Ajngáa rí májánʼ ndrígóo Reino rí na̱ʼkha̱ náa Dios xtáa rajuiʼtáraʼa náa xúgíʼ tsu̱du̱u̱ Ku̱ba̱ʼ, xó má niʼtáriyaʼ Jesús (Mateo 24:14). Náa libro ndrígóo Daniel rí na̱ʼkha̱ náa Biblia, naʼthí rí Reino bugi̱ nindxu̱u̱ mbáa Xa̱bu̱ Ñajunʼ bi̱ na̱ʼkha̱ náa Dios. Náa capítulo 2 náa libro rúʼko̱ naʼtíriyaʼ rí makuwa Xa̱bu̱ Ñajunʼ náa Babilonia rí nirígá nákha wajyúúʼ asndu rí mbiʼi xúgi̱, ga̱jma̱a̱ náa versículo 44 naʼthúlúʼ ndiéjunʼ garigá nda̱wa̱á:

“Ga̱jma̱a̱ índo̱ gakuwa rutañajunʼ reyes, Dios bi̱ xtáa mekhuíí magíiʼ mbáa reino bi̱ xáʼga̱nú mámbáa. Ga̱jma̱a̱ reino bugi̱ xáxtáa náa i̱mba̱ xuajen. Maʼni̱i̱ yujndaʼ ga̱jma̱a̱ maʼni gámbíin xúgínʼ reino, xúʼko̱ maʼga̱nú maʼtáñajunʼ asndu kámuu mbiʼi”.

Xó má rígi̱ ga̱jma̱a̱ i̱ʼwáʼ rí nijuiʼtáriyaʼ, naʼthí rí Reino ndrígóo Dios mariʼkuwíin xúgínʼ Xa̱bu̱ Ñajunʼ ga̱jma̱a̱ ma̱ʼkha̱ kayóo rí tsímáá náa tsu̱du̱u̱ Ku̱ba̱ʼ. Xú káʼnii gakuwa xa̱bu̱ náa majñu̱nʼ Reino buʼko̱ rá. Guʼyáá tikhuu rí marigá nda̱wa̱á rí mitsaan, rí nacha̱ má gambánuu.

• NÍ XÁRÍGÁ GUERRA

  Salmo 46:9: Dios “naʼni gámbáa guerra asndu náa námbáa ku̱ba̱ʼ. Nakumigaʼ xkamídá ga̱jma̱a̱ narujku̱u̱ kúdú; ga̱jma̱a̱ natsikhá carro dí nuni ga̱jma̱a̱ guerra”.

  Lá natatsaʼwáminaʼ xú káʼnii gánindxu̱u̱ ikhí á mu xúgíʼ dí rígá náa numbaaʼ ga̱jma̱a̱ ku̱ma̱ rí najmaa mu maguma ajua̱nʼ majmaa mu mixtambáñuun xa̱bu̱ ki xóo rí muradíin xáʼ. Reino ndrígóo Dios, nikudaminaʼ maʼni gámbáa guerra.

• NÍ XÁRÍGÁ NANDII.

  Isaías 33:24: “Nimbáa xa̱bu̱ xáʼthi: ‹Nandoo káñúʼ›”.

  Atatsaʼwáminaʼ náa mbá numbaaʼ náa xárígá nandii rí na̱ʼkhu̱ ámiún xa̱bu̱, cáncer, diabetes ní má i̱ʼwáʼ gaʼkhu. Náa mbá numbaaʼ xóo rígi̱ ní xárígá hospital ni má thana. Rígi̱, ní xaguáʼdáá xúgínʼ xa̱bu̱ náa xúgíʼ tsu̱du̱u̱ Ku̱ba̱ʼ: Rí nánguá gáʼniun nandii.

• NÍ XÁRÍGÁ EWIʼ.

  Salmo 72:16: “Maʼga̱nú marigá wéñuʼ ganitsu náa tsu̱du̱u̱ ku̱ba̱ʼ; ra̱ʼkhá tháán garigá ganitsu náa inu kúbá”.

  Náa Ku̱ba̱ʼ maxná wéñuʼ ganitsu mu̱phu̱ xúgínʼ. Ewiʼ ga̱jma̱a̱ rí nakéñunʼ xa̱bu̱ nánguá gárígá nditháan.

• NÍ XÁRÍGÁ GA̱ʼKHU̱, TSINGÍNÁ NI MÁ XAKHÁÑULÚ.

  Revelación (Apocalipsis) 21:4: Dios “maʼni kaʼwi̱i̱ xúgíʼ iyoʼ idún, ní xákhañun itháan, ní xárígá xtambiyaʼ, gitsawaʼskha asndu má gaʼkhu, xúgíʼ rígi̱ ninújngoo gáʼni ikhú”.

   Xa̱bu̱ ní xaguaʼdáá aʼkhá ga̱jma̱a̱ makuwa kámuu náa tsu̱du̱u̱ Ku̱ba̱ʼ rí maʼni̱i̱ mitsaan. Rúʼko̱ rí nikudaminaʼ maxnúlúʼ Jeobá, bi̱ Niʼniáanʼ.

Lá naku̱ma̱ʼ rí xúgíʼ rígi̱ nindxu̱u̱ májánʼ wéñuʼ mu mani̱ndxu̱u̱ gajkhun ráʼ. Maski ajndu mbaʼin xa̱bu̱ nanigu̱nʼ rí naʼthí náa Biblia, mbaʼin xa̱bu̱ naʼniún miʼskhaa makru̱ʼu̱u̱n rí eyoo gáʼthúu̱n rí makuwá kámuu. Numuu rí nimbáa xa̱bu̱ na̱nguá xtáa kámuu mbiʼi.

Xa̱bu̱ numbaaʼ mba̱yu̱ʼ tsiguʼ má kuwa náa aʼkhá ga̱jma̱a̱ rí nakháñulú. Ga̱jma̱a̱ mbaʼin naguanu nuthi rí xúʼko̱ má gakuwáanʼ ga̱jma̱a̱ gaʼkhu ma̱ngaa ga̱jma̱a̱ tsingíná. Mú, rígi̱ tsímbriguii nditháan ga̱jma̱a̱ rí Dios nindxa̱ʼwáminaʼ maʼni náa xa̱bu̱ numbaaʼ.

Mu maku̱mu̱lú kuʼyáá má xúʼko̱ rí Dios nikudaminaʼ, ikhaa niʼthí ajngáa rígi̱: “Xátanga̱a̱ xúʼkhiín, gajkhun mani rí phú nandoʼ, ga̱jma̱a̱ mambanúu gajkhun rí nitañájunʼ maguma” (Isaías 55:11).

Náa Biblia naʼthí rí Dios “xándoo maʼni nduwaʼ” (Tito 1:2). Numuu rí ikhaa nikudaminaʼ maxnúlúʼ rí mitsaan rígi̱, májánʼ nindxu̱u̱ rí mundxaʼwami̱jna̱ ga̱jma̱a̱ numuu graxe̱ rígi̱: “Lá gajkhun nindxu̱u̱ rí makuwáanʼ kámuu náa Ku̱ba̱ʼ mitsaan ráʼ. Ndiéjunʼ gíʼmaa muʼni mu makuwáanʼ náa rí Dios nikudaminaʼ maxnúlúʼ rá.” Náa i̱ʼwáʼ artículo gambayaaʼ maxtiʼña̱a̱ graxe̱ rígi̱.