1. 1. GIXA̱A̱. Ikhaa ninindxu̱u̱ mbáa ángel bi̱ táʼnimbo̱o̱ bi̱ phú naʼni dí xa̱bu̱ mawiñu̱u̱nʼ kuyamijná dí mbiʼi xúgi̱. Dios maʼni gámbáa Gixa̱a̱ ga̱jma̱a̱ xúgíinʼ bi̱ nawiñu̱u̱nʼ kuyamijná (Salmo 37:38; Romanos 16:20).

2. 2. NUMBAAʼ NÁA NAʼTÁÑAJUNʼ GIXA̱A̱. Dios maʼni gámbíin xúgíinʼ bi̱ nuni̱ rí nawiñu̱u̱nʼ kuyamijná xa̱bu̱, xóo políticos bi̱ nuni̱ kuʼwúnʼ eʼwíinʼ ga̱jma̱a̱ bi̱ nuyégún edxu̱u̱ náa mbá religión bi̱ i̱ndó nuni̱ dí xa̱bu̱ mawiñu̱u̱nʼ kuyamijná. Dios ma̱ngaa maʼni gámbíin xúgíinʼ xa̱bu̱ bi̱ nugujua̱ bi̱ i̱ndó nduyaʼ maguaʼdáá ikhiin ga̱jma̱a̱ nuni̱ kuʼwúnʼ eʼwíinʼ (2 Pedro 3:13).

3. 3. AʼKHÁ. Náa Biblia naʼthí dí xúgiáánʼ bi̱ ni̱ndxu̱lú xa̱bu̱ numbaaʼ kuaʼdáá aʼkhá, ikha jngóo rúʼko̱ naʼni dí mundxaʼwamíjná dí raʼkhí ga̱jma̱a̱ dí makumulú ma̱ngaa mu̱ʼni̱ dí ra̱májánʼ (Romanos 5:12). Ma̱ngaa rúʼko̱ naʼni dí mawiyulú kuʼñúún eʼwíinʼ. Mú, i̱ndó Dios ma̱ngoo mambáyulú mu maʼngulú mu̱ʼni̱ gámbáa xúgíʼ dí ra̱májánʼ rígi̱ ga̱jma̱a̱ nditháan ni xárígá náa a̱jkiu̱lú dí nawiyulú kuʼñúún eʼwíinʼ (Isaías 54:13).

1. 1. MARIGÁ XÓ MÁ KAʼYOO. Xa̱bu̱ ñajunʼ ndrígóo Dios maxtáa raʼtáñajúúnʼ xa̱bu̱ numbaaʼ asndu náa mekhuíí, mbáa xa̱bu̱ ñajunʼ májáanʼ bi̱ maxtáa asndu kámuu mbiʼi (Daniel 2:44). Dí tsíñún kuyamijná ga̱jma̱a̱ dí nda̱a̱ gamajkhún nixárígá ikhú ga̱jma̱a̱ Dios maʼnimbánuu numún xúgíinʼ bi̱ kúwíin ruminíiʼ dí mbiʼi xúgi̱ (Lucas 18:7).

2. 2. XÚGIÁÁNʼ MAKUWÁÁNʼ TSÍMÁÁ. Nimbáa nixáminúunʼ ga̱jma̱a̱ numuu guerra ma̱ngaa dí nagiʼdu̱u̱n xa̱bu̱ (Salmo 46:9). Nixákuwáánʼ ga̱jma̱a̱ gamíi náa tsu̱du̱u̱ Ku̱ba̱ʼ numuu dí i̱ndó makuwíin xa̱bu̱ bi̱ nanigu̱u̱nʼ marigá dí tsímáá (Salmo 72:7).

3. 3. XÚGIÁÁNʼ MAKUWÁÁNʼLÚ MÁJÁNʼ. Xúgíinʼ xa̱bu̱ maʼndún kuyamijná gajkhun (Mateo 22:39). Nimbá ni xáʼni gínáánʼlú ni má ku̱ma̱ dí ra̱májánʼ o dí raʼkhí dí niguáʼnílú nákha ginii (Isaías 65:17). Índo̱ gámbáa dí nawiñu̱u̱nʼ kuyamijná xa̱bu̱, ‹ikhú makuwáánʼ tsímáá wéñuʼ› (Salmo 37:11).

Lá manigua̱a̱ʼ maraxtaa náa mbá numbaaʼ xúʼko̱ kaʼnii ráʼ. Asndu nákha má xúgi̱ mbaʼin wéñuʼ xa̱bu̱ bi̱ kúwíin náa xúgíʼ numbaaʼ nandún kuyamijná wéñuʼ, ikhiin nindxu̱ún Testigos de Jeobá. Xú kaʼnii eni̱ marigá rígi̱ xá. Ikhiin nugímijna munimbaníí ikha dí na̱ʼkha̱ náa Biblia (Salmo 37:8). Maski ajndu mixtiʼkhu náa eguwáʼ ga̱jma̱a̱ xóo kúwíin, mú kúwíin mbá jnduʼ ga̱jma̱a̱ nandún kuyamijná (Isaías 2:2-4).

Testigos de Jeobá manigu̱u̱nʼ wéñuʼ musngáaʼ xú káʼnii gáʼnga̱a̱ʼ gátraʼníí índo̱ narígá dí ra̱májánʼ ga̱jma̱a̱ índo̱ tsíñún gúyaaʼ. Dí gájmaña̱a̱nʼ mambáyáaʼ mu xáwiya̱a̱ʼ xtañún eʼwíinʼ. Ma̱ta̱ya̱a̱ xú káʼnii gátani̱ gajmiáanʼ xúgíinʼ, asndu bi̱ na̱nguá eñún gúthanʼ májánʼ o nawiñu̱u̱nʼ kuyaaʼ, rúʼko̱ gáʼni dí maraxtaa gagi xúgi̱ ma̱ngaa dí mambajxa̱a̱ʼ májánʼ gajmiáanʼ eʼwíinʼ. Mú dí itháán gíʼdoo numuu nindxu̱u̱ rí ma̱ta̱ya̱a̱ ndiéjunʼ gátani̱ mu xúʼko̱ maraxtaa tsímáá índo̱ Xa̱bu̱ ñajunʼ ndrígóo Dios gáʼni gámbóo mbá kayuuʼ dí nawiñu̱u̱nʼ kuyamijná (Salmo 37:29).