¡RA̱ʼKHÁ THÁÁN MITSAAN NINDXU̱U̱ XÓO GAKUWÁANʼ NDA̱WA̱Á! Bi̱ Niʼniáanʼ nikudaminaʼ makuwáanʼ kámuu mbiʼi gi̱i̱, má náa tsu̱du̱u̱ Ku̱ba̱ʼ. Mú mbaʼin xa̱bu̱ naʼniún mingíjyúuʼ munimbu̱ún. Nundxa̱ʼwa̱míjna̱ rí xúgi̱ o nda̱wa̱á xúgiáanʼ má makhañúlúʼ, ga̱jma̱a̱ rí nakháñulú kagujtuminaʼ ga̱jma̱a̱ vida ndrígúlú. Eʼwíínʼ xa̱bu̱ nakumu̱ún rí ma̱ndoo makuwá kámuu mbiʼi índo̱ gakhañun ga̱jma̱a̱ índo̱ gágúun mekhuíí. Ndiéjunʼ tatsaʼwáminaʼ ikháánʼ rá.

Xóó xátriʼña̱a̱. Atayáá ginii rí nariʼña̱a̱ náa Biblia ga̱jma̱a̱ numuu graxe̱ rígi̱: Nguáthá mbiʼi gáʼyóóʼ makuwáanʼ ga̱jma̱a̱ rí xóo káʼnii nigumáanʼ rá. Náa numuu rí Dios niʼni Ku̱ba̱ʼ ga̱jma̱a̱ xa̱bu̱ numbaaʼ rá. Náa numuu rí nakháñulú rá.

Índo̱ nuʼni mbrigumijná ga̱jma̱a̱ i̱ʼwáʼ rí ndaʼya rí Dios niʼni náa tsu̱du̱u̱ Ku̱ba̱ʼ, na̱jkuánu nduʼyáá rí xa̱bu̱ numbaaʼ ni̱ndxu̱lú mixtiʼkuáanʼ wéñuʼ. Xú káʼnii rá. Náa Biblia naʼthí rí nigumáanʼ ikhaa kayíʼ xóo Dios (Génesis 1:26, 27). Ndiéjunʼ eyoo gáʼthúu̱n rígi̱ rá. Rí Dios niʼniáanʼ xó má xa̱bu̱ nindxu̱u̱ ikhaa, xóo rí maʼndulú kuʼyamijná ga̱jma̱a̱ muʼni rí jmbu.

Ma̱ngaa Dios niʼniáanʼ mu ma̱ndoo mundxaʼwamíjna̱ májánʼ ga̱jma̱a̱ rí mbuʼyáá káʼnii nindxu̱u̱ rí májánʼ ga̱jma̱a̱ dí ra̱májánʼ, ga̱jma̱a̱ rí maʼndulú muniʼnííʼ ma̱ngaa rí mambaxúlúʼ gajmiúlú. Ikha jngó ma̱ndoo manigulúʼ xúgíʼ rí mitsaan dí rígá náa numbaaʼ, xóo xtiʼkhu, ajmúú ga̱jma̱a̱ ajngáa rí nagui̱i̱. Rí itháan naʼni mixtiʼkuáanʼ nindxu̱u̱ rí mbuʼyamajkuíí bi̱ Niʼniáanʼ. Xúgíʼ rígi̱ naʼni rí mani̱ndxu̱u̱ mixtiʼkuii wéñuʼ xa̱bu̱ numbaaʼ ga̱jma̱a̱ i̱ʼwáʼ rí ndaʼya náa numbaaʼ.

Atatsaʼwáminaʼ ga̱jma̱a̱ numuu rígi̱: Á mu rí Dios nindoo rí xa̱bu̱ numbaaʼ makuwa káaʼ nguáthá tsiguʼ, náa numuu rí niʼniáanʼ xúgi̱ káʼnii ga̱jma̱a̱ rí ma̱ndoo muʼni marigá má xúʼko̱ rá. Numuu rí nandoo makuwáanʼ tsímáá kámuu mbiʼi náa tsu̱du̱u̱ Ku̱ba̱ʼ.

Tikhun xa̱bu̱ nakumu̱ún rí Dios nditháan táʼndoo rí xa̱bu̱ makuwá kámuu mbiʼi náa tsu̱du̱u̱ Ku̱ba̱ʼ. Nuthi rí numbaaʼ nindxu̱u̱ náa xa̱bu̱ nanújngun tsáʼkhá mu mbuyáá tsíin kaʼñún makuwá kámuu mbiʼi gajmiún Dios mekhuíí. Mú á mu gajkhun nindxu̱u̱ rígi̱, lá xágiʼdoo aʼkhúun Dios ga̱jma̱a̱ dí ra̱májánʼ dí rígá náa tsu̱du̱u̱ ku̱ba̱ʼ ráʼ. Rígi̱ xambriguii ga̱jma̱a̱ xóo nindxu̱u̱ Dios. Náa Biblia naʼthí  ga̱jma̱a̱ numuu ikhaa: “Xúgíʼ kambo̱o̱ nindxu̱u̱ jmbu. Dios tseʼninduwaʼ, nda̱a̱ nditháan dí ra̱májánʼ náa ikhaa; ikhaa nindxu̱u̱ májánʼ ga̱jma̱a̱ naʼni rí jmbu” (Deuteronomio 32:4).

Náa Biblia naʼthí kaʼwu náa numuu rí Dios niʼni Ku̱ba̱ʼ: “Jeobá kaʼyoo mekhu, mú ku̱ba̱ʼ nixnúún mu makuwá xa̱bu̱” (Salmo 115:16). Xúʼko̱ kaʼnii, Dios niʼni numbaaʼ ndrígúlú mu makuwáanʼ kámuu mbiʼi ga̱jma̱a̱ niʼniratoo ga̱jma̱a̱ xúgíʼ rí ndayúlú mu makuwáanʼ tsímáá kámuu mbiʼi ga̱jma̱a̱ maguaʼdáá numulúʼ (Génesis 2:8, 9).

“Jeobá kaʼyoo mekhu, mú ku̱ba̱ʼ nixnúún mu makuwá xa̱bu̱” (Salmo 115:16).

Náa Ajngá rawunʼ, Dios ma̱ngaa naʼthí náa numuu rí niʼnii xa̱bu̱ numbaaʼ. Ikhaa nixná ngawún rí muni timbíi̱n xa̱bu̱ gajmii: “Gakuwáanʼ náa xúgíʼ tsu̱du̱u̱ ku̱ba̱ʼ ga̱jma̱a̱ gutañájunʼ, ga̱jma̱a̱ guñewu̱u̱n [...] xúgínʼ xujkhúʼ bi̱ nubañimi̱jna̱ náa inuu ku̱ba̱ʼ” (Génesis 1:28). ¡Ra̱ʼkhá tháán májánʼ ñajunʼ rí nikhanun, rí muñewa̱a̱n ku̱ba̱ʼ ga̱jma̱a̱ muni̱i̱ mitsaan! Adán ga̱jma̱a̱ Eva ma̱ndoo makuwá gajmiún e̱jñún náa Ku̱ba̱ʼ raʼkháa mekhuíí.

Náa Biblia naʼthí rí mbáa bi̱ niʼnii Dios mekhuíí, bi̱ nda̱wa̱á nixná mbiʼyuu Satanás, nikuxi̱minaʼ ga̱jma̱a̱ nindoo maʼni gámbóo rí Dios nindoo maʼni náa tsu̱du̱u̱ numbaaʼ. Xú káʼnii niʼni xá.

Satanás niʼngo̱o̱ niʼni ríjíin timbíi̱n anu̱lú, Adán ga̱jma̱a̱ Eva, mu mumbayíí muxuximi̱jna̱ náa Dios. Niʼthí rí Dios tsíyoo maxnún rí májánʼ, xóo rí mbuyáá ikhiin ndiéjunʼ nindxu̱u̱ rí májánʼ ga̱jma̱a̱ dí ra̱májánʼ. Ga̱jma̱a̱ nimbayíí Satanás ga̱jma̱a̱ túnimbu̱ún náa Dios. Ndiéjunʼ nirígá rá. Nda̱wa̱á nikháñun, xó má Dios niʼthún. Ninimbáti̱ga̱ rí makuwá kámuu mbiʼi náa Ku̱ba̱ʼ mitsaan (Génesis 2:17; 3:1-6; 5:5).

Náa xúgíʼ tsiguʼ rí nikuwa, xa̱bu̱ numbaaʼ numíniiʼ ga̱jma̱a̱ numuu rí Adán ga̱jma̱a̱ Eva túnimbu̱ún. Náa Ajngá rawunʼ Dios naʼthí: “Ga̱jma̱a̱ numuu mbáwíi xa̱bu̱ [Adán] nito̱ʼo̱o̱ aʼkhá náa numbaaʼ. Ma̱ngaa rí nakháñulú nito̱ʼo̱o̱ ga̱jma̱a̱ numuu aʼkhá, rí nakháñulú nigadráʼa náa xúgínʼ xa̱bu̱ numuu rí xúgínʼ xa̱bu̱ nixuda̱mi̱jna̱ aʼkhá” (Romanos 5:12). Ikha jngó nakháñulú numuu rí nikhánulú aʼkhá ga̱jma̱a̱ rí nakháñulú, raʼkháa numuu rí Dios gíʼdoo imbo̱o̱ “awan” dí rakáʼnii mbuʼyáá ikháanʼ.

Rí túnimbu̱ún náa Edén táriʼkhu̱u̱ rí eyoo Dios náa tsu̱du̱u̱ Ku̱ba̱ʼ ga̱jma̱a̱ náa xa̱bu̱ numbaaʼ. Numuu rí ngajua rí gíʼdoo ga̱jma̱a̱ rí jmbu nindxu̱u̱ májánʼ, rúʼko̱ rí nixkaxi̱i̱ mu maʼni xúgíʼ rí ndayóoʼ mu maʼni káwáanʼ náa aʼkhá ga̱jma̱a̱ náa rí nakháñulú. Apóstol Pablo niʼthí: “Índo̱ nakháñulú nuʼninuma̱a̱ aʼkhá. Mú Dios namináanʼ dí makuwáanʼlu kámuu mbiʼi ga̱jma̱a̱ numuu Cristo Jesús bi̱ nindxu̱u̱ Señor ndrígiulúʼ” (Romanos 6:23). Ngajua rí Dios gíʼdoo náa ikháanʼ nixkaxi̱i̱ maxnáa “Ade tsi mbahui, [Jesucristo], ikajngo jamba tsi najumu-jiʼya eʼne, maxandatiga, indo tsuʼkue tsi mbaʼya asjndo jamu” (Juan 3:16). Índo̱ nixnáximinaʼ makhañúu, Jesús niʼtsiwáanʼ mu marigá mbu̱júu̱ rí Adán niʼni mbáti̱ga̱. a

Nacha̱ má, rí nikudaminaʼ maʼni Dios rí maʼni̱i̱ mbá Ku̱ba̱ʼ mitsaan mani̱ndxu̱u̱ gajkhun. Mu ikháánʼ maraxtaa tsímáá nda̱wa̱á, mbaʼyóoʼ matanimbaaʼ consejo rí nixná Jesús: “Ataʼaʼla, naʼ xkrugua ri chimajñaʼ, numu ri pu-majñaʼ xkrugua, jame pu-majñaʼ jamba ri naka jagun xabo naʼ ri nandatiguin, mapu-mbaʼin xabo tsi natuʼun iki” (Mateo 7:13, 14). Xúʼko̱ kaʼnii, ikháánʼ kaʼyaʼ marata̱ xú káʼnii gáraxtaa nda̱wa̱á. Ndiéjunʼ gátraʼwi̱i̱ matani ikháánʼ rá.