Dios niʼni xuyuʼ xa̱bu̱ mu maʼga̱ raʼni̱i̱ ikháá. Índo̱ mbáa xa̱bu̱ bi̱ tséʼniuu nandii nuthii, naxijtuminaʼ ga̱jma̱a̱ nato̱ʼo̱o̱ clavo náa xuyuʼ, “nacha̱ egíʼdu̱u̱ ñajunʼ mu maʼni thanaminaʼ náa nithu mba̱a̱ o chíʼgíʼ” (Johns Hopkins Medicine). Xuyuʼ xa̱bu̱ nañajunʼ nacha̱ mu matu̱ma̱a̱ eʼdi, najkatíyaʼ tsinaʼ ga̱jma̱a̱ maʼni̱i̱ náa nithii.

ATATSAʼWÁMINAʼ GA̱JMA̱A̱ NUMUU RÍGI̱: Á mu bi̱ Niʼniáanʼ niʼni xuyuʼ xa̱bu̱ mu maʼni̱i̱ ikháá, lá makumulúʼ rí xáʼngo̱o̱ gáʼni̱i̱ a̱jkiu̱lú índo̱ rígá mbá rí naʼni gawúnlú ráʼ. Salmista ndiʼyoo májánʼ rí Dios ma̱ndoo maʼni̱i̱ a̱jkiu̱ún xa̱bu̱ ga̱jma̱a̱ maʼni thanún (Salmo 147:3). Mú, á mu ikháánʼ xtaa ratraʼníí mbá rí naʼni gawáanʼ wéñuʼ, xú káʼnii tayáá rí gajkhun Dios “maʼni̱i̱ náa nigawáanʼ” xúgi̱ ga̱jma̱a̱ nda̱wa̱á rá.

Dios naʼthúlúʼ: “Xámiñaʼ, numuu rí ikhúúnʼ xtáá ga̱jma̱ʼ. Xatiexi asndu náa, numuu dí ni̱ndxu̱ʼ Dios ndrígáʼ. Gajkhun dí ikhúúnʼ mani gakhi̱i̱ a̱jkia̱nʼ. Phú gajkhun dí ikhúúnʼ mambáyaʼ” (Isaías 41:10). Índo̱ nduʼyáá rí Jeobá nandoo kaʼyulú wéñuʼ naʼni makuwáanʼ tsímáá ga̱jma̱a̱ maguaʼdáá tsiakii rí ndayúlú mu muraʼníí xkujndu. Apóstol Pablo nixná mbiʼyuu tsímáá rígi̱ xóo “tsímáá rí na̱ʼkha̱ náa Dios rí itháan gíʼdoo tsiakii”. Ga̱jma̱a̱ nda̱wa̱á xóó niʼthí: “Náa xúgíʼ rí nandoʼ mani gúʼdoo tsiakii rí na̱ʼkha̱ náa Dios” (Filipenses 4:4-7, 9, 13).

Biblia naʼni̱i̱ itháan gújkhuʼ fe ndrígúlú náa rí Dios nikudaminaʼ maʼni náa xa̱bu̱ numbaaʼ. Mbá xkri̱da, Revelación 21:4, 5 naʼthúlúʼ ndiéjunʼ gáʼni Dios ga̱jma̱a̱ náa numuu rí ma̱ndoo makumulúʼ kuʼyáá.

• “Maʼni kaʼwi̱i̱ xúgíʼ iyoʼ” idulú. Jeobá maʼni gámbáa xúgíʼ rí naʼni mumíniiʼ ga̱jma̱a̱ rí naʼni maxmiéjunʼlú, maski ajndu xóo ragíʼdoo numuu kujmaa.

• Rey bi̱ gíʼdoo xúgíʼ tsiakii bi̱ niʼni xúgíʼ “bi̱ gíʼ náa xílí rí nutañajunʼ” náa mekhuíí, majmuu tsiakii ndrígóo ga̱jma̱a̱ rí naʼtáñajunʼ mu maʼni rí xúminiiʼ ga̱jma̱a̱ mambáyulúʼ índo̱ gáʼyulúʼ.

• Jeobá naʼthúlúʼ rí xúgíʼ rí nakudaminaʼ “nindxu̱u̱ gajkhun”. Xóo muʼthá, Jeobá bi̱ nindxu̱u̱ Dios gajkhun, najmuu rí xóo nindxu̱u̱ mu maʼnimbánuu rí nikudaminaʼ.

“‹Maʼni kaʼwi̱i̱ xúgíʼ iyoʼ idún, ní xákhañun itháan, ní xárígá xtambiyaʼ, gitsawaʼskha asndu má gaʼkhu, xúgíʼ rígi̱ ninújngoo gáʼni ikhú›. Ga̱jma̱a̱ bi̱ gíʼ náa xílí rí nutañajunʼ niʼthí: “¡Atayáá! Mani̱i̱ xúgíʼ nuxi̱ʼ›. Ma̱ngaa niʼthí: ‹Ataniraʼmáʼ numuu rí ajngáa rígi̱ nindxu̱u̱ gajkhun ga̱jma̱a̱ xúʼko̱ gárígá›” (Revelación 21:4, 5).

Biblia ga̱jma̱a̱ xúgíʼ rí niʼni nambáyulúʼ muniʼnííʼ Anu̱lú mekhuíí. Xúgíʼ rí niguma náa numbaaʼ naxkaxáanʼ mambáxulu gajmiúlú Dios, náa Biblia naʼthúlúʼ mbájmbu: “Guxu̱ʼmámíjná náa Dios ga̱jma̱a̱ ikhaa makuʼmaminaʼ náa ikháanʼ” (Santiago 4:8). Ga̱jma̱a̱ Hechos 17:27 xóó naʼthí: “Na̱nguá xtáa mitsínguánʼ náa mámbáa rí ikháanʼlu”.

Á mu natríyaʼ itháan mbiʼi mu matatsiʼniiʼ Dios, itháan májánʼ gáta̱ya̱a̱ rí ikhaa naxmiéjunʼ kaʼyaʼ (1 Pedro 5:7). Xú káʼnii gambayaaʼ rí maku̱ma̱ʼ xtayáá Jeobá rá.

Atatsaʼwáminaʼ ga̱jma̱a̱ numuu Toru, mbáa xa̱bu̱ bi̱ xtáa Japón. Maski ajndu niʼnimba̱ja̱a̱ ru̱dúu̱ bi̱ nindxu̱u̱ cristiana, ikhaa ma̱ngaa ni̱jkha̱nú nixtáa náa mafia yakuza dí rígá náa Japón, rí migamíi wéñuʼ. Ikhaa naʼthí: “Nindxa̱ʼwa̱mínáʼ rí Dios naguiyuʼ kaʼyoʼ ga̱jma̱a̱ naxnúʼ castigo índo̱ nakháñun xa̱bu̱ náa mijngii xtáá, itháan índo̱ nakháñuu mbáa bi̱ nandoʼ ka̱yo̱o̱”. Toru ndaʼyoo dí rúʼko̱ niʼni rí mani̱ndxu̱u̱ “xa̱bu̱ bi̱ naʼni gíníi eʼwíínʼ ga̱jma̱a̱ rí tsigáwiinʼ a̱jkiu̱u̱n kaʼñún”. Índo̱ naʼthí rí nindoo magiʼdoo, ikhaa narmáʼáan a̱jkiu̱u̱n rígi̱: “Nindoʼ makhañúʼ nákha dxámá ga̱jma̱a̱ majmaʼniúnʼ wéñuʼ numuu rí nixíyáa mbáa bi̱ itháan gíʼdoo numuu ki xóo ikhúúnʼ”.

Mú, índo̱ Toru ga̱jma̱a̱ a̱ʼgiu̱u̱, Hannah, nigíʼdi̱i̱ ninigajmaa Biblia, ikhaa niriʼkuminaʼ wéñuʼ náa vida ndrígóo ga̱jma̱a̱ xóo kiexu̱u̱. “Asndu ndi̱yo̱o̱ xú káʼnii ni̱jkha̱ rariʼkuminaʼ ajmbioʼ”, eʼthí Hannah.  Rí xúgi̱, Toru naʼthí: “Nda̱yo̱o̱ rí Dios xtáa ga̱jma̱a̱ naxmiéjunʼ kaʼyoo mámbáa rí ikháanʼ. Tsíyoo rí nimbáa makhañúu ga̱jma̱a̱ nandoo maʼni mba̱a̱ a̱jkiu̱u̱n kaʼñún bi̱ nagáwiinʼ a̱jkiu̱ún. Ma̱ndoo muʼtháán ikhaa rí xándoo muʼtháán nimbáa ga̱jma̱a̱ rí nimbáa xákro̱ʼo̱o̱. Inu má, Jeobá maʼni gámbáa xúgíʼ xkujndu, gaʼkhu ga̱jma̱a̱ gamiéjunʼ. Asndu xúgi̱ nambáyulúʼ asndu xóo rí ikháanʼ tsíguaʼthi̱i̱n. Naxmiéjunʼ kaʼyulú wéñuʼ ga̱jma̱a̱ nañewu̱nlú índo̱ kuwáanʼ gíná” (Salmo 136:23).

Xó má ndiʼyáá ga̱jma̱a̱ numuu Toru, índo̱ nduʼyáá rí Dios ma̱ndoo maʼni gámbóo xúgíʼ rí naʼni mumbiyaʼ ga̱jma̱a̱ rí naʼni makuwáanʼ gíná, ga̱jma̱a̱ rí inuu maʼni, naʼni muguaʼthi̱i̱n mbá rí mitsaan ga̱jma̱a̱ naʼni makuwáanʼ itháan májánʼ. Xúʼko̱ kaʼnii, maski ajndu kuwáanʼ náa numbaaʼ náa rígá wéñuʼ gaʼkhu, ma̱ndoo mambáyaʼ ngajua ndrígóo Dios.