1, 2. a) Xú káʼnii embánii sniguʼ ga̱jma̱a̱ fe rá. b) Xú káʼnii graxe̱ gúʼyáá rá.

 JEOBÁ nindxu̱u̱ Anu̱lú, ga̱jma̱a̱ nakudaminaʼ rí maʼni tsajkurámiin xa̱bi̱i̱ bi̱ nuni rí jmbu. Xúʼko̱ nasngájma Jeobá rí nandoo kaʼyulú. Ga̱jma̱a̱ ikháanʼ nandulúʼ kuʼyáá Dios numuu rí “ikhaa nindoo kaʼyulúʼ ginii” (1 Juan 4:19). Sniguʼ nambánii ga̱jma̱a̱ fe. Á mu nandulúʼ kuʼyáá itháan Dios itháan gaguaʼdáá fe náa ikhaa ga̱jma̱a̱ mbuʼyáá rí Jeobá maʼni tsajkurámiinʼ bi̱ nandoo kaʼñún (atraxnuu Hebreos 11:6). *

² Jeobá nandoo maʼni tsajkurámiinʼ xa̱bi̱i̱. Xúʼko̱ káʼnii nindxu̱u̱ ikhaa. Ga̱jma̱a̱ ikháanʼ gíʼmaa muʼnimbulúʼ rí Jeobá maʼni tsajkurámiinʼ bi̱ nduyáaʼ ga̱jma̱a̱ xúgíʼ a̱jkiu̱ún mu fe ndrígúlú mani̱ndxu̱u̱ káxi̱. Náa numuu eʼthá rígi̱ rá. Numuu rí “fe nindxu̱u̱ rí nduʼyáá rí marigá ga̱jma̱a̱ kuwaanʼ  raguáʼthi̱i̱n” (Heb. 11:1). Rí muguaʼdáá fe nandoo gáʼthúu̱n rí muʼnimbulúʼ rí Dios maʼni tsajkurámiinʼ bi̱ naguáju̱n jmbu. Xú káʼnii embáyulú rí mbuʼyáá rí maguma tsajkurámáánʼ nda̱wa̱á rá. Xú káʼnii niʼni tsajkurámiinʼ xa̱bi̱i̱ Jeobá nákha wajyúúʼ rá. Xú káʼnii eʼni rí mbiʼi xúgi̱ xá. Guʼyáá.

3. Ndiéjunʼ eʼthúlú náa Malaquías 3:10 rá.

³ Jeobá nikudaminaʼ rí maʼni tsajkurámiinʼ xa̱bi̱i̱. Ikhaa nakudaminaʼ rí maʼni tsajkurámáánʼ á mu nuxnáá rí itháan májánʼ. Jeobá naʼthúlúʼ rígi̱: “Atani péñu, atrajmún”. Ga̱jma̱a̱ nda̱wa̱á naʼthí: “Atayáá á mu tsembáʼtoo xkrugoo mekhu mu xáʼyáʼ nditháan” (Mal. 3:10). Índo̱ nundrígú invitación ndrígóo Dios, nusngajmáá rí nuxnáa núma̱aʼ.

4. Náa numuu rí ma̱ndoo muʼnimbulúʼ náa ajngáa rí niʼthí Jesús náa Mateo 6:33 rá.

⁴ Jesús nikudaminaʼ náa xa̱bi̱i̱ rí Dios maxnún xúgíʼ rí nda̱ñúnʼ á mu nugíʼ ginii Reino náa vida ndrígu̱ún (atraxnuu Mateo 6:33). Jesús niʼthí rígi̱ numuu rí ndaʼyoo rí Dios naʼnimbánuu rí nakudaminaʼ (Is. 55:11). Ga̱jma̱a̱ ikháanʼ gíʼmaa makumulúʼ xúʼko̱ káʼnii. Á mu nusngajmá mbá fe káxi̱ náa Jeobá, ikhaa maʼnimbánuu ajngáa rígi̱: “Nimbá miʼtsú xániʼñáʼ ga̱jma̱a̱ xániʼñátiga̱a̱n” (Heb. 13:5). Ajngáa rígi̱ nambáyulúʼ muʼnimbulúʼ náa ajngáa rí niʼthí Jesús náa Mateo 6:33.

5. Xú káʼnii exnúlú tsiakii rí xóo Jesús niriʼña̱a̱ Pedro rá.

 ⁵ Apóstol Pedro niraxu̱u̱ Jesús: “Mba xugui niniʼñaxoʼ-jun, nakuaxoʼ tsudaʼ, ¿nala ri aguaʼdaxoʼ-ra?” (Mat. 19:27.) Jesús taxprígúu Pedro numuu rí niʼni graxe̱ rúʼko̱. Rí niʼni, Jesús niʼthún xa̱bi̱i̱ rí Jeobá maʼni tsajkurámiinʼ ga̱jma̱a̱ tsiakii rí gúni. Gajkhun má rí nda̱wa̱á xa̱bi̱i̱ ga̱jma̱a̱ eʼwíínʼ cristianos bi̱ guguajún jmbu mutañajunʼ gajmiún Jesús mekhuíí. Mú ma̱ngaa niʼthí rí maguma tsajkurámiinʼ rí mbiʼi xúgi̱: “Mbamba tsi niniñu goʼo, o dxiyo, o jñagüi, o anu, o rudu, o aʼgüi, o ijin, o mbayu gajma numu mbiʼyuʼ Ikun, tsuʼkue tsi magruigu imbaciento nutun xo tsudu ri niniñu, majana ri jaʼyo ri ndaʼya asjndo jamu” (Mat. 19:29). Rí mbiʼi xúgi̱, xúgiáanʼ nuxkamin náa congregación bi̱ ni̱ndxu̱ún xóo anu̱lú, rudúlu ga̱jma̱a̱ a̱ngiu̱lú. Xúʼko̱ káʼnii, rúʼko̱ gíʼdoo itháan numuu náa xúgíʼ tsiakii rí nuʼni ga̱jma̱a̱ numuu Reino ndrígóo Dios.

6. Xú káʼnii embáyulú mbuʼyáá rí Jeobá naʼni tsajkurámiinʼ xa̱bi̱i̱ rá.

⁶ Índo̱ nduʼyáá rí Jeobá naʼni tsajkurámiinʼ xa̱bi̱i̱ nambáyulúʼ mu maʼngulú índo̱ kuaʼdáá xkujndu. Raʼkháa i̱ndó xúgi̱ naguma tsajkurámáánʼ, ma̱ngaa naguaʼti̱i̱n maguma tsajkurámáánʼ itháan nda̱wa̱á (1 Tim. 4:8). Rí mbuʼyáá gajkhun rí Jeobá “xtáa ga̱jma̱a̱ rí ikhaa naʼni tsajkurámiinʼ bi̱ nduyáaʼ má xúʼko̱” nambáyulúʼ mu maguajún jmbu (Heb. 11:6).

7. Náa numuu nuʼthá rí ancla nindxu̱u̱ xóo mbá rí kuaʼti̱i̱n rá.

⁷ Náa Discurso rí nixná náa kúbá, Jesús niʼthí: “Gaʼdxaʼla jame gajuhuala gagui numu ri mapu-mba ri riga mudaʼla mikui, numu ri xkuaʼni-ma nixkahuin gaʼyo tsi nijuhua huajiu naki ri majuhua ikanʼla” (Mat. 5:12). Tikhun xa̱bi̱i̱ Dios maguma tsajkurámiinʼ mekhuíí. Ga̱jma̱a̱ eʼwíínʼ maguma tsajkurámiinʼ mu makuwá kámuu náa tsu̱du̱u̱ Ku̱ba̱ʼ mitsaan. Mangiin ikhiin nadxún wéñuʼ (Sal. 37:11; Luc. 18:30). Ikha jngó rí kuaʼti̱i̱n gíʼmaa mani̱ndxu̱u̱ náa xúgiáanʼ xóo “ancla náa ikháanʼlu, gajkhun ga̱jma̱a̱ jmbu” (Heb. 6:17-20). Xó má mbá ancla naʼni rí mbá barco mawiji̱ májánʼ índo̱ naʼni giñán mbiiʼ, rí kuaʼti̱i̱n nambáyulúʼ muguajún jmbu ga̱jma̱a̱ naxnúlú tsiakii mu muraʼníí xkujndu.

8. Xú káʼnii embáyulú rí kuaʼti̱i̱n mu xaxmiéjunlú wéñuʼ rá.

⁸ Rí kuaʼti̱i̱n ma̱ngaa nambáyulúʼ mu xaxmiéjunlú wéñuʼ. Xó má mbá bálsamo naʼni̱i̱ xuyulúʼ, rí nakudaminaʼ maʼni Dios naʼni̱i̱ a̱jkiu̱lú. Naxnúlú tsiakii índo̱ nduʼyáá rí Jeobá mañewu̱nlú índo̱ nuniʼñánʼ náa ikhaa xúgíʼ rí naʼni maxmiéjunʼlú (Sal. 55:22). Nduʼyáá gajkhun rí Jeobá “ma̱ndoo maʼni itháan mba̱a̱ ki xóo rí nunda̱ʼa̱a̱” (Efes. 3:20). Rígi̱ nandoo gáʼthúu̱n rí Jeobá maxnúlúʼ itháan ki xóo rí nunda̱ʼa̱a̱lú.

9. Ndiéjunʼ gíʼmaa muʼni mu Jeobá maʼni tsajkurámáánʼ rá.

 ⁹ Mu Jeobá maʼni tsajkurámáánʼ ndayóoʼ muguaʼdáá mbá fe káxi̱ náa ikhaa ga̱jma̱a̱ muʼnimbulúʼ kuʼyáá. Moisés niʼthún israelitas: “Jeobá maʼni tsajkurámáánʼ náa ku̱ba̱ʼ rí Jeobá Dios ndrígáʼ maxnáʼ mu maraxtaa ikhí i̱ndó xátatsiʼñáʼ ratadxawíín aʼwóo Jeobá Dios ndrígáʼ mu matanimbánii tsumáá xúgíʼ rí natañájuanʼ xúgi̱. Numuu rí Jeobá Dios ndrígáʼ maʼni tsajkurámáánʼ xó má nikudaminaʼ” (Deut. 15:4-6). Lá nduʼyáá májánʼ rí Jeobá maʼni tsajkurámáánʼ á mu naguajún jmbu má xúʼko̱ ráʼ. Kuaʼdáá mbá numuu mu muʼnimbulúʼ rígi̱.

10, 11. Xú káʼnii Jeobá niʼni tsajkurámááʼ José rá.

¹⁰ Biblia nigumaraʼmáʼ mu mambáyulúʼ. Ikhí ma̱ndoo muraxnuu xú káʼnii Jeobá niʼni tsajkurámiinʼ mbaʼin xa̱bi̱i̱ nákha wajyúúʼ (Rom. 15:4). José ninindxu̱u̱ mbá májánʼ xkri̱da. Timbá, a̱ngui̱i̱n nigujua̱a̱ xóo esclavo. Nda̱wa̱á, a̱ʼgiu̱u̱ xa̱bu̱ bi̱ naʼtáñajuunʼ nikruiga̱a̱ ga̱jma̱a̱ numuu mbá rí táʼni, ikha jngó José ni̱jkha̱ náa guʼwá e̱jua̱nʼ náa Egipto. Lá rígi̱ niʼni tsíngunʼ náa Jeobá xáʼ. Na̱nguá. Náa Biblia naʼthí: “Jeobá nixtáa má xúʼko̱ ga̱jma̱a̱ José ma̱ngaa nisngájmuu rí nindoo kaʼyoo má xúʼko̱”. Ga̱jma̱a̱ nda̱wa̱á naʼthí: “Jeobá xtáa ga̱jma̱a̱ José, ga̱jma̱a̱ rí ikhaa naʼni, Jeobá naʼni rí magajnúu májánʼ” (Gén. 39:21-23). Asndu mbiʼi rí mingíjyúuʼ wéñuʼ, José niʼngo̱o̱ a̱jkiu̱u̱n ga̱jma̱a̱ nigi̱ʼthu̱u̱n rí Jeobá mambáyúu.

¹¹ Xú káʼnii Jeobá niʼni tsajkurámáánʼ José rá. Nguáthá tsiguʼ nda̱wa̱á, Faraón niʼni kríyaaʼ José náa guʼwá e̱jua̱nʼ. José nánguá ninindxu̱u̱ esclavo, ni̱jkha̱nú ninindxu̱u̱ bi̱ ragajmi̱i̱n bi̱ nigiʼdoo itháan numuu náa Egipto (Gén. 41:1, 37-43). Ikhaa ga̱jma̱a̱ a̱ʼgiu̱u̱ niguáʼdiin a̱jmi̱i̱n e̱ji̱n. José nixná mbiʼyuu Manasés timbáa a̱ʼdióo, “numuu rí niʼthí ikhaa: ‹Dios niʼni mambumuʼ xúgíʼ gamiéjunʼ rí nigúʼdoo ga̱jma̱a̱ bi̱ kuwa náa goʼwóo anu̱ʼ›”. Bi̱ ragajmi̱i̱n nixná mbiʼyuu Efraín, “numuu rí niʼthí ikhaa: ‹Dios niʼni magúʼdoo náa ku̱ba̱ʼ rí migíná›” (Gén. 41:51, 52). Jeobá niʼni tsajkurámáánʼ José numuu rí tániñuʼ Jeobá, ikhaa niʼni káwíin israelitas gajmiún egipcios náa ewiʼ. Ikhaa ndiʼyoo májánʼ rí xúgíʼ rígi̱ ninindxu̱u̱ numuu rí Jeobá niʼni tsajkurámáánʼ (Gén. 45:5-9).

12. Ndiéjunʼ nimbáyúu Jesús mu mawiji̱ jmbu rá.

¹² Jesucristo ma̱ngaa niʼnimbo̱o̱ náa Dios maski ajndu nigiʼdoo mbaʼa tsáʼkhá. Nda̱wa̱á Jeobá niʼni tsajkurámááʼ. Ndiéjunʼ nimbáyúu Jesús mu mawiji̱ jmbu rá. Náa Ajngá rawunʼ Dios nariʼña̱a̱: “Ga̱jma̱a̱ gagi rí nigiʼdoo niʼngo̱o̱ náa ixi̱, ga̱jma̱a̱ tatiyuʼ” (Heb. 12:2). Jesús nixtáa gagi índo̱ niʼni kaʼwi̱i̱ mbiʼyuu Dios. Jeobá nindoo kaʼyoo Jesús ga̱jma̱a̱ niʼni tsajkurámáánʼ wéñuʼ. Náa Biblia naʼthí rí Jesús “nigi̱ʼi̱ náa ñawun mújúnʼ náa trono ndrígóo Dios”. Ma̱ngaa naʼthí rí “Dios niʼni mba̱a̱ mu magiʼdoo mbá ñajunʼ rí  gíʼdoo wéñuʼ numuu” ga̱jma̱a̱ rí “nixnúu mbiʼyu dí ragiʼdoo nimbáa” (Filip. 2:9).

13, 14. Xú káʼnii eʼyoo Jeobá rí nuʼni mu mbuʼyamajkuíí rá.

¹³ Nduʼyáá gajkhun rí Jeobá ndaʼyoo rí gíʼdoo wéñuʼ numuu xúgíʼ rí nuʼni mu mbuʼyamajkuíí. Ikhaa nakro̱ʼo̱o̱ índo̱ namíñulú o nundxaʼwamíjná rí xájmáanʼ gúʼni mbá ñajunʼ. Ma̱ngaa nagáwiinʼ a̱jkiu̱u̱n índo̱ naxmiéjunlú ga̱jma̱a̱ numuu ñajunʼ o numuu rí tséʼyáá xú káʼnii gúxnún rí nda̱ñúnʼ bi̱ kuwa náa guʼwúlú. Ga̱jma̱a̱ ikhaa nakro̱ʼo̱o̱ á mu mbá ga̱jmá o nandii tsíniñulú muʼni ñajuunʼ xóo nákha ginii. Nduʼyáá májánʼ rí Jeobá ndaʼyoo rí gíʼdoo numuu rí tséniʼñáaʼ maski ajndu nuraʼníí xkujndu (atraxnuu Hebreos 6:10, 11). *

¹⁴ Garmáʼáan a̱jkiu̱lú rí Jeobá nindxu̱u̱ “bi̱ naʼdxawun índo̱ nugríga̱a̱”. Nduʼyáá gajkhun rí ikhaa naʼdxun índo̱ nuʼtákáñii (Sal. 65:2). “Anu̱lú bi̱ nagáwiinʼ a̱jkiu̱u̱n ga̱jma̱a̱ Dios bi̱ naʼni̱i̱ a̱jkiu̱lú” maxnúlúʼ rí ndayúlú mu maguajún jmbu. Mbáa majmiuu a̱ngiu̱lú mu mumbayúlú (2 Cor. 1:3). Jeobá nadxuu índo̱ nagáwíínʼ a̱jkiu̱lú ga̱jma̱a̱ numbáñuun eʼwíínʼ. Náa Biblia naʼthí: “Bi̱ nambáyúu xa̱bu̱ gínáa naxnátiʼñuu Jeobá, ga̱jma̱a̱ Ikhaa maʼni numa̱a̱ rí naʼni” (Prov. 19:17; Mat. 6:3, 4). Ikha jngó índo̱ nuxná rí kuaʼdáá ga̱jma̱a̱ numbañún a̱ngiu̱lú, Jeobá ndaʼyoo xóo mbá rí nuxnatíʼñáá ga̱jma̱a̱ nakudaminaʼ rí maʼni numaaʼ.

15. Ndiéjunʼ rí xtaʼti̱i̱n matrígú ikháánʼ rá. (Atayáá timbá xtiʼkhu.)

¹⁵ Bi̱ kaxtaʼwíin guáʼthi̱i̱n mundrígú ‹corona rí jmbu›, rí maxnún Jesús (2 Tim. 4:7, 8) Mú á mu ikháánʼ i̱mba̱ rí xtaʼti̱i̱n tsíyoo gáʼthi rí ikháánʼ na̱nguá xtaʼdáá numaʼ. Mbaʼin xa̱bi̱i̱ Jesús bi̱ nindxu̱ún ‹eʼwíínʼ mugu̱› guáʼthi̱i̱n makuwá kámuu náa tsu̱du̱u̱ Ku̱ba̱ʼ mitsaan, náa “makuwá tsímáá wéñuʼ” (Juan 10:16; Sal. 37:11).

16. Xú káʼnii exnúlú tsiakii ajngáa rí na̱ʼkha̱ náa 1 Juan 3:19, 20 rá.

¹⁶ Mbáa nguáná nundxa̱ʼwa̱míjna̱ rí tséʼni wéñuʼ ñajunʼ Jeobá. Mbáa nuraximíjna̱ á mu Jeobá nadxuu ga̱jma̱a̱ rí nuʼnilú. Mbáa asndu nundxa̱ʼwa̱míjna̱ dí rakáʼyulú rí maguma tsajkurámáánʼ. Mú ragíʼmaa mambumulú “rí Dios itháan mba̱a̱ ki xóo a̱jkiu̱lú ga̱jma̱a̱ naninuʼ xúgíʼ” (atraxnuu 1 Juan 3:19, 20). * Á mu nuʼni ñajunʼ Jeobá numuu rí kuaʼdáá fe náa ikhaa ga̱jma̱a̱ nandulúʼ kuʼyáá, nduʼyáá gajkhun rí ikhaa maʼni tsajkurámáánʼ maski ajndu nundxa̱ʼwa̱míjna̱ dí ragíʼdoo numuu rí nuʼni (Mar. 12:41-44).

17. Xú káʼnii eguma tsajkurámáánʼ rí mbiʼi xúgi̱ ráʼ.

¹⁷ Jeobá ma̱ngaa naʼni tsajkurámiinʼ xa̱bi̱i̱ rí mbiʼi xúgi̱, maski ajndu kuwáanʼ náa iwáá mbiʼi xkawiʼ ndrígóo Satanás. Xú káʼnii eʼni xá. Jeobá naxnúlú wéñuʼ  ganitsu rí na̱ʼkha̱ náa ikhaa ga̱jma̱a̱ rí tsímáá. Ma̱ngaa naʼni tsajkurámáánʼ índo̱ naxniúlú a̱ngiu̱lú bi̱ nandún kuyulúʼ náa xúgíʼ numbaaʼ xóo nikudaminaʼ Jesús (Is. 54:13; Mar. 10:29, 30). Dios ma̱ngaa naʼni tsajkurámiinʼ bi̱ nunimi̱jna̱ mbuyááʼ, naʼni rí makuwá gagi ga̱jma̱a̱ tsímáá (Filip. 4:4-7).

18, 19. Xú káʼnii ekumulú bi̱ ni̱ndxu̱lú xa̱bi̱i̱ Jeobá índo̱ nundxa̱ʼwa̱míjna̱ xú káʼnii eʼni tsajkurámáánʼ ikhaa xá.

¹⁸ Anu̱lú Jeobá ra̱ʼkhá tháán májánʼ niʼni tsajkurámiinʼ xa̱bi̱i̱ náa xúgíʼ numbaaʼ. Mbá xkri̱da, mbáa ndxájulú náa Alemania bi̱ mbiʼyuu Bianca naʼthí: “Asndu na̱nguá e̱yo̱o̱ xóo maxna̱a̱ núma̱aʼ Jeobá ga̱jma̱a̱ numuu xúgíʼ rí nimbáyuʼ náa xkujndu rí gúʼdoo ga̱jma̱a̱ rí nixtáa ga̱jma̱á ni̱ndxu̱ʼ xúgíʼ mbiʼi. Náa numbaaʼ nda̱a̱ rí májánʼ ga̱jma̱a̱ migamíi. Mú, tsemiñuʼ rí xtáá náa ñawúunʼ Jeobá numuu rí xtáá rani̱ ñajunʼ. Mámbá rí naniminaʼ mani ñajunʼ, ikhaa ra̱ʼkhá tháán eʼni tsajkurámúúʼ”.

¹⁹ Gundxa̱ʼwámi̱jna̱ náa ndxájulú Paula, bi̱ xtáa náa Canadá ga̱jma̱a̱ gíʼdoo 70 tsiguʼ. Ikhaa na̱nguá xóo maʼni wéñuʼ numuu rí gíʼdoo mbá nandii mbiiʼ náa itsu̱ tsu̱du̱u̱. Tsíyoo maʼbañiminaʼ wéñuʼ mú naʼthí dí rúʼko̱ tsíyoo gáʼthi rí xándoo maʼtáraʼa. Ikhaa naʼthí: “Nataráʼa ga̱jma̱a̱ teléfono ga̱jma̱a̱ náa nda̱ñu̱u̱n xa̱bu̱. Mu maxnamínaʼ tsiakii, gúʼdoo mbá cuaderno náa naniraʼmáʼ textos rí na̱ʼkha̱ náa Biblia ga̱jma̱a̱ ku̱ma̱ rí na̱ʼkha̱ náa i̱yi̱i̱ʼ ndrígúlú, rí natangu̱u̱n nda̱yo̱o̱ nguáná. Naxna mbíʼyuu ‹Cuaderno rí naʼni maxtáá›. Xakuwáanʼ gíná mba̱yu̱ʼ á mu nundxa̱ʼwa̱míjna̱ rí naʼthí maʼni Jeobá. Ikhaa xtáa xawii má xúʼko̱ mu mambáyulúʼ, tséʼniuu xóo kuwáanʼ”. Mbáa na̱nguá kuwáanʼ xóo Bianca ga̱jma̱a̱ Paula. Mú mbáa nundxa̱ʼwa̱míjna̱ mbaʼa rí májánʼ rí Jeobá naxnúlú ga̱jma̱a̱ bi̱ kuwa mijngii náa ikháanʼlu. Xúgiáanʼ bi̱ ni̱ndxu̱lú xa̱bi̱i̱ Dios naxnúlú wéñuʼ tsiakii rí mundxaʼwamíjna̱ rí xú káʼnii eʼni tsajkurámáánʼ xúgi̱ ga̱jma̱a̱ xú káʼnii gáʼni nda̱wa̱á.

20. Ndiéjunʼ gundrígú á mu nuʼni xúgíʼ rí naʼngulú mu muʼni ñajunʼ Jeobá rá.

²⁰ Xámbumulú nditháan rí Jeobá naʼni tsajkurámáánʼ wéñuʼ índo̱ nuʼtákáñii ga̱jma̱a̱ xúgíʼ a̱jkiu̱lú. Nduʼyáá gajkhun rí mundrígú “rí nikudaminaʼ rí nimbánuu má” á mu nuʼni “rí nandoo Dios” (Heb. 10:35, 36). Ikha jngó guʼni gujkhuʼ fe ndrígúlú ga̱jma̱a̱ guʼni xúgíʼ rí naʼngulú mu muʼni ñajunʼ Jeobá. Á mu nuʼni xúʼko̱, mbuʼyáá gajkhun rí ikhaa maʼni tsajkurámáánʼ (atraxnuu Colosenses 3:23, 24). *