Atatsaʼwáminaʼ mbá xngaa rí xóo embáxu̱u̱n májánʼ a̱jmi̱i̱n e̱ji̱n bi̱ mbóó nigumiin. Náa ikhiin rígá mbá rí kiejunʼ wéñuʼ. Mbáa directora bi̱ mbiʼyuu Nancy Segal, nañajunʼ náa nduyáá xú káʼnii ni̱ndxu̱ún e̱ji̱n bi̱ mbóó egumiin, ikhaa mbóó nigumaa ga̱jma̱a̱ imba̱a̱ ndxájuu, ikhaa naʼthí rí tikhun bi̱ mbóó nigumiin “nakru̱ʼu̱u̱n májánʼ kuyamijná rí asndu tséyóoʼ má muthi wéñuʼ”. Mbáa a̱ʼgu̱ niʼthí ga̱jma̱a̱ numuu mbáa ndxájuu bi̱ mbóó nigumaa ga̱jma̱a̱: “Nuniʼnumijnáxu májánʼ wéñuʼ”.

Náa numuu rí narígá rígi̱ rá. Maski ajndu kagujtuminaʼ rígi̱ ga̱jma̱a̱ rí xóo kuwa ga̱jma̱a̱ xóo ni̱jkha̱ ragaji̱i̱n, mú tikhuu estudios nasngájma rí itháan gíʼdoo numuu células rí na̱ʼkha̱ náa bi̱ kuñún.

ATATSAʼWÁMINAʼ GA̱JMA̱A̱ NUMUU RÍGI̱: Dios niʼni células ndrígóo mbáa xa̱bu̱ numbaaʼ, ikha jngó nduʼyáá rí ikhaa nakro̱ʼo̱o̱ kaʼyulú májánʼ. Ikha jngó, salmista David niʼnirámáʼ: “Ikháánʼ nitieunʼ náa awúu̱n ru̱dúʼ. Itsuʼ na̱nguá guarkaʼo náa inaʼ ikháánʼ índo̱ nigumún náa tsékujmaa [...]. Idaʼ ndiʼyoo índo̱ ndiʼkhún xtáá ragumún, ga̱jma̱a̱ náa libro ndrígáʼ kiʼniraʼmáʼ xúgíʼ xú káʼnii nindxu̱ʼ” (Salmo 139:13, 15, 16). I̱ndó Dios bi̱ naniniáanʼ ga̱jma̱a̱ nakro̱ʼo̱o̱ kaʼyulú raʼkháa i̱ndó xóo nigumáanʼ, ma̱ngaa xúgíʼ rí xóo nikuwáanʼ rí niʼni manindxu̱lúʼ xó má kaʼniáanʼ. Ikha jngó, ma̱ndoo mbuʼyáá gajkhun rí nakro̱ʼo̱o̱ kaʼyulú itháan májánʼ ki xóo nimbáa xa̱bu̱.

Rey David niʼtájkáan: “Oh Jeobá, ikháánʼ natayáá májánʼ xóo ni̱ndxu̱ʼ, ga̱jma̱a̱ natatsinúnʼ májánʼ. Ikháánʼ natayáá májánʼ índo̱ naʼgúnʼ ga̱jma̱a̱ índo̱ nagújun. Asndu mitsínguánʼ etayáá xóo endxa̱ʼwa̱mínáʼ. Numuu rí asndu xóo nda̱a̱ nimbá ajngáa náa ra̱ju̱nʼ, índo̱, ¡atayáá! ikháánʼ má natayáá xúgíʼ” (Salmo 139:1, 2, 4). Ma̱ngaa, Jeobá naninuʼ rí nakumulú dí rígá asndu itháan mi̱jnu̱ʼ náa awúu̱n a̱jkiu̱lú, ma̱ngaa rí nandulúʼ muʼni (1 Crónicas 28:9; 1 Samuel 16:6, 7). Ndiéjunʼ eʼsngúlúʼ rígi̱ ga̱jma̱a̱ numuu Dios rá.

Naʼsngúlú rí maski ajndu nguáná tséʼyáá xóo muʼthá o rí nakumulú índo̱ nuʼtájkáan, bi̱ Niʼniáanʼ ndaʼyoo má. Ikhaa tseʼyoo i̱ndó rí nuʼni, ma̱ngaa ikhaa nakro̱ʼo̱o̱ náa numuu rí nuʼni. Ga̱jma̱a̱ raʼkháa i̱ndó rúʼko̱, Dios ma̱ngaa naʼngo̱o̱ ndaʼyoo rí gúʼnilú á mu kuwáanʼ i̱mba̱ núthu. Xúʼko̱, numuu rí Dios niʼniáanʼ mu maʼndulú kuʼyamijná, nduʼyáá májánʼ rí nandoo, naniguʼ wéñuʼ, maninuʼ ga̱jma̱a̱ makro̱ʼo̱o̱ rí májánʼ rí nundxa̱ʼwáá edxu̱lúʼ ga̱jma̱a̱ náa numuu eyulú muʼni (1 Juan 4:7-10).

 Náa Biblia naʼthúlúʼ:

• “Numuu rí iduu Jeobá ndaʼñún xa̱bu̱ bi̱ nuni rí jmbu, ga̱jma̱a̱ naʼdxaun índo̱ nutakháñii” (1 PEDRO 3:12).

• Dios nakudaminaʼ: “Mani rí majmañaʼ, ga̱jma̱a̱ masngáaʼ náa kamba̱a̱ rí gíʼmaa midxuʼ. Maxtáá rayaʼ índo̱ gaxnaʼ xtágabu” (SALMO 32:8).

Lá ma̱ndoo mambáyulúʼ muraʼníí xkujndu rí mbuʼyáá rí Dios nakro̱ʼo̱o̱ kaʼyulú ráʼ. Atatsaʼwáminaʼ ga̱jma̱a̱ numuu Anna, bi̱ xtáa Nigeria. Ikhaa niʼthí: “Ra̱ʼkha̱ tháán nixmiéjunʼ rí asndu ni̱jkhánú nindxa̱ʼwáminaʼ rí á mu gíʼdoo numuu maxtáá. Índo̱ nithu̱nʼ rí gúʼdoo cáncer náa tso̱xto̱ʼ, ajmbayi̱i̱ʼ nikháñu má ga̱jma̱a̱ a̱ʼdióʼ dxáʼgú kraʼa náa hospital numuu rí gíʼdoo hidrocefalia (gíwanʼ iyaʼ náa ngáñúnʼ). Niʼniuʼ gakhi̱i̱ rí maxtáá náa hospital ikháá má mbiʼi ga̱jmu̱ʼ a̱ʼdióʼ ga̱jma̱a̱ rí magumún cirugía, quimioterapia ga̱jma̱a̱ radioterapia”.

Ndiéjunʼ nimbáyúu Anna mu maʼngo̱o̱ maraʼnuu rígi̱ rá. “Niniguʼ wéñuʼ mandxa̱ʼo̱o̱ edxu̱ʼ texto rí nagájnuu náa Biblia xóo Filipenses 4:6, 7, náa naʼthí ‹ikhú tsímáá rí na̱ʼkha̱ náa Dios rí itháan gíʼdoo tsiakii, mañewu̱u̱n a̱jkia̱la ga̱jma̱a̱ rí nundxaʼwamíjna̱›. Mámbá rí narmáʼáan a̱jkiu̱nʼ ga̱jma̱a̱ numuu ajngáa rígi̱ naʼni maku̱mu̱ʼ rí xtáá mijngii ga̱jmu̱ʼ Jeobá, nda̱yo̱o̱ rí ikhaa nakro̱ʼo̱o̱ itháan ki xóo rí naku̱mu̱ʼ ikhúúnʼ. Ma̱ngaa nimbayúʼ wéñuʼ a̱ngui̱nʼ bi̱ mbóó enigajmaa gajmíi̱nʼ.

”Maski ajndu xóó gúʼdoo nandii, mú nánguá xóo nákha ginii. Nijmañuxu mundxa̱ʼwa̱a̱ májánʼ edxu̱xuʼ maski ajndu kuaʼdááxu xkujndu numuu rí Jeobá xtáa ga̱jma̱á ni̱ndxu̱xu̱ʼ. Santiago 5:11 naʼthí: ‹Gagi eñu̱u̱nxu bi̱ niʼngu̱u̱n. Ikháanʼ nidxawíín xóo niʼngo̱o̱ Job ga̱jma̱a̱ ndi̱ya̱a̱la rí niʼni Jeobá, rí Jeobá gíʼdoo wéñuʼ ngajua, ga̱jma̱a̱ nagáwiinʼ a̱jkiu̱u̱n›”. Jeobá nikro̱ʼo̱o̱ májánʼ xkujndu rí nigiʼdoo Job, ga̱jma̱a̱ nduʼyáá májánʼ rí ikhaa nakro̱ʼo̱o̱ xkujndu ndrígúlú mangáanʼ.