Índo̱ nanújngoo mbá ajtsú skíñúʼ minutos rí nigumaa mbáa ada̱ gíʼdoo wéñuʼ numuu. Náa numuu rá. Numuu rí xóo gáʼni mbáa náná ga̱jma̱a̱ a̱ʼdióo mbiʼi rúʼko̱ mambáyúu ada̱ mu maʼga̱ ragaja̱a̱ májánʼ. *

Ndiéjunʼ eʼni rí mbáa náná mañewu̱u̱n májánʼ a̱ʼdióo bi̱ ndiʼkhún nigumaa rá. Náa The Journal of Perinatal Education, profesora Jeannette Crenshaw naʼthí rí índo̱ mbáa a̱ʼgu̱ nagiʼdaa mbáa ada̱, hormona rí nagumbiʼyuu oxitocina “naʼni rí náná maʼndoo kaʼyoo a̱ʼdióo índo̱ ndaʼyoo, índo̱ ndayáraʼaa ga̱jma̱a̱ índo̱ naxnúu maʼxúuʼ”. Ikhú, náa xuyuʼ náná narígá i̱mba̱ hormona rí naʼni “maʼtámíjná ga̱jma̱a̱ a̱ʼdióo” ga̱jma̱a̱ rígi̱ maʼni rí maʼndún kuyamijná itháan. Ndíjkha jngó gíʼdoo wéñuʼ numuu rígi̱ rá.

Bi̱ niʼni rí gu̱ʼu̱ maʼndún kuñún e̱jñún, bi̱ nandoo kaʼyulú wéñuʼ, bi̱ Niʼni xúgíʼ, ikhaa nindxu̱u̱ Jeobá *. Rey David nixnáa núma̱aʼ Dios numuu rí niríyaʼ náa awúu̱n ru̱dúu̱ ga̱jma̱a̱ rí niʼni maxtáa májánʼ índo̱ ndiyáraʼaa ru̱dúu̱. Ndiʼyoo rí Jeobá niñewu̱u̱n asndu nákha mbiʼi rí nixtáa. Ikhaa niʼtájkáan: “Asndu nákha kuʼwu̱u̱n náa awúu̱n ru̱dúʼ, ikháánʼ ni̱ndxa̱ʼ Dios ndrígóʼ” (Salmo 22:9, 10).

ATATSAʼWÁMINAʼ GA̱JMA̱A̱ NUMUU RÍGI̱: Á mu Dios niʼni mbá rí miʼskhaa wéñuʼ mu mbáa náná maxtáa xawii ma̱ngaa rí mañewu̱u̱n a̱ʼdióo ga̱jma̱a̱ ngajua, lá xándoo Dios maxmiéjunʼ kaʼyulú mámbáa rí ikháanʼ rí ni̱ndxu̱lú e̱ji̱i̱n xáʼ. (Hechos 17:29.)

Jesucristo, bi̱ nininiʼ itháan májánʼ bi̱ Niʼniáanʼ, niʼthí: “Lá tsixtangujui̱i̱n a̱jmi̱i̱n ñu̱ʼu̱ ga̱jma̱a̱ mbá mbújkha̱a̱ rí na̱nguá gíʼdoo numuu ráʼ. Mú nimbáa tsijpátríguíi mbayííʼ rí xáʼyoo Anu̱u̱. Asndu xtátsúun edxa̱la kíxnuu xúgíʼ. Ikha jngó, xámiñalaʼ: Ikháanʼ kuaʼdáá itháan numala ki xóo mbaʼin ñu̱ʼu̱” (Mateo 10:29-31).

Raʼkháa xúgínʼ xa̱bu̱ nduñún ñu̱ʼu̱, itháan bi̱ nagadrígúun náa ku̱ba̱ʼ. Mú, Anu̱lú bi̱ xtáa mekhuíí ndaʼñún mámbíin rí ikhiin. Ga̱jma̱a̱ ñu̱ʼu̱ maski ajndu mbaʼin, nditháan xáguáʼdáá numún náa Dios xóo mbáa xa̱bu̱ numbaaʼ. Ikha jngó: Dios ndaʼyaʼ ga̱jma̱a̱ naxmiéjunʼ wéñuʼ kaʼyaʼ.

 Náa Biblia naʼthúlúʼ:

• “Numuu rí iduu Jeobá nayexi náa xúgíʼ ku̱ba̱ʼ mu masngájma tsiakii ndrígóo ga̱jma̱a̱ numún xa̱bu̱ bi̱ káxi̱ a̱jkiu̱ún náa ikhaa” (2 CRÓNICAS 16:9).

• “Jeobá ndaʼñún bi̱ jmbiin, ga̱jma̱a̱ naʼdxawún índo̱ nunda̱ʼa̱a̱ mambáñun” (SALMO 34:15).

• “Gajkhun rí ikhúúnʼ maxtáá gagi ga̱jma̱a̱ maʼdxuʼ numuu rí májánʼ a̱jkia̱nʼ, numuu rí natayáá índo̱ ikhúúnʼ xtáá gíná; natayáá gamiéjunʼ rí gúʼdoo” (SALMO 31:7).

Lá nambáyulúʼ índo̱ nduʼyáá rí Dios naxmiéjunʼ kaʼyulú ga̱jma̱a̱ nañewu̱nlú ga̱jma̱a̱ ngajua ráʼ. Xúʼko̱ kaʼnii. Hannah, * bi̱ na̱ʼkha̱ náa Inglaterra, naʼthí:

“Mbaʼa nuthu nikumuʼ rí Jeobá tsíyoo kaʼyoʼ ga̱jma̱a̱ tsiriʼñuʼ rí natajkáan numuu rí ndayóoʼ fe. Niku̱mu̱ʼ rí xtáa raxnúʼ castigo o tsembáyuʼ numuu rí nda̱a̱ numuʼ. Nikumuʼ rí ikhaa tsixmiéjunʼ kaʼyoʼ”.

Mú rí xúgi̱ Hannah ndaʼyoo májánʼ rí Jeobá nandoo kaʼyoo ga̱jma̱a̱ naxmiéjunʼ kaʼyoo. Ndiéjunʼ niʼni mariʼkhu̱u̱ xóo endxa̱ʼwáminaʼ xá. Ikhaa naʼthí: “Táriʼkuminaʼ nacha̱. Niʼni tsiguʼ rí nidxuun mbá discurso rí nagájnuu náa Biblia ga̱jma̱a̱ numuu tsigijñaʼ ndrígóo Jesús rí niʼni maguanúʼ tsiánguá ga̱jma̱a̱ nimbáyuʼ mu mba̱yo̱o̱ rí Jeobá nandoo kaʼyoʼ. Ma̱ngaa ndaʼyoo rí nandoo kaʼyoʼ índo̱ nariʼña̱a̱ rí natajkáan, mbaʼa nuthu nimbiyaʼ. Ma̱ngaa, rí nanigajmaa Biblia ga̱jma̱a̱ rí na̱jkháʼ náa reunión nambáyuʼ maniʼnííʼ májánʼ Jeobá ga̱jma̱a̱ mba̱yo̱o̱ rí eku̱mu̱u̱ náa ikháanʼlu. Rí xúgi̱ nda̱yo̱o̱ rí Jeobá nandoo kaʼyulú, nambáyulúʼ ga̱jma̱a̱ nandoo mañewu̱nlú”.

¡Ra̱ʼkhá tháán exnúlú tsiakii ajngáa rígi̱! Mú xú káʼnii gándoo gáta̱ya̱a̱ á mu Dios naxmiéjunʼ rí ekumaʼ ga̱jma̱a̱ nakro̱ʼo̱o̱ xóo xtaa rá. Mataxkamaa rí naxtiʼña̱a̱ náa imbo̱o̱ artículo.