Tsingíná: Lá nindxu̱u̱ castigo ndrígóo Dios ráʼ.
LUCÍA NARAJMBÚʼ RAJKHÚ XTI̱YU̱ʼ. Nákha chíʼgíʼ nigiʼdoo poliomielitis, mbá nandii rí na̱jkha̱roʼo rí nixnúu náa gaʼkhu ndrígóo. Índo̱ gíʼdoo 16 tsiguʼ, mbáa náná náa xtáa rañajunʼ niʼthúu̱n: “Dios niʼni rí xándoo gídxúʼ numuu rí tátanimbaʼ ga̱jma̱a̱ tatayamajkuíí ru̱dáʼ”. Mba̱yu̱ʼ tsiguʼ nda̱wa̱á, Lucía xóó nagawúnʼ ga̱jma̱a̱ ajngáa rí nijuaʼtháán.
ÍNDO̱ DÁMARIS NIʼDXUUN RÍ GÍʼDOO MBÁ NANDII NÁA NGÁÑUNʼ, anu̱u̱ niʼthúu̱n: “Mbáa nitani̱ mbá dí ra̱májánʼ wéñuʼ ikha jngó nitagíʼnii rígi̱. Dios exnáʼ castigo”. Dámaris nixtáa gíná wéñuʼ.
Niʼníí tsiguʼ xa̱bu̱ nakumu̱ún rí nandii nindxu̱u̱ castigo ndrígóo Dios. Náa libro Usos y costumbres de las tierras bíblicas (Rí najmaa ga̱jma̱a̱ rí naguʼwún nuni nákha wajyúúʼ) naʼthí rí nákha nixtáa Jesús, nikumu̱ún rí “nandii na̱ʼkha̱ numuu rí xa̱bu̱ nikudaminaʼ aʼkhá, o bi̱ kaʼñún, ga̱jma̱a̱ nindxu̱u̱ castigo ga̱jma̱a̱ numún aʼkhún”. Ga̱jma̱a̱ libro Medieval Medicine and the Plague (Thana rí nirígá wajyúúʼ ga̱jma̱a̱ nandii mbiʼ) naʼthí rí mba̱yu̱ʼ tsiguʼ nda̱wa̱á rí nixtáa Cristo, “tikhun xa̱bu̱ nikumu̱ún rí Dios nijmuu nandii mbiʼ mu maxnún castigo xa̱bu̱ ga̱jma̱a̱ numuu aʼkhún”. Mu, lá ninindxu̱u̱ castigo ndrígóo Dios nandii rí nirígá náa Europa nákha siglo gu̱wa̱ʼ i̱jkhu̱ ráʼ. O lá ninindxu̱u̱ mbá nandii mbiʼ, xó má nisngájma ciencia dxe̱ʼ. Mbáa ikháánʼ nitraximínáʼ á mu Dios najmuu nandii mu maxnún castigo xa̱bu̱ ga̱jma̱a̱ numuu aʼkhún. *
ATATSAʼWÁMINAʼ GA̱JMA̱A̱ NUMUU RÍGI̱: Á mu nandii ga̱jma̱a̱ tsingíná ninindxu̱u̱ castigo rí na̱ʼkha̱ náa Dios rí kaʼñún mundrigú xa̱bu̱, náa numuu rí Jesús, niʼni thanún bi̱ naʼniún nandii rá. Lá, rí niʼni Jesús xasngájma rí Jeobá na̱nguá nindxu̱u̱ jmbii ráʼ. (Mateo 4:23, 24.) Jesús nimbá miʼtsú xákuximínáʼ náa Anu̱u̱. Ikhaa niʼthí: “Nani má xúʼko̱ rí naniguuʼ” ga̱jma̱a̱ “xó má Anu̱ʼ niʼtáñajunʼ mani, xúʼko̱ má eni” (Juan 8:29; 14:31).
Náa Biblia naʼthí kaʼwu rí Jeobá nindxu̱u̱ “májánʼ ga̱jma̱a̱ naʼni rí jmbu” (Deuteronomio 32:4). Mbá xkri̱da, Dios xáʼni rí makhañún mbaʼin xa̱bu̱ bi̱ raguáʼdáá aʼkhún náa mbá avión ga̱jma̱a̱ numuu mbáwíi xa̱bu̱ bi̱ gíʼdoo aʼkhúun. Abrahán, mbáa xa̱bi̱i̱ Dios bi̱ jmbii, ndiʼyoo rí bi̱ xtáa Mitsídáanʼ xáʼni nditháan rígi̱. Ikha jngó, niʼthí dí “rakáʼnii” o xándoo maxíyáa “bi̱ jmbii ga̱jma̱a̱ bi̱ ra̱májáánʼ” (Génesis 18:25). Ma̱ngaa náa Biblia naʼthí rí “Dios na̱nguá eʼne rí ra̱májánʼ” o “xándoo maʼni dí ra̱májánʼ” (Job 34:10-12).
NDIÉJUNʼ EʼSNGÚLÚʼ NÁA BIBLIA GA̱JMA̱A̱ NUMUU TSINGÍNÁ RÁ.
Índo̱ numíniiʼ raʼkháa numuu rí Dios naxnúlú castigo ga̱jma̱a̱ numuu rí nikiéʼkulu. Jesús nisngájma kaʼwu índo̱ ikhaa gajmíi̱n discípulos ndrígóo nixkamaa mbáa bi̱ kúgoo iduu. Ikhiin niraxi̱i̱: “Rabí, tsáa nikudaminaʼ aʼkhá: Xa̱bu̱ bugi̱, anu̱u̱ o ru̱dúu̱ mu ikhaa xákruigo̱o̱ xáʼ.” Ga̱jma̱a̱ Jesús niriʼña̱a̱: “Ni xa̱bu̱ bugi̱ táʼni aʼkhá, ni anu̱u̱ ni ru̱dúu̱” (Juan 9:1-3).
Ga̱jma̱a̱ numuu ku̱ma̱ dí rígá nákha ikhú, xa̱bi̱i̱ Jesús niʼniún tsiánguá índo̱ Jesús niʼthí rí ni xa̱bu̱ buʼko̱ ni anu̱u̱ ni má ru̱dúu̱ na̱nguá nixudami̱jna̱ mbá aʼkhá rí maʼni mundrigú mbá castigo. Índo̱ nimbáʼta̱a̱ iduu xa̱bu̱ buʼko̱, Jesús raʼkháa i̱ndó niʼni thanuu bi̱ kúgoo iduu ma̱ngaa nisngájma rí ku̱ma̱ rúʼko̱ nindxu̱u̱ minduwaʼ (Juan 9:6, 7). Índo̱ nduʼyáá rí Dios na̱nguá gíʼdoo aʼkhúun ga̱jma̱a̱ numuu xúgíʼ rí nimíniiʼ naʼni̱i̱ a̱jkiu̱ún xa̱bu̱ bi̱ guáʼdáá mbá nandii gakhi̱i̱.
Lá magiʼdoo numuu rí Jesús maʼni thanún xa̱bu̱ bi̱ guáʼdáá nandii á mu nindxu̱u̱ mbá castigo ndrígóo Dios ráʼ.
Náa Biblia naʼthúlúʼ:
-
“Dios tsekuʼma dí ra̱májánʼ, ni má tsígrui̱ga̱ dí ra̱májánʼ náa inu nimbáa” (SANTIAGO 1:13). Ga̱jma̱a̱, raʼkháa i̱ndó rúʼko̱, Dios nacha̱ má gáʼni gámbáa “dí ra̱májánʼ” rí naʼni mumíniiʼ xa̱bu̱ mba̱yu̱ʼ tsiguʼ, xóo nandii, gaʼkhu ga̱jma̱a̱ rí nakháñulú.
-
Jesucristo “niʼni thanún xúgínʼ bi̱ kuwa rumíniʼ” (MATEO 8:16). Rí Jesús ni’ni thanún xa̱bu̱ nisngajma dí gáʼni Reino ndrígóo Dios nda̱wa̱á náa xúgíʼ numbaaʼ.
-
Dios “maʼni kaʼwi̱i̱ xúgíʼ iyoʼ idún, ní xákhañun itháan, ní xárígá xtambiyaʼ, gitsawaʼskha asndu má gaʼkhu, xúgíʼ rígi̱ ninújngoo gáʼni ikhú” (REVELACIÓN [APOCALIPSIS] 21:3-5).
TSÁA GÍʼDOO AʼKHÚUN RÁ.
Ikha jngó, náa numuu dí narígá wéñuʼ gamiéjunʼ ga̱jma̱a̱ tsingíná náa numbaaʼ rá. Á mu Dios ragíʼdoo aʼkhúun, tsáa gíʼdoo aʼkhúun xúʼko̱ rá. Graxe̱ rígi̱ nuni xa̱bu̱ numbaaʼ mba̱yu̱ʼ tsiguʼ. Náa i̱mba̱ artículo mataxkamaa rí naxtiʼña̱a̱.
^ Nákha wajyúúʼ, Dios nixnúún castigo xa̱bu̱ ga̱jma̱a̱ nandii, gamiéjunʼ o i̱ʼwáʼ, numuu rí nixudami̱jna̱ náa tikhu aʼkhá, mú náa Biblia tséʼthi á mu xóó naʼni rí mbiʼi xúgi̱.
