̱a̱ ráʼ. Lá ragájkhun rí xa̱bu̱ nandún rí maguma nacha̱ xúgíʼ rí nandún ga̱jma̱a̱ tsimbánun rí nutamijná gajmiún eʼwíínʼ ráʼ. Mbáa mangáán natayáá rí mbaʼin e̱ji̱n nánguá enimbu̱ún kuñún anu̱ún ga̱jma̱a̱ rí xa̱bu̱ nandún muni rí nanigu̱nʼ ikhiin ki xóo rí maʼndún kuyáá Dios. Ga̱jma̱a̱ na̱jkha̱ raʼni itháan mingíjyúuʼ.

Mateo 24:6, 7: “Mudxahuinla ri riga guerra, jame muhuan ri riga guerra. [...] Matuxu mba numba masañuʼ gajma imba numba, xuʼkue-ma matuxu mba xuajin ri mba masañuʼ gajma imba xuajin ri mba”.

Awan rí nigájnuu, xa̱bu̱ bi̱ nikháñun náa guerra ga̱jma̱a̱ numuu xkujndu asndu nákha tsiguʼ 1914 naʼni itháan rí 100 millones, rí naʼni itháan mbaʼin xa̱bu̱ bi̱ nikháñun ki xóo bi̱ kuwa náa xuajen mba̱ʼu̱. Atatsaʼwáminaʼ rí xa̱bu̱ nimbiyaʼ wéñuʼ, nirígá wéñuʼ gaʼkhu ga̱jma̱a̱ tsingíná ikhú. Lá niyambáá rígi̱ mu xuajen mba̱ʼu̱ muni gámbáa guerra ráʼ.

Mateo 24:7: “Maʼka ihui”.

Awan rí nigájnuu náa Xúgíʼ Numbaaʼ ga̱jma̱a̱ numuu Ganitsu: “Náa numbaaʼ najma̱a̱ wéñuʼ ganitsu mu mu̱phu̱ xúgínʼ xa̱bu̱, mú 815 millones xa̱bu̱, mbáa rí mbá míjna guwiinʼ nagúun gúnuʼ rí asndu tséphiʼtsu. Ga̱jma̱a̱ mbáa náa rí ajtsíin xa̱bu̱ nakéyuʼ”. Awan rí nagájnuu rí xúgíʼ tsiguʼ nakháñun itháan rí ajtsú millón e̱ji̱n ga̱jma̱a̱ numuu ewiʼ.

Lucas 21:11: “Mapu-gake maxma”.

Mámbá tsiguʼ, narígá mbá 50,000 gaʼxma rí itháan gakhi̱i̱ rí nakumu̱ún xa̱bu̱ ga̱jma̱a̱ mbá 100 rí naʼni gachúu mbaʼa guʼwá mba̱ʼu̱. Ma̱ngaa xúgíʼ tsiguʼ narígá gaʼxma rí itháan gakhi̱i̱. Xóo awan rí nagájnuu, nákha tsiguʼ 1975 asndu tsiguʼ 2000, gaʼxma nigudíin itháan rí 471,000 xa̱bu̱.

Mateo 24:14: “Jame miʼtaraʼa apa ajnga ri majan nuxiʼ numu ri naʼtañajun mba xuguinʼ xabo [...], aʼkue ri mariguo”.

Rí xúgi̱ kuwa itháan rí migiñuʼ millón xa̱bi̱i̱ Jeobá bi̱ kuwa rutaraʼa ajngáa rí nuxi̱ʼ ndrígóo Reino rí na̱ʼkha̱ náa Dios náa itháan rí 240 xuajen mba̱ʼu̱ náa xúgíʼ numbaaʼ. Ajngá rawunʼ nudxawíín náa kuwa mbaʼin xa̱bu̱ ga̱jma̱a̱ náa xuajen dí rígá mitsinguánʼ, náa xaxi̱i̱ ga̱jma̱a̱ náa kúbá. Rí najuiʼtáriyaʼ rúʼko̱ ma̱ngaa naʼthí rí índo̱ Dios gáʼyoo rí nijuiʼtáraʼa káxi̱, ‹ikhú gáʼkha̱ fin›. Ndiéjunʼ eyoo gáʼthúu̱n rúʼko̱ rá. Nandoo gáʼthúu̱n rí maguma gámbíin Xa̱bu̱ Ñajunʼ bi̱ kuwa náa numbaaʼ ga̱jma̱a̱ maxtáa imba̱a̱ Xa̱bu̱ Ñajunʼ bi̱ maʼtáñajunʼ náa Reino ndrígóo Dios. Ndiéjunʼ rí phú gajkhun maʼnimbánuu Reino bugi̱ rá. Atraxnuu má xúʼko̱ mu mataxkamaa rí naxtiʼña̱a̱.