Á mu Dios na̱nguá gíʼdoo aʼkhúun, ndiéjunʼ o tsáa gíʼdoo aʼkhúun rá. Náa numuu rí mbaʼin xa̱bu̱ nakháñun ga̱jma̱a̱ numuu ewiʼ o migíníi wéñuʼ rá. Náa numuu dí rígá guerras, nandii ga̱jma̱a̱ gamiéjunʼ rá. Náa Ajngá rawunʼ Dios naʼthí rí xa̱bu̱ numbaaʼ numíniiʼ ga̱jma̱a̱ mbá ajtsú numuu:

1. Xa̱bu̱ nuni i̱ndó rí nanigu̱nʼ ikhiin, nandún muguaʼdáá wéñuʼ ga̱jma̱a̱ naguiñunʼ kuñún eʼwíínʼ. “Xa̱biya̱ naʼtañajunʼ xa̱biya̱ mu maʼniu dí raʼkhí” (Eclesiastés 8:9). Nguáná xa̱bu̱ nagumiin dí ra̱májánʼ wéñuʼ, nguáná numuu rí eʼwíínʼ xa̱bu̱ nanigu̱nʼ muni i̱ndó rí nanigu̱nʼ ikhiin.

2. Mbiʼi ga̱jma̱a̱ gamiéjunʼ rí na̱nguá kuaʼti̱i̱n. Náa Biblia ma̱ngaa naʼthí rí xa̱bu̱ numíniiʼ “numuu rí na̱jkha̱nú mbiʼi ga̱jma̱a̱ gamiéjunʼ rí na̱nguá kuaʼti̱i̱n naguaʼnii xúgiáanʼ” (Eclesiastés 9:11). Xóo muʼthá, gamiéjunʼ narígá numuu rí kuwáanʼ náa ragíʼmaa makuwáanʼ náa hora dí ragíʼmaa, o numuu rí túñeumíjna̱lú ga̱jma̱a̱ nakiéʼkulu.

3. Xa̱bu̱ xkawiʼ bi̱ naʼtáñajunʼ náa numbaaʼ. Náa Biblia nasngájmaa tsáa bi̱ phú gíʼdoo aʼkhúun rí xa̱bu̱ numbaaʼ numíniiʼ wéñuʼ índo̱ naʼthí: “Náa xúgíʼ numbaaʼ rígá tsiakii ndrígóo Gixa̱a̱” (1 Juan 5:19). Gixa̱a̱, mbáa bi̱ gíʼdoo tsiakii bi̱ nákha ginii ninindxu̱u̱ mbáa ángel májáánʼ, mú “táxtáa náa rí gajkhun” (Juan 8:44). Eʼwíínʼ ángeles niwi̱i̱n gajmiún Satanás mu muni i̱ndó rí nanigu̱nʼ ikhiin ga̱jma̱a̱ xúʼko̱ niguánu ninindxu̱ún xa̱bu̱ wéñiʼ (Génesis 6:1-5). Asndu nákha nixuximi̱jna̱ náa Dios, Satanás gajmíi̱n xa̱bu̱ wéñiʼ kuwa runi dí ra̱májánʼ ga̱jma̱a̱ nuni gíníi xa̱bu̱ náa numbaaʼ, mú rí xúgi̱ nakujmaa itháan. Gixa̱a̱ nakiʼnáa wéñuʼ ga̱jma̱a̱ “naʼninduwiinʼ xúgínʼ xa̱bu̱ bi̱ kuwa náa xúgíʼ tsu̱du̱u̱ ku̱ba̱ʼ”, ikha jngó náa Biblia naʼthí: “¡Phú migíníi bi̱ kuwa náa numbaaʼ ga̱jma̱a̱ bi̱ kuwa náa lamáa!” (Revelación 12:9, 12). Satanás najmuu tsiakii ndrígóo mu maʼni gíníi xa̱bu̱, bi̱ naniguʼ maʼni dí ra̱májánʼ ga̱jma̱a̱ asndu nadxuu índo̱ ndaʼyoo rí numíniiʼ xa̱bu̱. Ikhaa gíʼdoo aʼkhúun ga̱jma̱a̱ numuu rí numíniiʼ, raʼkháa Dios.

ATATSAʼWÁMINAʼ GA̱JMA̱A̱ NUMUU RÍGI̱: I̱ndó mbáa xa̱bu̱ xkawiʼ bi̱ na̱nguá gíʼdoo a̱jkiu̱u̱n maʼni rí mumíniiʼ xa̱bu̱. Mú, náa Biblia naʼthí rí “Dios nandoo kaʼñúún xúgínʼ” (1 Juan 4:8). Ikha jngó na̱nguá xóo mundxaʼwamíjna̱ rí Dios bi̱ gajkhun maʼni dí ra̱májánʼ o rí na̱nguá jmbu (Job 34:10).

Rí xúgi̱, mbáa ikháánʼ natraximínáʼ: “Nguánáa gáʼni gámbáa Dios rí xkawiʼ rí naʼni Satanás rá.” Xó má ndiʼyáá, Dios naguiyuʼ kaʼyoo dí ra̱májánʼ, ga̱jma̱a̱ ikhaa nagawúunʼ wéñuʼ a̱jkiu̱u̱n índo̱ ikháanʼ numíniiʼ. Ma̱ngaa Ajngá rawunʼ naxkaxáanʼ mu muʼtháán rí naʼni maxmiéjunʼlú, numuu rí ikhaa naxmiéjunʼ kaʼyulú (1Pedro 5:7). Náa imbo̱o̱ artículo mbuʼyáá náa nasngájma rí Dios nandoo kaʼyulú wéñuʼ, ga̱jma̱a̱ rí gíʼdoo tsiakii maʼni gámbáa tsingíná ga̱jma̱a̱ rí nagumáanʼ dí ra̱májánʼ. *