Náá numuu rí nawiñu̱u̱nʼ kuyamijná xa̱bu̱ rá.
Náa numbaaʼ, xúgíinʼ xa̱bu̱ nawiñu̱u̱nʼ kuyamijná. Náá numuu rá. Mu mbuʼyáá, ndayóoʼ makru̱ʼu̱lú ndiéjunʼ eyoo gáʼthúu̱n dí nawiñu̱u̱nʼ kuyamijná, xú káʼnii egi̱ʼdu̱u̱ ga̱jma̱a̱ xú káʼnii embu̱jxu̱u̱ itháan.
Ndiéjunʼ eyoo gáʼthúu̱n dí mawiya̱a̱ʼ xtayáá mbáa rá.
Dí mawiya̱a̱ʼ xtayáá nandoo gáʼthúu̱n índo̱ tsíyaaʼ gátaya̱a̱ mbá kayuuʼ mbáa o mbaʼin xa̱bu̱, raʼkháa i̱ndó rí makiʼnáán xtayáá káaʼ nguáthá mbiʼíí.
XÚ KAʼNII GI̱ʼDU̱U̱ DÍ NAWIÑU̱U̱Nʼ KUYAMIJNÁ XA̱BU̱ RÁ.
Mbaʼa enii xóo gi̱ʼdu̱u̱ dí nawiñu̱u̱nʼ kuyamijná. Raʼkháa i̱ndó ga̱jma̱a̱ numuu rí nuni̱ ma̱ngaa ga̱jma̱a̱ numuu xóo nindxu̱ún. Nawiñu̱u̱nʼ kuñún eʼwíinʼ numuu rí nduñún xóo xa̱bu̱ ra̱míjíinʼ, dí rakáʼnii mambajxúun gajmiún o nduñún dí xándoo muriʼkumijnáa, dí na̱nguá guáʼdáá numún, dí nindxu̱ún bi̱ nuradíin a̱ngiu̱ún o dí naguwáʼ náa xuajen dí rígá wéñuʼ xkujndu. Ma̱ngaa mbaʼin nawiñu̱u̱nʼ kuñún eʼwíinʼ numuu dí niguma gíníi nákha ginii, niñu̱u̱n dí ra̱májánʼ o i̱ʼwáʼ gajmá dí niraʼníí.
XÚ KÁʼNII EMBU̱JXU̱U̱ ITHÁAN DÍ NAWIÑU̱U̱Nʼ KUYAMIJNÁ XÁ.
Nguáná xa̱bu̱ asndu nawiñu̱u̱nʼ kuyáá mbáa bi̱ na̱nguá eniʼniiʼ. Mbá xkri̱da, mbáa xa̱bu̱ ma̱ndoo mawiyu̱u̱ʼ kaʼyoo mbáa ndxájuu numuu rí bi̱ kaʼñún o bi̱ nambájxu̱u̱ gajmii nawiñu̱u̱nʼ kuyáá. Ga̱jma̱a̱ índo̱ eʼwíinʼ xa̱bu̱ nduyáá rígi̱ xúʼko̱ má eni̱ mangiin.
Índo̱ nduʼyáá xú káʼnii nacha̱ embu̱jxu̱u̱ dí nawiñu̱u̱nʼ kuyamijná xa̱bu̱, rígi̱ nambáyulú mbuʼyáá náá numuu rí mbaʼin wéñuuʼ xa̱bu̱ nawiñu̱u̱nʼ kuyamijná. Mu ma̱ndoo muʼni gámbáa dí nawiñu̱u̱nʼ kuyamijná xa̱bu̱, ndayóoʼ mbuʼyáá náá mínaaʼ ku̱mu̱u̱ xkujndu rígi̱. Náa Biblia naʼthí náá nigi̱ʼdu̱u̱ xúgíʼ xkujndu rígi̱.
NÁA BIBLIA NAʼTHÍ NÁÁ NIGI̱ʼDU̱U̱ XÚGÍʼ XKUJNDU
RAʼKHÁA XA̱BU̱ NUMBAAʼ NIGI̱ʼDI̱I̱ NIWIÑU̱U̱Nʼ KUYAMIJNÁ. Dí nawiñu̱u̱nʼ kuyamijná nigi̱ʼdu̱u̱ náa mekhuíí, rígi̱ niʼni mbáa ángel bi̱ najmaʼniiʼ xóo Gixa̱a̱, índo̱ nikuximínáʼ náa inuu Dios. Índo̱ niʼni rígi̱ ni̱jkha̱nú ninindxu̱u̱ mbáa bi̱ nagudíin eʼwíinʼ. Numuu rí ikhaa nindxu̱u̱ mbáa “bi̱ naʼni nduwaʼ ga̱jma̱a̱ nindxu̱u̱ anu̱ún bi̱ nuni̱ nduwaʼ”, tséniñuuʼ raʼni dí xa̱bu̱ mawiñu̱u̱nʼ kuyamijná ga̱jma̱a̱ magi̱ʼdu̱u̱n (Juan 8:44; 1 Juan 3:11, 12). Náa Biblia naʼsngáa dí nindxu̱u̱ mixkawi̱i̱ʼ ga̱jma̱a̱ najmangu̱u̱ʼ ma̱ngaa nakiʼnáa wéñuʼ (Job 2:7; Apocalipsis 12:9, 12, 17).
XA̱BU̱ NUMBAAʼ NINDRIGÚU RÍ NAWIÑU̱U̱Nʼ KUYAMIJNÁ. Adán bi̱ ninindxu̱u̱ timbáa xa̱biya̱, niʼni xó má Gixa̱a̱, rúʼko̱ niʼni dí xúgíinʼ xa̱bu̱ numbaaʼ mundrígúu aʼkhá ga̱jma̱a̱ dí xánindxu̱ún xa̱bu̱ jmbiin (Romanos 5:12). A̱ʼdióo Adán bi̱ giʼnii bi̱ mbiʼyuu Caín niwiyu̱u̱ʼ kaʼyoo Abel, maski ajndu nindxu̱u̱ giʼtio̱o̱, ikhaa nixíyáa (1 Juan 3:12). Maski ajndu ikháánʼlú bi̱ ni̱ndxu̱lú xa̱bu̱ numbaaʼ nandulú kuʼyamijná ga̱jma̱a̱ nagáwíinʼ a̱jkiu̱lú kuʼyamijná, mú ga̱jma̱a̱ numuu dí xúgiáanʼlú nindriʼgúu aʼkhá, tséʼni mingíjyúuʼ dí mundxaʼwamíjna̱ i̱ndó ga̱jma̱a̱ numulú ikháánʼ, maxiʼgúlú kuʼñúún eʼwíinʼ ga̱jma̱a̱ muʼnimbaʼumíjna̱, xúgíʼ rígi̱ naʼni mawiyulú kuʼñúún eʼwíinʼ (2 Timoteo 3:1-5).
ÍNDO̱ TSÉNIGUA̱A̱ʼ XÓO ENI̱ BI̱ NINDXU̱ÚN MIXTIʼKUIIN NAʼNI DÍ MAWIYA̱A̱ʼ XTAÑÚN. Numbaaʼ dí kuwáánʼlú naʼni dí xa̱bu̱ muni̱ rí xkawiʼ wéñuʼ ga̱jma̱a̱ xágá̱wíinʼ a̱jkiu̱ún kuñún eʼwíinʼ, rígi̱ naʼni dí mawiñu̱u̱nʼ kuyamijná. Numuu dí “náa xúgíʼ numbaaʼ rígá tsiakii ndrígóo Gixa̱a̱”, ikha jngóo xúgíʼ mbiʼi xa̱bu̱ tsíñún gúyamijná, nutawéñumíjná, nuñu̱u̱ dí ra̱májánʼ eʼwíinʼ ga̱jma̱a̱ nagi̱ʼdu̱u̱n (1 Juan 5:19).
Náa Biblia raʼkháa i̱ndó naʼthí náá eku̱mu̱u̱ xkujndu ma̱ngaa naʼthí xú káʼnii gándoo gámbánuu.
