Xa̱bu̱ bi̱ nunigajmaa ga̱jma̱a̱ numún a̱ʼgua̱a̱n nuthi rí a̱ʼgua̱a̱n, Gu̱nʼ ga̱jma̱a̱ i̱ʼwáʼ numbaaʼ naʼthí xóo gakuwa xa̱bu̱. Bi̱ nunigajmaa numún a̱ʼgua̱a̱n nuthi rí xóo tri̱ga̱ dí rígá mekhuíí índo̱ nagumaa mbáa ada̱ naʼthí xú káʼnii xa̱bu̱ ganindxu̱u̱ ga̱jma̱a̱ xú káʼnii gáxtáa nda̱wa̱á.

Maski asndu xúgíʼ ku̱ma̱ rígi̱ na̱ʼkha̱ asndu nákha wajyúúʼ náa Babilonia, rí mbiʼi xúgi̱ xóó najmaʼnuʼ wéñuʼ. Náa mbá encuesta rí nirígá nákha tsiguʼ 2012 náa Estados Unidos nisngajma rí náa ajtsíin xa̱bu̱, mbáa naku̱mu̱u̱ rí astrología “na̱ʼkha̱ náa ciencia” ga̱jma̱a̱ mbá 10% niʼthí rí nindxu̱u̱ “mbá ciencia”. Lá gajkhun nindxu̱u̱ rúʼko̱ ráʼ. Na̱nguá, mbuʼyáá náa numuu.

•   A̱ʼgua̱a̱n ga̱jma̱a̱ numbaaʼ xándoo gambáñun xa̱bu̱ xóo ethi bi̱ nunigajmaa numún a̱ʼgua̱a̱n.

• Nguáná, rí najuiʼtariyaʼ xú káʼnii ganindxu̱u̱ mbáa xa̱bu̱ ikháá má ganindxu̱u̱ náa xúgínʼ xa̱bu̱.

• Awan ndrígu̱ún bi̱ nunigajmaa numún a̱ʼgua̱a̱n, na̱ʼkha̱ náa ku̱ma̱ rí nirígá wajyúúʼ rí numbaaʼ nagutuaʼan náa mbájndi Ku̱ba̱ʼ, mu rí phú nindxu̱u̱ gajkhun rí nagutuaʼan náa mbájndi gíʼ A̱jkha̱ʼ.

• Tsembánii dí nutariyaʼ mbaʼin bi̱ nunigajmaa numún a̱ʼgua̱a̱n náa mbáa xa̱bu̱.

• Astrología naraʼwíin xa̱bu̱ náa 12 enii tsinaʼ ndrígóo Zodiaco xó má gu̱nʼ rí nigumiin. Mú numuu rí na̱jkha̱ raxtiʼkhuu xóo gíʼ Ku̱ba̱ʼ náa xúgíʼ tsiguʼ rí ninújngoo, fecha rí nuxna mbiʼi mámbá tsinaʼ ndrígóo Zodiaco nánguá nindxu̱u̱ ikháá xóo mbiʼi rí nanújngoo A̱jkha̱ʼ.

Nakumu̱ún rí tsinaʼ ndrígóo Zodiaco naʼthí xú káʼnii ganindxu̱u̱ mbáa xa̱bu̱, mú rí phú gajkhun rí bi̱ nikuwa mbóó mbiʼi mixtiʼkun ni̱ndxu̱ún. Mbiʼi rí nigumaa mbáa tséʼthi nditháan xú káʼnii xa̱bu̱ ganindxu̱u̱ mbáa rí xóo muʼthá rí xóo nindxu̱u̱ o xóo eʼni mbáa xa̱bu̱, bi̱ nunigajmaa numún a̱ʼgua̱a̱n káaʼ nakumu̱ún. Lá raʼkháa i̱ndó nuthi xóo ekumún xáʼ.

Asndu nákha wajyúúʼ, xa̱bu̱ nagún gúñún xawan. Tikhun rí ikhiin nigíʼ mbuyáá xú káʼnii gáxtáa mbáa nda̱wa̱á índo̱ nduyáá chámbu̱ún xa̱bu̱ o chámbu̱ún xujkhúʼ o xóo rí mbáa mbaxtá naxpájtu exí. Eʼwíínʼ nduyáá rí garigá nda̱wa̱á índo̱ nduyáá xtíxúu té o café rí nagi̱ʼi̱ náa taza. Rí xúgi̱ najmún i̱ʼwáʼ, xóo barajas, itsí xngiyaʼ, dados, rí nduyáá xujkhúʼ ga̱jma̱a̱ rí ndaʼyoo xnuʼndaa o nagún gúñún xa̱bu̱ xawan. Mú, lá gajkhun nindxu̱u̱ rí nuthi xa̱bu̱ xawan ráʼ. Na̱nguá, ragájkhun nindxu̱u̱. Guʼyáá náa numuu.

Guʼyáá rí tsimbriguu rí nuthi. Rí nutariyaʼ tsimbriguii, maski ajndu najmún mixtiʼkhu enii xawan o á mu najmún ikháá má. Mbá xkri̱da, á mu mbáa xa̱bu̱ naraxu̱u̱n a̱jmi̱i̱n xa̱bu̱ xawan xú káʼnii gáxtáa nda̱wa̱á ga̱jma̱a̱ ikhiin “nuraxnuu” ikháá má carta, ikháanʼ maku̱mu̱lú rí mbríguu ganindxu̱u̱ rí nuthi mú nguáná ragájkhun rúʼko̱.

Rí najmún ga̱jma̱a̱ rí nuni xa̱bu̱ xawan eʼwíínʼ nuthi mbá dí ra̱májánʼ ga̱jma̱a̱ numún ikhiin. Kuwa xa̱bu̱ bi̱ nuthi rí xawan nduyáá xóo eni xa̱bu̱ ga̱jma̱a̱ rí cartas ga̱jma̱a̱ itsí xngiyaʼ i̱ndó nuni makujmaa rí naʼgui̱i̱. Mbá xkri̱da, tikhun xawan bi̱ najmañún wéñuʼ nuni graxe̱ ga̱jma̱a̱ nugíʼ edxu̱ún mu mbuyáá rí gúriʼña̱a̱ o rí tsiriʼña̱a̱n xa̱bu̱. Nda̱wa̱á asndu xóo xawan ndaʼyoo, rí xóo ethi xa̱bu̱ maski ajndu ikhiin túyáá xóo nithi. Xawan nuriya kaʼñún xa̱bu̱ itháan mba̱a̱ mbújkha̱a̱ índo̱ najmún ajngáa rí nuthi má xa̱bu̱.

Xa̱bu̱ bi̱ nunigajmaa numún a̱ʼgua̱a̱n ga̱jma̱a̱ xawan najmún ku̱ma̱ rí katsíñanʼ rí xú káʼnii gakuwáanʼ nda̱wa̱á. Mú, lá xúʼko̱ nindxu̱u̱ ráʼ. Náa Biblia naʼthí rí ma̱ndoo muraʼwíí ndiéjunʼ guʼnimbulúʼ ga̱jma̱a̱ rí gúʼni gáʼthi xóo gakuwáanʼ nda̱wa̱á (Josué 24:15).

Bi̱ nandún muni rí naniguʼ Dios guáʼdáá i̱mba̱ numuu mu muni gaʼduunʼ astrología ga̱jma̱a̱ xawan, rí ikhaa tsíyoo gáʼyoo xúgíʼ rígi̱. Náa Biblia naʼthí: “Ragíʼmaa maxtáa nimbáa [...] bi̱ ndaʼyoo dí gárígá nda̱wa̱á, nimbáa bi̱ naʼni magia, nimbáa bi̱ nariyaʼ suerte, nimbáa bi̱ naʼni xawan, nimbáa bi̱ naʼni brujo náa imba̱a̱ xa̱bu̱, nimbáa bi̱ naraxi numuu náa xa̱bu̱ xawan, nimbáa bi̱ naʼtimijna gajmíi̱n wajinʼ. Numuu rí bi̱ naʼni xúgíʼ rígi̱, rúʼko̱ nawiyuʼ kaʼyoo Jeobá” a (Deuteronomio 18:10-12).